កម្មវិធីស្រាវជ្រាវក្រុមគ្រួសារគឺជាការប្រមូលផ្ដុំទិន្នន័យពង្សាវលីដ៏ធំបំផុតមួយនៅទូទាំងពិភពលោក ដែលដកស្រង់ចេញពីប្រភពស៊ីវិល សាសនា និងប្រភពផ្សេងទៀត ដែលអ្នកស្រាវជ្រាវម្នាក់ៗត្រូវវាយតម្លៃសម្រាប់តម្លៃពង្សាវលីរបស់ពួកគេ ។ ឥឡូវនេះ មែកធាងគ្រួសារនៃកម្មវិធីស្រាវជ្រាវក្រុមគ្រួសារផ្ដល់លទ្ធភាពដល់អ្នកប្រើប្រាស់ឲ្យរៀបឯកសារស្តីពីទំនាក់ទំនងគ្រួសារដែលប្រតិព័ទ្ធភេទដូចគ្នា ។
ដោយស្របជាមួយនឹងគោលលទ្ធិនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះមានតែអាពាហ៍ពិពាហ៍រវាងមនុស្សដែលមានភេទផ្ទុយគ្នាប៉ុណ្ណោះ ទើបមានលក្ខណៈជាផ្លូវការ ឬអាចផ្សារភ្ជាប់នៅក្នុងព្រះវិហារបរិសុទ្ធបាន ។
ការធ្វើបច្ចុប្បន្នភាពសំណួរ និងចម្លើយសម្រាប់ទំនាក់ទំនងនៅក្នុងមែកធាងគ្រួសារនៃកម្មវិធីស្រាវជ្រាវក្រុមគ្រួសារ
១. ហេតុអ្វីកម្មវិធីស្រាវជ្រាវក្រុមគ្រួសារធ្វើនូវកិច្ចការនេះ ?
មែកធាងគ្រួសារនៃកម្មវិធីស្រាវជ្រាវក្រុមគ្រួសារត្រូវបានរចនាឡើងដើម្បីលើកកម្ពស់ដល់ភាពត្រឹមត្រូវខាងពង្សាវលីដោយផ្អែកលើកំណត់ត្រាប្រភពដើម ។ មែកធាងគ្រួសារផ្ដល់លទ្ធភាពដល់អ្នកប្រើប្រាស់ឲ្យរៀបឯកសារស្តីពីរាល់ទំនាក់ទំនងគ្រួសារទាំងអស់ រួមទាំងអាពាហ៍ពិពាហ៍អ្នកដែលប្រតិព័ទ្ធភេទដូចគ្នា និងការសុំកូនមកចិញ្ចឹមរបស់អ្នកដែលប្រតិព័ទ្ធភេទដូចគ្នាផងដែរ ។
២. តើនេះជាការផ្លាស់ប្ដូរមួយនៅក្នុងគោលលទ្ធិសាសនាចក្រឬ ?
អត់ទេ ។ កម្មវិធីស្រាវជ្រាវក្រុមគ្រួសារខិតខំរក្សាទុកជាឌីជីថល និងផ្តល់នូវការចូលទៅកាន់កំណត់ត្រាពង្សាវលី និងកំណត់ត្រាប្រវត្តិសាស្ត្រ ហើយនេះគឺជាផ្នែកមួយនៃកិច្ចខិតខំប្រឹងប្រែងរបស់កម្មវិធីនេះក្នុងការចងក្រងឯកសារគ្រួសារមនុស្សឲ្យត្រឹមត្រូវ ។ សាសនាចក្រគោរព ឬផ្សារភ្ជាប់អាពាហ៍ពិពាហ៍តែរវាងមនុស្សដែលមានភេទផ្ទុយគ្នាប៉ុណ្ណោះ ។
៣. តើស្វាមីភរិយាដែលមានភេទដូចគ្នាអាចផ្សារភ្ជាប់នឹងគ្នាបានដែរឬទេ ?
អត់ទេ ។ ដោយស្របតាមគោលលទ្ធិរបស់សាសនាចក្រ ស្វាមីភរិយាដែលមានភេទដូចគ្នាមិនអាចផ្សារភ្ជាប់នឹងគ្នាបានឡើយ ទោះជាពួកគេបានរៀបការស្របច្បាប់ហើយក្ដី ។ បុគ្គលដែលស្លាប់ ខណៈពេលដែលនៅរស់បានមានទំនាក់ទំនងស្វាមីភរិយាដែលមានភេទដូចគ្នា ឬដែលជាភាគីម្ខាងនៃអាពាហ៍ពិពាហ៍ភេទដូចគ្នា អាចទទួលបានរាល់ពិធីសាសនាផ្សេងៗដែលមាននៅក្នុងព្រះវិហារបរិសុទ្ធដែលគាត់មានសិទ្ធិទទួល ។
៤. តើកូនរបស់ស្វាមីភរិយាដែលមានភេទដូចគ្នាអាចផ្សារភ្ជាប់នឹងពួកគេបានដែរឬទេ ?
អត់ទេ ។ ស្របតាមគោលលទ្ធិនៃសាសនាចក្រ កូនៗមិនអាចផ្សារភ្ជាប់ទៅនឹងគូស្វាមីភរិយាដែលមានភេទដូចគ្នាបានទេ ទោះបីជាបានរៀបការស្របច្បាប់ហើយក្ដី ។
៥. តើកម្មវិធីស្រាវជ្រាវក្រុមគ្រួសារជាវិបសាយពង្សាវលីទីមួយដែលអនុញ្ញាតឲ្យមានការកត់ត្រាទំនាក់ទំនងប្រតិព័ទ្ធភេទដូចគ្នាមែនទេ ?
អត់ទេ ។ កម្មវិធីស្រាវជ្រាវក្រុមគ្រួសារពុំមែនជាវិបសាយពង្សាវលីទីមួយ ដែលអនុញ្ញាតឲ្យមានការកត់ត្រាទំនាក់ទំនងប្រតិព័ទ្ធភេទដូចគ្នានោះទេ ។
៦. តើខ្ញុំនឹងឃើញការផ្លាស់ប្ដូរអ្វីខ្លះនៅក្នុងមែកធាងគ្រួសារ ?
ឥឡូវនេះពេលដាក់បន្ថែមស្វាមីភរិយា ឬឪពុកម្ដាយម្នាក់ អ្នកប្រើប្រាស់អាចដាក់បន្ថែមស្វាមី ឬភរិយា ឬឪពុក ឬម្ដាយដែលប្រតិព័ទ្ធភេទដូចគ្នាបាន ។
៧. តើមានតម្រូវការអ្វីខ្លះដើម្បីដាក់បន្ថែមមុខងារនេះ ?
ប្រព័ន្ធមួយចំនួនសម្រាប់មែកធាងគ្រួសារ ដូចជា ការស្រាវជ្រាវមែកធាង និងកំណត់ត្រា ត្រូវបានរចនាឡើងវិញស្ទើរតែទាំងស្រុង ដើម្បីអនុញ្ញតឲ្យមានការរៀបចំឯកសារសម្រាប់ទំនាក់ទំនងប្រតិព័ទ្ធភេទដូចគ្នា ពីមុនមែកធាងគ្រួសារអាចដាក់ឲ្យប្រើមុខងារនេះបាន ។
៨. តើវាដំណើរការនៅក្នុងកម្មវិធីឧបករណ៍ចល័តមែកធាងគ្រួសារដែរឬទេ ?
ប្រាកដណាស់ ។ វានឹងដំណើរការនៅលើកម្មវិធីឧបករណ៍ចល័ត ពេលអ្នកប្រើប្រាស់ដំឡើងការធ្វើបច្ចុប្បន្នភាពដែលចាំបាច់ ។
៩. តើខ្ញុំអាចដាក់ស្នើទៅក្នុងកម្រងអនុស្សាវរីយ៍ ( ដូចជារូបថត ដំណើររឿង ឯកសារ ) ដែលទាក់ទងទៅនឹងទំនាក់ទំនងប្រតិព័ទ្ធភេទដូចគ្នាបានដែរឬទេ ?
បទដ្ឋានសម្រាប់ការដាក់ស្នើទៅក្នុងកម្រងអនុស្សាវរីយ៍ ( ដូចជារូបថត ដំណើររឿង ឯកសារ ) គឺដូចគ្នាសម្រាប់អ្នកប្រើប្រាស់គ្រប់រូប ហើយធ្វើតាម សេចក្ដីណែនាំ និងគោលនយោបាយស្ដីពីការដាក់បញ្ចូល ។
ជាប់ទាក់ទង
កម្មវិធីស្រាវជ្រាវក្រុមគ្រួសារនៃមែកធាងគ្រួសារដាក់បន្ថែមលទ្ធភាពដើម្បីរៀបឯកសាររាល់ទំនាក់ទំនងគ្រួសារទាំងអស់ ( FamilySearch Newsroom )
តើខ្ញុំបន្ថែមស្វាមី ឬភរិយា ឬដៃគូទៅក្នុងមែកធាងគ្រួសារដោយរបៀបណា ?
តើខ្ញុំបន្ថែមឪពុក ឬម្ដាយទៅក្នុងមែកធាងគ្រួសារដោយរបៀបណា ?