ʻOku ʻi ai ha fakangatangata ki haʻo fakatatali ʻotu ʻe 300 ki hoʻo lisi ʻo e ngaahi hingoa fakafāmili ki he temipalé. ʻOku kau ʻi he fakamatalá ʻa e hingoa ʻo ha kui mo e ngaahi ouau naʻá ke fakatatalí.
Ko ʻene aʻu pē hoʻo lisí ki he fakangatangata ko ʻení, he ʻikai ke ke toe lava ʻo fakatatali ha ngaahi ouau kae ʻoua kuo ʻalu hifo ʻa e lisí ki lalo ʻi he fakangatangatá.
Naʻe ʻuluaki fakaʻaongaʻi ʻa e fakangatangata ki he fakatatalí ʻi he 2021. ʻOku fakamatalaʻi fakaikiiki ange ʻe he ngaahi fehuʻi mo e ngaahi tali ko ʻení ʻa e fakangatangatá.
Ngaahi fehuʻi ʻoku lahi hono ʻeké
Ko e hā kuo fokotuʻu ai ha fakangatangata ki he fakatatalí?
ʻI ha tohi naʻe fakahoko ʻi he ʻaho 8 ʻOkatopa 2012, naʻe poupouʻi ai ʻe he Kau Palesitenisī ʻUluakí ʻa kinautolu ʻoku lahi ʻenau ngaahi hingoa fakafāmili kuo taʻofi fakatatalí ke “tukuange mai ʻa e ngaahi hingoá ni kei taimi ke lava ʻo fakahoko ʻa e ngaahi ouau ʻoku fiemaʻú.” ʻOku tatali ha tokolahi hotau fāmili kuo pekiá ki he faingamālie ke maʻu ʻa e ngaahi tāpuaki ʻo e ngaahi ouau fakafofongá. ʻOku tokolahi ha kāingalotu ʻoku ngāue ʻi he ngaahi temipale ʻi he funga ʻo e māmaní ke tokoni ʻi he ngāue ko ʻení.
ʻOku fakaʻatā koe ʻe ha fakangatangata foʻou ʻe 300 ke faingofua ange hoʻo tokangaʻi hoʻo lisi fakatatalí. ʻOku fakaʻatā ʻe he liliú ke faingofua ange hono maʻu ʻe he kāingalotu ʻo e Siasí ha ngaahi faingamālie ki he temipalé. ʻIkai ngata aí, ʻe tokoni ia kiate kinautolu ʻi he tafaʻaki ʻe taha ʻo e veilí ke maʻu ʻa e ngaahi ouaú ʻi ha taimi ʻoku lelei angé.
Kuo hanga ʻe Palesiteni Lāsolo M. Nalesoni mo e kau palōfita ʻi onopōní ʻo fakamamafaʻi mai ʻa e mahuʻinga hono fakavaveʻi e ngāue ʻa e ʻEikí ke tānaki ʻa ʻIsilelí. ʻOku ʻi ai hotau fatongia toputapu ke fakahoko e ngaahi ouau fakafofonga maʻa ʻetau ngaahi kuí. ʻI heʻetau hoko ko ha Siasi fakaemāmani lahi mo e kau mēmipa ʻo e fāmili lahi pē ʻe taha ʻo e faʻahinga ʻo e tangatá, te tau lava ai ʻo fetokoniʻaki ke fakahoko e tufakanga toputapú ni.
Ko e ngaahi sitepu ʻeni te ke lava ʻo fakahoko kapau ʻoku fuʻu lahi ho ngaahi faingamālie fakatemipale ke fakakakató:
- Vahevahe ʻa e ngaahi hingoa fakafāmilí ki he kau mēmipa ʻo e fāmilí, kaungāmeʻá, pe kulupu fakafāmilí
- Vahevahe e ngaahi fakatatalí mo e temipalé. ʻE lava ke maʻu ʻe he niʻihi kehé ʻa e hingoá mei he Ngaahi Ouau Kuo Māú mo e Fuʻu ʻAkau Fakafāmilí.
- Tukuange ha ngaahi hingoa mei hono taʻofi fakatatalí
He ʻikai ke ke lava ʻo vahevahe ʻa e ngaahi ouau naʻá ke fakatatali mei he ʻinivenitoli ʻa e temipalé naʻe vahevahé. ʻI hoʻo feingá, te ke sio ki ha pōpoaki: “He ʻikai lava ke toe vahevahe ʻa e ngaahi ouau naʻe vahevahe kimuʻa mo e temipalé.” Te ke lava ʻo tukuange e fakatatali ʻa e ngaahi ouau ko ʻení. ʻI he taimi te ke tukuange ai ʻa e ngaahi hingoa ko ʻení, ʻe toe foki ia ki he lisi ʻo e tokotaha naʻá ne ʻuluaki vahevahe ia mo e temipalé.
ʻI he taimi ʻoku ʻi lalo ai hoʻo lisi fakatatalí ʻi he fakangatangatá, te ke lava ʻo toʻo fakafoki ha fakatatali naʻá ke ʻosi vahevahe kimuʻa.
He ʻikai te ke lava ʻo fakafoki ʻa e ngaahi ouaú ʻi he ngaahi tūkunga ko ʻení:
- ʻOku kakato ʻa e ngaahi ouaú
- Ko ha ngaahi kaati temipale kuo paaki
- ʻOku taʻofi fakatatali ʻe ha taha kehe ʻa e ngaahi ouaú ʻi ha vahaʻa taimi ʻaho ʻe 120
Ko e hā e meʻa ʻoku lau ki he fakangatangata ʻo e fakatatalí?
ʻOku lau tuʻo taha pē ʻa e ʻotu takitaha ʻi hoʻo lisi fakatatalí, ʻo aʻu pē ki he taimi ʻoku fakafofongaʻi ai ʻe he ʻotú ha ngaahi ouau lahí. Ke sio ki ho fiká, vakai ki he tafaʻaki toʻohemá. Ko hoʻo fika fakakātoá e mataʻifika hili ʻa e “Ko ʻEku Lisi Tuku Fakatatalí.”
ʻOku fakatahaʻi ʻa e ngaahi papitaisó, hilifakinimá, ʻinisitolí, ʻenitaumení, mo e sila ki he mātuʻá ki he tokotaha, ʻi he ʻotu ʻe taha pea lau pē ia ko ha fakatatali pē ʻe taha. ʻOku hā ʻa e ouau ʻo e sila ki he malí ʻi hono ʻotu fakatatali pē ʻoʻona pea lau ko ha fakatatali kehe pē ia.
Ko e hā ʻe hoko kapau ʻoku ʻosi fakalaka ʻeku lisi fakatatalí ʻi he fakangatangatá?
Kapau ʻoku ʻosi laka ange hoʻo lisí ʻi he fika ʻoku fakangofua ke fakatatalí, ʻe ʻasi pē ʻi hoʻo lisí kae ʻoua kuo ʻosi honau ʻahó. ʻI he taimi ʻoku ʻosi ai e ʻaho fakatatalí, ʻoku vahevahe leva ʻa e ngaahi ouaú mo e temipalé. ʻE lava ke kumi mo fakatatali kinautolu ʻe he kāingá ʻi he Fuʻu ʻAkau Fakafāmilí pe fakafou ʻi he Ngaahi Ouau Kuo Māú.
Kapau ʻoku ʻi lalo hoʻo lisi taʻofi fakatatalí ʻi he fakangatangatá pea kuo teʻeki paaki pe fakakakato ʻe ha taha ʻa e ngāué, te ke lava ʻo fakafoki hono vahevahe ha hingoa.
Te u ʻiloʻi fēfē pe ʻoku aʻu ʻeku lisi taʻofi fakatatalí ki he fakangatangatá?
Ke vakai ki hoʻo ngaahi lisi fakatatalí, hū ki he FamilySearch.org, pea lomiʻi ʻi he Temipalé. Lomiʻi ʻi he Ko ʻEku Ngaahi Fakatatalí. ʻI he tafaʻaki toʻohemá, ʻoku fakahaaʻi atu ʻe he Ko ʻEku Ngaahi Fakatatalí ʻa e lahi ʻo e ngaahi fakatatali ʻokú ke maʻú. ʻOku ʻikai kaunga ʻa e lahi ʻo e Vahevahé ki hoʻo fakangatangatá.
Kapau te ke feinga ke fakatatali ha ouau hili hoʻo aʻu ki he fakangatangatá, te ke sio ki ha fakatokanga kuó ke aʻu ki he fakangatangatá.
Ko e hā e meʻa ʻoku hoko ʻi heʻeku aʻu ki he fakangatangata ʻo e taʻofi fakatatalí?
ʻI hoʻo aʻu pē ki he fakangatangatá, he ʻikai ke ke lava ʻo fakatatali ha toe ngaahi hingoa fakafāmili kehe. Ke fakaʻatā ha feituʻu ʻi hoʻo lisí, te ke lava ʻo vahevahe ʻa e fakatatali lolotongá mo e temipalé. ʻE lava ke fakaʻaongaʻi ʻe he kāingalotu kehe ʻo e Siasí ʻa e Ngaahi Ouau Kuo Māú pea tokoniʻi koe ke fakakakato e ngaahi ouaú. ʻI he kakato pē ʻa e ngāué, te ke maʻu ha fanongonongo ʻi hoʻo Ngaahi Fanongonongo ʻi he FamilySearch.
Te ke lava ʻo maʻu ʻa e ngaahi hingoa kuo vahevahe ka ʻoku teʻeki ke fakakakató ʻi he taimi ʻoku ʻi ai ha feituʻu lahi ange ʻi hoʻo lisi taʻofi fakatatalí. Kapau ʻoku kau ʻi ha taʻofi fakatatali kuo vahevahe ha ngaahi ouau kuo ʻosi paaki pe fakakakato, he ʻikai ke toe lava ʻo toʻo hono vahevahe ʻo e ngaahi ouau ko iá.
ʻOku lau nai ʻa hono vahevahe ʻo e ngaahi hingoa fakafāmilí mo e temipalé ki heʻeku fika fakangatangatá?
ʻI he taimi ʻokú ke vahevahe ai ha hingoa fakafāmili mo e temipalé, ʻoku ʻikai lau ia ki he fakangatangata ʻo hoʻo fakatatalí.
ʻOku lau nai e ngaahi hingoa ʻoku vahevahe mo ha kulupu fakafāmilí ki heʻeku fika fakangatangatá?
ʻI he taimi ʻokú ke vahevahe ai ha hingoa fakafāmili mo ha kulupu fakafāmili, ʻoku lau leva ia ki he fika fakangatangata ʻo hoʻo fakatatalí. ʻE fakaʻaongaʻi ʻa e ngaahi ʻaho angamaheni ʻoku ʻosi ki aí hili hono toe fakaava kakato ʻo e ngaahi temipalé ʻi he tūkunga hono 4.
ʻOku lau fēfē nai ʻa hono vahevahe ʻo ha ngaahi hingoa fakafāmili mo ha kāinga pe mēmipa kehe ʻo e Siasí ki heʻeku fika fakangatangatá?
Te ke lava ʻo vahevahe e ngaahi hingoa fakafāmilí ki ho kāingá pe kaungāmeʻá ʻaki haʻo ʻīmeili pe pōpoaki ʻi he FamilySearch. ʻOku ʻasi ʻi ha ʻīmeili pe pōpoaki ʻi he FamilySearch ʻa e ngaahi hingoá mo e ngaahi ouau ʻoku fiemaʻú. Kapau te nau tali ʻa e ngaahi fakatatalí, ʻe ʻave leva ia ki heʻenau lisi fakatatalí. ʻI he taimi ko ʻení, ʻoku ʻikai toe ʻasi leva ʻa e taʻofi fakatatalí ia ʻi hoʻo lisí, pea ʻikai ke toe lau ia ki hoʻo fika fakangatangatá.
Kapau te u vahevahe ʻa e ngaahi hingoa fakafāmilí mo e temipalé, ko e hā hono fuoloa ʻeku tatali ke fakakakató?
ʻOku faingataʻa ke tala pe ko e hā hono vave pea toki fakakakato ʻa e ngaahi ouau ʻoku vahevahe mo e temipalé. ʻOku kau heni ʻa e lahi ʻo e ngaahi ouau ʻoku vahevahe ʻe he niʻihi kehé pea mo e tokolahi ʻo kinautolu ʻoku omi ki he temipalé. ʻI he lolotonga ní, ko e ʻenitaumeni maʻá e houʻeiki tangatá ʻoku fuoloa taha ke fakakakató. Ko e ngaahi ouau kehé (papitaisó, hilifakinimá, mo e ʻinisitolí) ki he tangatá pe fefiné ʻoku ʻikai ke fuʻu fuoloa fēfē.
ʻI he Ngaahi Ouau Kuo Māú, ʻoku lava ke toe faingofua ange hono maʻu mo fakakakato ʻe he kau mēmipa ʻo e fāmilí mo e kāingalotu ʻo e Siasí ʻi he funga ʻo e māmaní ʻa e ngaahi hingoa kuo vahevahe mo e temipalé. ʻI he lahi ange ʻa e ngaahi temipale kuo langa ʻi he funga ʻo e māmaní, ʻoku toe tokolahi ange ai ha kāingalotu ʻoku nau malava ke kau atu ki hono fakahoko ʻo e ouau maʻá e pekiá. ʻE tokoni foki hono toutou fakaleleiʻi ʻo e founga vahevahé mo e tufakí ke vave ai hono fakakakató.
ʻOku ou saiʻia ange ke vahevahe ʻa e ngaahi kaati hingoa fakafāmili kuo pākí mo e kau mēmipa ʻo e fāmilí. ʻE lava nai ke u maʻu ha fakaʻatā makehe ki he fakangatangata ki he fakatatalí?
ʻOku fakaʻaongaʻi ʻa e fakangatangata ki he taʻofi fakatatalí ki he niʻihi kotoa pē ʻoku nau fakaʻaongaʻí.
Fakakaukau ke vahevahe ʻa e ngaahi hingoa fakafāmilí mo ho kāingá ʻo fakaʻaongaʻi ʻa e polokalama kulupu fakafāmili foʻoú. ʻI ha kulupu fakafāmili, ʻe lava ke paaki ʻe he kāingá ʻa e kātí ʻi he taimi ʻoku nau mateuteu ai ke ʻaʻahi ki he temipalé. ʻOku fakangatangata pē ʻa e ngaahi hingoa ʻokú ke vahevahé ki ha kulupu fakafāmili. Ka te ke lava ʻo sio ki he ngaahi ouau ʻi hoʻo lisí pea ko hai naʻá ne paaki kinautolú. Te ke lava ʻo muimuiʻi ʻa e fakalakalaka ʻi he ʻinitanetí pea maʻu mo e ngaahi fanongonongó ʻi he kakato ʻa e ngaahi ouaú.
Kapau te u vahevahe ha ngaahi taʻofi fakatatali ki ha ngaahi ouau pau maʻa ha kui, ʻoku anga fēfē hono lau e ngaahi ouau ʻoku ou laú ki he fakangatangatá?
ʻOku lau tuʻo taha pē ʻa e ʻotu takitaha ʻi hoʻo lisi taʻofi fakatatalí, ʻo aʻu pē ki he taimi ʻoku fakafofongaʻi ai ʻe he ʻotú ha ngaahi ouau lahi. Ko e meʻa tatau pē kapau te ke vahevahe ha konga ʻo e taʻofi fakatatali ko iá mo e niʻihi kehé.
ʻOku fakakau ʻa e ouau sila ki he mali ʻo ha tokotaha fakafoʻituituí ʻi ha ʻotu mavahe mei he ngaahi ouau kehé pea ʻoku lau maʻu pē ia ʻiate ia pē. ʻOku fakatahaʻi ʻa e ngaahi ouau kehe kotoa pē maʻá e fakafoʻituituí ʻi ha ʻotu fakatatali pē ʻe taha. ʻE lau ʻa e fakatatali ʻa e foʻi toko taha ʻoku fakakau kotoa ki ai ʻa e ngaahi ouaú, ko ha foʻi fakatatali ʻe 2.
Ko e hā ʻa e meʻa ʻe hoko kapau te u vahevahe ha hingoa fakafāmili mo e niʻihi kehé ʻi he ʻīmeilí pe pōpoakí, ka ʻoku laka ia ʻi he fika fakangatangata ʻa e tokotaha ʻokú ne maʻú?
ʻOku tatau pē ʻa e fika fakangatangata ʻa e lisi fakatatali ʻa e tokotaha takitaha. ʻE lava ke tali ʻe he kāingalotú ʻa e ngaahi hingoa ʻoku vahevahé ʻi he taimi ʻoku ʻi siʻi hifo ai ʻenau lisí ʻi he fakangatangatá.
Kapau ʻoku fonu ʻa e lisi ʻa e tokotaha haʻaná, ʻe kei ʻi hoʻo lisí pē ʻa e ngaahi hingoá. Te ke lava ʻo vahevahe ʻa e taʻofi fakatatalí mo e temipalé pe ko ha kulupu fakafāmili.
Kapau te u fakaʻaongaʻi ha polokalama ʻe taha ke fakatatali ʻa e ngaahi ouaú, ʻoku kei ʻi ai nai ha fika fakangatangata?
ʻOku ʻi ai ha polokalama faʻahi tolu ʻoku ngāue ʻi he FamilySearch ke tokoni ki he kāingalotú ʻi hono taʻofi fakatatali e ngaahi hingoa fakafāmilí. ʻOku ngāue ʻa e ngaahi polokalamá ʻi he Fuʻu ʻAkau Fakafāmili ʻa e FamilySearch pea ʻoku ʻi ai ʻa e fakangatangata tatau.
Hili ʻeku aʻu ki he fika fakangatangatá, ʻe fēfē haʻaku muimuiʻi ʻa e ngaahi hingoa fakafāmili te u fie taʻofi fakatatali ʻamui angé?
Fakaʻaongaʻi hoʻo Lisi Muimuiʻí ke fakaʻilongaʻi ʻa e ngaahi kui ʻoku ngalingali te ke fie taʻofi fakatatali ʻenau ngaahi ouaú ʻi he kahaʻú. Ke ʻai ke faingofua hono maʻu ʻi he lisí, te ke lava ʻo tānaki atu ʻa e fakaʻilonga Taʻofi Talifaki ʻa e Temipalé.
Ko e hā ʻoku tauhi ai ʻe he temipalé ‘a ʻeku kaati hingoa fakafāmilí hili ʻeku fakakakato ha ouau ki ha kui?
ʻI hono tuku ʻa e ngaahi kaati hingoa fakafāmilí ʻi he temipalé, ‘oku fakaʻatā ai ki he kau ngāue temipalé ke nau fakapapauʻi ‘oku ʻikai hiki tuʻo ua ‘a e ngāue ouaú, pea ʻoku tonu hono lekooti e ngaahi ouaú. ʻOku tokoni foki ʻa e foungá ni ke taʻofi ʻa e mafola ʻa e siemú pea taʻofi ʻa e taimi tatalí hili hoʻo ʻaʻahi ki he temipalé.
Ngaahi fakamatala fekauʻakí
ʻE founga fēfē haʻaku vahevahe ʻa e ngaahi hingoa fakafāmilí mo e temipale?
ʻE founga fēfē haʻaku vahevahe ʻeku ngaahi hingoa fakafāmilí mo e fāmilí mo e ngaahi kaungāmeʻá ʻi he ʻīmeilí?
ʻE founga fēfē haʻaku toʻo pe fakaʻatā e ngaahi hingoa fakafāmilí mei heʻeku lisi fakatatali ʻi he temipalé?
Fakangatangata ʻo e taimi ki hono taʻofi fakatatali ʻo e ouau fakatemipalé
ʻOku founga fēfē ʻeku fakaʻaongaʻi ʻa e lisi Muimuiʻi ʻi he Fuʻu ʻAkau Fakafāmilí ke muimuiʻi ʻaki ha ngaahi kui ʻoku nau fiemaʻu ha ngaahi ouau fakatemipalé?
FamilySearch Blog
ʻE founga fēfē haʻaku vahevahe ha ngaahi hingoa fakafāmili ʻo fakafou ʻi he ngaahi pōpoaki ʻi he FamilySearch?
Te u vahevahe fēfē ʻa e ngaahi ouaú mo ha kulupu fakafāmili?