ដូច្នេះអ្នកបានសម្រេចចិត្តក្នុងការរក្សាទិនានុប្បវត្តិមួយ—ប៉ុន្តែអ្នកងឿងឆ្ងល់ថាតើរឿងប្រភេទអ្វីដែលអ្នកគួរតែសរសេរអំពី ។ បន្ទាប់មកទៀត តើអ្នកអាចដាក់អ្វីគ្រប់យ៉ាងដែលអ្នកចង់ឲ្យអ្នក និងកូនចៅរបស់អ្នកចងចាំនៅក្នុងក្រដាសប៉ុន្មានទំព័រនេះយ៉ាងដូចម្ដេចទៅ ?
កុំបារម្ភ—ហើយសូមចងចាំថា ជាដំបូង និងសំខាន់បំផុត ទិនានុប្បវត្តិរបស់អ្នកគឺជាអ្វីដែលអ្នកចង់ឲ្យវាមាន ។ នោះមានន័យថាវាអាចមានព័ត៌មានច្រើន ឬតិចទៅតាមដែលអ្នកចង់ឲ្យវាមាន ! ប្រសិនបើអ្នកនៅតែស្វែងរកកន្លែងដើម្បីចាប់ផ្តើម សូមពិចារណាការណែនាំខាងក្រោមនេះ ។
ប្រធានបទដែលត្រូវសរសេរនៅក្នុងទិនានុប្បវត្តិ
នៅពេលអ្នកចាប់ផ្តើម សូមពិចារណាអំពីទស្សនាវដ្ដី និងកំណត់ហេតុប្រចាំថ្ងៃល្បីៗមួយចំនួនដែលបានបោះពុម្ពផ្សាយ ដូចជា Anne Frank: The Diary of a Young Girl; ឧទាហរណ៍បែបនេះប្រហែលអាចជួយអ្នកគិតអំពីអ្វីដែលអ្នកចង់កត់ត្រា ។
អ្នកក៏ប្រហែលជាគិតអំពីអ្វីដែលអ្នកប្រាថ្នាចង់ឲ្យជីដូនជីតារបស់អ្នកបានកត់ត្រាផងដែរ ។ តើអ្នកងឿងឆ្ងល់ទេថាតើពួកគាត់គិតយ៉ាងណាចំពោះព្រឹត្តិការណ៍បច្ចុប្បន្ន តើពួកគាត់បានទាក់ទងជាមួយអ្នកណា ឬអ្វីទៅដែលជាការកម្សាន្ត ឬតន្ត្រីដែលពួកគាត់ចូលចិត្ត ? សូម្បីតែអ្វីដែលសាមញ្ញដូចជាពួកគាត់ចូលចិត្តម្ហូបអ្វី ថាតើអាកាសធាតុមានលក្ខណៈបែបណា និងអ្វីដែលត្រូវចំណាយប្រចាំថ្ងៃអាចគួរឲ្យចាប់អារម្មណ៍សម្រាប់មនុស្សជំនាន់ក្រោយ ។
រក្សាកំណត់ត្រានៃព្រឹត្តិការណ៍សំខាន់ៗក្នុងជីវិតរបស់អ្នក ៖ គ្រួសារ សាលារៀន ការងារ និងផ្សេងៗទៀត ។ កំណត់ត្រាបែបនេះមិនត្រឹមតែជួយអ្នកចងចាំកាលបរិច្ឆេទសំខាន់ៗប៉ុណ្ណោះទេ ប៉ុន្តែកូនចៅរបស់អ្នកនឹងអរគុណអ្នកនៅពេលដែលពួកគេរៀនអំពីកេរដំណែលគ្រួសាររបស់ពួកគេ ។
ធ្វើឲ្យទិនានុប្បវត្តិរបស់អ្នកកាន់តែមានលក្ខណៈផ្ទាល់ខ្លួន
បន្ថែមពីលើការកត់ត្រាព្រឹត្តិការណ៍សំខាន់ៗអំពីជីវិតរបស់អ្នក សូមពិចារណាចែកចាយសកម្មភាពប្រចាំថ្ងៃរបស់អ្នក ។ ឧទាហរណ៍ ជីដូនខាងឪពុករបស់ខ្ញុំបានរក្សាទិនានុប្បវត្តិខ្លីមួយ មានរយៈពេល ៦ ខែដែលលម្អិតអំពីសកម្មភាពប្រចាំថ្ងៃរបស់គាត់ក្នុងអំឡុងទសវត្សរ៍ ឆ្នាំ១៩៣០ ។ រឿងមួយក្នុងចំណោមរឿងដែលខ្ញុំចូលចិត្តនៅក្នុងទិនានុប្បវត្តិរបស់គាត់និយាយថា « ការលាងសម្អាតដ៏ធំ ! ថ្ងៃដ៏ល្អ ។ … បានរើសផ្កានៅតាមច្រាំងទន្លេបន្ទាប់ពីចេញពីសាលារៀន » ។ គួរឲ្យសោកស្តាយ ជីដូនរបស់ខ្ញុំបានទទួលមរណភាពតែប៉ុន្មានឆ្នាំក្រោយមកទាំងនៅវ័យក្មេង ។ កំណត់ហេតុប្រចាំថ្ងៃនេះផ្តល់នូវការយល់ដឹងអំពីថាតើគាត់ជានរណា និងជីវិតរបស់គាត់មានលក្ខណៈដូចម្តេចក្នុងរបៀបដែលខ្ញុំមិនធ្លាប់ដឹង ។
កត់ត្រាអំពីការតស៊ូ ការខកចិត្ត ទុក្ខព្រួយ និងជ័យជម្នះរបស់អ្នក ។ ការអានទិនានុប្បវត្តិរបស់អ្នកឡើងវិញអាចជាប្រភពនៃការលួងលោម និងការធានាដល់អ្នកនៅពេលដែលអ្នកកំពុងប្រឈមមុខនឹងការសាកល្បង និងអាចមើលឃើញពីរបៀបដែលអ្នកបានយកឈ្នះឧបសគ្គកន្លងមក ។
កត់ត្រាគំនិត និងពាក្យដកស្រង់ដែលលើកទឹកចិត្តនឹងបំផុសគំនិតអ្នក ទាំងដើម្បីចងចាំ និងរក្សាទុកវាសម្រាប់អ្នកដទៃ ។ ប្រសិនបើអ្នកជាអ្នកកាន់សាសនា កត់ត្រាបទពិសោធន៍ខាងវិញ្ញាណដែលអ្នកធ្លាប់មាននៅក្នុងជីវិតរបស់អ្នក ។
ចែកចាយពេលវេលាគួរឲ្យអស់សំណើច និងរឿងខ្មាសអៀនមួយចំនួនដែលកើតឡើងរួមជាមួយនឹងការរៀនសូត្រ និងការរីកចម្រើនដែលបង្កើតជាដំណើរជីវិតរបស់អ្នក ។
របៀបចាប់ផ្ដើមសរសេរទិនានុប្បវត្តិ
អ្នកអាចនឹងសួរថា « ប៉ុន្តែតើខ្ញុំចាប់ផ្តើមដោយរបៀបណា » ? មានវិធីជាច្រើន ដើម្បីធ្វើទិនានុប្បវត្តិ ប៉ុន្តែអ្វីដែលសំខាន់គឺត្រូវចាប់ផ្តើម ។
កំណត់ពេលពីរបីនាទីជារៀងរាល់ថ្ងៃដើម្បីសង្ខេបព្រឹត្តិការណ៍ដែលបានកើតឡើង ។ កុំបំបិទនូវបទពិសោធន៍ដែលសំខាន់របស់អ្នក ឬបារម្ភអំពីអ្វីដែលអ្នកដទៃអាចគិតអំពីវាឡើយ ។ សូមរក្សាតុល្យភាពនៃរឿងល្អៗ ក៏ដូចជាបទពិសោធន៍ដ៏លំបាកដែលកើតឡើង ។
ធ្វើឲ្យទិនានុប្បវត្តិរបស់អ្នកមានលក្ខណៈផ្ទាល់ខ្លួនទៅនឹងអ្វីដែលមានអារម្មណ៍ត្រឹមត្រូវសម្រាប់អ្នក ។ ពីព្រោះនេះគឺជាដំណើររឿង និងជាជីវិតរបស់អ្នក អ្នកអាចសម្រេចចិត្តក្នុងការចែកចាយផ្នែកខ្លះនៃវាជាមួយសមាជិកគ្រួសាររបស់អ្នក ។ ឬអ្នកប្រហែលជាមានអារម្មណ៍ចង់កប់ទុកនូវរឿងទាំងនោះទុកជាអាថ៌កំបាំងជារៀងរហូត ! អ្វីដែលសំខាន់គឺត្រូវកត់ត្រាបទពិសោធន៍ជីវិតរបស់អ្នក និងរៀនអំពីវា ។
ពិចារណាការវិភាគ និងផ្ទុកទិនានុប្បវត្តិរបស់អ្នកទៅក្នុង កម្រងអនុស្សាវរីយ៍របស់កម្មវិធីស្រាវជ្រាវក្រុមគ្រួសារ ដើម្បីរក្សាទុកសម្រាប់មនុស្សជំនាន់ក្រោយ—ឬប្រសិនបើអ្នកចង់ប្រើវាដោយផ្ទាល់ ជាទិនានុប្បវត្តិអនឡាញ ដើម្បីកត់ត្រាគំនិតរបស់អ្នក ។
សូមចងចាំអ្វីដែល អានី ហ្វ្រែង ធ្លាប់បានសរសេរអំពីការរក្សាកំណត់ហេតុ ៖ « ការសរសេរធ្វើឲ្យខ្ញុំបានធូរស្រាលចិត្ត ទុក្ខព្រួយរបស់ខ្ញុំបានរសាយបាត់ទៅ ហើយភាពក្លាហានរបស់ខ្ញុំបានកើតឡើងជាថ្មី » ។ ( Anne Frank: The Diary of a Young Girl ទំព័រ ១៧៧ )
អត្ថបទដែលទាក់ទង
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
