Жил бүр FamilySearch-д хүн бүр үнэ төлбөргүй судлах боломжтой угийн бичгийн олон бүртгэлийг нэмж оруулдаг ба хүмүүст нас барсан болон одоогийн гэр бүлүүдтэйгээ холбогдох боломжийг шинэчлэн сайжруулсан байдлаар олгодог билээ. 2024 онд FamilySearch вэбсайт болон аппликэйшнд ямар шинэ зүйлс нэмэгдэж байгааг сонирхолтой байдлаар товч харуулав.
Угийн бичгийн бүртгэл
Энэ жил FamilySearch-ийн ажилтнууд, сайн дурынхан дэлхий даяарх бүртгэлийн архивчид болон бусад байгууллагатай хамтран олон сая түүхэн бүртгэлийг хадгалан хамгаалах мөн илүү хүртээмжтэй болгох зорилгоор дүрсжүүлэх ажлыг үргэлжлүүлэн хийх болно.
Энэхүү ажлын хүрээнд FamilySearch нь түүхэн бичээснүүд цахимаар тийм ч их нийтлэгдээгүй Перу, Португал гэх мэт улс оронд бүртгэлийг олж мөн дижитал хэлбэрт оруулахаар голчлон төлөвлөж байна. Бүртгэлийг дижитал хэлбэрт оруулах ажил маань бусад улс оронд ч үргэлжлэх нь мэдээж. Ингэснээр бид 2024 онд Африк, Ази, Европ, Хойд Америк, Өмнөд Америк, Номхон далайн арлууд гэхчлэн суурьших боломжтой тив, 75 гаруй арлын оронд бүртгэлийг дижитал болгох ажлыг урагшлуулна хэмээн найдаж байна.
Үүнээс гадна, бид төрөлжсөн, хүлээгдэж буй бүртгэлийн багцуудыг илүү нээлттэй болгоход туслахдаа баяртай байх болно. Өнгөрсөн жил FamilySearch нь Ancestry болон Канадын номын сан, архивын газартай хамтран 1931 оны Канадын хүн амын тооллогын хайлтыг бүгдэд нээлттэй болгосон. FamilySearch.org нь хүн амын тооллогын цувралаа цаашид сайжруулахдаа 1921 оны Канадын хүн амын тооллогыг ч мөн бүтнээр нь нэмэх болно. Бид түүнчлэн Африк тивээс ам дамжсан угийн бичиг болон бусад онцгой бүртгэлийн багцыг цуглуулж, тэдгээрээс хайлт хийх боломжтой болгох ажлыг үргэлжлүүлэхээр төлөвлөж байна.
Ам дамжсан угийн бичгийн тухайд гэвэл FamilySearch-ийн Африк тивийн 15 гаруй орноос цуглуулсан ам дамжсан угийн бичгүүдийг хялбар байдлаар судлахад зориулж шинэчилсэн хайлтыг нэвтрүүлэх болно. Хэрэглэгчид овог аймаг, тосгон, эсвэл овог нэрээр хайж, ярилцлагын үеэр цуглуулсан зураг, аудио бичлэг, удмын бичгийг тэр даруй орж үзэх боломжтой болох юм.
Компьютерын тусламжтай индексжүүлэх ажлын ахиц дэвшил
2024 онд FamilySearch итали, испани, португал, англи зэрэг өөр өөр хэл дээрх бүртгэлийг таньж, индексжүүлэхийн тулд компьютерын тусламжтай индексжүүлэх алгоритмаа үргэлжлүүлэн сайжруулах болно. Энэ ажил нь сая, сая бүртгэлийн зургийг авч, текстээр хурдан хайх боломжтой болгож, онлайн бүртгэлийн хүртээмжийг эрс сайжруулан, олон орны хүмүүст өвөг дээдсийнхээ талаар илүү их мэдээлэл олж авахад нь туслах болно.
Бүрэн бичвэрийн хайлт
Үүнтэй холбоотойгоор дурдахад, FamilySearch нь бүртгэлийн хайлтаа сайжруулахын тулд хиймэл оюун ухаанаар ажилладаг гар бичвэрийг таних хамгийн сүүлийн үеийн технологийг ашиглаж байгаа билээ. Бид танд өвөг дээдсээ олоход туслахын тулд бүртгэлийн хамгийн чухал хэсгүүдийг индексжүүлэхийг хичээдэг. 2024 онд бид бүртгэлийн багцыг сонгох бүрэн текстээр хайх боломжийг нэмж, таны хайлтыг илүү үр дүнтэй болгохоор ажиллаж байна.
Сайн дурын ажлын шинэ туршлага
FamilySearch.org-ийн Оролцох хэсэгт сайн дурын ажлын шинэ боломжууд нэмэгдэж байгаа ба сайн дурын ажилтнууд компьютерын тусламжтай индексжүүлэлтийг хялбараар хянах ажилд туслах боломжтой болох юм.
Өнгөрсөн жилүүдэд хийсэн сайжруулалтуудаар дамжуулан сайн дурын ажилтнуудад индексжүүлсэн нэрсийг хаа явсан газраа хянаж, мөн өөрсдийн сонирхолд нийцсэн бүртгэлийн багц дээр ажиллах боломжтой болсон билээ. 2024 оны "Оролцох" хэсгийн шинэчлэлтүүд нь хэрэглэгчдэд бүртгэлийн бүх хэсгийг илүү хялбар, гар утсан дээр ажиллахад хялбар байдлаар хянах боломжийг олгох сонголтуудыг агуулах болно. (Өнгөрсөн жилүүдэд таны оролцсон сайн дурын ажил бусдад хэрхэн тусалсныг эндээс олж хараарай!)
Цахим хэлбэрээр гарч буй илүү олон ном
2024 онд FamilySearch өөрийн үнэгүй Цахим номын сан дахь цахим нийтлэлийн тоо хэмжээг үргэлжлүүлэн ихэсгэж, үүнд хувь нэмэр оруулах байгууллагуудыг нэмэгдүүлнэ. Үүнд угийн бичгийн номууд, гэр бүлийн түүхүүд, орон нутгийн түүхүүд, газрын зургууд, жил тутмын дурсамж товхимлууд багтана.
Гэр бүлийн бүлэгт зориулсан илүү сайн хуваалцах боломж
FamilySearch гэр бүлийн мод нь үеэлүүд, эцэг эхчүүд, эмээ өвөө нар зэрэг аль ч төрлийн хамаатнууд хамтдаа удам угсаагаа баримтжуулах боломжтой хамтын ажиллагаа ихтэй мод юм. Хувийн нууцыг хамгаалахын тулд гэр бүлийн мод амьд байгаа хамаатнуудын мэдээллийг харагдах байдлыг хязгаарладаг.
Энэ жил FamilySearch дээрх гэр бүлийн бүлгүүдийн шинэчлэлтээр дамжуулан хэрэглэгчид амьд байгаа хамаатнуудынхаа мэдээллийг бүлэг дотроо хуваалцах боломжтой ба ингэснээр гэр бүлийн гишүүд амьд байгаа хамаатнуудынхаа мэдээллийг дахин дахин оруулах шаардлагагүй болно. Дэлгэрэнгүй мэдээллийг дараа өгөх ба энэхүү шинэчлэлээр дамжуулан зураг хуваалцах, гэр бүлийн дурсамж болон амьд байгаа гэр бүлийн гишүүдийн дэлгэрэнгүй мэдээллийг хамтран хөтлөхөд илүү хялбар байх болно.
Угийн бичгийн дэлхийн хамгийн том чуулган хоёрдугаар сард болно.
2-р сарын 29-нөөс эхлэн FamilySearch-ийн алдарт Рүүтстэк арга хэмжээ энэ жил “Санагтун” уриатайгаар эргэж ирэх болно. Гэр бүлээ цахимаар судлах дэлхийн хамгийн том чуулган 2024 оны 2-р сарын 29-нөөс 3-р сарын 2-ны хооронд дэлхий даяар цахимаар болон Юта мужийн Солт Лэйк Ситид биечлэн болох ба үүнд 27 хэл дээрх 700 хичээл багтана. Шинэ интерактив чат нь Рүүтстэкт онлайнаар оролцож буй хүмүүсийн оролцох байдлыг улам тэлэх болно.
RootsTech нь ураг төрлөө судлах, гэр бүлийн модоо томруулахад туслах зөвлөгөө авах, шинэлэг бүтээгдэхүүн, үйлчилгээг олж мэдэн, түүнчлэн гайхалтай илтгэл, үг хэлэгчдээс урам зориг авах хосгүй сайхан арга хэмжээ юм. Онлайнаар дэлхий даяарх сая, сая хүн оролцоно гэж тооцоолж байгаа ба мянга, мянган хүн хэдийнээ биеэр оролцохоор бүртгүүлээд байна. Онлайнаар оролцоход үнэ төлбөргүй ба Salt Palace Convention Center-д дүүрэн хөтөлбөртэй гурван өдрийн арга хэмжээнд биечлэн оролцоход ердөө 109 ам.доллар болно. Дэлгэрэнгүй мэдээлэл авах, аль нэг хэлбэрээр оролцохоор бүртгүүлэхийг хүсвэл RootsTech.org руу очно уу.
Шинэчлэлүүдийг туршин FamilySearch-ийн ирээдүйн нэгэн хэсэг болоорой.
FamilySearch нь хэрэглэгчдээсээ сайтынхаа талаарх санал хүсэлт хүлээн авч, юу сайн ажиллаж байгааг мөн юуг сайжруулах хэрэгтэйг мэдэхийг ихэд хүсдэг билээ. Бид 2024 онд хэрэглэгчид сонгогдсон шинэчлэлтүүдийг боловсруулж байх үед нь турших боломжтой тусгайлсан хэсэгтэй болохоор төлөвлөж байна. Энэ талаарх дэлгэрэнгүй мэдээллийг нийтлэх блогт анхаарлаа хандуулаарай.
Сэтгэл догдлом шинэ жил—үүгээр зочлохоо мартуузай!
Бид та бүхнийг 2024 онд нэмэгдэх эдгээр болон бусад зүйлийг үзэхээр FamilySearch-д ойр ойрхон зочилно хэмээн найдаж байна! FamilySearch блог нь шинэ үйлдлүүд хэзээ гарахыг танд мэдээлэх үүднээс шинэ мэдээ мэдээллийг тогтмол нийтэлдэг билээ. Шинэ мэдээ мэдээлэл авахыг хүсвэл FamilySearch-д нэмэгдсэн шинэ зүйлс хуудсаар зочлох эсвэл бүртгүүлнэ үү.
Та мөн хүссэн хугацаагаараа FamilySearch дээрх одоогийн үйлдлүүдийг ашиглаарай. Энд танд гэр бүл, удам угсаагаа судлахад туслах холбооснуудыг оруулсан ба бүгдийг нь чөлөөтэй ашиглах боломжтой.
FamilySearch дээр бид таныг гэр бүлтэй чинь холбож, хөгжилтэй танин мэдэхүй болон гэр бүлийн түүхийн үйлчилгээг санал болгодог. Яагаад? Учир нь бид гэр бүлүүдийг нандигнаж, үе удмуудыг хооронд нь холбох нь бидний амьдралыг одоо болон үүрд сайжруулдаг гэдэгт итгэдэг. Бид Есүс Христийн Хожмын Үеийн Гэгээнтнүүдийн Сүмээс санхүүждэг ашгийн бус байгууллага юм. Бидний итгэдэг зүйлсийн талаар дэлгэрэнгүй мэдэхийг хүсвэл энд дарна уу.
null
Холбоотой нийтлэл
