នៅក្នុង សុន្ទរកថារបស់លោក នៅក្នុង សន្និសីទទូទៅ ខែតុលា ឆ្នាំ២០២៤ របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ប្រធាន រ័សុល អិម ណិលសុន បានប្រកាសព្រះវិហារបរិសុទ្ធថ្មីចំនួន ១៧ ហើយបានជំរុញឲ្យយើងឧទ្ទិសជីវិតរបស់យើងដល់ព្រះយេស៊ូវគ្រីស្ទឡើងវិញ ។ លោកបានប្រកាសថា ល្បឿននៃការកសាងព្រះវិហារបរិសុទ្ធដែលមិនធ្លាប់មានពីមុនមកត្រូវបានកំណត់ដោយព្រះអម្ចាស់ ហើយលោកបានមានប្រសាសន៍អំពីរបៀបដែលពរជ័យនៃព្រះវិហារបរិសុទ្ធរៀបចំយើង និងពិភពលោកសម្រាប់ការយាងមកជាលើកទីពីររបស់ព្រះអង្គសង្គ្រោះ ។
នៅទូទាំងសន្និសីទ ពួកសាវក អ្នកមានសិទ្ធិអំណាចទូទៅ និងពួកអ្នកកាន់តំណែងទូទៅនៃសាសនាចក្រក៏បានបង្រៀនអំពីពរជ័យ អំណាច ភាពបរិសុទ្ធ និងទំនាក់ទំនងសេចក្ដីសញ្ញា ដែលយើងអាចរកឃើញនៅដំណាក់របស់ព្រះអម្ចាស់ នៅពេលយើងទៅទីនោះជាញឹកញាប់ ។
ដូចទៅនឹង សន្និសីទមុនៗ យើងបានប្រមូលផ្តុំការបង្រៀនអំពីព្រះវិហារបរិសុទ្ធ និងពង្សប្រវត្តិ ដែលយើងចង់ចែកចាយជាមួយអ្នក ។ យើងសង្ឃឹមថា ការដកស្រង់ទាំងនេះនឹងបំផុសគំនិត និងលើកទឹកចិត្តអ្នក ហើយយើងសូមអញ្ជើញអ្នកឲ្យចម្លង ឬទាញយកសម្រង់ទាំងនេះ ហើយចែកចាយវាជាមួយក្រុមគ្រួសារ និងមិត្តភក្តិរបស់អ្នក ។
ជ័យជំនះនៃសេចក្ដីសង្ឃឹម—អែលឌើរ នែល អិល អាន់ឌើរសិន
យើងស្រឡាញ់ការសន្យារបស់អែលឌើរ នែល អិល អាន់ឌើរសិន ដែលថា សេចក្តីសង្ឃឹមកើតឡើង នៅពេលដែលយើងបង្កើនសេចក្តីជំនឿលើព្រះអម្ចាស់ ។ លោកបានគូសបញ្ជាក់ថា ការថ្វាយបង្គំនៅក្នុងដំណាក់នៃព្រះអម្ចាស់ ជាវិធីមួយដើម្បីបង្កើនសេចក្តីជំនឿ និងសេចក្តីសង្ឃឹម ។
« គ្មាន … អ្វីដែលអាចធ្វើឲ្យសេចក្តីសង្ឃឹមរបស់យើងចុះងងឹតបានឡើយ ពេលយើងជឿ ហើយកាន់យ៉ាងខ្ជាប់ខ្ជួននូវសេចក្តីសញ្ញារបស់យើងជាមួយនឹងព្រះនៅក្នុងព្រះដំណាក់របស់ព្រះអម្ចាស់ ។ វាគឺជាព្រះដំណាក់នៃពន្លឺ ដំណាក់នៃសេចក្តីសង្ឃឹម » ។ —អែលឌើរ នែល អិល អាន់ឌើរសិន
រៀនបន្ថែមទៀតអំពីសេចក្ដីសញ្ញានៅទីនេះ ។
រស់នៅឲ្យស្របតាមអភ័យឯកសិទ្ធិរបស់ក្មួយៗ—ប្រធាន អេមីលី បេលី ហ្វ្រីមែន
ប្រធាន អេមីលី បេលី ហ្វ្រីមែន ប្រធានយុវនារីទូទៅ បានបង្រៀនថា ពិធីបរិសុទ្ធ និងការសន្យានៃសេចក្ដីសញ្ញាដោះសោព្រះចេស្ដារបស់ព្រះនៅក្នុងជីវិតរបស់យើង ។
« សូមរៀនពីរបៀបដែលពិធីបរិសុទ្ធបព្វជិតភាព និងការសន្យានៃសេចក្តីសញ្ញានឹងអនុញ្ញាតឲ្យព្រះចេស្ដារបស់ព្រះកើតមានដល់ជីវិតរបស់ក្មួយៗដោយមាននូវប្រសិទ្ធភាពកាន់តែខ្លាំង ដោយធ្វើការនៅក្នុង និងតាមរយៈក្មួយៗ ជំរុញ និងបំពាក់ឲ្យក្មួយសម្រេចបាននូវគោលបំណង និងសក្តានុពលពេញលេញរបស់ក្មួយៗ » ។ —ប្រធាន អេមីលី បេលី ហ្វ្រីមែន
រៀនបន្ថែមទៀតអំពីពិធីបរិសុទ្ធទាំងឡាយនៅទីនេះ ។
« ការទទួលទាននំប៉័ង និងទឹកគឺជាការរំឭកប្រចាំសប្តាហ៍អំពីព្រះចេស្ដារបស់ទ្រង់ដែលធ្វើការក្នុងក្មួយៗដើម្បីជួយក្មួយៗឲ្យយកឈ្នះលើឧបសគ្គ ។ ការពាក់សម្លៀកបំពាក់នៃបព្វជិតភាពបរិសុទ្ធគឺជាការរំឭកប្រចាំថ្ងៃអំពីអំណោយទាននៃព្រះចេស្ដារបស់ទ្រង់ដែលធ្វើការនៅក្នុងក្មួយៗដើម្បីជួយក្មួយៗឲ្យប្រែក្លាយដូចជាព្រះ » ។ —ប្រធាន អេមីលី បេលី ហ្វ្រីមែន
ស្វែងយល់បន្ថែមអំពី សម្លៀកបំពាក់ពិសិដ្ឋនៃព្រះវិហារបរិសុទ្ធនៅទីនេះ និងស្វែងរកចម្លើយចំពោះសំណួរដែលចោទសួរជាញឹកញាប់ ។
« យើងទាំងអស់គ្នាមានសិទ្ធិទទួលបានអំណោយទាននៃព្រះចេស្ដារបស់ព្រះ ។ រាល់ពេលដែលយើងទទួលទានសាក្រាម៉ង់ ។ រាល់ពេលដែលយើងឆ្លងកាត់ច្រកចូលនៃព្រះវិហារបរិសុទ្ធ ។ នេះគឺជាផ្នែកសំខាន់ៗនៃថ្ងៃឈប់សម្រាករបស់ខ្ញុំ ។ នេះគឺជាមូលហេតុដែលខ្ញុំស្រឡាញ់ប័ណ្ណចូលព្រះវិហារបរិសុទ្ធរបស់ខ្ញុំ ។ ‹ នៅក្នុងពិធីបរិសុទ្ធនោះ អំណាចនៃព្រះត្រូវបានបើកសម្ដែងឲ្យឃើញ › » ។ —ប្រធាន អេមីលី បេលី ហ្វ្រីមែន
បុត្រសំណព្វរបស់ព្រះ—អែលឌើរ ខាល ឌី ហើសត៏
អែលឌើរ ខាល ឌី ហើសត៏ ជាពួកចិតសិបនាក់ដែលមានសិទ្ធិអំណាចទូទៅ បានមានប្រសាសន៍អំពីសេចក្តីស្រឡាញ់របស់ព្រះចំពោះយើងដែលតែងតែនៅជាមួយយើង ទោះបីជាយើងអាចមានអារម្មណ៍ថានៅឆ្ងាយក៏ដោយ ។ លោកបានផ្ដល់យោបល់នូវវិធីដែលយើងអាចជ្រមុជកាន់តែជ្រៅទៅក្នុងសេចក្តីស្រឡាញ់របស់ព្រះ រួមទាំងការទៅព្រះវិហារបរិសុទ្ធផងដែរ ។
« ព្រះដំណាក់របស់ព្រះអម្ចាស់ គឺជាព្រះដំណាក់នៃសេចក្ដីសញ្ញាដ៏មានតម្លៃបំផុត ហើយជាទីកន្លែងផ្ដល់ដល់យើងនូវសុវត្ថិភាព និងហ៊ុមព័ទ្ធយើងដោយសេចក្ដីស្រឡាញ់របស់ព្រះវរបិតាយើង » ។ —អែលឌើរ ខាល ឌី ហើសត៏
ការដើរតាមព្រះគ្រីស្ទ—ប្រធាន ដាល្លិន អេក អូក
ប្រធាន ដាល្លិន អេក អូក បានជំរុញឲ្យយើងធ្វើតាមព្រះគ្រីស្ទ ។ លោកបានប្រើការប្រៀបធៀបនៃការបង្ហោះខ្លែងដើម្បីបង្រៀនអំពីការធ្វើតាមបទបញ្ញត្តិរបស់ព្រះ និងការរក្សាសេចក្តីសញ្ញារបស់យើង ។
« ប្រសិនបើយើងកាត់ខ្សែ នោះខ្លែងនឹងមិនអាចហោះកាន់តែខ្ពស់ទេ ។ ខ្លែងនឹងត្រូវខ្យល់បក់បោក ហើយធ្លាក់មកលើដីជាមិនខាន ។ ខ្សែដ៏សំខាន់នោះតំណាងឲ្យសេចក្ដីសញ្ញាដែលចងភ្ជាប់យើងទៅនឹងព្រះ ជាព្រះវរបិតាសួគ៌របស់យើង និងព្រះរាជបុត្រាទ្រង់ គឺព្រះយេស៊ូវគ្រីស្ទ ។ នៅពេលយើងគោរពសេចក្ដីសញ្ញាទាំងនោះដោយការរក្សាបទបញ្ញត្តិ ហើយធ្វើតាមផែនការនៃការប្រោសលោះរបស់ទ្រង់ នោះពរជ័យដែលបានសន្យារបស់ទ្រង់នឹងអាចជួយយើងឲ្យឡើងខ្ពស់ដល់សេឡេស្ទាល » ។ —ប្រធាន ដាល្លិន អេក អូក
ចងភ្ជាប់ទៅនឹងព្រះយេស៊ូវគ្រីស្ទ ៖ ការក្លាយជាអំបិលនៃផែនដី—អែលឌើរ ហូសេ អេ តិក្សេរ៉ា
ដោយប្រៀបធៀបសេចក្តីជំនឿលើព្រះយេស៊ូវគ្រីស្ទទៅនឹងអំបិល អែលឌើរ ហូសេ អេ តិក្សេរ៉ា ជាពួកចិតសិបនាក់ដែលមានសិទ្ធិអំណាចទូទៅ បានអញ្ជើញយើងឲ្យពង្រឹងសេចក្តីជំនឿរបស់យើងតាមរយៈការថ្វាយបង្គំនៅក្នុងព្រះវិហារបរិសុទ្ធ ការពង្រឹងអ្នកដទៃក្នុងការរស់នៅតាមដំណឹងល្អ ការបម្រើក្នុងសាសនាចក្រ និងការប្រើប្រាស់ទំនាក់ទំនងឌីជីថលក្នុងរបៀបវិជ្ជមាន ។
« យុវវ័យរបស់យើងបានបង្ហាញពីភាពក្លាហាន និងការលះបង់ដ៏គួរឲ្យកត់សម្គាល់ ។ ពួកគេបានទទួលយកការងារពង្សប្រវត្តិដោយក្តីរំភើប ហើយការទៅទស្សនាដំណាក់នៃព្រះអម្ចាស់ជាញឹកញាប់គឺជាសក្ខីភាពមួយចំពោះការប្តេជ្ញារបស់ពួកគេ » ។ —អែលឌើរ ហូសេ អេ តិក្សេរ៉ា
« បច្ចុប្បន្នព្រះវិហារបរិសុទ្ធខិតកាន់តែជិតជាងមុន ការផ្តល់អាទិភាពដល់ការថ្វាយបង្គំជាទៀងទាត់ក្នុងដំណាក់នៃព្រះអម្ចាស់នឹងជួយយើងឲ្យផ្តោតលើអ្វីដែលសំខាន់បំផុត ហើយរក្សាជីវិតរបស់យើងឲ្យផ្តោតលើព្រះគ្រីស្ទ » ។ —អែលឌើរ ហូសេ អេ តិក្សេរ៉ា
« នៅក្នុងព្រះវិហារបរិសុទ្ធ យើងរកឃើញចំណុចសំខាន់នៃសេចក្តីជំនឿរបស់យើងនៅក្នុងព្រះយេស៊ូវគ្រីស្ទ និងវិញ្ញាណនៃការលះបង់របស់យើងចំពោះទ្រង់ » ។ —អែលឌើរ ហូសេ អេ តិក្សេរ៉ា
ធ្វើឲ្យឆន្ទៈរបស់យើងស្របគ្នានឹងព្រះឆន្ទៈរបស់ទ្រង់—អែលឌើរ អូលីសេស សូរ៉េស
អែលឌើរ អូលីសេស សូរ៉េស បានថ្លែងទីបន្ទាល់ថា យើងអាចទទួលបានកែវមុក្ដាដ៏មានតម្លៃបំផុតគឺនគរស្ថានសួគ៌ នៅពេលដែលយើងធ្វើតាមព្រះឆន្ទៈរបស់ព្រះអម្ចាស់ ហើយបន្តពិតចំពោះសេចក្តីសញ្ញារបស់យើង ។
« នៅពេលយើងព្យាយាមដើម្បីពិតចំពោះគ្រប់សេចក្តីសញ្ញាដែលយើងបានចុះ និងរស់នៅតាម ‹ គ្រប់ទាំងព្រះបន្ទូល ដែលចេញពីព្រះឱស្ឋព្រះ › យើងនឹងត្រូវបានការពារពីការធ្លាក់ខ្លួនជាជនរងគ្រោះនៃអំពើបាប និងកំហុសនៃពិភពលោក—កំហុសនៃទស្សនវិជ្ជា និងគោលលទ្ធិដែលនឹងនាំយើងចេញឆ្ងាយពីកែវមុក្តាដ៏មានតម្លៃបំផុតនោះ » ។ —អែលឌើរ អូលីសេស សូរ៉េស
បរិសុទ្ធភាពថ្វាយព្រះអម្ចាស់ក្នុងជីវិតប្រចាំថ្ងៃ—អែលឌើរ ហ្គើរីត ដបុលយូ ហ្គង
អែលឌើរ ហ្គើរីត ដបុលយូ ហ្គង បានចែកចាយរឿងរ៉ាវពីសមាជិកសាសនាចក្រជុំវិញពិភពលោកដែលបានរកឃើញពរជ័យពីការជ្រើសរើសបរិសុទ្ធភាពថ្វាយព្រះអម្ចាស់ក្នុងជីវិតប្រចាំថ្ងៃ ។
« ស្ត្រីម្នាក់ខំប្រឹងអស់ពីសមត្ថភាពជារៀងរាល់ថ្ងៃ ក្រោយពីស្វាមីមិនស្មោះត្រង់របស់គាត់បានចាកចោលគាត់ និងកូនៗ ។ ខ្ញុំពិតជាកោតសរសើរគាត់ និងអ្នកផ្សេងទៀតដូចជាគាត់ខ្លាំងណាស់ ។ ថ្ងៃមួយ ពេលកំពុងបត់ខោអាវ គាត់ដាក់ដៃលើគំនរខោអាវ ដោយដកដង្ហើមធំថា ‹ តើមានប្រយោជន៍អីទៅ ? › គាត់បានឮសំឡេងដ៍ទន់ភ្លន់អះអាងដល់គាត់ថា ‹ សេចក្តីសញ្ញារបស់អ្នកគឺនៅនឹងយើង › » ។ —អែលឌើរ ហ្គើរីត ដបុលយូ ហ្គង
ស្វែងយល់បន្ថែមអំពី សម្លៀកបំពាក់ពិសិដ្ឋនៃព្រះវិហារបរិសុទ្ធនៅទីនេះ និងស្វែងរកចម្លើយចំពោះសំណួរដែលចោទសួរជាញឹកញាប់ ។
អែលឌើរ ហ្គង បានប្រាប់រឿងមួយអំពីយុវនារីម្នាក់ ដែលបានខិតខំភ្ជាប់ទំនាក់ទំនងកាន់តែជិតស្និទ្ធជាមួយឪពុករបស់នាង បន្ទាប់ពីម្តាយរបស់នាងបានស្លាប់ទៅ ។ នាងទទួលអារម្មណ៍បំផុសគំនិតឲ្យចូលរួមព្រះវិហារបរិសុទ្ធជាមួយឪពុករបស់នាងរៀងរាល់សប្តាហ៍ ។ យុវនារីនោះបាននិយាយថា
« ការចំណាយពេលនៅក្នុងដំណាក់របស់ព្រះអម្ចាស់បានព្យាបាលពួកយើង ។ ម្តាយខ្ញុំមិនអាចជួយពួកយើងបានពេលនៅលើផែនដី ។ ទាល់តែគាត់ទៅឯម្ខាងទៀតនៃវាំងនន ទើបគាត់អាចជួយជួសជុលអ្វីដែលខូចខាតបាន ។ ព្រះវិហារបរិសុទ្ធបានបំពេញដំណើរជីវិតរបស់យើងឲ្យមានភាពពេញលេញជាគ្រួសារដ៏អស់កល្បមួយ » ។ —អែលឌើរ ហ្គើរីត ដបុលយូ ហ្គង
រៀនបន្ថែមទៀតអំពីជីវិតបន្ទាប់ពីការស្លាប់នៅទីនេះ ។
« បរិសុទ្ធភាពថ្វាយព្រះអម្ចាស់ក្នុងជីវិតប្រចាំថ្ងៃរួមមានទាំងការមករកព្រះអម្ចាស់ក្នុងដំណាក់ដ៏បរិសុទ្ធរបស់ទ្រង់ជាញឹកញាប់ » ។ —អែលឌើរ ហ្គើរីត ដបុលយូ ហ្គង
« ជាមួយនឹងពាក្យពិសិដ្ឋប្រាំបួនពាក្យ ព្រះវិហារបរិសុទ្ធរបស់យើងអញ្ជើញ និងប្រកាសថា ៖ ‹ បរិសុទ្ធភាពថ្វាយព្រះអម្ចាស់។ ដំណាក់នៃព្រះអម្ចាស់ › » ។ —អែលឌើរ ហ្គើរីត ដបុលយូ ហ្គង
អំណរនៃសេចក្តីប្រោសលោះ—ស៊ីស្ទើរ គ្រីស្ទីន អិម យី
ស៊ីស្ទើរ គ្រីស្ទីន អិម យី ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ បានថ្លែងទីបន្ទាល់អំពីការណ៍ជាច្រើនដែលទាក់ទងនឹងការប្រោសលោះ និងទំនាក់ទំនងសេចក្ដីសញ្ញារបស់ព្រះជាមួយយើង ។
« ព្រះចេស្ដាដ៏ប្រោសលោះនៃព្រះយេស៊ូវគ្រីស្ទគឺជាពរជ័យដែលបានសន្យាដ៏មហិមាបំផុតមួយនៃសេចក្តីសញ្ញារបស់យើង ។ ចូរពិចារណាអំពីការណ៍នេះ នៅពេលបងប្អូនចូលរួមក្នុងពិធីបរិសុទ្ធដ៏ពិសិដ្ឋនានា ។ បើគ្មានវាទេ យើងមិនអាចត្រឡប់ទៅកាន់ទីវត្តមាននៃព្រះវរបិតាសួគ៌របស់យើង និងអស់អ្នកដែលយើងស្រឡាញ់បានឡើយ » ។ —ស៊ីស្ទើរ គ្រីស្ទីន អិម យី
« ប្រសិនបើបងប្អូនកំពុងពុះពារនឹងស្ថានភាពមួយដែលបងប្អូនគិតថា បងប្អូនគួរតែបានយកឈ្នះវារួចហើយមកដល់បច្ចុប្បន្ននេះនោះ សូមកុំចុះចាញ់ឡើយ ។ ចូរអត់ធ្មត់ជាមួយនឹងខ្លួនឯង រក្សាសេចក្ដីសញ្ញារបស់បងប្អូន ប្រែចិត្តជាញឹកញាប់ ស្វែងរកជំនួយពីថ្នាក់ដឹកនាំរបស់បងប្អូន ប្រសិនបើចាំបាច់ ហើយទៅព្រះដំណាក់របស់ព្រះអម្ចាស់ឲ្យបានញឹកញាប់តាមដែលបងប្អូនអាចធ្វើទៅបាន ។ សូមស្តាប់តាម និងយកចិត្តទុកដាក់ចំពោះការបំផុសគំនិតដែលទ្រង់បញ្ជូនទៅឲ្យបងប្អូន ។ ទ្រង់នឹងមិនបោះបង់ទំនាក់ទំនងនៃសេចក្ដីសញ្ញារបស់ទ្រង់ជាមួយនឹងបងប្អូនឡើយ » ។ —បងស្រី គ្រីស្ទីន អិម យី
លោកដែលទូលនឹងព្រះយេហូវ៉ា—អែលឌើរ ខែល អេស ម៉ាកឃេ
អែលឌើរ ខែល អេស ម៉ាកឃេ ជាពួកចិតសិបនាក់ដែលមានសិទ្ធិអំណាចទូទៅ បានថ្លែងទីបន្ទាល់អំពីភាពពេញលេញនៃដំណឹងល្អដែលបានស្តារឡើងវិញដោយព្រះយេស៊ូវគ្រីស្ទតាមរយៈ យ៉ូសែប ស្ម៊ីធ ដែលរួមមានទាំងពិធីបរិសុទ្ធនៃព្រះវិហារបរិសុទ្ធផងដែរ ។
« ព្រះគ្រីស្ទតែងតែបង្គាប់ឲ្យរាស្រ្តរបស់ទ្រង់សាងសង់ព្រះវិហារបរិសុទ្ធ ជាកន្លែងដែលទ្រង់បង្ហាញព្រះកាយដល់ពួកគេ និងប្រទានអំណោយទានដោយព្រះចេស្ដាមកពីស្ថានលើ » ។ —អែលឌើរ ខែល អេស ម៉ាកឃេ
ឱបក្រសោបអំណោយទាននៃការប្រែចិត្តរបស់ព្រះអម្ចាស់—អែលឌើរ ហ៊ោរហេ អិម អាល់វ៉ារ៉ាដូរ
អែលឌើរ ហ៊ោរហេ អិម អាល់វ៉ារ៉ាដូរ ជាពួកចិតសិបនាក់ដែលមានសិទ្ធិអំណាចទូទៅ បានបង្រៀនអំពីតួនាទីរបស់ព្រះគ្រីស្ទក្នុងនាមជាលោកគ្រូនៃការព្យាបាល ។ ដំណាក់របស់ព្រះអម្ចាស់បំផុសគំនិតយើងឲ្យបង្កើនបរិសុទ្ធភាពផ្ទាល់ខ្លួន តាមរយៈគោលលទ្ធិរបស់ព្រះគ្រីស្ទ ដែលរួមមានទាំងការប្រែចិត្ត ។
![ក្រាហ្វិកនៃការដកស្រង់ដោយមានព្រះវិហារបរិសុទ្ធ ផត-អូ-ព្រីន ហៃទី នៅផ្ទៃខាងក្រោយ ៖ « ការបម្រើនៅក្នុងព្រះដំណាក់របស់ព្រះអម្ចាស់ជាទៀងទាត់ និងការព្យាយាមរក្សាសេចក្ដីសញ្ញាដ៏ពិសិដ្ឋដែលយើងបានធ្វើនៅទីនោះ នឹងបង្កើនបំណងប្រាថ្នា និងសមត្ថភាពរបស់យើង ដើម្បីទទួលបទពិសោធន៍នៃ [ ការផ្លាស់ប្តូរ ] ដែលចាំបាច់ ដើម្បីយើងប្រែក្លាយដូចជាព្រះអង្គសង្គ្រោះរបស់យើង » ។ អែលឌើរ ហ៊ោរហេ អិម អាល់វ៉ារ៉ាដូរ](https://cms-b-assets.familysearch.org/62/62/e09fcf85488abcf6aba858f58839/8-%E0%B8%AF-%E0%B8%98-%E0%B8%A2%E0%B8%93%E0%B9%80%E0%B8%95-%E0%B8%A3%E0%B9%80%E0%B8%A2-%E0%B8%B2%E0%B8%B2%E0%B8%A3%E0%B9%80%E0%B8%A2%E0%B8%B2-%E0%B8%A3-%E0%B8%A9-%E0%B8%A3%E0%B8%96%E0%B8%93%E0%B8%A0-%E0%B8%81-%E0%B8%9C-khmer-cambodian.jpg)
« ឱ! នេះជាបុព្វហេតុដ៏សុចរិតមួយដើម្បីឲ្យបានស្អាតស្អំ—ដើម្បីមានភាពស័ក្ដិសមចំពោះភាពពេញលេញនៃពរជ័យដែលព្រះវរបិតាសួគ៌ និងព្រះរាជបុត្រាទ្រង់មានសម្រាប់យើង តាមរយៈសេចក្ដីសញ្ញានៃព្រះវិហារបរិសុទ្ធដ៏ពិសិដ្ឋ ! » —អែលឌើរ ហ៊ោរហេ អិម អាល់វ៉ារ៉ាដូរ
« នៅពេលយើងមករកព្រះយេស៊ូវគ្រីស្ទ ផ្លូវនៃការប្រែចិត្តដ៏ស្មោះរបស់យើងនឹងនាំយើងទៅកាន់ព្រះវិហារបរិសុទ្ធរបស់ព្រះអង្គសង្គ្រោះនៅទីបំផុត » ។ —អែលឌើរ ហ៊ោរហេ អិម អាល់វ៉ារ៉ាដូរ
« ការបម្រើនៅក្នុងព្រះដំណាក់របស់ព្រះអម្ចាស់ជាទៀងទាត់ និងការព្យាយាមរក្សាសេចក្ដីសញ្ញាដ៏ពិសិដ្ឋដែលយើងបានធ្វើនៅទីនោះ នឹងបង្កើនបំណងប្រាថ្នា និងសមត្ថភាពរបស់យើង ដើម្បីទទួលបទពិសោធន៍នៃការផ្លាស់ប្តូរនៃដួងចិត្ត ពលំ គំនិត និងព្រលឹងដែលចាំបាច់ ដើម្បីយើងប្រែក្លាយដូចជាព្រះអង្គសង្គ្រោះរបស់យើង » ។ —អែលឌើរ ហ៊ោរហេ អិម អាល់វ៉ារ៉ាដូរ
« ដំណាក់របស់ព្រះអម្ចាស់ ព្រះគម្ពីរបរិសុទ្ធរបស់ទ្រង់ ពួកព្យាការី និងពួកសាវករបស់ទ្រង់បំផុសគំនិតយើងឲ្យព្យាយាមឆ្ពោះទៅកាន់បរិសុទ្ធភាពផ្ទាល់ខ្លួនតាមរយៈគោលលទ្ធិនៃ ព្រះគ្រីស្ទ » ។ —អែលឌើរ ហ៊ោរហេ អិម អាល់វ៉ារ៉ាដូរ
« គឺខ្ញុំនេះហើយ »—ប្រធាន ជែហ្វ្រី អ័រ ហូឡិន
ប្រធាន ជែហ្វ្រី អ័រ ហូឡិន បានពន្យល់អំពីសេចក្ដីសប្បុរសដ៏ទេវភាពរបស់ព្រះយេស៊ូវគ្រីស្ទ ។ លោកក៏បានមានប្រសាសន៍អំពីពរជ័យដែលទទួលបាននៅក្នុងដំណាក់របស់ព្រះអម្ចាស់ផងដែរ ។
« ដើម្បីណែនាំអ្នកដទៃអំពីសេចក្ដីជំនឿ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ ហើយទទួលយកពរជ័យរបស់យើងនៅក្នុងដំណាក់នៃព្រះអម្ចាស់—ទាំងនេះគឺជាគ្រឹះនៃ ‹ គោលការណ៍ និងពិធីបរិសុទ្ធ › ដែលកំណត់ពីសេចក្ដីស្រឡាញ់របស់យើងចំពោះព្រះ និងអ្នកជិតខាង ហើយកំណត់អំពីសាសនាចក្រពិតរបស់ព្រះគ្រីស្ទដោយអំណរ ។ —ប្រធាន ជែហ្វ្រី អ័រ ហូឡិន
ការស្វែងរកចម្លើយចំពោះសំណួរខាងវិញ្ញាណ—ស៊ីស្ទើរ ត្រេស៊ី វ៉ាយ ប្រោននីង
ស៊ីស្ទើរ ត្រេស៊ី វ៉ាយ ប្រោននីង ទីប្រឹក្សាទីពីរក្នុងគណៈប្រធានអង្គការបឋមសិក្សាទូទៅ បានបញ្ជាក់អំពីអំណាចនៃការសួរព្រះនូវសំណួរដំណឹងល្អដ៏ស្មោះត្រង់ ។ ដំណាក់របស់ព្រះអម្ចាស់គឺជាកន្លែងដ៏ពិសិដ្ឋ ដែលយើងអាចស្វែងរកចម្លើយចំពោះសំណួរដ៏ស្មោះត្រង់ ។
![ក្រាហ្វិកនៃការដកស្រង់ដោយមានព្រះវិហារបរិសុទ្ធ ឌូបាន អាហ្វ្រិកខាងត្បូង នៅផ្ទៃខាងក្រោយ ៖ « [ ព្រះជាព្រះវរបិតា និងព្រះរាជបុត្រារបស់ទ្រង់ ] សុំឲ្យយើងចំណាយពេលថ្វាយបង្គំជាទៀងទាត់នៅក្នុងព្រះដំណាក់នៃព្រះអម្ចាស់ ហើយលុតជង្គង់អធិស្ថាន ‹ ដើម្បីទទួលព័ត៌មានពីស្ថានសួគ៌ » ។ ស៊ីស្ទើរ ត្រេស៊ី វ៉ាយ ប្រោននីង](https://cms-b-assets.familysearch.org/61/29/cb5504d54187b02ecc9897c4c754/9-9-%E0%B8%9A-%E0%B9%80%E0%B8%8D-%E0%B8%87%E0%B8%A4%E0%B8%95%E0%B8%AA-%E0%B8%A0-%E0%B8%A2-%E0%B8%A4%E0%B8%95%E0%B8%A3%E0%B8%AA-%E0%B8%9F-khmer-cambodian.jpg)
« [ ព្រះជាព្រះវរបិតា និងព្រះរាជបុត្រារបស់ទ្រង់ ] សុំឲ្យយើងចំណាយពេលថ្វាយបង្គំជាទៀងទាត់នៅក្នុងព្រះដំណាក់នៃព្រះអម្ចាស់ ហើយលុតជង្គង់អធិស្ថាន ‹ ដើម្បីទទួលព័ត៌មានពីស្ថានសួគ៌ › » ។ —ស៊ីស្ទើរ ត្រេស៊ី វ៉ាយ ប្រោននីង
ជីវិតរមែងស្លាប់ពិតជាបានផល !—អែលឌើរ ប្រ៊ូក ភី ហេលស៍
សេចក្តីថ្លែងការណ៍នេះដែលថ្លែងដោយអែលឌើរ ប្រ៊ូក ភី ហេលស៍ ជាពួកចិតសិបនាក់ដែលមានសិទ្ធិអំណាចទូទៅ ផ្តល់ការធានាថា ទោះបីជាមានបញ្ហាប្រឈមក្នុងជីវិតរមែងស្លាប់ក៏ដោយ យើងអាចទុកចិត្តលើព្រះអម្ចាស់បាន ។
« ខ្ញុំសូមថ្លែងទីបន្ទាល់ថា នៅពេលយើងទទួលពិធីបរិសុទ្ធនៃដំណឹងល្អ ចូលក្នុងសេចក្ដីសញ្ញាជាមួយព្រះ ហើយបន្ទាប់មករក្សាសេចក្តីសញ្ញាទាំងនោះ ប្រែចិត្ត បម្រើអ្នកដទៃ និងស៊ូទ្រាំរហូតដល់ទីបំផុត នោះយើងក៏អាចមានការធានាអះអាង និងទំនុកចិត្តពេញលេញលើព្រះអម្ចាស់ថា ជីវិតរមែងស្លាប់ពិតជាបានផល ! » —អែលឌើរ ប្រ៊ូក ភី ហេលស៍
សូមស្វែងរកទ្រង់ឲ្យអស់ពីដួងចិត្តរបស់បងប្អូន—ប៊ីស្សព អិល ថត បាជច៍
ប៊ីស្សព អិល ថត បាជច៍ ទីប្រឹក្សាទីពីរក្នុងគណៈប៊ីស្សពជាអធិបតីបានថ្លែងទីបន្ទាល់ថា នៅពេលដែលយើងងាកទៅរកព្រះគ្រីស្ទកាន់តែញឹកញាប់តាមរយៈការថ្វាយបង្គំនៅថ្ងៃឈប់សម្រាក ការចូលរួមព្រះវិហារបរិសុទ្ធ ការអធិស្ឋាន និងការសិក្សាបទគម្ពីរ នោះយើងអាចពង្រឹងទំនាក់ទំនងនៃសេចក្តីសញ្ញារបស់យើង ។
« ដំណឹងល្អរបស់ព្រះយេស៊ូវគ្រីស្ទផ្តល់ឲ្យយើងនូវឱកាសដើម្បីត្រឡប់ទៅរកទ្រង់ជាញឹកញាប់ ។ ឱកាសទាំងនេះរួមមានការអធិស្ឋានប្រចាំថ្ងៃ ការសិក្សាបទគម្ពីរ ពិធីសាក្រាម៉ង់ ថ្ងៃឈប់សម្រាក និងការថ្វាយបង្គំនៅព្រះវិហារបរិសុទ្ធ » ។ —ប៊ីស្សព អិល ថត បាជច៍
« ក្នុងអំឡុងពេលថ្វាយបង្គំក្នុងព្រះវិហារបរិសុទ្ធរបស់យើង ចុះបើយើងត្រូវខិតខំប្រឹងប្រែងកាន់តែមានវិន័យ និងផ្តោតការយកចិត្តទុកដាក់បន្ថែមទៀត ដើម្បីយកចិត្តទុកដាក់ ឬនៅយូរបន្តិចនៅក្នុងបន្ទប់សេឡេស្ទាលក្នុងការជញ្ជឹងគិតដ៏ស្ងប់ស្ងាត់នោះ ? នៅពេលដែលការផ្តោតអារម្មណ៍របស់យើងតិចនៅលើការធ្វើ និងកាន់តែច្រើននៅលើការពង្រឹងទំនាក់ទំនងនៃសេចក្តីសញ្ញារបស់យើងជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ខ្ញុំសូមថ្លែងទីបន្ទាល់ថា ពេលវេលាដ៏ពិសិដ្ឋនីមួយៗនេះនឹងត្រូវបានពង្រឹង ហើយយើងនឹងទទួលបានការណែនាំដែលត្រូវការនៅក្នុងជីវិតផ្ទាល់ខ្លួនរបស់យើង » ។ —ប៊ីស្សព អិល ថត បាជច៍
នេះគឺជាថ្ងៃដែលពុំអាចបំភ្លេចបានឡើយ—អែលឌើរ ហ្គែរី អ៊ី ស្ទីវ៉ែនសុន
នៅក្នុងសុន្ទរកថារបស់លោក អែលឌើរ ហ្គែរី អ៊ី ស្ទីវ៉ែនសុន បានរៀបរាប់អំពីទសវត្សរ៍ខាងមុខនៃឱកាសដែលមិនធ្លាប់មានពីមុនមក ដើម្បីចែកចាយអំណរនៃដំណឹងល្អរបស់ព្រះយេស៊ូវគ្រីស្ទ ។
« សូមពិចារណាអំពីចំនួននៃការបើកសម្ពោធព្រះវិហារបរិសុទ្ធ និងការឧទ្ទិសឆ្លងដែលរៀបចំដើម្បីធ្វើនៅទសវត្សរ៍ក្រោយ ។ . . . ព្រឹត្តិការណ៍ទាំងនេះនឹងក្លាយជាថ្ងៃដែលពុំអាចបំភ្លេចបាន » ។ —អែលឌើរ ហ្គែរី អ៊ី ស្ទីវ៉ែនសុន
« ពេលខ្ញុំទៅព្រះវិហារបរិសុទ្ធជុំវិញពិភពលោក ខ្ញុំស្ងប់ស្ងែងចំពោះក្រុមយុវវ័យដ៏ច្រើនដែលកំពុងរង់ចាំនៅឯអាងជ្រមុជទឹក និងយុវមជ្ឈិមវ័យដ៏ច្រើនកំពុងបម្រើជាអ្នកធ្វើពិធីបរិសុទ្ធ » ។ —អែលឌើរ ហ្គែរី អ៊ី ស្ទីវ៉ែនសុន
« សម្រាប់ក្មួយៗនៃជំនាន់ដែលកំពុងពេញវ័យ …ខ្ញុំសូមលើកទឹកចិត្តក្មួយៗឲ្យចូលរួមក្នុងពង្សប្រវត្តិ ចំណាយពេលនៅក្នុងព្រះវិហារបរិសុទ្ធ ហើយរៀបចំខ្លួនដោយប្រុងប្រយ័ត្នដើម្បីធ្វើជាបុរស ឬស្ត្រីដែលត្រៀមខ្លួនរៀបការនឹងដៃគូដែលស័ក្ដិសមដូចគ្នានៅក្នុងព្រះវិហារបរិសុទ្ធ » ។ —អែលឌើរ ហ្គែរី អ៊ី ស្ទីវ៉ែនសុន
« សូមបង្កើតលំនាំនៅក្នុងជីវិតរបស់ក្មួយៗ ឥឡូវនេះ ដើម្បីដាក់ព្រះវិហារបរិសុទ្ធជាផ្នែកដ៏សំខាន់ក្នុងជីវិតរបស់ក្មួយៗ » ។ —អែលឌើរ ហ្គែរី អ៊ី ស្ទីវ៉ែនសុន
ឱ ! យុវវ័យថ្លៃថ្នូរអើយ—បងប្រុស ប្រ៊ាតលី អ័រ វិលខក់
បងប្រុស ប្រ៊ាតលី អ័រ វិលខក់ ទីប្រឹក្សាទីមួយនៅក្នុងគណៈប្រធានយុវជនទូទៅ បានមានប្រសាសន៍ទៅកាន់បុត្រាបុត្រីនៃសេចក្ដីសញ្ញារបស់ព្រះ ជាពិសេសជំនាន់ដែលកំពុងពេញវ័យ ហើយបានប្រកាសថា ព្រះអង្គសង្គ្រោះទុកព្រះទ័យលើយើងក្នុងការធ្វើកិច្ចការរបស់ទ្រង់ ហើយថាយើងបានកើតមកដើម្បីផ្លាស់ប្តូរពិភពលោក និងជួយនាំបុត្រទាំងអស់របស់ទ្រង់ទៅផ្ទះវិញ ។
« ដោយសារតែជម្រើសរបស់ប្អូនៗក្នុងការធ្វើ និងរក្សាសេចក្ដីសញ្ញា នោះទ្រង់ផ្ដល់ឲ្យប្អូនៗនូវការទុកព្រះទ័យរបស់ទ្រង់ ។ ទ្រង់ទុកព្រះទ័យឲ្យប្អូនៗមានភាពខុសប្លែកពីគេ ជារាស្ត្រដ៏ជាកេរ្តិ៍អាករនៃព្រះ និងបានញែកចេញដោយសារកិច្ចការដ៏សំខាន់នេះ ទ្រង់ទុកព្រះទ័យលើប្អូនៗឲ្យធ្វើ » ។ —បងប្រុស ប្រ៊ាតលី អ័រ វិលខក់
« សូមគិតអំពីការណ៍នេះ ! ក្នុងចំណោមមនុស្សទាំងអស់នៅលើផែនដី—ព្រះទុកព្រះទ័យលើប្អូនៗ ដែលជាបុត្រនៃសេចក្តីសញ្ញា … ដើម្បីជួយកិច្ចការរបស់ទ្រង់ក្នុងការនាំបុត្រាបុត្រីទាំងអស់របស់ទ្រង់ទៅផ្ទះដោយសុវត្ថិភាព » ។ —បងប្រុស ប្រ៊ាតលី អ័រ វិលខក់
« ប្អូនកំពុងចាប់ដៃធ្វើការជាមួយនឹងព្រះយេស៊ូវគ្រីស្ទ ។ ជាមួយនឹងសេចក្តីសញ្ញាថ្មីនីមួយៗ—ហើយពេលទំនាក់ទំនងរបស់ប្អូនជាមួយនឹងទ្រង់កាន់តែជ្រាលជ្រៅ—នោះប្អូនៗកាន់តែស្អិតជាប់នឹងគ្នាកាន់តែតឹង រហូតទាល់តែប្អូនភ្ជាប់គ្នាយ៉ាងស្អិតល្មួត » ។ —បងប្រុស ប្រ៊ាតលី អ័រ វិលខក់
« ទំនាក់ទំនងនៃសេចក្តីសញ្ញារបស់ប្អូនជាមួយនឹងព្រះ និងព្រះយេស៊ូវគ្រីស្ទ គឺជាទំនាក់ទំនងនៃសេចក្តីស្រឡាញ់ និងការជឿទុកចិត្ត ដែលប្អូនៗមានលទ្ធភាពទទួលបានព្រះគុណដ៏ធំធេងរបស់ទ្រង់ទាំងទ្វេ—ជំនួយដ៏ទេវភាព អំណោយទាននៃកម្លាំង និងអំណាចរបស់ទ្រង់ទាំងទ្វេ » ។ —បងប្រុស ប្រ៊ាតលី អ័រ វិលខក់
បីបាច់ឫស នោះមែកនឹងលូតលាស់ឡើង—អែលឌើរ ឌៀថើរ អេហ្វ អុជដូហ្វ
យើងស្រឡាញ់ការរំឭកនេះមកពីអែលឌើរ ឌៀថើរ អេហ្វ អុជដូហ្វ ថា យើងនឹងរកឃើញព្រះអង្គសង្គ្រោះនៅក្នុងពិធីបរិសុទ្ធរបស់ទ្រង់ ។
« បើបងប្អូនកំពុងស្វែងរកបទពិសោធន៍ដ៏មានអត្ថន័យក្នុងការប្រជុំសាសនាចក្រ ឬក្នុងព្រះវិហារបរិសុទ្ធ សូមព្យាយាមស្វែងរកព្រះយេស៊ូវគ្រីស្ទនៅក្នុងពិធីការបរិសុទ្ធដ៏ពិសិដ្ឋដែលយើងទទួលនៅទីនោះ ។ សូមស្វែងរកព្រះអម្ចាស់នៅក្នុងដំណាក់ដ៏បរិសុទ្ធរបស់ទ្រង់ » ។ —អែលឌើរ ឌៀថើរ អេហ្វ អុជដូហ្វ
« មើលចុះ យើងជាពន្លឺដែលអ្នករាល់គ្នានឹងលើកឡើង »—អែលឌើរ រ៉ូណល អេ រ៉ាសបាន
អែលឌើរ រ៉ូណល អេ រ៉ាសបាន បានចែកចាយបទពិសោធន៍ជាមួយប្រធាន រ័សុល អិម ណិលសុន ពីការឧទ្ទិសឆ្លងឡើងវិញនៃព្រះវិហារបរិសុទ្ធ ម៉ានតៃ យូថាហ៍ ។ នៅក្នុងសុន្ទរកថារបស់លោក លោកក៏បានដកស្រង់ការបង្រៀនរបស់ប្រធាន ណិលសុន អំពីព្រះវិហារបរិសុទ្ធនៅប៉ុន្មានឆ្នាំកន្លងមកនេះផងដែរ ។ នេះជាការដកស្រង់មួយចំនួនពីប្រធាន ណិលសុន ដែលយើងចូលចិត្ត ដែលបានលើកឡើងដោយអែលឌើរ រ៉ាសបាន ។
២០២០
« ការសាងសង់ព្រះវិហារបរិសុទ្ធទាំងនេះប្រហែលជាពុំអាចផ្លាស់ប្ដូរជីវិតបងប្អូនបានទេ ប៉ុន្តែពេលវេលាដែលបងប្អូនចំណាយក្នុងព្រះវិហារបរិសុទ្ធនឹងផ្លាស់ប្ដូរជីវិតរបស់បងប្អូន » —ប្រធាន រ័សុល អិម ណិលសុន ( « អនាគតរបស់សាសនាចក្រ ៖ ការរៀបចំពិភពលោកសម្រាប់ការយាងមកជាលើកទីពីររបស់ព្រះអង្គសង្គ្រោះ » លីអាហូណា )
២០២១
« ព្រះអង្គសង្គ្រោះ និងគោលលទ្ធិរបស់ទ្រង់គឺជាចំណុចស្នូលនៃព្រះវិហារបរិសុទ្ធ ។ អ្វីគ្រប់យ៉ាងដែលបានបង្រៀននៅក្នុងព្រះវិហារបរិសុទ្ធ តាមរយៈការណែនាំ និងតាមរយៈព្រះវិញ្ញាណ គឺបង្កើនការយល់ដឹងរបស់យើងអំពីព្រះយេស៊ូវគ្រីស្ទ ។ ពិធីបរិសុទ្ធដ៏ចាំបាច់ទាំងឡាយរបស់ទ្រង់ចងភ្ជាប់យើងទៅនឹងទ្រង់ តាមរយៈសេចក្តីសញ្ញាដ៏ពិសិដ្ឋនៃបព្វជិតភាព ។ បន្ទាប់មក នៅពេលយើងរក្សាសេចក្តីសញ្ញារបស់យើង នោះទ្រង់នឹងប្រទានព្រះចេស្ដានៃការព្យាបាល ព្រះចេស្ដានៃការពង្រឹង របស់ទ្រង់ » —រ័សុល អិម ណិលសុន ( សន្និសីទទូទៅ ខែតុលា ឆ្នាំ២០២១ )
រៀនបន្ថែមទៀតអំពីបព្វជិតភាពនៅទីនេះ ។
« យើងមានពួកទេវតានៅជុំវិញយើងនៅសព្វថ្ងៃនេះ ។ ប្រធាន ណិលសុន បានមានប្រសាសន៍ថា ‹ [ នៅក្នុងព្រះវិហារបរិសុទ្ធ ] បងប្អូននឹងរៀនពីរបៀបបើកវាំងននដែលខណ្ឌចែករវាងស្ថានសួគ៌ និងផែនដី របៀបទូលសូមពួកទេវតារបស់ព្រះឲ្យជួយដល់បងប្អូន › » —អែលឌើរ រ៉ូណល អេ រ៉ាសបាន និងប្រធាន រ័សុល អិម ណិលសុន ( សន្និសីទទូទៅ ខែតុលា ឆ្នាំ ២០២១ )
ឆ្នាំ ២០២៤
« អស់អ្នកដែលថ្វាយបង្គំនៅក្នុងព្រះវិហារបរិសុទ្ធ នឹងប្រដាប់ដោយព្រះចេស្ដានៃព្រះ ហើយពួកទេវតាតាម ‹ ថែរក្សាពួកគេ › ។ តើវាបង្កើនទំនុកចិត្តរបស់បងប្អូនប៉ុនណា ក្នុងការដឹងថា ក្នុងនាមជាស្ត្រី ឬបុរសដែលបានទទួលអំណោយទានពិសិដ្ឋប្រដាប់ដោយព្រះចេស្ដារបស់ព្រះ ដែលបងប្អូនមិនចាំបាច់ប្រឈមមុខនឹងជីវិតនេះតែម្នាក់ឯងនោះ ? តើវាផ្ដល់ភាពក្លាហានអ្វីខ្លះដល់បងប្អូន ក្នុងការដឹងថាទេវតាពិតជានឹងជួយបងប្អូនមែននោះ ? » —ប្រធាន រ័សុល អិម ណិលសុន ( សន្និសីទទូទៅ ខែមេសា ឆ្នាំ ២០២៤ )
« នៅក្នុងការអធិស្ឋាននៃការឧទ្ទិសឆ្លងឡើងវិញ [ សម្រាប់ព្រះវិហារបរិសុទ្ធ ម៉ានតៃ យូថាហ៍ ] នោះ ប្រធាន ណិលសុន បានទូលអង្វរព្រះអម្ចាស់ថា ព្រះដំណាក់ដ៏បរិសុទ្ធរបស់ទ្រង់នឹង លើកឡើង ជាពិសេសដល់អស់អ្នកដែលបានចូលក្នុងព្រះវិហារបរិសុទ្ធនោះ ‹ ដើម្បីពួកគេអាចទទួលបានពរជ័យពិសិដ្ឋ ហើយបន្តស័ក្ដិសម និងស្មោះត្រង់ចំពោះសេចក្ដីសញ្ញារបស់ពួកគេ … ថាទីនេះអាចក្លាយជាដំណាក់នៃសេចក្ដីសុខសាន្ត ដំណាក់នៃការលួងលោមចិត្ត និងដំណាក់នៃវិវរណៈផ្ទាល់ខ្លួនសម្រាប់អស់អ្នកដែលចូលតាមទ្វារទាំងនេះដោយស័ក្ដិសម › » ។ —អែលឌើរ រ៉ូណល អេ រ៉ាសបាន និងប្រធាន រ័សុល អិម ណិលសុន ( ការអធិស្ឋានឧទ្ទិសឆ្លងព្រះវិហារបរិសុទ្ធ ម៉ានតៃ )
« យើងសង់ព្រះវិហារបរិសុទ្ធដើម្បីគោរពព្រះអម្ចាស់ ។ ព្រះវិហារបរិសុទ្ធទាំងនេះត្រូវបានសាងសង់ឡើងសម្រាប់ការថ្វាយបង្គំ ហើយមិនមែនសម្រាប់ការដាក់បង្ហាញនោះទេ ។ យើងធ្វើសេចក្ដីសញ្ញាពិសិដ្ឋដែលមានសារៈសំខាន់ដ៏អស់កល្បនៅក្នុងព្រះវិហារបរិសុទ្ធដ៏ពិសិដ្ឋទាំងនេះ » ។ —ប្រធាន រ័សុល អិម ណិលសុន ( ការឧទ្ទិសឆ្លងឡើងវិញព្រះវិហារបរិសុទ្ធ ម៉ានតៃ )
« ព្រះអម្ចាស់ព្រះយេស៊ូវគ្រីស្ទនឹងយាងមកម្ដងទៀត »—ប្រធាន រ័សុល អិម ណិលសុន
ប្រធាន រ័សុល អិម ណិលសុន ប្រធានសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានបើកសុន្ទរកថារបស់លោកសម្រាប់សន្និសីទ ខែតុលា ឆ្នាំ២០២៤ ដោយប្រកាសពីព្រះវិហារបរិសុទ្ធថ្មីចំនួន ១៧ ហើយបានសន្យាថា អ្នកស្វែងរកដោយស្មោះត្រង់គ្រប់រូបនឹងរកឃើញព្រះគ្រីស្ទនៅក្នុងព្រះវិហារបរិសុទ្ធ ។
ព្រះវិហារបរិសុទ្ធថ្មីចំនួន ១៧
ខាងក្រោមនេះគឺជាព្រះវិហារបរិសុទ្ធថ្មីចំនួន ១៧ ដែលប្រធាន ណិលសុន បានប្រកាសក្នុងអំឡុងពេលថ្លែងសុន្ទរកថារបស់លោក ៖
- អ៊ូឈីតាន់ ដឺ ហ្សារ៉ាហ្គូស្សា ម៉ិកស៊ិក
- សាន់តា អេណា អែលសាវ៉ាឌ័រ
- មែលដឺលីន កូឡុំបៀ
- សាន់ត្យាហ្គោ សាធារណរដ្ឋ ដូមីនីក
- ព័រតូម៉ុង ឈីលី
- ឌុយប្លីន អៀរឡង់
- មីឡាន អ៊ីតាលី
- អាប៊ូចា នីហ្សេរីយ៉ា
- កំប៉ាឡា អ៊ូហ្គង់ដា
- ម៉ាពុយតូ ម៉ូសំប៊ិក
- ខូអឺដាឡេន អៃដាហូ
- ឃ្វីន ឃ្រីក អេរីហ្សូណា
- អេលប៉ាសូ តិចសាស់
- ហាន់វីល អាឡាបាម៉ា
- មីលវ៉ូគី វីនស្កុនស៊ីន
- សាំម៊ីត ញូវ ជើស៊ី
- ប្រាយស៍ យូថាហ៍
ភ្លាមៗបន្ទាប់ពីប្រកាសទីតាំងព្រះវិហារបរិសុទ្ធថ្មីទាំងនេះ ប្រធាន ណិលសុន បានប្រកាស ៖
« បងប្អូនប្រុសស្រីជាទីស្រឡាញ់របស់ខ្ញុំ តើបងប្អូនមើលឃើញអ្វីដែលកំពុងកើតឡើងនៅចំពោះមុខយើងដែរឬទេ ? ខ្ញុំសូមអធិស្ឋានកុំឲ្យយើងខកខាននូវភាពដ៏អស្ចារ្យនៃគ្រានេះ ! ព្រះអម្ចាស់ពិតជាកំពុងពន្លឿនកិច្ចការទ្រង់ » ។ —ប្រធាន រ័សុល អិម ណិលសុន
សារលិខិតអំពីព្រះវិហារបរិសុទ្ធមកពីព្យាការី
សុន្ទរកថារបស់ប្រធាន ណិលសុន ពោរពេញទៅដោយការណែនាំ និងការសន្យាសម្រាប់យើងដើម្បីរស់នៅតាម ។ យើងមិនអាចបញ្ចូលគ្រប់ការដកស្រង់អំពីព្រះវិហារបរិសុទ្ធ និងសេចក្ដីសញ្ញានៅក្នុងអត្ថបទនេះបានទេ ដូច្នេះយើងលើកទឹកចិត្តអ្នកឲ្យអានសុន្ទរកថាពេញលេញដើម្បីទទួលបានការបំផុសគំនិតបន្ថែមទៀត ។
![ក្រាហ្វិកនៃការដកស្រង់ដោយមានព្រះវិហារបរិសុទ្ធ លីម៉ា ពេរ៉ូ លូស អូលីវូស នៅផ្ទៃខាងក្រោយ ៖ « ពរជ័យនៃព្រះវិហារបរិសុទ្ធជួយប្រមូលសាសន៍អ៊ីស្រាអែលនៅទាំងសងខាងនៃវាំងនន [ ហើយ ] ជួយរៀបចំមនុស្សដែលនឹងជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ផងដែរ ! » ប្រធាន រ័សុល អិម ណិលសុន](https://cms-b-assets.familysearch.org/25/d1/3d9a891d4161b076f44672d4fdf5/15-%E0%B8%AF-%E0%B8%A3-%E0%B8%87%E0%B8%95%E0%B8%B2%E0%B8%A3-%E0%B8%A3-%E0%B8%AA-%E0%B8%93-%E0%B8%A3-%E0%B8%A9%E0%B8%93%E0%B8%B2%E0%B8%93%E0%B8%AA-khmer-cambodian.jpg)
« ហេតុអ្វីយើងកំពុងសាងសង់ព្រះវិហារបរិសុទ្ធក្នុងល្បឿនដែលមិនធ្លាប់មានពីមុនមកបែបនេះ ? ហេតុអ្វី ? ព្រោះព្រះអម្ចាស់បានបញ្ជាយើងឲ្យធ្វើដូច្នោះ ។ ពរជ័យនៃព្រះវិហារបរិសុទ្ធជួយប្រមូលសាសន៍អ៊ីស្រាអែលនៅទាំងសងខាងនៃវាំងនន ។ ពរជ័យទាំងនេះក៏ជួយរៀបចំមនុស្សដែលនឹងជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ផងដែរ ! » —ប្រធាន រ័សុល អិម ណិលសុន
« ការថ្វាយបង្គំជាទៀងទាត់នៅក្នុងព្រះវិហារបរិសុទ្ធនឹងជួយយើង » ។ —ប្រធាន រ័សុល អិម ណិលសុន
« នៅក្នុងដំណាក់របស់ព្រះអម្ចាស់ យើងផ្តោតទៅលើព្រះយេស៊ូវគ្រីស្ទ ។ យើងរៀនអំពីទ្រង់ ។ យើងចុះសេចក្ដីសញ្ញាដើម្បីដើរតាមទ្រង់ ។ យើងមកស្គាល់ទ្រង់ » ។ —ប្រធាន រ័សុល អិម ណិលសុន
« នៅពេលយើងរក្សាសេចក្ដីសញ្ញាព្រះវិហារបរិសុទ្ធ នោះយើងទទួលបានព្រះចេស្ដានៃព្រះអម្ចាស់ជួយពង្រឹងយើងកាន់តែខ្លាំង » ។ —ប្រធាន រ័សុល អិម ណិលសុន
« នៅក្នុងព្រះវិហារបរិសុទ្ធ យើងទទួលបានការការពារពីការធ្វើទុក្ខនៃលោកិយ ។ យើងដកពិសោធន៍នូវសេចក្តីស្រឡាញ់ដ៏សុទ្ធសាធរបស់ព្រះយេស៊ូវគ្រីស្ទ និងព្រះវរបិតាសួគ៌របស់យើងជាបរិបូរ ! យើងទទួលអារម្មណ៍សុខសាន្ត និងការធានាខាងវិញ្ញាណ ដែលផ្ទុយស្រឡះពីភាពចលាចលនៃលោកិយ » ។ —ប្រធាន រ័សុល អិម ណិលសុន
« នេះជាការសន្យារបស់ខ្ញុំចំពោះបងប្អូន ៖ អ្នកដែលស្វែងរកព្រះយេស៊ូវគ្រីស្ទដោយស្មោះត្រង់គ្រប់រូបនឹងរកឃើញទ្រង់នៅក្នុងព្រះវិហារបរិសុទ្ធ ។ បងប្អូននឹងទទួលអារម្មណ៍នៃសេចក្ដីមេត្តារបស់ទ្រង់ ។ បងប្អូននឹងរកឃើញចម្លើយចំពោះសំណួរដែលគួរឲ្យរំខានបំផុតរបស់បងប្អូន ។ បងប្អូននឹងយល់កាន់តែច្បាស់អំពីអំណរនៃដំណឹងល្អរបស់ទ្រង់ » ។ —ប្រធាន រ័សុល អិម ណិលសុន
« បើបងប្អូននឹងចុះ ហើយរក្សាសេចក្ដីសញ្ញាដើម្បីដើរតាមព្រះយេស៊ូវគ្រីស្ទ នោះបងប្អូននឹងឃើញថា គ្រាឈឺចាប់ក្នុងជីវិតបងប្អូនគឺរឿងបណ្តោះអាសន្នតែប៉ុណ្ណោះ ។ ការរងទុក្ខរបស់បងប្អូននឹងត្រូវបាន ‹ លេបទៅក្នុងអំណរ នៃព្រះគ្រីស្ទ › » ។ —ប្រធាន រ័សុល អិម ណិលសុន
ការថ្វាយបង្គំនៅក្នុងព្រះវិហារបរិសុទ្ធ
ដើម្បីកំណត់ពេលណាត់ជួបសម្រាប់ព្រះវិហារបរិសុទ្ធ ឬដើម្បីទទួលបានព័ត៌មានអំពីព្រះវិហារបរិសុទ្ធដែលនៅជិតអ្នកបំផុត សូមចូលទៅកាន់តំណភ្ជាប់ខាងក្រោម ៖
ការរៀបចំខ្លួនសម្រាប់ព្រះវិហារបរិសុទ្ធ
ថ្នាក់ដឹកនាំមូលដ្ឋាន ដូចជាប៊ីស្សពរបស់អ្នក អាចជួយអ្នកទទួលបានប័ណ្ណចូលព្រះវិហារបរិសុទ្ធដើម្បីថ្វាយបង្គំនៅក្នុងដំណាក់របស់ព្រះអម្ចាស់ ។ សូមពិនិត្យមើល អត្ថបទនេះ អំពីការធ្វើឲ្យការថ្វាយបង្គំនៅព្រះវិហារបរិសុទ្ធរបស់អ្នកកាន់តែមានភាពផ្ទាល់ខ្លួន និងកាន់តែមានន័យ ។
ឧបករណ៍ថ្មីមួយហៅថា ជំនួយឈ្មោះគ្រួសារ ផ្តល់ឲ្យថ្នាក់ដឹកនាំ និងអ្នកប្រឹក្សានូវវិធីដ៏អស្ចារ្យមួយដើម្បីជួយសមាជិកថ្មី និងសមាជិកដែលត្រឡប់មកវិញ ព្រមទាំងយុវជនឲ្យរៀបចំ និងបោះពុម្ពប័ណ្ណឈ្មោះគ្រួសារសម្រាប់ការធ្វើដំណើរដំបូងរបស់ពួកគេទៅកាន់ព្រះវិហារបរិសុទ្ធ ។ រៀនបន្ថែមអំពី ជំនួយឈ្មោះគ្រួសារ នៅទីនេះ ។
សម្រាប់ជំនួយផ្សេងទៀតក្នុងការរៀបចំ និងស្វែងរកឈ្មោះគ្រួសារ សូមព្យាយាមចុចលើតំណខាងក្រោមនេះ ៖
ការទាញយក និងចែកចាយការដកស្រង់នៅក្នុងអត្ថបទនេះ
ការដកស្រង់នៅក្នុងអត្ថបទនេះអាចត្រូវបានចម្លង និងចែកចាយដោយសេរី ។
ដើម្បីទាញយក និងចែកចាយរូបភាពការដកស្រង់នៅលើកុំព្យូទ័រលើតុ សូមចុចលើរូបភាពមួយដើម្បីជ្រើសរើសវា ហើយបន្ទាប់មកចុចកូនកណ្ដុរខាងស្ដាំ ( សម្រាប់ Windows ) ឬចុច Control ខណៈពេលដែលអ្នកចុច ( សម្រាប់ Mac ) ដើម្បីមើលជម្រើស Save និង Download ។ បន្ទាប់ពីអ្នកបានរក្សាទុករូបភាពមួយ អ្នកអាចបង្ហោះវាទៅគេហទំព័រប្រព័ន្ធផ្សព្វផ្សាយសង្គមដែលអ្នកចូលចិត្ត ឬផ្ញើវាទៅមិត្តភក្តិ ។
ដើម្បីចែកចាយ ឬរក្សាទុករូបភាពនៅលើឧបករណ៍ចល័ត សូមចុចលើរូបភាពដើម្បីបើកវា ហើយបន្ទាប់មកសង្កត់ម្រាមដៃរបស់អ្នករហូតដល់ម៉ឺនុយជម្រើសលេចឡើង ដូច្នេះអ្នកអាចទាញយក ឬចែកចាយរូបភាព ។
លើសពីនេះទៀត អ្នកអាចទាញយកការដកស្រង់ទាំងអស់ក្នុងពេលតែមួយនៅក្នុង zipped folder ដោយប្រើប៊ូតុងនេះ ៖
ដើម្បីស្វែងរកវីដេអូ សំឡេង និងអត្ថបទនៃសន្និសីទទូទៅពេញលេញ ខែតុលា ឆ្នាំ២០២៤ របស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមចូលទៅកាន់ ChurchofJesusChrist.org ។
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
