ខួបអាពាហ៍ពិពាហ៍គឺជាពេលវេលាដ៏ល្អសម្រាប់គូស្វាមីភរិយាដើម្បីភ្ជាប់ទំនាក់ទំនងជាមួយគ្នាឡើងវិញ ។ ខួបអាពាហ៍ពិពាហ៍ដែលគួរឲ្យចងចាំបំផុតមួយចំនួនគឺជាពេលវេលាស្ងប់ស្ងាត់នៅពេលដែលអ្នកអាចនិយាយអំពីជីវិតរបស់អ្នកជាមួយគ្នា និងរបៀបដែលអ្នកចង់រីកចម្រើនក្នុងនាមជាគូស្វាមី ឬភរិយា ។ សំណួរគឺជាវិធីដ៏ល្អមួយដើម្បីបង្កើនការយល់ដឹង ការយល់ចិត្ត និងចំណង ។ ទោះបីជាអ្នកអាចគិតថាអ្នកស្គាល់គ្នាច្បាស់ប៉ុនណាក៏ដោយ សំណួរដែលមានការគិតគូរអាចពង្រឹងចំណងរបស់អ្នកបានដែរ ។
តើអ្នកមានខួបអាពាហ៍ពិពាហ៍នាពេលឆាប់ៗខាងមុខនេះដែរឬទេ ? សូមពិចារណាកំណត់ពេលវេលាជាមួយគ្នាដើម្បីសួរសំណួរ និងព្រាងគំនិតដើម្បីពង្រឹងទំនាក់ទំនងរបស់អ្នក ។ នរណាទៅដឹង ? អ្នកប្រហែលជាអាចរកឃើញអ្វីមួយដែលគួរឲ្យភ្ញាក់ផ្អើល ដែលអាចជួយឲ្យទំនាក់ទំនងរបស់អ្នករីកចម្រើនឡើង ។
សំណួរខួបអាពាហ៍ពិពាហ៍ដែលអាចប្រើបានជារៀងរាល់ឆ្នាំ
មិនថាអ្នកបានរៀបអាពាហ៍ពិពាហ៍យូរប៉ុនណាឡើយ វាជាការណ៍ល្អក្នុងការដឹងពីសុខទុក្ខគ្នាទៅវិញទៅមក ដាក់ផែនការដើម្បីពង្រឹងភាពខ្សោយក្នុងទំនាក់ទំនងរបស់អ្នក និងអបអរជ័យជម្នះរបស់អ្នករួមគ្នា ។ នេះគឺជាសំណួរមួយចំនួនដែលអ្នកអាចទៅមើលឡើងវិញបានជារៀងរាល់ឆ្នាំ ហើយមើលពីរបៀបដែលចម្លើយរបស់អ្នកផ្លាស់ប្ដូរពីមួយឆ្នាំទៅមួយឆ្នាំ ។
- តើពេលណានៅក្នុងឆ្នាំចាស់គឺជាពេលដែលអ្នកចូលចិត្ដនៅក្នុងចំណងអាពាហ៍ពិពាហ៍របស់យើង ?
- តើអ្វីដែលថ្មីដែលអ្នកបានរៀនអំពីខ្ញុំនៅឆ្នាំនេះ ?
- តើអ្វីនៅក្នុងទំនាក់ទំនងរបស់យើងដែលយើងអាចធ្វើឲ្យប្រសើរឡើងបាន ?
- តើអ្វីជាភាពខ្លាំងដ៏ធំបំផុតរបស់យើងក្នុងនាមជាស្វាមីភរិយា ?
- តើយើងទន្ទឹងរង់ចាំអ្វីនៅឆ្នាំខាងមុខនេះ ?
- តើអ្វីជាចំណុចពិសេសរបស់ខ្ញុំដែលអ្នកគិតថាគួរឲ្យស្រឡាញ់ ?
- តើបីចំណុចណាខ្លះដែលអ្នកមានអំណរគុណសម្រាប់ខ្ញុំ ?
- តើអ្នកទទួលសេចក្តីស្រឡាញ់យ៉ាងដូចម្ដេច ? តើខ្ញុំធ្វើអ្វីខ្លះ ដែលធ្វើឲ្យអ្នកទទួលអារម្មណ៍ថាខ្ញុំស្រឡាញ់អ្នកបំផុត ? តើខ្ញុំអាចធ្វើអ្វីខ្លះដើម្បីជួយអ្នកឲ្យកាន់តែទទួលអារម្មណ៍នៃសេចក្ដីស្រឡាញ់ពីខ្ញុំ ?
សំណួរសម្រាប់គូស្វាមីភរិយាដែលពុំមានកូនៗស្នាក់នៅជាមួយទៀត
នៅពេលដែលកូនៗចាកចេញពីផ្ទះ ស្វាមីភរិយាអាចចាប់ផ្ដើមទំនាក់ទំនងរបស់ពួកគេម្ដងទៀតបាន ។ សូមចំណាយពេលដើម្បីនឹកគិតជាមួយគ្នាអំពីដំណាក់កាលថ្មីនៃជីវិតរបស់អ្នក ។ ពិចារណាសួរសំណួរទាំងនេះទៅកាន់គ្នាទៅវិញទៅមក ៖
- តើអ្វីជាការចងចាំដែលអ្នកចូលចិត្តជាងគេអំឡុងពេលដែលយើងនៅជាមួយគ្នា ?
- តើមានកន្លែងណាដែលយើងចង់ធ្វើដំណើរទៅជាមួយគ្នាដែរឬទេ ?
- តើមានក្ដីសង្ឃឹម និងក្ដីស្រមៃណាខ្លះដែលយើងអាចឈោងចាប់បាន ?
- តើអ្នកទន្ទឹងរង់ចាំធ្វើកិច្ចការអ្វីខ្លះជាមួយគ្នា ?
- តើយើងអាចផ្តល់អាទិភាពដល់ការចំណាយពេលល្អៗជាមួយគ្នាខណៈដែលយើងនៅតែពីរនាក់ដោយរបៀបណា ?
- តើយើងអាចចាប់ផ្តើមធ្វើការស្ម័គ្រចិត្តជាមួយគ្នានៅឯណាបាន ?
- តើយើងអាចបន្តបីបាច់ និងបណ្ដុះសេចក្តីស្រឡាញ់របស់យើងចំពោះគ្នាទៅវិញទៅមកក្នុងដំណាក់កាលបន្ទាប់នៃជីវិតនេះដោយរបៀបណា ?
- តើអ្វីជាគោលដៅរបស់អ្នកសម្រាប់ជំពូកបន្ទាប់នៃជីវិតរបស់យើង ទាំងជីវិតបុគ្គល និងជីវិតជាស្វាមីភរិយា ?
សំណួរសម្រាប់សួរគូស្វាមីភរិយាផ្សេងទៀត
គូស្វាមីភរិយាដែលបានរៀបការរយៈពេលយូរអាចផ្តល់នូវការយល់ដឹងដ៏ឈ្លាសវៃអំពីរបៀបស្ថាបនាទំនាក់ទំនងដ៏ជោគជ័យ ។ តើឪពុកម្តាយរបស់អ្នករៀបការយូរប៉ុនណាហើយ ? ចំណែកឯជីដូនជីតារបស់អ្នកវិញនោះ ? គិតអំពីគូស្វាមីភរិយាផ្សេងទៀតនៅក្នុងជីវិតរបស់អ្នកដែលអ្នកស្ញប់ស្ញែង ។ ប្រសិនបើអ្នកមានសាច់ញាតិ ឬមិត្តភក្តិដែលមានខួបអាពាហ៍ពិពាហ៍នាពេលខាងមុខ សូមពិចារណាសួរពួកគេនូវសំណួរទាំងនេះដើម្បីអ្នកទទួលបានគំនិត និងដំបូន្មានសម្រាប់ទំនាក់ទំនងរបស់អ្នកផ្ទាល់ ។
- តើអ្នកបានជួបគ្នាដោយរបៀបណា នៅពេលណា និងនៅឯណា ?
- តើអ្វីបានទាក់ទាញឲ្យអ្នកចាប់អារម្មណ៍លើគ្នា ?
- តើអ្នកដោះស្រាយជម្លោះ និងការមិនយល់ស្របគ្នាដោយរបៀបណា ?
- តើអ្នកមានចំណាប់អារម្មណ៍ និងចំណង់ចំណូលចិត្តដែលអ្នកចូលចិត្តធ្វើរួមគ្នាដែរឬទេ ?
- តើអ្នកបានដោះស្រាយភាពចលាចល និងការខកចិត្ដបានយ៉ាងដូចម្ដេច ?
- តើអ្នកមានកូន និងចៅប៉ុន្មាននាក់ដែរ ?
- តើអ្វីជាក្តីសុបិនដ៏ធំបំផុតរបស់អ្នកសម្រាប់គ្រួសាររបស់អ្នក ?
- តើអ្នកធ្វើអ្វីដើម្បីបន្តស្រឡាញ់គ្នាទៅវិញទៅមក ?
- តើអ្វីជាដំបូន្មានសម្រាប់ចំណងអាពាហ៍ពិពាហ៍ដ៏ល្អបំផុតរបស់អ្នក ?
សរសេរដំណើររឿងជីវិតផ្ទាល់ខ្លួនរបស់អ្នក
តើអ្នកបានគិតអំពីការចំណាយពេលអង្គុយជាមួយស្វាមី ឬភរិយារបស់អ្នក ហើយសរសេរនូវដំណើររឿងនៃជីវិតរបស់អ្នករួមគ្នាដែរឬទេ ? វាអាចមានប្រយោជន៍ដើម្បីមើលឃើញពីរបៀបដែលផ្លូវផ្សេងគ្នារបស់អ្នក បាននាំអ្នកឲ្យមកជួបគ្នា និងនាំអ្នកមកក្នុងជីវិតបច្ចុប្បន្នរបស់អ្នក ។ វាក៏ជាការណ៍ដ៏រីករាយផងដែរដើម្បីមើលឃើញពីរបៀបដែលអ្នកទាំងពីរមើលឃើញព្រឹត្ដិការណ៍ដូចគ្នាចេញពីទស្សនផ្សេងគ្នា ។ ទាំងនេះគឺជាសំណួរមួយចំនួនដើម្បីរំឭកកម្រងអនុស្សាវរីយ៍របស់អ្នក ៖
- តើអ្នកនឹងប្រាប់ដំណើររឿងនៅពេលដែលយើងជួបគ្នាជាលើកដំបូងដោយរបៀបណា ?
- ពីដំបូងតើអ្នកមើលឃើញខ្ញុំថាយ៉ាងណាដែរ ?
- ពេលដែលអ្នកបានដឹងថាអ្នកស្រឡាញ់ខ្ញុំ តើពេលនោះអ្នកស្គាល់ខ្ញុំយូរប៉ុនណាហើយ ?
- តើអ្នកណានិយាយថា « ខ្ញុំស្រឡាញ់អ្នក » មុនគេ ?
- តើអ្នកណាជាអ្នកលើកឡើងអំពីការរៀបអាពាហ៍ពិពាហ៍មុនគេ ?
- តើអ្វីដែលអ្នកគិតថាអ្នកគួរតែដឹង ពេលយើងរៀបអាពាហ៍ពិពាហ៍ ?
- តើអ្នកបានមានអារម្មណ៍បែបណានៅថ្ងៃរៀបអាពាហ៍ពិពាហ៍របស់យើង ?
- តើខ្ញុំស្អាតទេនៅក្នុងថ្ងៃរៀបអាពាហ៍ពិពាហ៍របស់យើង ?
- តើអ្វីជាការភ្ញាក់ផ្អើលខ្លាំងបំផុតរបស់អ្នកអំពីអាពាហ៍ពិពាហ៍នៅក្នុងអំឡុងឆ្នាំដំបូងរបស់យើង ?
សូមមើល អត្ថបទនេះ ដើម្បីទទួលបានគំនិតបន្ថែមអំពីប្រធានបទសម្រាប់ការសរសេរដើម្បីជួយអ្នកសរសេរប្រវត្ដិផ្ទាល់ខ្លួនរបស់អ្នក ។ ( តាមរយៈមុខងារបកប្រែដោយស្វ័យប្រវត្តិដែលផ្តល់ដោយ Google នៅលើរបាររុករកនៅខាងឆ្វេង ទំព័រនេះមានជាភាសាជាច្រើន ) ។
រក្សាទុកកម្រងអនុស្សាវរីយ៍របស់អ្នក
សូមពិចារណាដាក់បញ្ចូលពេលវេលាដើម្បីនឹកគិតពីឆ្នាំនេះ និងការដាក់គោលដៅជាផ្នែកមួយនៃការអបអរខួបអាពាហ៍ពិពាហ៍របស់អ្នក ។ អ្នកអាចសរសេរការឆ្លើយតបរបស់អ្នកនៅក្នុងសៀវភៅកំណត់ហេតុ ឬថតវីដេអូ ឬសំឡេងទុកដើម្បីរក្សាកំណត់ត្រានៃជីវិតរបស់អ្នកជាមួយគ្នា ។ វិធីដ៏ល្អដើម្បីរក្សាកម្រងអនុវស្សាវរីយ៍ដែលសំខាន់បំផុតគឺ កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ ។
តាមលំនាំដើម កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ គឺដាក់ជាសាធារណៈ ដូចនេះអ្នកអាចចែកចាយអនុស្សាវរីយ៍បានយ៉ាងងាយស្រួល ឬអាចឲ្យសាច់ញាតិរកមើលអនុស្សាវរីយ៍ទាំងនោះនៅក្នុងមែកធាងគ្រួសាររួម ។ អ្នកក៏អាចគូសចំណាំកម្រងអនុស្សាវរីយ៍ពិសេសដាក់ជាឯកជន ឬចែកចាយត្រឹមតែក្នុងក្រុមតូចក៏បានដែរ ។
មិនថាអ្នកជ្រើសរើសអបអរខួបអនុស្សាវរីយ៍របស់អ្នក និងដាក់គោលដៅសម្រាប់ពេលអនាគតតាមវិធីណានោះទេ សូមប្រាកដថាអ្នករក្សាកំណត់ត្រានៃការឆ្លើយតបរបស់អ្នកដើម្បីអ្នកឃើញពីរបៀបដែលកង្វល់ និងសំណួររបស់អ្នកផ្លាស់ប្ដូរពីមួយឆ្នាំទៅមួយឆ្នាំ ។ ប្រសិនបើអ្នកសួរសំណួរទាំងនេះទៅកាន់ឪពុកម្តាយ និងជីដូនជីតារបស់អ្នក សូមកត់ត្រាចម្លើយរបស់ពួកគាត់ផងដែរ ! អ្នកនឹងចូលចិត្ដការមានកំណត់ត្រាអំពីគំនិត និងកម្រងអនុស្សាវរីយ៍នៃអាពាហ៍ពិពាហ៍របស់ពួកគេដើម្បីទុកមើលនាឆ្នាំក្រោយៗទៀត ។
អត្ថបទដែលទាក់ទង
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
