តើអ្នកស្គាល់ជីដូនរបស់អ្នកច្បាស់ប៉ុនណាដែរ ? ពួកគាត់អាចរស់នៅឆ្ងាយ ឬរស់នៅជាមួយគ្រួសាររបស់អ្នក ប៉ុន្តែពួកគាត់ម្នាក់ៗដើរតួនាទីពិសេសមួយនៅក្នុងជីវិតរបស់អ្នក ។ ដំណើររឿងរបស់ពួកគាត់នឹងជួយអ្នកឲ្យយល់អំពីជីដូនរបស់អ្នក គ្រួសាររបស់អ្នក និងខ្លួនអ្នកបានកាន់តែប្រសើរឡើង ។
ឥឡូវនេះជាពេលវេលាដ៏អស្ចារ្យដើម្បីចាប់ផ្តើម ជាពិសេសប្រសិនបើជីដូនរបស់អ្នកកំពុងនៅរស់នៅឡើយ ។ របៀបដ៏ល្អបំផុតដើម្បីស្វែងយល់អំពីពួកគាត់ គឺសួរសំណួរពួកគាត់ ។ កត់ត្រា ឬសរសេរចម្លើយរបស់ពួកគាត់ ដើម្បីរក្សាកម្រងអនុស្សាវរីយ៍អំពីពួកគាត់ និងបង្កើតទំនាក់ទំនងជាមួយពួកគាត់ ទោះបីជាក្រោយមកពួកគាត់បានទទួលមរណភាពទៅហើយក៏ដោយ ។ ប្រសិនបើពួកគាត់បានទទួលមរណភាពហើយ សូមឲ្យគ្រួសាររបស់អ្នកចែកចាយនូវអនុស្សាវរីយ៍ទាំងឡាយដែលពួកគេចងចាំអំពីជីដូនរបស់អ្នក ជាមួយនឹងអ្នក ។
សំណួរដើម្បីសួរជីដូនរបស់អ្នក
តើសំណួរអ្វីខ្លះដែលអ្នកអាចសួរជីដូនរបស់អ្នកអំពីអតីតកាល ? សូមប្រើសំណួរទាំងនេះដើម្បីចាប់ផ្ដើមការសន្ទនាជាមួយជីដូនរបស់អ្នក ហើយស្វែងយល់បន្ថែមអំពីគាត់ ។
- តើលោកយាយមានអនុស្សាវរីយ៍សប្បាយៗបំផុតអ្វីខ្លះ ?
- តើលោកយាយមានការសោកស្តាយអ្វីខ្លះដែលលោកយាយចង់ចែកចាយ ?
- តើលោកយាយកើតនៅពេលណា និងកន្លែងណា ?
- តើឪពុកម្តាយរបស់លោកយាយបានជ្រើសរើសឈ្មោះរបស់លោកយាយដោយរបៀបណា ? តើលោកយាយមានឈ្មោះហៅក្រៅដែរឬទេ ?
- តើលោកយាយមានកុមារភាពបែបណាដែរ ?
- តើគ្រួសាររបស់លោកយាយធ្លាប់ធ្វើអ្វីខ្លះជាមួយគ្នាកាលពីលោកយាយនៅក្មេង ?
- តើលោកយាយបានរៀនឯណា ?
- តើមុខវិជ្ជាអ្វីខ្លះដែលលោកយាយចូលចិត្ត ហើយតើគ្រូបង្រៀនម្នាក់ណាដែលលោកយាយចូលចិត្ត ?
- តើផ្ទះកាលពីកុមារភាពរបស់លោកយាយមានលក្ខណៈដូចម្តេច ? តើលោកយាយផ្លាស់ប្តូរទីលំនៅច្រើនទេ ?
- តើកាលពីនៅក្មេង លោកយាយបានធ្វើអ្វីខ្លះដើម្បីមានភាពរីករាយ ?
- តើលោកយាយធ្លាប់ទទួលបានការដាក់ការពិន័យទេ ?
- តើលោកយាយបានរៀនអ្វីខ្លះពីម្តាយរបស់លោកយាយ ឬស្ត្រីផ្សេងទៀតនៅក្នុងគ្រួសាររបស់លោកយាយ ?
- តើលោកយាយចងចាំអ្វីខ្លះអំពីឪពុកម្តាយ ជីដូនជីតា និងបងប្អូនរបស់លោកយាយ ? តើពួកគាត់មានឈ្មោះអ្វីខ្លះ ?
- តើព្រឹត្តិការណ៍អ្វីខ្លះក្នុងប្រវត្តិសាស្រ្តពិភពលោកដែលលោកយាយចងចាំជាពិសេស ហើយតើវាបានផ្លាស់ប្តូរជីវិតរបស់លោកយាយយ៉ាងដូចម្តេច ? ( ប្រហែលអាចលើកឡើងអំពីសង្គ្រាមធំៗ ជំងឺរាតត្បាត កូវីដ ឬព្រឹត្តិការណ៍ផ្សេងទៀត ) ។
- តើលោកយាយបានជួបលោកតាដោយរបៀបណា ហើយតើគាត់សុំលោកយាយរៀបការដោយរបៀបណា ?
- តើទំនាក់ទំនងរបស់លោកយាយជាមួយលោកតាយ៉ាងណាដែរ ហើយហេតុអ្វីបានជាលោកយាយជ្រើសរើសយកគាត់ ?
- តើលោកយាយអាចប្រាប់ចៅអំពីពិធីរៀបការរបស់លោកយាយបានឬទេ ? តើលោកយាយបានរៀបការនៅពេលណា និងកន្លែងណា ?
- តើមានអ្វីខ្លះបានផ្លាស់ប្តូរក្នុងជីវិតរបស់លោកយាយ ? តើការបង្កើតថ្មីអ្វីខ្លះនៅក្នុងអំឡុងជីវិតរបស់លោកយាយដែលបានធ្វើឲ្យមានភាពខុសគ្នាខ្លាំងចំពោះលោកយាយ ?
- តើតួនាទីក្នុងនាមជាស្ត្រីបានផ្លាស់ប្តូរយ៉ាងណាខ្លះនៅពេញមួយជីវិតរបស់លោកយាយ ?
- តើលោកយាយបានរស់នៅទីណាខ្លះ ? តើផ្ទះដំបូងរបស់លោកយាយមានលក្ខណៈដូចម្តេច ?
- តើជីវិតរបស់យាយផ្លាស់ប្តូរយ៉ាងដូចម្តេច នៅពេលលោកយាយមានកូន ?
- តើលោកយាយមានអារម្មណ៍យ៉ាងណាដែរ ពេលមានផ្ទៃពោះ ?
- តើអនុស្សាវរីយ៍អ្វីខ្លះដែលលោកយាយចូលចិត្ដជាងគេ ជាមួយកូនៗរបស់លោកយាយ ?
- តើលោកយាយបានបម្រើការងារឲ្យនរណាខ្លះ ហើយតើលោកយាយធ្លាប់ធ្វើការងារអ្វីខ្លះ ?
- តើជំនឿ ឬសាសនាបានដើរតួនាទីបែបណាក្នុងជីវិតរបស់លោកយាយ ?
- តើពេលវេលាដ៏លំបាកបំផុតក្នុងជីវិតរបស់លោកយាយគឺពេលណាខ្លះ ហើយតើលោកយាយឆ្លងកាត់ពេលវេលាលំបាកទាំងនោះបានដោយរបៀបណា ?
- តើអនុស្សាវរីយ៍ថ្ងៃឈប់សម្រាក និងទំនៀមទម្លាប់អ្វីខ្លះដែលលោកយាយចូលចិត្តជាងគេ ?
- តើដំណើរកម្សាន្ត ឬវិស្សមកាលណាខ្លះដែលលោកយាយចងចាំ ហើយតើមួយណាដែលលោកយាយចូលចិត្តជាងគេ ?
- តើមានអ្វីអំពីជីវិតរបស់លោកយាយដែលនឹងធ្វើឲ្យខ្ញុំភ្ញាក់ផ្អើល ?
- តើលោកយាយសង្ឃឹមចង់បានអ្វីខ្លះសម្រាប់កូនៗ និងចៅៗរបស់លោកយាយ ? តើលោកយាយមានដំបូន្មានអ្វីសម្រាប់ពួកចៅដែរឬទេ ?
- តើលោកយាយបានចូលរួមក្នុងសកម្មភាព ឬអង្គការប្រភេទណាខ្លះ ដូចជាកីឡា ការបម្រើ តន្ត្រី សិល្បៈ និងផ្សេងៗទៀត ?
- តើលោកយាយស្លៀកសម្លៀកបំពាក់ប្រភេទណា ? តើលោកយាយចាប់អារម្មណ៍លើម៉ូដទាន់សម័យទេ ?
- តើការបម្រើបានជះឥទ្ធិពលដល់ជីវិតរបស់លោកយាយយ៉ាងដូចម្តេច ទាំងក្នុងនាមជាអ្នកផ្តល់ការបម្រើ ឬអ្នកដែលទទួលការបម្រើ ?
សំណួរសម្រាប់កុមារដើម្បីសួរលោកយាយ
ការសួរសំណួរអាចជួយកុមារឲ្យស្គាល់លោកតាលោកយាយរបស់ពួកគេ និងបង្កើតអនុស្សាវរីយ៍ដ៏មានអត្ថន័យ ។ ការស្វែងរកអ្វីដែលមានស្រដៀងគ្នាអាចគួរឲ្យចាប់អារម្មណ៍ជាពិសេសសម្រាប់កុមារតូចៗ និងកុមារធំៗ ។
- តើអ្នកណាខ្លះជាមិត្តរបស់លោកយាយ ហើយតើលោកយាយចូលចិត្តធ្វើអ្វីជាមួយពួកគាត់ ?
- តើលោកយាយចង់ធ្វើការងារអ្វីពេលលោកយាយធំឡើង ? តើលោកយាយបានធ្វើការងារ ដែលលោកយាយចង់ធ្វើទេ ?
- តើម្ដាយ ឬឪពុករបស់ចៅ ពួកគាត់ជាក្មេងយ៉ាងម៉េចដែរ ពេលពួកគាត់នៅក្មេង ?
- តើលោកយាយមានប្រដាប់ប្រដាលេងដែលលោកយាយចូលចិត្តទេ កាលលោកយាយនៅក្មេង ?
- តើអ្វីខ្លះទៅដែលលោកយាយចូលចិត្ត ( ពណ៌ សៀវភៅ សត្វ និងផ្សេងៗទៀត ) ?
- តើលោកយាយធ្វើអ្វីសម្រាប់ការកម្សាន្ត ?
- តើជំនាញអ្វីខ្លះដែលលោកយាយអាចបង្រៀនចៅ ?
តើអ្នកសម្ភាសលោកយាយរបស់អ្នកដោយរបៀបណា ?
ការកត់ត្រាដំណើររឿងរបស់លោកយាយរបស់អ្នកអាចរក្សាអនុស្សាវរីយ៍របស់គាត់ឲ្យនៅមានភាពរស់រវើក ទោះបីជាគាត់បានទទួលមរណភាពទៅហើយក៏ដោយ—សម្រាប់អ្នក និងគ្រួសាររបស់អ្នក ។ ចាប់ផ្តើមដោយរៀបចំបញ្ជីសំណួរដែលអ្នកចង់សួរ ( ដូចជាសំណួរខាងលើ ) ។ ខណៈពេលដែលអ្នកកំពុងនិយាយជាមួយលោកយាយរបស់អ្នក សូមរកវិធីមួយដើម្បីចងចាំអ្វីដែលគាត់មានប្រសាសន៍ ។ ទាំងនេះគឺជាគំនិតយោបល់មួយចំនួន ។
- ថតវីដេអូ ឬសំឡេងនៅលើទូរសព្ទរបស់អ្នក ដើម្បីផ្ដិតយកដំណើររឿង និងអនុស្សាវរីយ៍សំខាន់ៗ ។
- សូមសរសេរដំណើររឿងរបស់ជីដូនអ្នកទុក ពេលអ្នកបានស្ដាប់អំពីដំណើររឿងទាំងនោះ ។
- ប្រើកម្មវិធី កម្រងអនុស្សាវរីយ៍កម្មវិធីស្រាវជ្រាវក្រុមគ្រួសារ ដោយឥតគិតថ្លៃ ដើម្បីបង្កើត និងរក្សាទុកការថតសំឡេងនៅលើទូរសព្ទឆ្លាតវៃ ។ អ្នកអាចចែកចាយកម្រងអនុស្សាវរីយ៍ដែលអ្នកបន្ថែមជាមួយគ្រួសារ ប៉ុន្តែអ្នកក៏អាច ធ្វើឲ្យកម្រងអនុស្សាវរីយ៍ជាឯកជននៅលើគេហទំព័រ FamilySearch.org ផងដែរ។
នៅពេលដែលអ្នកបានកត់ត្រាដំណើររឿងរបស់លោកយាយអ្នកហើយ សូមរក្សាវាឲ្យមានសុវត្ថិភាព ។ ការបង្កើត និងការរក្សាទុកច្បាប់ចម្លងជាឌីជីថលនឹងការពារពេលវេលាដ៏មានតម្លៃទាំងនេះពីការបាត់បង់ដោយចៃដន្យ គ្រោះធម្មជាតិ ឬការផ្លាស់ប្តូរខាងបច្ចេកវិទ្យា ។
អ្នកអាចរក្សាទុកកំណត់ត្រា ឬការថតរបស់អ្នកនៅក្នុងអង្គចងចាំcloud ហើយអ្នកក៏អាចរក្សាទុកវានៅក្នុង កម្រងអនុស្សាវរីយ៍កម្មវិធីស្រាវជ្រាវក្រុមគ្រួសារ ផងដែរ ។ កម្មវិធី កម្រងអនុស្សាវរីយ៍ ធ្វើឲ្យវាមានភាពងាយស្រួលក្នុងការរក្សាទុកកម្រងអនុស្សាវរីយ៍ដែលសំខាន់បំផុតសម្រាប់អ្នក និងគ្រួសាររបស់អ្នក ហើយចែកចាយវាជាមួយអ្នកដទៃ ។
អត្ថបទដែលទាក់ទង
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
