យើងទាំងអស់គ្នាធ្លាប់បានឮនូវរឿងកំប្លែងអំពីការតាំងចិត្តសម្រាប់ឆ្នាំថ្មី ដូចជារឿងមួយនេះ ៖ « ឆ្នាំមុន ខ្ញុំបានទុកការតាំងចិត្តសម្រាប់ឆ្នាំថ្មីរបស់ខ្ញុំទាំងអស់តាំងនៅលើធ្នើរចោល » ។ ដើមឆ្នាំថ្មីគឺជាពេលវេលាដ៏ល្អមួយដើម្បីនឹកគិតពីឆ្នាំចាស់ កាលអ្នកដាក់ផែនការសម្រាប់ឆ្នាំខាងមុខ ។
នៅក្នុងអត្ថបទនេះ អ្នកអាចរកឃើញនូវសំណួរដើម្បីជួយអ្នកនឹកគិតពីឆ្នាំចាស់ និងសំណួរដើម្បីផ្ដល់ដល់អ្នកនូវគំនិតសម្រាប់គោលដៅនាឆ្នាំក្រោយ ក៏ដូចជាគន្លឹះសម្រាប់ការដាក់ និងការសម្រេចបាននូវការតាំងចិត្តសម្រាប់ឆ្នាំថ្មីរបស់អ្នកផងដែរ ។
ការនឹកគិតសម្រាប់ឆ្នាំថ្មី ៖ ការពិនិត្យមើលឆ្នាំចាស់ដើម្បីនាំយកភាពរីកចម្រើនមកដល់ឆ្នាំថ្មី
របៀបមួយដើម្បីដាក់គោលដៅសម្រាប់ឆ្នាំថ្មីដែលនឹងមកដល់គឺការនឹកគិតអំពីឆ្នាំចាស់ ។ ចំណាយពេលមើលរូបថត ការចុះផ្សាយលើប្រព័ន្ធផ្សព្វផ្សាយសង្គម សំបុត្រ សារ និងការកត់ត្រាក្នុងសៀវភៅកំណត់ហេតុរបស់អ្នកដើម្បីពិនិត្យមើលឆ្នាំចាស់ឡើងវិញ ។
នៅពេលអ្នកពិនិត្យមើលឆ្នាំចាស់ សូមព្រាងនូវសំណួរបើកនានាជាមួយសមាជិកគ្រួសាររបស់អ្នក ហើយសរសេរនូវអ្វីដែលអ្នកចង់កែលម្អ ។ នេះគឺជាសំណួរមួយចំនួនដើម្បីជួយអ្នកនឹកគិតអំពីជ័យជម្នះ និងបញ្ហាប្រឈមនៅឆ្នាំចាស់ ។ អ្នកក៏អាចព្រាងសំណួរមួយចំនួនទៀតជាមួយសមាជិកគ្រួសាររបស់អ្នកបានផងដែរ !
សំណួរសម្រាប់មជ្ឈិមវ័យ
- តើសៀវភៅ ភាពយន្ដ កម្មវិធីទូរទស្សន៍ ឬចម្រៀងមួយណា ឬអ្វីផ្សេងទៀតណាខ្លះដែលអ្នកចូលចិត្ដជាងគេនៅក្នុងឆ្នាំនេះ ?
- តើទីណាគឺជាកន្លែងដ៏អស្ចារ្យបំផុតដែលអ្នកបានទៅលេងនៅឆ្នាំនេះ ?
- តើអាហារមួយពេលណាដែលអ្នកបានទទួលទានហើយចូលចិត្ដជាងគេនៅឆ្នាំនេះ ?
- តើពេលណាជាពេលដែលអ្នកចូលចិត្ដជាងគេនៅក្នុងឆ្នាំនេះ ?
- តើដំបូន្មានល្អបំផុតដែលអ្នកមាននៅក្នុងឆ្នាំនេះគឺជាអ្វី ?
- តើអ្វីគឺជាបញ្ហាធំបំផុតដែលអ្នកបានដោះស្រាយនៅឆ្នាំនេះ ?
- តើសមិទ្ធផលមួយណាដែលអ្នកមានមោទនភាពជាងគេនៅឆ្នាំនេះ ?
- តើអ្នកបានរៀនជំនាញ និងមេរៀនជីវិតអ្វីខ្លះនៅឆ្នាំនេះ ?
- តើអ្វីទៅជាផ្នែកដ៏ពិបាកបំផុតក្នុងឆ្នាំនេះ ?
- តើអ្នកនឹងប្រើពាក្យបីពាក្យដើម្បីពិពណ៌នាឆ្នាំនេះយ៉ាងដូចម្ដេច ?
- តើអ្នកបានបង្កើតមិត្ដភាពថ្មីអ្វីខ្លះ ?
- តើអ្វីដែលបានផ្លាស់ប្ដូរនៅក្នុងជីវិតរបស់អ្នកនៅឆ្នាំនេះ ?
- តើអ្នកមានអំណរគុណចំពោះអ្វីខ្លះក្នុងពេលឥឡូវនេះ ?
សំណួរសម្រាប់ក្មេងជំទង់
- តើបង្អែមអ្វីដែលឆ្ងាញ់បំផុតដែលអ្នកបានទទួលទាននៅឆ្នាំនេះ ?
- តើសៀវភៅអ្វីដែលអ្នកបានអាន ហើយចូលចិត្ដជាងគេនៅឆ្នាំនេះ ?
- តើភាពយន្ដអ្វីដែលអ្នកបានមើលហើយចូលចិត្ដជាងគេនៅឆ្នាំនេះ ?
- តើកម្មវិធីទូរទស្សន៍អ្វីដែលអ្នកបានមើល ហើយចូលចិត្ដជាងគេនៅឆ្នាំនេះ ?
- តើបទចម្រៀងអ្វីដែលអ្នកចូលចិត្ដជាងគេ ហើយស្ដាប់ច្រើនដងនៅឆ្នាំនេះ ?
- តើរឿងដែលគួរឲ្យអស់សំណើចអ្វីបានកើតឡើងនៅឆ្នាំនេះ ?
- តើអ្វីជាបញ្ហាប្រឈមដ៏ធំបំផុតរបស់អ្នកនៅឆ្នាំនេះ ?
- តើអ្វីជាសមិទ្ធផលដែលអ្នកមានមោទនភាពបំផុតនៅឆ្នាំនេះ ?
- តើអ្វីមួយដែលអ្នកបានរៀននៅសាលានៅឆ្នាំនេះដែលសំខាន់សម្រាប់អ្នក ?
- តើអ្នករំភើបអំពីរឿងអ្វីខ្លះនៅឆ្នាំក្រោយនេះ ?
សំណួរសម្រាប់កុមារ
- តើអ្នកចូលចិត្តមុខវិជ្ជាអ្វីជាងគេនៅសាលា ?
- តើមុខវិជ្ជាណាពិបាកជាងគេ ?
- តើអ្នកចូលចិត្ដរៀនអ្វីជាងគេនៅសាលានៅឆ្នាំនេះ ?
- តើអ្នកចង់ធ្វើអ្វីពេលអ្នកធំឡើង ?
- តើអ្វីដែលបានកើតឡើងនៅឆ្នាំនេះដែលធ្វើឲ្យអ្នកសប្បាយចិត្ដ ?
- តើអ្នកចូលចិត្តប្រដាប់លេងអ្វីជាងគេនៅឆ្នាំនេះ ?
- តើអ្នកទន្ទឹងរង់ចាំធ្វើអ្វីនៅឆ្នាំក្រោយ ?
- តើអ្នកចង់រៀនអ្វីនៅឆ្នាំក្រោយ ?
- តើអ្នកអាចធ្វើឲ្យឆ្នាំថ្មីនេះ ជាឆ្នាំដ៏អស្ចារ្យដោយរបៀបណា ?
សំណួរដើម្បីបំផុសការតាំងចិត្ដសម្រាប់ឆ្នាំថ្មី
ការដាក់គោលដៅនៅក្នុងឆ្នាំថ្មីអាចមានអារម្មណ៍លើសលប់ ។ តើចាប់ផ្តើមពីកន្លែងណា ? ទាំងនេះគឺជាសំណួរមួយចំនួនដើម្បីជួយបំផុសគំនិត ។
គោលដៅខាងហិរញ្ញវត្ថុ
- តើអ្នកចង់ដាក់គោលដៅផែនការហរិញ្ញវត្ថុប្រចាំខែនៅឆ្នាំនេះដែរឬទេ ?
- តើអ្នកនឹងដាក់ផែនការសន្សំសម្រាប់ការចូលនិវត្ដន៍នៅឆ្នាំនេះដោយរបៀបណា ?
- តើអ្នកនឹងគ្រប់គ្រងថវិការបស់អ្នកនៅឆ្នាំនេះឲ្យបានប្រសើរដោយរបៀបណា ?
- តើការចំណាយរយៈពេលវែងអ្វីខ្លះដែលអ្នកចង់សន្សំទុកនៅឆ្នាំនេះ ?
- តើអ្នកមានគោលដៅសន្សំលុយចំនួនប៉ុន្មានជារៀងរាល់ខែ ?
គោលដៅខាងសុខភាព
- តើអ្នកមានបញ្ហាសុខភាពអ្វីដែរឬទេ ?
- តើអ្នកអាចធ្វើអ្វីខ្លះដើម្បីធ្វើឲ្យសុខភាពអ្នកបានប្រសើរឡើង ?
- តើអ្នកនឹងគ្រប់គ្រងភាពតានតឹងរបស់អ្នកយ៉ាងដូចម្ដេច ?
- តើអ្នកនឹងការពារ ហើយពង្រឹងសុខភាពខាងរាងកាយ ខាងផ្លូវចិត្ដ ខាងសតិអារម្មណ៍ ខាងសង្គម និងខាងវិញ្ញាណរបស់អ្នកដោយរបៀបណា ?
- តើអ្នកមានគោលដៅធ្វើលំហាត់ប្រាណដែរឬទេ ?
- តើរបៀបណាខ្លះដែលអ្នកអាចមានភាពសកម្មជាងមុននៅក្នុងជីវិតប្រចាំថ្ងៃរបស់អ្នក ?
- តើអ្នកចង់រៀបផែនការសម្រាប់ការដាក់ផែនការម្ហូបអាហារ ឬការរៀបចំម្ហូបអាហារដែរឬទេ ?
- តើអ្នកនឹងទទួលទានផ្លែឈើ និងបន្លែបន្ថែមទៀតដោយរបៀបណា ?
- តើអ្នកនឹងផឹកទឹកច្រើនជាងមុនដោយរបៀបណា ?
- តើអ្នកចង់បង្កើន ឬធ្វើឲ្យជំនាញចម្អិនម្ហូបរបស់អ្នកកាន់តែប្រសើរជាងមុនដែរឬទេ ?
គោលដៅខាងគេហដ្ឋាន
- តើអ្នកចង់ដាក់គោលដៅដើម្បីរៀបចំគ្រែគេងរបស់អ្នកជារៀងរាល់ថ្ងៃដែរឬទេ ?
- តើអ្នកអាចរៀបចំទុកដាក់ផ្ទះរបស់អ្នកឲ្យបានស្អាតជាងមុនដោយរបៀបណា ?
- តើភាពរាយប៉ាយ ឬសកម្មភាពមិនចាំបាច់ណាខ្លះដែលអ្នកចង់លុបបំបាត់ ?
- តើអ្នកនឹងគ្រប់គ្រងការសម្អាតនៅក្នុងផ្ទះរបស់អ្នកឲ្យមានប្រសិទ្ធភាពដោយរបៀបណា ?
- តើគម្រោងកែលម្អផ្ទះអ្វីខ្លះដែលអ្នកចង់សម្រេចបាន ?
គោលដៅអភិវឌ្ឍផ្ទាល់ខ្លួន
- តើអ្នកចង់ចាប់ផ្ដើមសរសេរកំណត់ហេតុដែរឬទេ ?
- តើអ្នកចង់អានសៀវភៅប៉ុន្មានក្បាល ?
- តើអ្នកនឹងចំណាយពេលថែមទៀតជាមួយធម្មជាតិដោយរបៀបណា ?
- តើអ្នកអាចគ្រប់គ្រងពេលវេលារបស់អ្នកដោយឈ្លាសវៃជាងមុនដោយរបៀបណា ?
- តើអ្នកចង់រៀនអ្វីថ្មីនៅឆ្នាំនេះ ?
- តើអ្នកនឹងស្ម័គ្រចិត្ដ ឬរួមចំណែកផ្ដល់ឲ្យសហគមន៍របស់អ្នកវិញដោយរបៀបណា ?
- តើមានចរិតលក្ខណៈដែលអ្នកចង់អភិវឌ្ឍនៅក្នុងខ្លួនរបស់អ្នកផ្ទាល់ដែរឬទេ ?
- តើអ្នកមានបញ្ជីជំនាញ និងចំណង់ចំណូលចិត្ដដែលអ្នកចង់អភិវឌ្ឍដែរឬទេ ?
- តើអ្នកមានគោលដៅអាជីពអ្វីខ្លះ ? តើអ្នកត្រូវធ្វើអ្វីខ្លះដើម្បីសម្រេចគោលដៅទាំងនោះបាន ?
- តើមានអ្វីខ្លះដែលអ្នកចង់បន្ថែម ឬដកចេញពីទម្លាប់ប្រចាំថ្ងៃរបស់អ្នក ?
- តើមានទីកន្លែងណាដែលអ្នកចង់ធ្វើដំណើរទៅដែរឬទេ ? តើអ្នកអាចធ្វើឲ្យការណ៍នោះកើតឡើងដោយរបៀបណា ?
- តើអ្នកចង់កាត់បន្ថយការមើលលើអេក្រង់ ឬកំណត់ពេលវេលាលើការប្រើប្រាស់បណ្ដាញសង្គមរបស់អ្នកដែរឬទេ ?
គោលដៅគ្រួសារ
- តើអ្នកនឹងដាក់អាទិភាពលើការចំណាយពេលល្អៗជាមួយមនុស្សជាទីស្រឡាញ់របស់អ្នកដោយរបៀបណា ?
- តើអ្នកនឹងផ្ដល់អាទិភាពលើការចំណាយពេលជាមួយស្វាមី ឬភរិយារបស់អ្នកដោយរបៀបណា ?
- តើគ្រួសាររបស់អ្នកអាចមានការទំនាក់ទំនងប្រសើរជាងមុនដោយរបៀបណា ?
- តើអ្វីដែលអ្នកចង់បង្រៀនដល់កូនៗរបស់អ្នកនៅឆ្នាំនេះ ?
- តើអ្នកចង់ធ្វើការកែលម្អអ្វីខ្លះនៅក្នុងវប្បធម៌គ្រួសាររបស់អ្នក ?
- តើអ្នកនឹងរក្សាទំនាក់ទំនងជាមួយមិត្ដភក្ដិ និងគ្រួសារដែលរស់នៅឆ្ងាយដោយរបៀបណា ?
- តើសកម្មភាពអ្វីដែលអ្នក និងគ្រួសាររបស់អ្នកអាចចាប់ផ្ដើមចូលរួមជាមួយគ្នា ?
- តើអ្នកអាចចូលរួមកាន់តែច្រើននៅក្នុងការកត់ត្រាពង្សប្រវត្ដិរបស់គ្រួសារអ្នកដោយរបៀបណា ?
គន្លឹះសម្រាប់ការដាក់គោលដៅ
យើងទាំងអស់គ្នាមាននូវភាពខ្លាំង និងភាពខ្សោយផ្សេងៗគ្នា ។ មនុស្សមួយចំនួនពូកែក្នុងការដាក់ និងធ្វើតាមការតាំងចិត្ដ រីឯអ្នកផ្សេងទៀតមានអារម្មណ៍មិនសូវមានទំនុកចិត្ដលើសមត្ថភាពរបស់ពួកគេក្នុងការដាក់ និងធ្វើតាមគោលដៅឡើយ ។ ទាំងនេះគឺជាគន្លឹះមួយចំនួនសម្រាប់ដំណើរការសាមញ្ញក្នុងការបង្កើតគោលដៅ ។
- ប្រើប្រាស់វិធីសាស្ដ្រ SMART ដើម្បីដាក់គោលដៅ ។
- ធ្វើបញ្ជីគោលដៅដ៏សាមញ្ញពី ១ ដល់ ៣ ដែលជាគោលដៅសំខាន់បំផុតសម្រាប់អ្នក ។
- ព្យាយាមបង្កើតគោលដៅរយៈពេលខ្លីសម្រាប់រយៈពេលមួយខែ ឬពីរខែ ឬកំណត់ពេលវេលាពីរដងក្នុងមួយឆ្នាំសម្រាប់ការដាក់គោលដៅ ។
- ចាប់ផ្ដើមពីគោលដៅតូចៗ ។ ដូចដែលលោក ម៉ាទីន លឺស័រ ឃីង ស៊ីញ្ញ័រ បានមានប្រសាសន៍ថា « អ្នកមិនចាំបាច់មើលឃើញកាំជណ្ដើរទាំងអស់ឡើយ គ្រាន់តែឡើងម្ដងមួយកាំទៅបានហើយ » ។
- ខណៈពេលដែលអ្នកដាក់គោលដៅរបស់អ្នក សូមសួរខ្លួនឯងនូវសំណួរទាំងនេះអំពីគោលដៅនីមួយៗ ។ វាអាចជួយអ្នកសម្រេចចិត្តថាតើគោលដៅនោះគឺជាអ្វីដែលពិតជាសំខាន់សម្រាប់អ្នកឬអត់ ។
- តើខ្ញុំត្រៀមខ្លួនរួចរាល់ដើម្បីធ្វើការផ្លាស់ប្ដូរហើយឬនៅ ?
- តើគោលដៅនេះត្រូវការជំហានអ្វីខ្លះ ?
- តើគោលដៅនេះនឹងបន្ថែមគុណតម្លៃដល់ជីវិតរបស់ខ្ញុំដោយរបៀបណា ?
- តើជីវិតរបស់ខ្ញុំនឹងទៅជាយ៉ាងណា ប្រសិនបើខ្ញុំធ្វើការផ្លាស់ប្ដូរនេះ ?
ការសម្រេចបាននូវគោលដៅរបស់អ្នក
តើពួកយើងប៉ុន្មាននាក់ដែលចាប់ផ្ដើមឆ្នាំថ្មីជាមួយផែនការល្អៗសម្រាប់គោលដៅរបស់យើង ប៉ុន្ដែមិនដែលបានធ្វើសកម្មភាពតាមផែនការនោះ ដើម្បីសម្រេចបាននូវគោលដៅទាំងនោះឡើយ ? គោលដៅរបស់អ្នកគឺមានតម្លៃ ហើយអ្នកអាចសម្រេចវាបាន ! ទាំងនេះគឺជាគន្លឹះមួយចំនួនសម្រាប់កិច្ចខិតខំឆ្ពោះទៅរកគោលដៅរបស់អ្នក ។
- សាកល្បប្រើកម្មវិធីរៀបចំផែនការប្រចាំថ្ងៃដើម្បីជួយអ្នកតាមដានគោលដៅ និងសកម្មភាពរបស់អ្នក ។
- ត្រូវមានភាពខ្ជាប់ខ្ជួនក្នុងការអភិវឌ្ឍទម្លាប់ថ្មីមួយ ។ ប្រើតារាង ឬបញ្ជីដើម្បីតាមដានការរីកចម្រើនរបស់អ្នក ។
- អបអរជ័យជម្នះតូចៗនៅតាមផ្លូវទៅកាន់ការសម្រេចបាននូវគោលដៅរបស់អ្នក ។ ផ្តល់រង្វាន់ដល់ខ្លួនឯងនៅពេលអ្នកស្ថិតនៅពាក់កណ្ដាលផ្លូវនៃការសម្រេចគោលដៅរបស់អ្នក ។
- សុំឲ្យមនុស្សជាទីស្រឡាញ់ជួយអ្នកក្នុងការតាមដានគោលដៅរបស់អ្នក ។ សម្រេចចិត្តថាអ្វីដែលដំណើរការល្អបំផុតសម្រាប់អ្នកនៅក្នុងស្ថានភាពរបស់អ្នក ហើយបន្តដំណើរទៅមុខទៀត ។
- ដាក់ការរំឭកសម្រាប់ខ្លួនឯងដើម្បីបោះជំហានទៅកាន់គោលដៅរបស់អ្នក និងការរំឭកដើម្បីពិនិត្យមើល និងវាយតម្លៃថាតើអ្នកកំពុងស្ថិតនៅចំណុចណាក្នុងការសម្រេចគោលដៅរបស់អ្នក ។ ពិចារណាកែសម្រួលគោលដៅរបស់អ្នក ឬបង្កើតផែនការថ្មី ប្រសិនបើផែនការដើមរបស់អ្នកហាក់ដូចជាមិនដំណើរការសម្រាប់អ្នក ។
- កុំបោះបង់ឡើយ បើអ្នកសរសេរគោលដៅដដែលៗជារៀងរាល់ឆ្នាំនោះ ។ កត់សម្គាល់ការផ្លាស់ប្តូរដែលអ្នកកំពុងមាន និងអបអរដល់ខ្លួនអ្នកចំពោះការរីកចម្រើនរបស់អ្នកឆ្ពោះទៅរកការសម្រេចគោលដៅ ។
រក្សាទុកកម្រងអនុស្សាវរីយ៍របស់អ្នក
មិនថាអ្នកជ្រើសរើសដើម្បីនឹកគិតពីឆ្នាំចាស់ និងដាក់ការតាំងចិត្ដសម្រាប់ពេលអនាគតតាមរបៀបណានោះទេ សូមប្រាកដថាអ្នកកត់ត្រាចម្លើយរបស់អ្នក ដើម្បីមើលឃើញពីរបៀបដែលកង្វល់ ចម្លើយ និងគោលដៅរបស់អ្នកផ្លាស់ប្ដូរពីមួយឆ្នាំទៅមួយឆ្នាំ ។ អ្នកអាចពិចារណាចាប់ផ្តើមប្រពៃណីនៃការនឹកគិតពីឆ្នាំចាស់ និងការដាក់គោលដៅថ្មីជាមួយគ្រួសាររបស់អ្នកជារៀងរាល់ឆ្នាំ ។
នៅពេលអ្នកចាប់ផ្តើមប្រពៃណីថ្មីនេះ សូមកុំភ្លេចកត់ត្រាចម្លើយចំពោះសំណួរទាំងនេះ មិនថានៅលើក្រដាស ឬតាមយៈបច្ចេកវិទ្យានោះឡើយ ។ វិធីដ៏ល្អដើម្បីរក្សាកម្រងអនុស្សាវរីយ៍ដែលសំខាន់បំផុតរបស់អ្នក និងដើម្បីរក្សាកំណត់ត្រានៃបទពិសោធន៍ ភាពជោគជ័យ និងបញ្ហាប្រឈមរបស់អ្នកគឺការរក្សាវានៅក្នុង កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ ។
តាមលំនាំដើម កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ គឺដាក់ជាសាធារណៈ ដូចនេះអ្នកអាចចែកចាយអនុស្សាវរីយ៍បានយ៉ាងងាយស្រួល ឬអាចឲ្យសាច់ញាតិរកមើលអនុស្សាវរីយ៍ទាំងនោះនៅក្នុងមែកធាងគ្រួសាររួម ។ អ្នកក៏អាចគូសចំណាំកម្រងអនុស្សាវរីយ៍ពិសេសដាក់ជាឯកជន ឬចែកចាយក្នុងក្រុមតូចក៏បានដែរ ។ ទាំងនេះគឺជាអត្ថបទពីរបីដើម្បីជួយអ្នកក្នុងកិច្ចការនេះ ( មានជាភាសាជាក់លាក់មួយចំនួន ) ៖
ទាំងនេះគឺជាគំនិតមួយចំនួនសម្រាប់ការរក្សាសំណួរ និងការនឹកគិតសម្រាប់ឆ្នាំថ្មីរបស់អ្នក ៖
- ធ្វើសៀវភៅកម្រងអនុស្សាវរីយ៍ដោយមានរូបថត និងវត្ថុអនុស្សាវរីយ៍ពីឆ្នាំចាស់ ។
- សង្ខេបនូវជ័យជម្នះ និងបញ្ហាប្រឈមនៃឆ្នាំចាស់នៅក្នុង សៀវភៅកំណត់ហេតុ ។
- ទិញសៀវភៅសរសេរពិសេសមួយក្បាលទុកសម្រាប់តែសរសេរសំណួរសម្រាប់ឆ្នាំថ្មីដើម្បីអ្នកអាចមើលវានៅពេលក្រោយ ហើយប្រៀបធៀបចម្លើយជារៀងរាល់ឆ្នាំ ។
- សុំឲ្យនរណាម្នាក់សម្ភាសអ្នក ឬគ្រួសាររបស់អ្នកអំពីសំណួរទាំងនោះ ។ ធ្វើការថតជាសំឡេង ឬវីដេអូនៃការសម្ភាសនេះដើម្បីចែកចាយជាមួយសមាជិកគ្រួសារផ្សេងទៀត ។
រក្សាទុកនូវការនឹកគិតពីឆ្នាំមុនរបស់អ្នក និងរបស់មនុស្សជាទីស្រឡាញ់របស់អ្នក ហើយទន្ទឹងរង់ចាំយ៉ាងរំភើបដើម្បីសម្រេចនូវគោលដៅដ៏អស្ចារ្យនាឆ្នាំក្រោយ !
អត្ថបទដែលទាក់ទង
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
