RootsTech គឺជាព្រឹត្តិការណ៍ស្វែងរកក្រុមគ្រួសារដ៏ធំបំផុតមួយនៅក្នុងពិភពលោក ។ វាគឺជាឱកាសមួយសម្រាប់អ្នកចូលចិត្តពង្សប្រវត្តិ អ្នកដែលមានបទពិសោធន៍ស្រាប់ និងបុគ្គលថ្មីចំពោះពង្សាវលី ដើម្បីរៀនបន្ថែមអំពីបុព្វការីជនរបស់ពួកគេ និងការស្វែងរកជាច្រើនដែលត្រូវធ្វើ ។
នៅឆ្នាំនេះ RootsTech ផ្តល់នូវឱកាសដ៏អស្ចារ្យជាច្រើនសម្រាប់អ្នក ដើម្បីភ្ជាប់ជាមួយនឹងដំណើររឿងគ្រួសារផ្ទាល់ខ្លួនរបស់អ្នក ។
សកម្មភាពទាំងឡាយនៅក្នុងសាលពិព័រណ៍

RootsTech នឹងត្រូវប្រារព្ធឡើងនៅក្នុងមជ្ឈមណ្ឌលសន្និបាត សលត៍ ផាលេស ម្តងទៀតនៅឆ្នាំនេះ ហើយនឹងមានសកម្មភាពជាច្រើនសម្រាប់មិត្តភក្តិ និងក្រុមគ្រួសារ ។ សាលពិព័រណ៍នេះ បើកទាំង ៣ ថ្ងៃនៃសន្និសីទនេះ នឹងជាមជ្ឈមណ្ឌលដ៏សំខាន់សម្រាប់សកម្មភាពទាំងនេះ ។ កម្មវិធីនេះឥតគិតថ្លៃសម្រាប់សាធារណជន ហើយអ្នកមិនត្រូវការសំបុត្រពី RootsTech ដើម្បីទៅមើលសាលពិព័រណ៍នោះទេ ។
កន្លែងស្វែងរក
ការបង្ហាញខ្លីៗមួយនៃសន្និសីទនេះនឹងជាកន្លែងស្វែងរក ដែលមនុស្សអាចចូលរួមក្នុងបទពិសោធន៍ប្រាស្រ័យទាក់ទង និងខាងការអប់រំ ។ អ្នកអាចរំពឹងថានឹងរកឃើញការដាក់បង្ហាញការប្រាស្រ័យទាក់ទង ជាមួយនឹងបច្ចេកវិទ្យាចាស់ និងឧបករណ៍សិក្សាដែលមានការចូលរួមពីអ្នករៀន ដែលបង្រៀនអំពី DNA និងរបៀបដែលវាដំណើរការ ។ ការដាក់បង្ហាញការប្រាស្រ័យទាក់ទង និងការធ្វើសិប្បកម្មសប្បាយៗនឹងបង្ហាញពីប្រពៃណី និងវត្ថុដែលមានអត្ថន័យមកពីផ្នែកផ្សេងៗគ្នាក្នុងពិភពលោក ។
ការតាំងពិព័រណ៍សិល្បៈ
RootsTech នឹងបង្ហាញការតាំងពិព័រណ៍សិល្បៈ ដោយបង្ហាញស្នាដៃសិល្បៈដែលផ្ដិតយកស្មារតីនៃពង្សប្រវត្តិ និងការស្វែងរក ។ ពួកអ្នកទស្សនាអាចរុករកវិចិត្រសាល រកឃើញដំណើររឿងដែលបានកប់ទុក និងរីករាយជាមួយទម្រង់សិល្បៈផ្សេងៗដែលត្រូវបានបំផុសគំនិតដោយវប្បធម៌ផ្សេងៗគ្នាជុំវិញពិភពលោក ។ ការតាំងពិព័រណ៍នេះអបអរសាទរភាពច្នៃប្រឌិតនៃការរកឃើញ និងអំណាចដ៏យូរអង្វែងនៃគ្រួសារ ។
គម្រោងបម្រើ
យើងមានសេចក្តីរំភើបរីករាយក្នុងការប្រកាសពីគម្រោងបម្រើដ៏ពិសេសមួយដែលមានឈ្មោះថា ការបង្កើតមែកធាង ដោយស្វាគមន៍អ្នករាល់គ្នាឲ្យចូលរួម ។ កិច្ចខិតខំប្រឹងប្រែងសហការនេះផ្តោតទៅលើពង្សប្រវត្តិ ដោយអនុញ្ញាតឲ្យអ្នកដែលមានបទពិសោធន៍ច្រើនណែនាំ និងជួយអ្នកដែលទើបតែចាប់ផ្តើម ។ ជាមួយគ្នា យើងនឹងបំពេញឈ្មោះ កំណត់ត្រាលិបិក្រម និងបង្កើតការតភ្ជាប់ពង្សាវលីដ៏មានអត្ថន័យ ទាំងអស់ក្នុងខណៈពេលដែលកំពុងបង្កើតមែកធាងគ្រួសាររបស់យើង ។
ប៉ុន្តែនេះមិនទាន់ចប់ទេ ! នឹងមានឱកាសជាច្រើនផ្សេងទៀតដើម្បីបម្រើ និងបង្កើតឲ្យមានភាពខុសគ្នា ។ សូមរង់ចាំមើលព័ត៌មានលម្អិតដ៏គួរឲ្យរំភើបបន្ថែមទៀត !
ថ្នាក់ទាំងឡាយ

RootsTech នៅឆ្នាំនេះផ្តល់ជូននូវថ្នាក់ឥតគិតថ្លៃជាច្រើនប្រភេទ ដែលផ្តោតទៅលើសមាជិករបស់សាសនាចក្រគ្រប់វ័យ និងកម្រិតជំនាញពង្សប្រវត្តិទាំងអស់ ។ ទាំងនេះគឺជាថ្នាក់មួយចំនួនដែលអាចទាក់ទាញចំណាប់អារម្មណ៍របស់អ្នក ។
កំណត់ចំណាំ ៖ ខណៈដែលថ្នាក់ទាំងនេះនឹងត្រូវបានបង្រៀនជាភាសាអង់គ្លេស ការថតវីដេអូរបស់ពួកគេនឹងមានការបកប្រែជាភាសាផ្សេងៗ ។
មានកាន់តែច្រើន ។ ថ្នាក់រៀន និងការណែនាំឥតគិតថ្លៃជាច្រើនគឺអាចរកបាន ចេញពីថ្នាក់ស៊ីជម្រៅពីពង្សាវលីរបស់អៀរឡង់ ដល់ថ្នាក់មូលដ្ឋានពីពង្សាវលីសម្រាប់អ្នកចាប់ផ្តើមដំបូង ! ថ្នាក់រៀនទាំងនេះជាច្រើនមានប្រយោជន៍សម្រាប់បុគ្គល ឬក្រុមគ្រួសារ ជីវិតផ្ទាល់ខ្លួន និងការហៅបម្រើក្នុងសាសនាចក្រ ។ សូមធានាថាបានចុចលើ កាលវិភាគ RootsTech ឆ្នាំ២០២៥ ដើម្បីកែតម្រូវថ្នាក់របស់អ្នកទៅតាមចំណាប់អារម្មណ៍ និងភាពអាចរកបានរបស់អ្នក—មានអ្វីមួយសម្រាប់អ្នករាល់គ្នានៅឯ RootsTech ។
ទិវាស្វែងរកក្រុមគ្រួសារ
ថ្ងៃសៅរ៍ទី៨ ខែមីនា ឆ្នាំ២០២៥ គឺជាទិវាស្វែងរកគ្រួសារនៅឯកម្មវិធី RootsTech ! ការស្វែងរកក្រុមគ្រួសារ គឺឥតគិតថ្លៃសម្រាប់អ្នកដែលចង់ចូលរួម ។ ឱកាសដើម្បីចូលរួមគឺមានទាំងនៅលើអនឡាញ និងដោយផ្ទាល់នៅឯ សលត៍ ផាលេស នៅក្នុងទីក្រុង សលត៍លេក ។ សូមពិនិត្យមើលអត្ថបទនេះដើម្បីស្វែងយល់បន្ថែមអំពីព្រឹត្តិការណ៍ដ៏គួរឲ្យរំភើបដែលកើតឡើងនៅទិវាស្វែងរកក្រុមគ្រួសារ ។
ចូលរួមជាមួយយើងតាមអនឡាញ
RootsTech ឆ្នាំ២០២៥ កំពុងប្រព្រឹត្តទៅដោយផ្ទាល់នៅទីក្រុង សលត៍លេក ប៉ុន្តែសម្រាប់អ្នកដែលមិនអាចចូលរួមបាន សូមកុំព្រួយបារម្ភឡើយ ! អ្នកនៅតែអាចចូលរួមបាននៅក្នុងថ្នាក់អនឡាញ សិក្ខាសាលា និងបទពិសោធន៍ផ្សេងៗគ្នា ក៏ដូចជាចូលរួមក្នុងសកម្មភាពដោយផ្ទាល់ផ្សេងៗតាមអ៊ីនធឺណិតបានផងដែរ ។ ត្រូវប្រាកដថារុករកពីទំព័រសម័យប្រជុំរបស់ពួកបរិសុទ្ធថ្ងៃចុងក្រោយ ដែលមានជាភាសាជាច្រើន ។
អ្នកក៏អាចមើលសម័យប្រជុំទិវាស្វែងរកក្រុមគ្រួសារដែលកន្លងទៅបានផងដែរ ។ កាលពីឆ្នាំមុន ប្រធាន អិម រ័សុល បាឡឺដ បានចែកចាយបទពិសោធន៍របស់លោកពីការងារពង្សប្រវត្តិ ដោយមានប្រសាសន៍ថា « វាមានសារៈសំខាន់ណាស់ក្នុងការស្វែងរក និងដឹងពីអ្វីដែលយើងអាចធ្វើបានអំពីអ្នកដែលបានមកមុនយើង » ។ យើងពិតជារំភើបសម្រាប់អ្នកណាស់ក្នុងការស្វែងយល់ពីអ្វីទាំងអស់ដែលកើតឡើងនៅក្នុងRootsTech នៅឆ្នាំនេះ ។