Дана Танамачитай танилцана уу: Дэлхийд нэрд гарсан зураач, Рүүтстэкийн үндсэн илтгэгч

Дана Танамачи уран зургийнхаа өмнө чихнийхээ ард үсээ хийж байгаа нь
Гэрэл зургийг Вэнди Пүүл/Laity Lodge

Рүүтстэк нь зураач Дана Танамачи Рүүтстэк 2025-д үндсэн илтгэгчээр оролцох гэж байгааг зарлаж байгаадаа баяртай байна. Данагийн бүтээл ихэвчлэн хүний үзүүлэх нөлөө, гэр бүлийн холбоо зэргийг илэрхийлдэг учир энэ чанар нь түүнийг Рүүтстэкд төгс тохирох нэгэн болгож байгаа юм. Хэрэв та урлаг, гэр бүлийн түүхэнд дуртай бол энэ таны сонирхолд таарах Рүүтстэкийн илтгэл юм. Дана Танамачитай танилцаарай. Дараа нь Солт Лэйк Ситид ирж Рүүтстэк дээр түүнийг өөрийн биеэр ирж эсвэл дэлхийн аль ч өнцөг булангаас онлайнаар үзнэ үү.

Данатай танилцана уу

Данагийн уран бүтээлүүд O Magazine, Time Magazine-ы нүүр болон АНУ-ын шуудангийн марк дээр хүртэл нийтлэгдэж байсан! Тэрээр 2022 онд Empire State Building доторх Старбакст гурван давхартай дүйцэх хэмжээний ханын зураг зурж өгсөн бөгөөд Дундад зууны зураг чимэглэл бүхий Библийн орчин үеийн хувилбар болох Англи хэл дээрх жишиг Библийн 500 гаруй зургийг алтан бэхээр бас зуржээ. Тэр энэ бүхнийг болон өөр олон бүтээлээ дэлхийн хамгийн том брэнд, нэрсийн ажлыг хийж өгч байхдаа амжиж хийсэн!

Урлагийн шинэ төрлийг нээсэн

Бараа бүтээгдэхүүнийх нь уут сав, баглаа боодол нь дангаараа үзэсгэлэн гоо агуулдаг дуртай дэлгүүр танд байдаг уу? Самбар дээрх бичээс нь цэс гэхээс илүү урлагийн бүтээл мэт санагддаг ресторанд та очиж үзэж байсан уу? Тэр ч бүү хэл та өмнө нь зогсож зураг авхуулахыг хүсэж байсан байж ч магад! Хэрэв та эдгээр асуултын аль нэгэнд нь тийм гэж хариулсан бол танд Бруклинаас гаралтай зураач Дана Танамачигийн бүтээл таалагдана.

Данагийн асар их нэр хүнд, арвин их бүтээлийг олж мэдээд тэр бүтээлээ олон арван жилийн турш гаргаж байгаа эсвэл амжилт ололтынх нь цаана уран бүтээлийг нь хариуцсан захирал, маркетингийн ажилтнуудын бяцхан баг байгаа гэж та бодож байж болох юм. Үнэндээ Данагийн дэлхийд нэртэй зураач болох аян зам санамсаргүй тохиолдлоор эхэлсэн бөгөөд бүтээлээ туурвихыг нь дэмжиж, тэдгээрийг нь бусдад хуваалцдаг найзууд нь байгаагүй бол огт эхлэхгүй байх байсан биз ээ.

Уг түүх 2009 оны нэгэн өдөр Дана найзынхаа гэрт үдэшлэгт зориулан байшингаа чимэглэхэд нь тусалснаар эхэлсэн. Үдэшлэгийн сэдэв Агуу Гатсби байлаа. Байшин дотроо Данагийн найз нь шохойгоор зурдаг хана байрлуулсан байсан бөгөөд тухайн үед ийм ханатай байх нь ховор зүйл байж. Чимэглэж байх зуураа найз нь Данад шохой өгөөд, уг үдшийн сэдвийг онцлох ямар нэгэн зүйлийг ханан дээр бичиж өгөхийг түүнээс хүсжээ. Дана үсэг бүрийг нэг нэгээр нь бичин 920-иод оны Жаазын эрин үеийн уур амьсгалыг тусган харуулахыг чадлаараа хичээжээ. Тэр оройн үдэшлэг дээрх хүмүүст уг бүтээл үнэхээр таалагдсан байв.

Шохойн зургаас Nike хүртэл

“Амьдралын хамгийн сайхан зүйлсээ хуваалцах ёстой” гэсэн үг бүхий шохойн зураг.
Данагийн уран бүтээлээс

Мэдээж Данагийн уран бүтээлийн зургийг тэр орой авсан хүмүүс дараа нь олон нийтийн мэдээллийн хэрэгслээр тавьжээ. Дараагийн хэдэн долоо хоногт Дана бусад найзынхаа үдэшлэгт зориулан самбар дээр нь бичиж эхэлсэн бөгөөд тун удалгүй өмнө нь хэзээ ч уулзаж байгаагүй хүмүүс түүнтэй холбогдон чухал үйл ажиллагаанд нь зориулан мөн адил бүтээл хийж өгөхийг хүсэх болов.

Дараа нь бизнес эрхлэгчид ч Данатай холбоо барьж, дэлгүүрийнхээ дотор заслыг хийхдээ түүнийг хөлслөх болжээ. Дана ч харин өөрийн зүгээс өрнөж буй үйл явцаас таашаал авахыг хичээж байв. “Эхэндээ би ажлаа онлайнд огт тавьдаггүй байлаа. Учир нь дотоод шүүмжлэгч маань надад үүнийг өөр хэн нэгэн, надаас хавьгүй илүү сайн хийж байгаа гэж хэлж байсан юм. Гэвч үүнийг надаас өөр хэн ч хийхгүй байгаа нь тодорхой болов. Харин ойролцоогоор дараагийн таван жилийн турш намайг “Шохойтой охин” гэж нэрлэх болсон юм. Яван явсаар би “Шохойн хатан” болж шат ахив. Ийн дуудаж байсан ч Дана нэрээрээ дуудуулахыг би илүүд үзэж байлаа” (Dana Tanamachi, Adobe Max, 2023; энэ нийтлэл дэх бүх эшлэлийг энэхүү эх сурвалжаас авав).

Яваандаа компаниуд Данагийн загварыг шошго, боодол, цүнх, номын хавтас, зурагт хуудас гэх мэт бизнесийнхээ бусад хүрээнд ашиглахыг хүсжээ. Дана: “Шинэ захиалга бүр намайг гайхшируулж, даруусгадаг байсан. Тоглоогүй шүү. Үнэндээ хүмүүс надад үүнийг хийсний төлөө мөнгө төлж байгаа гэдэгт би итгэж чадахгүй байсан” гэсэн юм.

Энэ хооронд Данагийн үйлчлүүлэгчдийн жагсаалт өссөөр байв. Өнөөдөр энэ жагсаалтаас цөөнийг нь дурдвал бизнесийн ертөнцийн хамгийн том брэнд болох Nike, Google, Target, Starbucks зэрэг компаниуд байна. Та дэлгүүрээр явж байхдаа түүний бүтээлийг харж байснаа өөрөө ч мэдэхгүй эсвэл наад зах нь түүний хэв маягийг дуурайх гэсэн компанитай харилцаж байсан ч байж магад.

Гаман-ы нөлөө

Дана амьдралынхаа туршид японы гаман хэмээх “Тэсэж тэвчиж чадахааргүй зүйлийг тэвчээртэй, нэр төртэй даван туулах” гэсэн ойлголтоос мөн өвөг дээдээс нь бүтээлч байдлын хүчийг ашиглаж, амьдралынхаа хүнд цаг үеэр гаманыг дагаж байсан арга замуудаас нь сэтгэлийн амар амгалан, хүч чадлыг авч байсан байна.

Данагийн япон гаралтай америк элэнц өвөө, эмээ нар Дэлхийн II дайны үед хорих лагерьд амьдарч байхдаа танилцжээ. Тэд хоёулаа 19-тэй байхдаа гэр бүл болж, Калифорнийн далайн эрэг дэх гэр орноо орхин, цөл газар луу нүүхээс өөр аргагүй болсон байв. Хэдийгээр Данагийн элэнц өвөө, эмээ нь тав тухгүй, хүнд хэцүү нөхцөлд, тэнд хэр удаан амьдрахаа мэдэхгүй байсан ч хаягдал цаас, модны өөдөс, хаясан хуванцар гэх зэрэг олдсон тарчигхан материалаар бүтээл урлаж, сэтгэлийн амар амгалан, хүч чадлыг олсон ажээ. Тэд зөвхөн өөрсдөдөө төдийгүй лагерьд байгаа хүүхдүүдэд энэхүү хэвийн бус нөхцөл байдлыг “хэвийн болгох” гэсэндээ ийн хийж байж. Тэдний түүхийг судалснаар Дана одоо түүний гэр бүлд удам дамжин өвлөгдөн хадгалагдаж буй нарийн ур хийцтэй оригами бүтээлүүдээс гаманыг олж хардаг. Түүний дуртай бүтээлүүдийн нэг бол гэр бүлийнх нь нэг гишүүний чүдэнзний мод, хогийн савнаас авсан тамхины хайрцгийн цаасаар хийсэн алгын чинээ шүхэр юм.

Саад бэрхшээлийн дундах бүтээл

Хэдэн жилийн өмнө тэрээр Дундад зууны үед бүтээсэн Библийн гоёмсог гар бичвэрийг уншигчдад сануулах зорилготой Англи хэл дээрх жишиг Библийн 500 гаруй зургийг алтан бэхээр гараар зурах төслийн ажлыг хүлээн авах үед гэр бүлийнх нь түүх, уран бүтээлийн өв нь Данагийн хувьд онцгой утга учир агуулах болсон юм. Энэ төсөл нь Данагийн амьдралын хамгийн хэцүү, хүнд үетэй давхацсан бөгөөд тухайн үед тэр бууж өгөх, төслөө хойшлуулах талаар нухацтай бодож байжээ. Өвөг дээдсийнх нь гаман-ы үлгэр жишээ цөхрөлтгүй байхад түүнд сүнслэгээр нөлөөлжээ.

Дана Танамачи шат дээр зогсон ханан дээр тууз нааж байгаа гэрэл зураг.
Гэрэл зургийг Вэнди Пүүл/Laity Lodge

“Би өмнө нь нэгэн хүн амьдралын хүнд хэцүү цаг мөчийн талаар чи нэг бол яг одоо туулж байгаа аль эсвэл туулах гэж байгаа, эсвэл туулаад дуусаж байгаа гэж хэлэхийг сонсож билээ. Эхлээд сонсоход сэтгэлээр унамаар ч юм шиг сонсогдож магад. Хэдий бид амьдрал бидэнд юу авчрахыг мэдэхгүй ч бэрхшээлтэй тулгарахдаа хэрхэн хүлээн авахаа, ямар байр суурьтай байхаа хянаж чадна. Бид хүлээн авах уу эсвэл зугтах уу гэдгээ сонгож болно” гэж тэр хэлсэн. Өмнө нь амьдарч байсан хүмүүсийнхээ жишээг даган Дана тулгарсан бэрхшээлээ хүлээн авахыг сонгосноор ажил нь утга учир, нинжин сэтгэлийн хувьд цоо шинэ түвшинд хүрсэн юм.

Энэ төсөл нь Данагийн амьдралд арилшгүй мөр үлдээж, сорилт бэрхшээлд хандах хандлагыг нь өөрчилсөн юм. Тэр: “Бидний энэ цаг үед саад тотгороор дүүрэн энэхүү замаас гаргах гарц мундахгүй их бий. Бид мэдрэмжээ дарах, зайлсхийх, эсэргүүцэх эсвэл зүгээр л асуудлаа шийдвэрлэлгүй хойшлуулах олон арга замыг сонгож болно. Гэхдээ зовлон шаналлаасаа зугталгүй, тэсвэрлэж, тууштай байх үед энэ нь бидний сэтгэлийн гүнд, далд байгаа тэсвэр хатуужил, эр зориг гэх гайхалтай зан чанарыг маань гаргаж ирдэг” гэсэн юм.

Рүүтстэкээр Дана Танамачитай хамт Гэр бүл, түүх, гаманыг магтан дуулцгаая!

Сүнслэгээр өдөөгдөхөд бэлэн үү? Дана Танамачи хэрхэн дэлхийд алдартай зураач болсон аян замынх нь тухай уншихаас илүү түүхээ өөрөө ярихыг нь сонсохоос өөр сайхан зүйл үгүй! Рүүтстэкт биечлэн эсвэл онлайнаар бидэнтэй нэгдэн, түүний хэлэх үгийг сонсоорой. Тэр бол гэр бүлийн тань түүхийг магтан дуулах дэлхийг хамарсан үйл ажиллагаанд тохирох төгс илтгэгч юм. Дараа нь та үлдэн, зарим хичээлтэй танилцаж, өөр олон гайхалтай танилцуулгыг сонсож, гэр бүлийн түүхээ олж мэдэхэд тань туслах үнэт ур чадваруудын талаар мэдэж ав.


Рүүтстэк гэж юу вэ?

Рүүтстэк бол суралцах, урам зориг авах, гэр бүлийн түүхээр дамжуулан хоорондоо холбогдох газар юм. FamilySearch байгууллагаас зохион байгуулж, угийн бичгийн судалгаа явуулдаг бусад байгууллагын ивээн тэтгэж буй энэхүү арга хэмжээний хүрээнд танд гэр бүлийн түүхийн ажлыг урьд өмнө хийж байгаагүй арга замаар хийхэд туслах мэргэжилтнүүдийн оролцсон зуу зуун хичээл, зөвлөгөө, тустай арга барил санал болгох видео, урам зориг өгөх түүхүүд бидэнд бий. Хүссэн үедээ ашиглаж болох манай сургалтын номын санд зочил эсвэл бидний онлайн болон танхимаар зохион байгуулах дараагийн чуулга уулзалтад оролцох төлөвлөгөө гарга.


Холбоотой нийтлэл

-аар/ээр  Maggie Stevens
December 8, 2025
Рүүтстэк 2025 арга хэмжээний онцлох нэгэн үйл явдал бол гол тайзан дээр уран бүтээлээ толилуулсан Мэт Шо, Саванна Шо хоёрын дуу хоолойн ер б…
-аар/ээр  David Nielsen
December 23, 2024
Гэр бүлийнхнийхээ талаар олж нээх дэлхийн хамгийн том арга хэмжээ, угийн бичгийн чуулган болох Рүүтстэк нь домогт Нэлсон Мандэлагийн ач хүү …
-аар/ээр  David Nielsen
December 23, 2024
Ирэх 3-р сард Олимпын алтан медальт Тара Дэвис-Вүүдхолл, Паралимпын алтан медальт Хантэр Вүүдхолл нар Рүүтстэк 2025-д хүрэлцэн ирж үндсэн сэ…

Тэмдэглэгээ
Зохиогчийн тухай