Ko e FamilySearch ko e taha ia ʻo e ngaahi tānakiʻanga lahi taha ʻo e fakamatala fakatohihohoko ʻi he māmaní, kuo toʻo ia mei he ngaahi maʻuʻanga fakamatala fakapuleʻangá, faka-Siasí, mo e ngaahi maʻuʻanga tokoni kehé ke fakafuofuaʻi ʻaki honau mahuʻinga fakatohihohokó ʻe he tokotaha fakatotolo takitaha. ʻOku ʻomi ʻe he Fuʻu ʻAkau Fakafāmili ʻi he FamilySearch he taimí ni ʻa e malava ʻe he niʻihi ʻoku nau fakaʻaongaʻí ʻo hiki e ngaahi vā fetuʻutaki fakafāmili ʻi he tuʻunga tangata mo e tangata pe fefine mo e fefiné.
Fakatatau mo e tokāteline ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e mali pē ʻi he vahaʻa ʻo e kakai tangata mo e fefiné ʻe lava ke fakamolumaluʻi pe silaʻi ʻi he temipalé.
Ngaahi Fakamatala Fakamuimuitaha ʻi he F&T ki he Ngaahi Vā Fetuʻutaki ʻi he Fuʻu ʻAkau Fakafāmili ʻo e FamilySearch
1. Ko e hā ʻoku fakahoko ai ʻeni ʻe he FamilySearch?
ʻOku fakataumuʻa ʻa e Fuʻu ʻAkau Fakafāmili ʻo e FamilySearch ke poupouʻi ke tonu e tohi hohokó ʻo makatuʻunga ʻi he ngaahi ʻuluaki maʻuʻanga lekooti totonú. ʻOku ʻomi ʻe he Fuʻu ʻAkau Fakafāmilí ʻa e malava ke lekooti ʻe he niʻihi ʻoku nau fakaʻaongaʻí ʻa e ngaahi vā fetuʻutaki fakafāmili kotoa pē, kau ai ʻa e mali ʻa e tangata mo e tangata pe fefine mo e fefiné mo e ngaahi ohi fānau ʻoku fakahoko ʻi he vā ʻa e tangata mo e tangata pe fefine mo e fefiné.
2. Ko ha liliu nai ʻeni ʻi he tokāteline ʻo e Siasí?
ʻIkai. ʻOku feinga ʻa e FamilySearch ke tauhi fakaʻilekitulōnika mo fakaʻatā ʻa e ngaahi lekooti fakatohihohokó mo fakahisitōliá, pea ko e konga ʻeni ʻo ʻene feinga ke hiki ha fakamatala totonu ki he fāmili ʻo e tangatá. ʻOku fakamolumaluʻi pe silaʻi ʻe he Siasí ʻa e ngaahi malí ʻi he vahaʻa pē ʻo e kakai tangata mo e kakai fefiné.
3. ʻE lava nai ke silaʻi ʻa e ngaahi hoa mali tangata mo e tangata pe fefine mo e fefiné?
ʻIkai. ʻO fakatatau pea mo e tokāteline ʻa e Siasí, ʻoku ʻikai ke silaʻi e hoa mali e tangata mo e tangatá pe fefine mo e fefiné, ʻo tatau ai pē pe kuó na ʻosi mali fakalao. ʻE lava ke maʻu ʻe ha taha kuo pekia naʻe moʻui ʻi ha vā fetuʻutaki fakahomosekisuale pe pīkinga ki he mali ʻa e tangata mo e tangata pe fefine mo e fefiné, ʻa e ngaahi ouau fakalotu kehe kotoa pē ʻoku lava ke maʻu ʻi ha temipale ʻa ia ʻokú ne feʻunga ke maʻú.
4. ʻE lava nai e fānau ʻa e ngaahi hoa mali ʻo e tangata mo e tangatá pe fefine mo e fefiné ke silaʻi kiate kinautolu?
ʻIkai. ʻO fakatatau pea mo e tokāteline ʻa e Siasí, ʻoku ʻikai silaʻi ʻa e fānaú ki he ngaahi hoa mali tangata mo e tangata pe fefine mo e fefiné, neongo ai pē pe kuo ʻosi mali fakalao e ngaahi hoá.
5. ʻOku hoko nai ʻa e FamilySearch ko e fuofua saiti tohi hohoko ke fakaʻatā ai hono lekooti ʻo e vā fetuʻutaki fakahomosekisualé?
ʻIkai. ʻOku ʻikai ko e FamilySearch ʻa e fuofua saiti fakatohihohoko ke fakaʻatā ki hono lekooti ʻo e vā fetuʻutaki fakahomosekisualé.
6. Ko e hā ha ngaahi liliu te u sio ki ai ʻi he Fuʻu ʻAkau Fakafāmilí?
ʻI he taimi ʻoku tānaki atu ai ha hoa mali pe mātuʻá, ʻe lava he taimí ni ʻe he tokotaha ʻokú ne fakaʻaongaʻí ke tānaki ha hoa mali pe mātuʻa ʻoku nau tuʻunga tangata pe fefine tatau.
7. Ko e hā ha meʻa naʻe fie maʻu ke tānaki ki ai ʻa e ngāué?
Naʻe fie maʻu ke toe fokotuʻutuʻu foʻou ha ngaahi founga lahi ʻoku nau pīkinga ki he Fuʻu ʻAkau Fakafāmilí, hangē ko e Fuʻu ʻAkaú mo e fekumi ki ha lekōtí, ke lava ʻo fakaʻatā ʻa e fakamatala fakapepa ʻo e ngaahi vā fetuʻutaki fakahomosekisualé kimuʻa pea toki lava ʻe he Fuʻu ʻAkau Fakafāmilí ʻo tuku atu ʻa e ngāue ko ʻení.
8. ʻOku ngāue nai ia ʻi he polokalama telefoni toʻotoʻo ʻo e Fuʻu ʻAkau Fakafāmilí?
ʻIo. ʻE ngāue ia ʻi he polokalama telefoni toʻotoʻó ʻi he taimi pē ʻe fakahū ai ʻe he tokotahá ʻa e ngaahi fakamatala fakamuimuitaha ʻoku fie maʻú.
9. ʻE lava nai ke u fakahū ha ngaahi manatu melie (ʻū tā, ngaahi talanoa, ʻū fakamatala fakapepa) ʻoku fekauʻaki honau kaveingá mo e vā fetuʻutaki fakahomosekisualé?
ʻOku tatau ʻa e ngaahi tuʻunga moʻui ki hono fakahū ʻo e ngaahi manatu melié (ʻū tā, ngaahi talanoa, ʻū fakamatala fakapepa) ki he tokotaha kotoa pē ʻokú ne fakaʻaongaʻí, pea muimui ki he Ngaahi Fakahinohino mo e Ngaahi Tuʻutuʻuni ki hono fakahū ʻo e fakamatala ki he FamilySearch. .
Fekauʻaki
ʻOku Tānaki Atu ʻe he Fuʻu ʻAkau Fakafāmili ʻa e FamilySearch ʻa e Malava ke Hiki Kotoa e Ngaahi Vā Fetuʻutaki Fakafāmilí (Loki Ongoongo ʻa e FamilySearch)
Te u tānaki fēfē ha hoa mali pe hoa ʻi he Fuʻu ʻAkau Fakafāmilí?
Te u tānaki fēfē ha mātuʻa ʻi he Fuʻu ʻAkau Fakafāmilí?