“Бидний ураг төрөлтэйгөө холбоотой байх төрөлхийн хүсэл маань ариун сүмийн нандин ёслолуудаар дамжуулан өвөг дээдэстэйгээ холбогдох үед биелэгддэг.”
(Рассэлл М.Нэлсон, “Хайраар холбогдсон үе үеийнхэн,” Ensign, May 2010, 92 эсвэл 2010 оны 4-р сарын Ерөнхий чуулган, 102)
Тэнгэрийн хаант улсад орохын тулд бүх хүн баптисм хүртэх ёстой хэмээн Есүс заасан. Та баптисм хүртэхдээ, Христийн жишээ болон сургаалыг дагана гэж Бурхантай гэрээнд ордог. Баптисм хүртсэнийхээ дараа та өвөг дээдэстээ ариун гэрээнүүд хийхэд нь тусалж чадна.
Энэ нийтлэл танд залбиралтайгаар хамаатан садныхаа мэдээллийг цуглуулж, ариун сүмд очиж тэдний өмнөөс баптисм хүртэхэд удирдах болно.
Хэрэгтэй мэдээллүүдийг цуглуул
Хамаатан садныхаа мэдээллийг цуглуулж, тэдний баптисмын хүсэлт гаргахад FamilySearch.org-ыг ашигла.
1. FamilySearch-д аккаунтаа үнэгүй үүсгэ.
FamilySearch.org эсвэл Гэр бүлийн мод ашиглан аккаунт үүсгэ. Есүс Христийн Хожмын Үеийн Гэгээнтнүүдийн Сүмийн гишүүн мөн эсэхээ заавал баталгаажуулна уу. FamilySearch танаас Сүмийн гишүүнчлэлийн дугаарыг тань асуух болно. Та энэ дугаарыг өөрийн ариун сүмийн зөвшөөрлийн бичиг дээрээс харж болно, мөн тойргийн бичиг хэргийн ажилтан эсвэл бишопын зөвлөлийн гишүүнээс асууж болно.
2. Гэр бүлийн модонд хамаатан саднаа нэмэх.
FamilySearch нь Гэр бүлийн мод-ыг ашиглан аль аль хамаатны ёслолуудыг дуусгасан, алийг нь дуусгаагүй байгааг бүртгэдэг.
Гэр бүлийн мод дээр ариун сүмд ёслолыг нь үйлдэх өвөг дээдэстэй таныг холбосон үе удмын ерөнхий мэдээллийг оруул. Жишээлбэл: Хэрэв та өвөө/эмээгийнхээ ёслолыг хийх гэж байгаа бол эхлээд эцэг/эхийнхээ нэрийг оруулаад дараа нь өвөө/эмээгээ нэмж оруулна. Нас барсан хүнд ёслол захиалахын тулд уг хүний нэр, хүйс, төрөлт, гэрлэлт эсвэл нас баралт зэрэг амьдралд нь тохиолдсон ядаж нэг үйл явдлын огноо ба байршлыг бөглөж оруулах хэрэгтэй.
Нас барсан өвөг дээдсийг нэмэх үед FamilySearch танд Гэр бүлийн мод дээр өмнө нь оруулсан байж болох боломжтой нэрсийг харуулдаг. Эдгээр боломжтой нэр нь уг хүний өмнөөс ёслолыг өмнө нь хийж дуусгасан эсэхийг мэдэхэд танд тусалдаг.
3. Гэр бүлийн нэрийн картыг хүсэх
Гэр бүлийн нэрийн карт нь ариун сүмд аль хүний өмнөөс ёслол үйлдэж байгааг тань харуулдаг. Хамаатан саднаа Гэр бүлийн модонд нэмсний дараа тухайн хувь хүний хуудсан дээрх Ёслолууд хуудсыг ашиглан ёслолыг захиална. (Доорх жишээг харна уу.)
Хэрэв хамаатан садан нь сүүлийн 110 жилийн дотор нас барсан бол гэр бүлийн нэрийн карт бэлтгэхээс өмнө хамгийн ойрын гэр бүлийн гишүүнээс зөвшөөрөл авна. (Тусгай зөвшөөрөл хэрхэн хүсэх тухай эндээс уншина уу.)
Жич: Та төрөл садандаа үйлчлэхдээ бусад амьд гэр бүлийн гишүүний хүслийг хүндэтгэх нь чухал байдаг. Зөвшөөрөл хүсэхдээ ариун сүмд хийдэг үйлчлэл нь хайраар хийгддэг бөгөөд нас барсан хүмүүс уг ёслолыг хүлээн авах эсэхийг өөрсдөө шийддэг гэдгийг тайлбарлах нь зүйтэй байж болно.
Гэр бүлийн нэрийн хүсэлтийг илгээсний дараа FamilySearch танаас гэр бүлийн нэрийн картыг өөрөө хэвлэх эсвэл ариун сүмд хэвлэхээр бол уг мэдээллийг танд өгөх сонголтыг асууна.
Ариун сүмд үйлчлэх
Та ариун сүмд гэр бүлийнхээ төлөө үйлчлэхдээ одоо үеийн төлөөлөгчдийн амласан зарим адислалыг хүртэж чадна.
“Та өвөг дээдсээ илүү хайрлаж, тэдэнд илүү их талархах болно. Аврагчийн тухай таны гэрчлэл илүү гүн гүнзгий, бат бөх болно. Та нар өсөн нэмэгдэж буй дайсны нөлөөнөөс хамгаалагдах болно гэдгийг би та нарт амлаж байна”.
Дэвид A.Бэднар, “Хүүхдүүдийнх нь зүрх сэтгэл эцгүүд уруугаа эргэх болно,” Ensign Nov. 2011, 26–27 эсвэл 2011 оны 10-р сарын Ерөнхий чуулган, 28–31
