Ирэх 3-р сард Олимпын алтан медальт Тара Дэвис-Вүүдхолл, Паралимпын алтан медальт Хантэр Вүүдхолл нар Рүүтстэк 2025-д хүрэлцэн ирж үндсэн сэдвээр захиасаа хуваалцах гэж байна. Гэр бүлийн хос сорилт бэрхшээлийг бууж сөхрөлгүй даван туулж, харилцан бие биедээ урам зориг хайрлаж байсан явдал нь гэр бүлийн агуу түүхийн мөн чанарыг үлгэрлэн харуулдаг. Энэ нь олж нээх, харилцан холбогдохын хүч болон түүхүүд үргэлж гол байр суурь эзэлдэг Рүүтстэкийн хувьд тэднийг энд оролцоход хамгийн тохирох хүмүүс болгож байгаа юм.
Эхнэр, нөхөр хоёр хоёулаа хөнгөн атлетикийн тамирчид. Тара уртын харайлт, 60 болон 100 метрийн саадтай гүйлтийн төрөлд өрсөлддөг. Тэрээр 2020 оны Токиогийн, 2024 оны Парисын Олимпын наадамд оролцсон. Хантэр 100 метрийн Т64, 400 метрийн Т62, 4х100 метрийн универсал буухианд өрсөлддөг. Тэрээр 2016 оны Рио, 2020 оны Токио, 2024 оны Парисын Паралимпын наадамд оролцсон.
Тара, Хантэр хоёр хөнгөн атлетикийн спортын дэлхийн оргилд хүрэх замдаа асуудал, саад бэрхшээлтэй тулгарч байсан. 2020 оны Токиогийн олимпод Тара 6-р байр эзэлж, мөн тэр жил нуруундаа цуурал авсан нь түүнийг өөрийн чадварт эргэлзэхэд хүргэсэн юм. Тэр цагаас хойш тэр сэтгэцийн эрүүл мэндийн асуудалтай тэмцэж байгаагаа олон нийтийн мэдээллийн хэрэгслээр нээлттэй ярих болсон. Хантэр 11 сартай байхдаа өвдөгнийхөө доогуурхан хоёр хөлөө тайруулсан бөгөөд “илд” хэмээн нэрлэгддэг уян хатан L хэлбэрийн хиймэл хөлтэй өрсөлддөг.
Хэрэв та сорилт бэрхшээлтэйгээ зоригтойёо нүүр туулж, гэр бүлээсээ хүч чадал авсан хүмүүсийн түүхийг сонсох дуртай бол Тара Дэвис-Вудхолл, Хантэр Вудхолл хоёрын амьдралын түүх сонирхлыг тань татна.
Тара, Хантэр хоёрын түүх
Хантэр Вудхолл, Тара Дэвис-Вудхолл хоёрын түүх 2017 онд Айдахогийн Покателло хотод болсон ахлах сургуулийн гүйлтийн тэмцээн дээр танилцаж эхэлдэг. Тарагийн ярьснаар Хантэрыг гүйж, хөвгүүдийн 400 метрийн гүйлтийн тэмцээнд түрүүлэхийг харжээ. Уралдааны дараа түүнийг тэврэх хэрэгтэй гэсэн бодол Тарад төрсөн байна. Тэр өдөр төрсөн өдөр нь болж таарсан Хантэр найздаа гэрлэх охинтойгоо саяхан танилцлаа гэж хэлжээ.
Ахлах сургуулиа төгсөөд Тара, Хантэр хоёр коллежид элсэн оржээ. Тара Жоржиагийн Их Сургуульд орж, дараа нь Техасын Их Сургуульд шилжиж, Хантэр Арканзасын Их Сургуульд сурав. Хантэр 1-р ангиллын тэтгэлэг хүлээн авсан анхны хоёр хөлгүй хүн байв. Дараагийн 4 жилийн турш тэр хоёр утсаар болон олон нийтийн мэдээллийн хэрэгслээр харилцжээ. Энэ хугацаанд Тара дотор болон гадна уртын харайлтаар NCAA-гийн аварга болж, улмаар 2020 оны Токиогийн Олимпод оролцсон байна. Хантэр мөн адил Бүх Америкийн шилдгийн шагнал хүртэж, Токиогийн 2020 оны Паралимпын наадмын эрэгтэйчүүдийн 400М Т62 төрлөөс хүрэл медаль авчээ.
Тэр хоёр хоёулаа 2021 онд сургуулиа төгссөн бөгөөд дараа жил нь Хантэрын 5 жилийн өмнө төрсөн өдрөөрөө зөгнөн хэлсэн үг нь биелж, Хантэр, Тара хоёр гэрлэв.
Хоёр тамирчин хоёул 2024 оны Парисын наадамд бэлтгэж, Тара олимпод, Хантэр паралимпод оролцжээ. Тара эмэгтэйчүүдийн уртын харайлтаар алтан медаль, Хантэр 4x100 метрийн буухиагаар хүрэл медаль, эрэгтэйчүүдийн Т62 400 метрийн гүйлтийн төрөлд алтан медаль тус тус хүртэв.
Алхам тутамд бие биедээ урам зориг өгөх
Спортынхоо шилдэг тамирчдын хувьд Тара, Хантэр хоёр маш олон цагийг хамтдаа өнгөрүүлдэг. Нэг мөрөөдөлтэй байна гэдэг нь дасгал сургуулилтын үеэр сайн, муу зүйл тохиолдох үед бие биеэ урамшуулах, зоригжуулах, дэмжих тоо томшгүй олон боломж гарч ирдэг гэсэн үг юм.
Хантэр саяхны нэгэн ярилцлагадаа тэдний харилцаа нэг баг гэсэн ойлголт дээр түшиглэдэг талаар ярьсан юм. Том үйл явдал болохоос хэдэн сарын өмнө тэд бүх зүйлээ хамтдаа хийдэг аж. Тэд нэг дасгалжуулагчтай бөгөөд хамтдаа дасгал сургуулилтаа хийдэг. Тэд хамтдаа хоол хийж, хооллодог. Тэд орондоо хамтдаа орж, хамтдаа сэрэхэд анхаардаг. Хантэр: “Энэ нь яг дэргэдээ шахаж шаардаж, хариуцлага тооцдог, мөн энэ түвшинд өрсөлдөхөд ямар их золиослол, цаг зав, хариуцлага шаардагддагийг ойлгодог хамтрагчтай байхтай адил” гэж хэлсэн юм.
Тара, Хантэр хоёр гэрлэснээсээ хойш аян замынхаа ихэнх хэсгийг олон нийтийн мэдээллийн хэрэгслээр хуваалцаж, хөгжөөн дэмжигчдэдээ бэлтгэл хийж байгаа Олимпын тамирчны амьдрал ямар байдгийг харах боломжийг олгожээ. Тэдний постууд өөдрөг, эерэг уур амьсгалыг түгээдэг. Хэрэв ямар нэг уриа байдаг бол энэ нь тэдний харилцаа, хүнд хэцүү зүйлсийг хийхэд бие биедээ туслах, мөн үзэж байгаа үзэгчдээ мөн адил үйлдэхэд урамшуулан дэмжих талаар байна. 2024 оны Парисын олимпын наадамд Тара уртын харайлтын төрөлд алтан медаль хүртэж байгааг үзүүлсэн YouTube видеог нь хэдэн арван сая удаа үзжээ. Үзэгчдийн суудлын эхний эгнээнд буй Хантэрыг тэврэхээр яаран гүйж буй Тарагийн дүр зураг бидний харилцаа амьдралд ямар чухал үүрэг гүйцэтгэдгийн тод томруун жишээ юм.
Рүүтстэк 2025-д Вүүдхоллынхонтой хамт хүн хоорондын харилцааны хүчийг магтан дуулцгаая
Олон жилийн турш Рүүтстэкийн үндсэн тайзан дээр олон итгэмээргүй авьяаслаг хүн гарч ирж байсан ч тэдний дунд Вүүдхоллынхон шиг хурдан эсвэл хол үсэрч чадах хүн бараг байхгүй байсан биз ээ! Өвөрмөц ч гэлээ Тара, Хантэр хоёрын шаргуу хөдөлмөрлөж, хамтдаа байж, багийн хувьд сорилт бэрхшээлээ даван туулсан тухай түүх бидний хүн нэг бүрд ойр тусдаг бөгөөд таныг урамшуулан зоригжуулж, амьдралд тань байгаа чухал хүмүүсийнхээ харилцаанд илүү их талархах хүслийг төрүүлэх нь гарцаагүй. Гэхдээ битгий ганцаараа үзээрэй. Найзаа эсвэл хайртай нэгнээ энэхүү онцгой үйл ажиллагаанд хамтдаа оролцоход урь. Тэдний бидэнд үлгэрлэн харуулснаар биднийг хамт байгаа үед сүнслэг өдөөлт илүү чөлөөтэй орж ирдэг бололтой!
Тара Дэвис-Вүүдхолл, Хантэр Вүүдхолл хоёрыг Солт Лэйкт болох Рүүтстэк 2025-д амьдаар харахын тулд одоо бүртгүүлнэ үү. Эсвэл онлайн үйл ажиллагаанд бүртгүүлж, дэлхийн аль ч өнцөг булангаас үнэ төлбөргүй үзэж болно.
Рүүтстэк гэж юу вэ?
Рүүтстэк бол суралцах, урам зориг авах, гэр бүлийн түүхээр дамжуулан хоорондоо холбогдох газар юм. FamilySearch байгууллагаас зохион байгуулж, угийн бичгийн судалгаа явуулдаг бусад байгууллагын ивээн тэтгэж буй энэхүү арга хэмжээний хүрээнд танд гэр бүлийн түүхийн ажлыг урьд өмнө хийж байгаагүй арга замаар хийхэд туслах мэргэжилтнүүдийн оролцсон зуу зуун хичээл, зөвлөгөө, тустай арга барил санал болгох видео, урам зориг өгөх түүхүүд бидэнд бий. Хүссэн үедээ ашиглаж болох манай сургалтын номын санд зочил эсвэл бидний онлайн болон танхимаар зохион байгуулах дараагийн чуулга уулзалтад оролцох төлөвлөгөө гарга.
Холбоотой нийтлэл
