តើអ្នកធ្លាប់ទាញរូបផ្គុំចាស់មួយមកផ្គុំដើម្បីគ្រាន់តែចង់ដឹងថានៅចុងបញ្ចប់ អ្នកបាត់បំណែកណាឬទេ ? រឿងដូចគ្នានេះកើតឡើងចំពោះអនុស្សាវរីយ៍ពីមួយថ្ងៃទៅមួយថ្ងៃ ។ បំណែកតូចមួយចាប់ផ្តើមមិនសូវសំខាន់នៅពេលដែលពេលវេលាកន្លងទៅ ។ ការសរសេរទិនានុប្បវត្តិជួយរក្សាព័ត៌មានលម្អិតតិចតួចទាំងនោះ ដូច្នេះអ្នកនឹងនៅចងចាំវាជានិច្ច ។
នៅក្នុងដំណើរជីវិត មនុស្សជាច្រើនរកឃើញអារម្មណ៍ភាពជាខ្លួនឯង និងមើលឃើញភាពប្រសើរឡើងនៅក្នុងជីវិតប្រចាំថ្ងៃរបស់ពួកគេ ។ ការសិក្សាបានរកឃើញថា មានអត្ថប្រយោជន៍ជាច្រើនក្នុងការសរសេរទិនានុប្បវត្តិ, រួមមានដូចខាងក្រោម ៖
- ការសម្រាន្តបានប្រសើរជាងមុន
- បន្ធូរបន្ថយភាពតានតឹង
- កែលម្អសុខភាពផ្លូវចិត្ត
- បង្កើនការយល់ដឹង
- ពង្រឹងប្រព័ន្ធភាពស៊ាំ
តើវាដំណើរការយ៉ាងដូចម្ដេច ? ការសរសេរគំនិត និងអារម្មណ៍របស់អ្នកផ្តល់ឲ្យអ្នកនូវឱកាសដើម្បីដំណើរការនឹងយល់ដឹងគំនិត និងអារម្មណ៍ទាំងនោះ ។ ដំណើរការនេះអាចជំរុញប្រព័ន្ធភាពស៊ាំ និងបន្ថយបន្ទុកផ្លូវចិត្តរបស់អ្នក ។
ការចាប់ផ្តើមអាចមានអារម្មណ៍ឆ្គងបន្តិច ហើយការបង្កើតទម្លាប់ថ្មី ត្រូវការការអនុវត្ត ។ ព្យាយាមប្រើគំនិតជំនួយសរសេរទិនានុប្បវត្តិទាំងនេះដើម្បីឲ្យអ្នកបន្ដទៅមុន ។ កម្រអនុស្សាវរីយ៍កម្មវិធីស្រាវជ្រាវក្រុមគ្រួសារ ក៏ផ្តល់ជូននូវវេទិកាឥតគិតថ្លៃ និងងាយស្រួលក្នុងការសរសេរទិនានុប្បវត្តិរបស់អ្នក និងរក្សាទុកវាជាមួយរូបភាពដែលអ្នកចូលចិត្តផងដែរ ។
គំនិតជំនួយសម្រាប់ការសរសេរទិនានុប្បវត្តិរហ័ស និងងាយស្រួល
ប្រសិនបើអ្នកទើបតែចាប់ផ្តើម គំនិតជំនួយរហ័ស និងគួរឲ្យរីករាយទាំងនេះអាចជាកន្លែងដ៏ល្អឥតខ្ចោះដើម្បីសាកល្បងក្នុងការសរសេរទិនានុប្បវត្តិ ។ ឬប្រសិនបើអ្នកមានថ្ងៃដ៏លំបាក នោះប្រធានបទដែលងាយៗអាចជារឿងដែលធ្វើឲ្យអ្នកឈប់ផ្ដោតទៅលើរឿងដែលលំបាកៗនៅពេលអ្នកសរសេរ ។
- តើអ្វីជារឿងល្អបំផុតដែលបានកើតឡើងនៅថ្ងៃនេះ ?
- តើរសជាតិការ៉េមដែលអ្នកចូលចិត្ត និងមិនចូលចិត្តបំផុតគឺជារសជាតិអ្វី ?
- តើអ្នករំភើបចិត្តអំពីរឿងអ្វីខ្លះនៅសប្តាហ៍ក្រោយ ?
- បង្កើតបញ្ជីអាហារដែលអ្នកចូលចិត្ត ចំណង់ចំណូលចិត្ត ភាពយន្ត ចម្រៀង និងផ្សេងៗទៀត ។
- សរសេរឈ្មោះទីកន្លែងដែលអ្នកសង្ឃឹមថានឹងទៅលេងនៅថ្ងៃណាមួយ ។ តើអ្នកចង់ធ្វើអ្វីខ្លះនៅទីនោះ ?
- ប្រសិនបើអ្នកអាចជ្រើសរើសថាមពលដ៏អស្ចារ្យ តើថាមពលនោះជាអ្វីទៅ ?
- តើនរណាជាតួអង្គដែលអ្នកចូលចិត្តនៅក្នុងកម្មវិធីទូរទស្សន៍ ?
- តើសត្វចិញ្ចឹមជាទីស្រឡាញ់របស់អ្នកគឺជាសត្វអ្វី ?
- តើរដូវកាលដែលអ្នកចូលចិត្តបំផុតប្រចាំឆ្នាំគឺជារដូវកាលអ្វី?
- ប្រសិនបើអ្នកអាចជ្រើសរើសពិភពប្រឌិតដើម្បីរស់នៅ តើវានឹងជាពិភពអ្វី?
គំនិតជំនួយសម្រាប់ការសរសេរទិនានុប្បវត្តិដើម្បីចងក្រងអនុស្សាវរីយ៍ដំបូងៗរបស់អ្នក
ការអាឡោះអាល័យ គឺជាកម្លាំងដ៏មានឥទ្ធិពលមួយដែលមានអត្ថប្រយោជន៍ជាច្រើន ។ វាអាចកាត់បន្ថយភាពតានតឹង និងការថប់បារម្ភ ហើយជួយអ្នកឲ្យមានអារម្មណ៍សប្បាយរីករាយជាងមុន ។ ចងក្រងអនុស្សាវរីយ៍ដំបូងៗមួយចំនួនដើម្បីពង្រឹងទំនាក់ទំនងរបស់អ្នកជាមួយអតីតកាលរបស់អ្នក ។
សូមកុំពង្វាងចេញពីអនុស្សាវរីយ៍លំបាកៗផងដែរ ។ ការឆ្លងកាត់អារម្មណ៍ទាំងនោះអាចជួយអ្នកទទួលយករឿងទាំងនោះ និងបន្តទៅមុខទៀត ។
- រៀបរាប់អំពីផ្ទះកាលពីកុមារភាពរបស់អ្នក ។ តើអ្នកនឹកអ្វីខ្លះអំពីផ្ទះនោះ ? តើបន្ទប់របស់អ្នកមានសភាពយ៉ាងណាដែរ ? តើអ្នកបានផ្លាស់ប្ដូរទីលំនៅដែរឬទេ ?
- តើអាហារអ្វីដែលអ្នកចូលចិត្តកាលពីកុមារ ? តើអ្នកបានចម្អិតអាហារទាំងនោះថ្មីៗនេះទេ ?
- តើអ្វីខ្លះជាប្រពៃណីបុណ្យជាតិដែលអ្នកចូលចិត្តនោះ ? រួមបញ្ចូលអនុស្សាវរីយ៍ជាក់លាក់ ។
- តើនរណាជាមិត្តភក្ដិល្អបំផុតរបស់អ្នកកាលពីកុមារ ? តើអ្នកបានធ្វើអ្វីជាមួយគ្នា ? តើអ្នកនៅតែបន្តទាក់ទងគ្នាសព្វថ្ងៃនេះដែរឬទេ ?
- តើអ្នកបានរៀនសាលាណាដែរ ? តើមុខវិជ្ជាអ្វីដែលអ្នកចូលចិត្តជាងគេ ? តើអ្នកមានគ្រូបង្រៀនដែលអ្នកចូលចិត្តជាងគេដែរឬទេ?
- តើអ្នកចងចាំអ្វីខ្លះអំពីស្រុកកំណើតរបស់អ្នក ? តើអ្នកនៅតែបន្ដរស់នៅទីនោះដែរឬទេ ? បើមិនដូច្នេះទេ តើអ្នកធ្លាប់ទៅលេងទីនោះដែរឬទេ ?
- តើអ្នកកោតសរសើរនរណាកាលពីកុមារ ?
- តើការចងចាំដ៏អាម៉ាស់បំផុតរបស់អ្នកគឺជាអ្វី ?
- តើសៀវភៅអ្វីដែលអ្នកចូលចិត្តបំផុតកាលពីកុមារ ?
គំនិតជំនួយសម្រាប់ការសរសេរទិនានុប្បវត្តិដើម្បីចងក្រងអំពីគ្រួសាររបស់អ្នក
ការរុករកអនុស្សាវរីយ៍ និងប្រវត្តិគ្រួសារបើកផ្លូវឲ្យអ្នកស្វែងយល់ថាតើអ្នកជានរណា ។ ការស្វែងរកឫសគល់គ្រួសារ និងវប្បធម៌ ជំរុញឲ្យមានអារម្មណ៍នៃភាពជាកម្មសិទ្ធិ ដែលនាំមកជាមួយការបង្កើនតម្លៃផ្ទាល់ខ្លួន និងភាពរឹងមាំ ។ ការសរសេរអំពីគ្រួសាររបស់អ្នកគឺជាវិធីមួយក្នុងចំណោមវិធីជាច្រើនដែលអ្នកអាចពង្រឹងទំនាក់ទំនងទាំងនោះ ។
ប្រសិនបើអ្នកចាប់អារម្មណ៍ក្នុងការរុករកបន្ថែមពីឫសគល់គ្រួសាររបស់អ្នក សូមព្យាយាមស្វែងយល់អំពី មែកធាងគ្រួសាររបស់អ្នក ។
- ចូរពិពណ៌នាអំពីឪពុកម្ដាយរបស់អ្នក ។ តើពួកគាត់មានភិនភាគយ៉ាងណាដែរ ? តើអ្នកបានធ្វើអ្វីជាមួយគ្នា ? តើអ្នកមានអារម្មណ៍យ៉ាងណាអំពីពួកគាត់ ?
- តើអ្នកចាំជីដូនជីតារបស់អ្នកដែរឬទេ ? តើអ្នកមានទំនាក់ទំនងប្រភេទណាជាមួយពួកគាត់ ?
- តើឪពុកម្តាយរបស់អ្នកបានធ្វើការងារអ្វីដែរ ?
- ប្រសិនបើអ្នកមានបងប្អូន តើអ្នកមានអនុស្សាវរីយ៍អ្វីខ្លះជាមួយគ្នា ?
- រៀបរាប់អំពីទំនាក់ទំនងគ្រួសារបច្ចុប្បន្នរបស់អ្នក ។ តើអ្នកមានអារម្មណ៍ជិតស្និទ្ធបំផុតជាមួយអ្នកណា ?
- តើអនុស្សាវរីយ៍គ្រួសារដែលអ្នកចូលចិត្តគឺជាអ្វី ?
- តើអ្នកធ្លាប់មានការជួបជុំគ្រួសារទេ ? សូមរៀបរាប់អំពីការជួបជុំទាំងនោះ ។
- រៀបរាប់អំពីបញ្ហាប្រឈមដែលអ្នកបានប្រឈមមុខជាមួយគ្រួសាររបស់អ្នក ។ តើគ្រួសាររបស់អ្នកឆ្លងកាត់បញ្ហាប្រឈមទាំងនោះដោយរបៀបណា ?
- តើគ្រួសាររបស់អ្នកបង្ហាញក្តីស្រឡាញ់ចំពោះគ្នាទៅវិញទៅមកតាមរបៀបណាដែរ ?
- ប្រសិនបើអ្នកអាចនិយាយអ្វីមួយទៅកាន់គ្រួសាររបស់អ្នក តើអ្នកនឹងនិយាយអ្វី ?
- តើអ្វីទៅជាឫសគល់វប្បធម៌របស់គ្រួសារអ្នក ?
គំនិតជំនួយសម្រាប់ការសរសេរទិនានុប្បវត្តិផ្ទាល់ខ្លួន
ការសរសេរទិនានុប្បវត្តិផ្តល់នូវច្រកចេញដើម្បីយល់ដឹងពីគំនិត និងអារម្មណ៍របស់អ្នក ។ ព្យាយាមសរសេរអំពីអ្វីដែលកំពុងកើតឡើងនៅក្នុងជីវិតរបស់អ្នក និងអារម្មណ៍របស់អ្នកឥឡូវនេះ ។ អ្នកប្រហែលរកឃើញថាបទពិសោធន៍មួយអាចជាអ្វីដែលជួយអ្នកបន្ធូរអារម្មណ៍តានតឹង ។
- តើអ្នកសង្ឃឹមចង់សម្រេចបានអ្វីខ្លះនៅឆ្នាំនេះ ? ក្នុងរយៈពេលប្រាំឆ្នាំខាងមុខ ?
- តើអ្នកមានអារម្មណ៍សប្បាយបំផុតនៅពេលណា ? មានអារម្មណ៍សោកសៅបំផុតនៅពេលណា ?
- តើមានអ្វីដែលរំខានអ្នកនាពេលថ្មីៗនេះទេ ?
- តើវិជ្ជាជីវៈបច្ចុប្បន្នរបស់អ្នកគឺជាអ្វី ? តើអ្នកពេញចិត្តនឹងការងាររបស់អ្នកទេ ? បើមិនដូច្នេះទេ តើអ្នកចង់ផ្លាស់ប្តូរអ្វីខ្លះ ?
- តើមានអ្វីនៅក្នុងបញ្ជីដែលត្រូវធ្វើរបស់អ្នក ? តើអ្នកអាចសម្រេចបានក្តីសុបិនទាំងនោះដោយរបៀបណា ?
- តើភាពភ័យខ្លាចរបស់អ្នកគឺជាអ្វី ? ហេតុអ្វីវាធ្វើឲ្យអ្នកភ័យខ្លាច ?
- តើអ្នកចូលចិត្តទៅកន្លែងណាជាងគេបំផុតនៅក្នុងពិភពលោកនេះ ?
- តើអ្នកធ្វើការសម្រេចចិត្តដែលសំខាន់ៗដោយរបៀបណា ?
- តើអ្វីដែលអ្នកចង់រៀនធ្វើ ? តើមានអ្វីរារាំងអ្នក ?
- តើអ្វីដែលធ្វើឲ្យអ្នកមានមោទនភាពជាងគេ ?
- ចែកចាយអំពីអ្វីមួយដែលអ្នកសោកស្តាយ និងអ្វីដែលអ្នកនឹងធ្វើឲ្យល្អជាង ។
- តើអ្វីដែលជំរុញចិត្តអ្នក ?
សង្ឃឹមថាបញ្ជីនៃគំនិតជំនួយសម្រាប់ការសរសេរទិនានុប្បវត្តិនេះអាចជួយអ្នកឲ្យចាប់ផ្តើមកត់ត្រាដំណើររឿងផ្ទាល់ខ្លួនរបស់អ្នក ។ ការសរសេរទិនានុប្បវត្តិគឺជាវិធីដ៏អស្ចារ្យមួយដើម្បីរុករកអតីតកាលរបស់អ្នក គ្រួសាររបស់អ្នក និងអារម្មណ៍ផ្ទាល់ខ្លួនរបស់អ្នក។ បញ្ជីនេះគ្រាន់តែផ្នែកបន្ដិចបន្ដួចប៉ុណ្ណោះ ដូច្នេះសូមបន្តស្វែងរកប្រធានបទថ្មីៗដើម្បីសរសេរបន្ថែម ។
អត្ថបទដែលទាក់ទង
