ថ្ងៃខួបកំណើតគឺជាពេលវេលាដ៏សំខាន់មួយដែលមានភាពងាយស្រួលក្នុងប្រារព្ធ ។ ថ្ងៃខួបកំណើតគឺជាពេលដើម្បីអបអរ គិតពិចារណា និងភ្ជាប់ទំនាក់ទំនង ។ ការណ៍នេះធ្វើឲ្យថ្ងៃខួបកំណើតជាឱកាសដ៏ល្អបំផុតសម្រាប់ការចាប់ផ្ដើមប្រពៃណីថ្មីៗ ។
តើមានវិធីណាដែលធ្វើឲ្យថ្ងៃខួបកំណើតជាការចងចាំដ៏ល្អជាជាងការមាននូវសំណួរដែលបង្កើនការគិតគូរ និងការត្រិះរិះផ្ទាល់ខ្លួន ដែលបំផុសគំនិតឲ្យមានការសន្ទនាដ៏មានអត្ថន័យនោះ ? តាមរយៈការសួរសំណួរត្រឹមត្រូវអំពីថ្ងៃខួបកំណើត អ្នកអាចបង្វែរថ្ងៃខួបកំណើតទាំងអស់ឲ្យទៅជាឱកាសដើម្បីគិតពិចារណាអំពីអតីតកាល និងក្ដីសុបិនអំពីអនាគតកាល ។ វាងាយស្រួលដូចជាការកត់កំណត់ហេតុបទពិសោធន៍របស់អ្នក ឬការចែកចាយអនុស្សាវរីយ៍នានាជាមួយមនុស្សជាទីស្រឡាញ់ដូច្នោះដែរ ។ ការសម្ភាសនៅថ្ងៃខួបកំណើតអាចជាសកម្មភាពតែម្តង ឬជាអ្វីមួយដែលអ្នកធ្វើដដែលៗជារៀងរាល់ឆ្នាំ ហើយមើលត្រឡប់ក្រោយវិញដើម្បីគិតពីរបៀបដែលអ្នក និងមនុស្សជាទីស្រឡាញ់របស់អ្នកបានរីកចម្រើន និងផ្លាស់ប្ដូរពីមួយឆ្នាំទៅមួយឆ្នាំ ។
ចូរយើងក្រលេកមើលកម្រងនៃគំនិត និងសំណួរដែលគួរឲ្យចាប់អារម្មណ៍ ដែលត្រៀមជាស្រេចដើម្បីជួយបំផុសគំនិតឲ្យមានការពិចារណាផ្ទាល់ខ្លួន និងពង្រឹងចំណងជាមួយគ្រួសារ និងមិត្ដភក្ដិ ។ អ្នកអាចរក្សាចម្លើយចំពោះសំណួរទាំងនេះដោយប្រើកម្រងអនុស្សាវរីយ៍កម្មវិធីស្រាវជ្រាវក្រុមគ្រួសារ ។ នៅប៉ុន្មានឆ្នាំខាងមុខ អ្នកអាចមើលត្រឡប់ក្រោយវិញ ហើយមើលឃើញពីរបៀបដែលចម្លើយទៅកាន់សំណួរដដែលទាំងនោះផ្លាស់ប្ដូរ កាលអ្នកមានអាយុកាន់តែច្រើនទៅ ។
សំណួរថ្ងៃខួបកំណើតដើម្បីសួរអ្នកដទៃ
សំណួរដែលមានការគិតគូរអាចពង្រឹងទំនាក់ទំនងរបស់អ្នកជាមួយមនុស្សជាទីស្រឡាញ់ ហើយគ្មានពេលណាដែលល្អសម្រាប់ការសួរសំណួរទាំងនោះ ជាងថ្ងៃខួបកំណើតដ៏ពិសេសឡើយ ! អ្នកអាចសម្ភាសកូនៗ ស្វាមី ឬភរិយា ឪពុកម្ដាយ ជីដូនជីតា និងមនុស្សជាទីស្រឡាញ់ផ្សេងទៀតរបស់អ្នកនៅឯការជួបជុំជាក្រុមគ្រួសារ ។ អ្នកអាចធ្វើការសម្ភាសនៅថ្ងៃខួបកំណើតម្តងនៅឯការជួបជុំជាក្រុមគ្រួសារ នៅចំថ្ងៃខួបកំណើតពិសេស ( ដូចជានៅអាយុ ៥, ៨, ១០, ១២, ១៦, ១៨ និង ២១ ឆ្នាំ ) នៅពេលដែលនរណាម្នាក់កើនអាយុដប់ឆ្នាំបន្ថែមទៀត ឬសូម្បីតែធ្វើវាជារៀងរាល់ឆ្នាំ ។
ទាំងនេះគឺជាសំណួរដ៏មានអត្ថន័យមួយចំនួនដើម្បីជួយអ្នកស្វែងយល់បន្ថែមអំពីបទពិសោធន៍ ក្ដីស្រមៃ និងការយល់ដឹងផ្ទាល់ខ្លួនរបស់មនុស្សជាទីស្រឡាញ់របស់អ្នក ។
សំណួរអំពីថ្ងៃខួបកំណើតពីអតីតកាល
- តើប្រពៃណី ឬអនុស្សាវរីយ៍ថ្ងៃខួបកំណើតអ្វីខ្លះដែលអ្នកចូលចិត្ដជាងគេ ?
- ប្រសិនបើអ្នកអាចចំណាយពេលថ្ងៃខួបកំណើតរបស់អ្នកជាមួយនរណាម្នាក់ មិនថានៅអតីតកាល ឬបច្ចុប្បន្ននេះទេ តើអ្នកនឹងចំណាយពេលជាមួយនរណា ?
- ប្រសិនបើអ្នកអាចផ្ដល់ដំបូន្មានទៅកាន់ខ្លួនអ្នកកាលពីនៅអតីតកាល តើអ្នកនឹងផ្ដល់ដំបូន្មានអ្វីខ្លះ ?
- ប្រសិនបើអ្នកអាចប្រារព្ធថ្ងៃខួបកំណើតរបស់អ្នកនៅទីណាក៏បាននៅក្នុងពិភពលោកនេះ តើអ្នកនឹងប្រារព្ធវានៅឯណា ?
- តើអំណោយខួបកំណើតអ្វីជាអំណោយដ៏មានអត្ថន័យបំផុត ដែលអ្នកធ្លាប់ទទួលបាន ?
សំណួរអំពីឆ្នាំកន្លងមកនេះ
- តើអនុស្សាវរីយ៍អ្វីខ្លះពីឆ្នាំមុនដែលអ្នកចូលចិត្ដជាងគេ ?
- ប្រសិនបើអ្នកអាចដកពិសោធន៍នូវគ្រាមួយកាលពីឆ្នាំមុនម្ដងទៀត តើអ្នកចង់ដកពិសោធន៍ពេលមួយណា ?
- តើអ្នកបានសម្រេចបាននូវកិច្ចការណាមួយដែលអ្នកមានមោទនភាពជាពិសេសឬទេ នៅក្នុងឆ្នាំនេះ ?
- តើរឿងមួយដែលអ្នកមានអំណរគុណចំពោះ កាលអ្នកប្រារព្ធខួបកំណើតឆ្នាំនេះគឺជាអ្វី ?
- តើរឿងមួយដែលអ្នកបានរៀនអំពីខ្លួនអ្នកនៅឆ្នាំនេះគឺជាអ្វី ?
- ប្រសិនបើអ្នកអាចពិពណ៌នាឆ្នាំកន្លងទៅនេះដោយប្រើពាក្យមួយពាក្យ តើពាក្យនោះជាពាក្យអ្វី ?
- តើនរណាដែលបានជះឥទ្ធិពលខ្លាំងបំផុតនៅក្នុងជីវិតរបស់អ្នកនាឆ្នាំនេះ ហើយដោយរបៀបណា ?
សំណួរអំពីឥឡូវនេះ
- តើអ្នកចូលចិត្តម្ហូបអ្វីជាងគេនៅបច្ចុប្បន្ននេះ ?
- តើអ្នកចូលចិត្តសៀវភៅមួយណាជាងគេ ?
- តើអ្នកចូលចិត្ដភាពយន្ដមួយណាជាងគេ ?
- តើអ្នកចូលចិត្តកម្មវិធីទូរទស្សន៍មួយណាជាងគេ ?
- តើអ្នកមានចំណង់ចំណូលចិត្តធ្វើអ្វី ?
- តើចម្រៀងមួយណាដែលអ្នកចូលចិត្ដជាងគេ ?
សំណួរអំពីឆ្នាំក្រោយ
- តើមានអ្វីដែលសប្បាយៗ ឬរំភើបដែលអ្នកចង់សាកល្បងនៅឆ្នាំក្រោយនេះដែរឬទេ ?
- តើរឿងមួយដែលអ្នកទន្ទឹងរង់ចាំយ៉ាងអន្ទះសាបំផុតនៅឆ្នាំក្រោយនេះគឺជាអ្វី ?
- តើពេលនេះនៅឆ្នាំក្រោយ អ្នកគិតថាអ្នកនឹងធ្វើអ្វី ?
- តើអ្វីដែលអ្នកចង់ធ្វើឲ្យខុសប្លែកពីរាល់ដងនៅឆ្នាំនេះ ?
សំណួរអំពីថ្ងៃខួបកំណើតសម្រាប់សួរខ្លួនអ្នក
ថ្ងៃខួបកំណើតរបស់អ្នកក៏ពេលវេលាដ៏ល្អបំផុតសម្រាប់ការនឹកគិតផ្ទាល់ខ្លួនផងដែរ ! សូមចំណាយពេលបន្ដិចដើម្បីផ្អាក ហើយសួរខ្លួនអ្នកនូវសំណួរមួយចំនួនដើម្បីអបអរដល់ការរីកចម្រើនរបស់អ្នក នឹកគិតដល់អនុស្សាវរីយ៍ដ៏សប្បាយៗ និងដាក់គោលដៅសម្រាប់ឆ្នាំទៅមុខទៀត ។
សំណួរអំពីឆ្នាំកន្លងមកនេះ
- តើសមិទ្ធផលមួយណាដែលខ្ញុំមានមោទនភាពបំផុត ?
- តើបញ្ហាប្រឈមអ្វីខ្លះដែលខ្ញុំបានយកឈ្នះ ហើយតើវាបានជំរុញដល់ការរីកចម្រើនរបស់ខ្ញុំយ៉ាងដូចម្ដេចខ្លះ ?
- តើពេលវេលាមួយកាលពីឆ្នាំមុន ដែលខ្ញុំតែងតែឲ្យតម្លៃជានិច្ចនោះគឺជាពេលវេលាណា ?
- តើខ្ញុំបានមើលថែខ្លួនឯងបានកម្រិតណាដែរឆ្នាំនេះ ( ផ្នែករាងកាយ ផ្នែកផ្លូវចិត្ដ និងផ្នែកសតិអារម្មណ៍ ) ?
- តើបុគ្គល ឬកិច្ចការណាដែលនាំអំណរដល់ខ្ញុំខ្លាំងបំផុតនៅឆ្នាំនេះ ?
- តើអ្វីជាកិច្ចការដែលខ្ញុំសង្ឃឹមថាខ្ញុំបានធ្វើខុសប្លែកពីរាល់ដងនៅឆ្នាំនេះ ?
- តើគោលដៅមួយដែលខ្ញុំបានដាក់កាលពីឆ្នាំមុន ហើយខ្ញុំសម្រេចបាននោះជាអ្វី ?
- តើខ្ញុំបានធ្វើឲ្យមានភាពខុសប្លែកគ្នានៅក្នុងជីវិតរបស់នរណាម្នាក់នៅឆ្នាំនេះដោយរបៀបណា ?
- តើអ្វីខ្លះដែលថ្មីដែលខ្ញុំបានសាកល្បងធ្វើនៅឆ្នាំនេះ ហើយតើវាបានជះឥទ្ធិពលដល់ខ្ញុំយ៉ាងដូចម្ដេចខ្លះ ?
- តើអ្វីដែលខ្ញុំមានអំណរគុណបំផុតនៅពេលឥឡូវនេះ ?
- ប្រសិនបើខ្ញុំអាចពិពណ៌នាឆ្នាំមុននេះដោយប្រើពាក្យមួយពាក្យ តើខ្ញុំនឹងប្រើពាក្យអ្វី ?
- ប្រសិនបើខ្ញុំអាចត្រឡប់ទៅកាន់ថ្ងៃមួយនៅក្នុងឆ្នាំនេះវិញ តើថ្ងៃនោះនឹងជាថ្ងៃណា ហើយហេតុអ្វី ?
សំណួរអំពីឥឡូវនេះ
- តើអ្នកចូលចិត្តម្ហូបអ្វីជាងគេនៅបច្ចុប្បន្ននេះ ?
- តើអ្នកចូលចិត្តសៀវភៅមួយណាជាងគេ ?
- តើអ្នកចូលចិត្ដភាពយន្ដមួយណាជាងគេ ?
- តើអ្នកចូលចិត្តកម្មវិធីទូរទស្សន៍មួយណាជាងគេ ?
- តើអ្វីជាចំណង់ចំណូលចិត្តពេលទំនេររបស់អ្នក ?
- តើចម្រៀងមួយណាដែលអ្នកចូលចិត្ដជាងគេ ?
សំណួរអំពីឆ្នាំក្រោយ
- តើអ្វីដែលខ្ញុំទន្ទឹងរង់ចាំដោយរំភើបបំផុតសម្រាប់ឆ្នាំខាងមុខ ?
- តើគោលដៅអ្វីខ្លះដែលខ្ញុំចង់ដាក់សម្រាប់ឆ្នាំក្រោយ ?
- តើអ្វីជាដំបូន្មានមួយដែលខ្ញុំចង់ផ្ដល់ដល់ខ្លួនឯងសម្រាប់ឆ្នាំថ្មីនេះ ?
- តើខ្ញុំនឹងថែរក្សាខ្លួនឯងឲ្យបានល្អជាងនៅឆ្នាំក្រោយនេះដោយរបៀបណា ( ផ្នែករាងកាយ ផ្នែកផ្លូវចិត្ដ និងផ្នែកសតិអារម្មណ ) ?
- តើអ្វីមួយដែលខ្ញុំចង់ធ្វើឲ្យខុសប្លែកពីរាល់ដងនៅឆ្នាំក្រោយគឺជាអ្វី ?
កត់ត្រាសំណួរថ្ងៃខួបកំណើតរបស់អ្នក
សំណួរទាំងនេះគឺជាសំណួរដ៏ឥតខ្ចោះសម្រាប់សួរខ្លួនអ្នក និងអ្នកដទៃទៀត ដោយចាត់ទុកជាបទពិសោធន៍ដ៏គួរឲ្យចងចាំក្នុងអំឡុងការអបអរថ្ងៃខួបកំណើត ឬអាចចាត់ទុកជាឱកាសដើម្បីចាប់ផ្ដើមប្រពៃណីប្រចាំឆ្នាំដែលយើងរំពឹងរង់ចាំ ។ នៅពេលដែលអ្នកសួរសំណួរទាំងនេះ អ្នកអាចប្រើ កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ ដើម្បីរក្សាទុកកម្រងអនុស្សាវរីយ៍ និងគំនិតទាំងនេះ ។
តាមលំនាំដើម កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ គឺដាក់ជាសាធារណៈ ដូចនេះអ្នកអាចចែកចាយកម្រងអនុស្សាវរីយ៍បានយ៉ាងងាយស្រួល ឬអាចឲ្យសាច់ញាតិរកមើលកម្រងអនុស្សាវរីយ៍ទាំងនោះនៅក្នុងមែកធាងគ្រួសាររួម ។ អ្នកក៏អាចគូសចំណាំកម្រងអនុស្សាវរីយ៍ពិសេសដាក់ជាឯកជន ឬចែកចាយក្នុងក្រុមតូចក៏បានដែរ ។
ទាំងនេះគឺជាទម្រង់មួយចំនួនផ្សេងទៀតដែលអ្នកអាចប្រើបានដើម្បីរក្សាទុកចម្លើយចំពោះសំណួរថ្ងៃខួបកំណើត ៖
- វីដេអូ ។ ថតវីដេអូរបស់បុគ្គលដែលឆ្លើយសំណួរទាំងនេះ ។ ប្រសិនបើអ្នកធ្វើការសម្ភាសម្ដងទៀតនៅឆ្នាំផ្សេងទៀត នោះអ្នកត្រូវធ្វើវីដេអូចងក្រងចម្លើយរបស់ពួកគេ ។
- ថតសំឡេង ។ កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារមានម៉ាស៊ីនថតសំឡេងដោយឥតគិតថ្លៃ ។ នៅក្នុងកម្មវិធីនេះ អ្នកគ្រាន់តែចុច ថត នៅលើទូរសព្ទរបស់អ្នក ហើយថតសំឡេងរបស់មនុស្សជាទីស្រឡាញ់របស់អ្នកឆ្លើយសំណួរនៅក្នុងថ្ងៃខួបកំណើតរបស់ពួកគេ ។
- សៀវភៅកម្រងអនុស្សាវរីយ៍ ។ ដាក់ចម្លើយចំពោះសំណួរទាំងនេះនៅក្នុងសៀវភៅកម្រងអនុស្សាវរីយ៍ដោយភ្ជាប់ជាមួយរូបថតពីការអបអរនៅថ្ងៃខួបកំណើត ។ ប្រសិនបើអ្នកធ្វើការសម្ភាសនោះម្ដងទៀត អ្នកអាចឃើញបុគ្គលនោះផ្លាស់ប្ដូរពីមួយឆ្នាំទៅមួយឆ្នាំ ទាំងតាមរយៈចម្លើយ និងរូបថតទាំងឡាយរបស់ពួកគេ ។
- សៀវភៅ កំណត់ ហេតុ ។ អ្នកអាចសរសេរចម្លើយនៅក្នុងសៀវភៅកំណត់ហេតុផ្ទាល់ខ្លួនរបស់អ្នក ឬបុគ្គលរូបនោះអាចប្រើសៀវភៅកំណត់ហេតុរបស់គាត់បាន ។
សូមត្រៀមខ្លួនដើម្បីស្វែងយល់បន្ថែមអំពីខ្លួនអ្នក និងមនុស្សជាទីស្រឡាញ់របស់អ្នក ដោយការពិចារណាសំណួរថ្ងៃខួបកំណើតទាំងនេះ ។
អត្ថបទដែលទាក់ទង
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
