តើអ្នកបានដាក់ប្រវត្តិរូបពីរបញ្ចូលគ្នាដោយចៃដន្យនៅក្នុង មែកធាងគ្រួសារនៃកម្មវិធីស្រាវជ្រាវក្រុមគ្រួសារ ហើយក្រោយមកទើបបានដឹងថាអ្នកមិនគួរដាក់ដែរឬទេ ? ឬតើមានសាច់ញាតិដែលចេះតែដាក់ប្រវត្តិរូបបញ្ចូលគ្នា ហើយអ្នកត្រូវបានទទួលភារកិច្ចដើម្បីកែតម្រូវបញ្ហាការដាក់បញ្ចូលគ្នាមិនត្រឹមត្រូវទាំងនោះឬទេ ?
នៅក្នុងអត្ថបទនេះ អ្នកអាចរៀនពីរបៀបកែតម្រូវការដាក់បញ្ចូលគ្នាដែលមិនត្រឹមត្រូវ កែតម្រូវកំហុសទាំងឡាយ ហើយប្រើឧបករណ៍ការវិភាគការដាក់បញ្ចូលគ្នាដើម្បីជួយក្នុងដំណើរការនេះ ។
សញ្ញានៃការដាក់បញ្ចូលគ្នាមិនត្រឹមត្រូវដែលអាចកើតមាន
នៅពេលអ្នកធ្វើការក្នុងមែកធាងគ្រួសារ អ្នកអាចមើលឃើញប្រវត្តិរូបដែលមានភាពមិនត្រូវគ្នា ឬកំហុសនានាដែលបង្ហាញពីការដាក់បញ្ចូលគ្នាដែលមិនត្រឹមត្រូវដែលអាចកើតមាន ។ នេះគឺជាឧទាហរណ៍ពីអ្វីដែលត្រូវរកមើល ៖
- បុគ្គលនេះបានរៀបការជាមួយស្វាមី ឬភរិយាច្រើននាក់ក្នុងពេលដំណាលគ្នាដោយគ្មានភស្តុតាងពីការស្លាប់ ឬការលែងលះគ្នា ។
- បុគ្គលនេះមានចំនួនកូនច្រើនជាករណីកម្រ ( ២០ នាក់ ឬច្រើនជាងនេះ ) ។
- ថ្ងៃខែឆ្នាំកំណើតរបស់កូនមិនសមហេតុផលទេ ។ ឧទាហរណ៍ កូនបានកើតមុនពេលម្តាយអាចមានកូនបាន ឬអាយុលើសពី៩ខែបន្ទាប់ពីការស្លាប់របស់ឪពុក ។
- ទីកន្លែងកំណើតរបស់កូនមិនសមហេតុផលទេ ។ ឧទាហរណ៍ កំណត់ត្រាជំរឿនបង្ហាញថាគ្រួសារនេះតែងតែរស់នៅក្នុងទីតាំងតែមួយ ប៉ុន្តែកូនៗជាច្រើននាក់បានកើតនៅទីតាំងផ្សេងៗគ្នា ។
- កូនៗបានមានអាយុតិចជាងគ្នា៧ខែ ឬកូនៗទាំងនោះមានអាយុឃ្លាតគ្នាឆ្ងាយពេក ។
- កូនមានឈ្មោះដូចគ្នានឹងបងៗបង្កើតដែលរស់នៅក្នុងពេលដូចគ្នា ។
- ព្រឹត្តិការណ៍ជីវិតមិនសមហេតុផល ។ ឧទាហរណ៍ កូនបានចូលជាគ្រីស្ទានមុនពេលកើត ឬបុគ្គលម្នាក់រៀបការនៅអាយុ២ឆ្នាំ ។
- បុគ្គលនេះមានប្រភពដើមជាន់គ្នា ។ ឧទាហរណ៍ ប្រភពជំរឿនពីរត្រូវបានផ្តល់ឲ្យសម្រាប់ឆ្នាំដូចគ្នា ឬប្រភពបញ្ចុះសពពីរត្រូវបានផ្តល់ឲ្យសម្រាប់ឆ្នាំផ្សេងគ្នា ។
- កាលបរិច្ឆេទនៃព្រឹត្តិការណ៍ជីវិតគឺមិនត្រូវគ្នាទេនៅក្នុងប្រភពដើមទាំងឡាយ ។ ឧទាហរណ៍ កំណត់ត្រាពាក់កណ្តាលដែលបានភ្ជាប់ទៅបុគ្គលម្នាក់ដាក់ថាមានឆ្នាំកំណើតនៅឆ្នាំ១៨៦០ ហើយពាក់កណ្ដាលទៀតដាក់ថាឆ្នាំកំណើតគឺនៅឆ្នាំ១៨៥០ ។
- សមាជិកគ្រួសារ និងទំនាក់ទំនងនៅក្នុងប្រភពដើមផ្សេងៗគ្នាគឺមិនត្រូវគ្នាទេ ។
បើសិនអ្នកឃើញមានបញ្ហាកាន់តែច្រើន នោះមានភាគរយច្រើនដែលការដាក់បញ្ចូលគ្នាដែលមិនត្រឹមត្រូវបានកើតឡើង ។
ហេតុអ្វីត្រូវកែតម្រូវបញ្ហាការដាក់បញ្ចូលគ្នាដែលមិនត្រឹមត្រូវ ?
ដោយសារមែកធាងគ្រួសារគឺជាមែកធាងរួម នោះការដាក់បញ្ចូលគ្នាដែលមិនត្រឹមត្រូវមិនត្រឹមតែប៉ះពាល់ដល់បុគ្គលដែលបានបង្កើតវាតែប៉ុណ្ណោះទេ ។ ការដាក់បញ្ចូលគ្នាដែលមិនត្រឹមត្រូវប៉ះពាល់ដល់អ្នកប្រើប្រាស់ទាំងអស់ និងអាចនាំឲ្យមានបញ្ហាផ្សេងៗទៀតផងដែរ ។
- ការដាក់បញ្ចូលគ្នាដែលមិនត្រឹមត្រូវអាចនាំឲ្យមានទំនាក់ទំនងមិនត្រឹមត្រូវ ។ មនុស្សអាចបានភ្ជាប់ទៅស្វាមីភរិយា ឬឪពុកម្តាយខុស ដែលនាំឲ្យសែស្រឡាយទាំងមូលមិនត្រឹមត្រូវ ។
- ការដាក់បញ្ចូលគ្នាមិនត្រឹមត្រូវមានទំនោរអាចទៅជាបញ្ហាធំបាន ។ ការដាក់បញ្ចូលគ្នាមិនត្រឹមត្រូវជាទូទៅបណ្តាលឲ្យមានភាពមិនត្រូវគ្នា និងកំហុសផ្សេងទៀតនៅក្នុងប្រវត្តិរូប ។ កំហុសទាំងនេះជាញឹកញាប់បណ្តាលឲ្យមានការយល់ច្រឡំអំពីអត្តសញ្ញាណពិតរបស់បុគ្គលនៅលើប្រវត្តិរូប ដែលនាំឲ្យមានការដាក់បញ្ចូលគ្នាមិនត្រឹមត្រូវបន្ថែមទៀតសម្រាប់បុគ្គលនោះ និងសូម្បីតែសមាជិកគ្រួសារផ្សេងទៀត ។
ការកែតម្រូវបញ្ហាការដាក់បញ្ចូលគ្នាមិនត្រឹមត្រូវជួយកែតម្រូវបញ្ហាដែលមានស្រាប់ និងចៀសវាងបញ្ហាការដាក់បញ្ចូលគ្នានាពេលអនាគត ។
ចំណាំ ៖ នៅក្នុងកម្មវិធីទូរសព្ទ អ្នកអាចលុបចោលការដាក់បញ្ចូលគ្នាលុះត្រាតែមិនមានការផ្លាស់ប្តូរណាមួយត្រូវបានធ្វើឡើងចាប់តាំងពីការដាក់បញ្ចូលគ្នានោះមក ។ ដូចគ្នានេះផងដែរ សូមដឹងថាឧបករណ៍ការវិភាគការដាក់បញ្ចូលគ្នាមិនមាននៅក្នុងកម្មវិធីទូរសព្ទទេ ។ សូមមើលតើខ្ញុំអាចដោះស្រាយការដាក់បញ្ចូលគ្នានៅក្នុងមែកធាងគ្រួសារដោយរបៀបណា ?ហើយអូសទៅជំហានសម្រាប់កម្មវិធីទូរសព្ទ ។
កន្លែងដែលត្រូវមើលទីមួយ ៖ កំណត់ហេតុការផ្លាស់ប្តូរ
នៅពេលវាយតម្លៃការដាក់បញ្ចូលគ្នាដែលមិនត្រឹមត្រូវដែលអាចមាន កន្លែងចាប់ផ្តើមដ៏ល្អបំផុតគឺ កំណត់ហេតុការផ្លាស់ប្តូរ ។ កំណត់ហេតុការផ្លាស់ប្តូរបង្ហាញការផ្លាស់ប្តូរទាំងអស់ដែលបានធ្វើឡើងចំពោះប្រវត្តិរូបចាប់តាំងពីវាបានបង្កើតមក រួមទាំងការដាក់បញ្ចូលគ្នាផងដែរ ។
ដើម្បីមើលកំណត់ហេតុការផ្លាស់ប្តូរនៅលើកុំព្យូទ័រលើតុ សូមចូលទៅកាន់ប្រវត្តិរូបរបស់បុព្វការីជនរបស់អ្នក ។ អូសចុះក្រោម ។ អ្នកនឹងរកឃើញផ្នែក ការផ្លាស់ប្តូរចុងក្រោយបំផុត នៅខាងស្តាំដៃនៃអេក្រង់ ។ សូមចុចលើ បង្ហាញទាំងអស់ ។ នៅលើកម្មវិធីទូរសព្ទ សូមចូលទៅកាន់ប្រវត្តិរូបរបស់បុព្វការីជនរបស់អ្នក ។ សូមចុចលើ សញ្ញាចុចបីបញ្ឈរ នៅជ្រុងខាងស្តាំដៃផ្នែកខាងលើ ហើយបន្ទាប់មកចុចលើ ការផ្លាស់ប្ដូរថ្មីៗ ។
នៅពេលដែលអ្នកស្ថិតនៅក្នុងកំណត់ហេតុការផ្លាស់ប្តូរ អ្នកអាចតម្រងដើម្បីបង្ហាញតែការដាក់បញ្ចូលគ្នាប៉ុណ្ណោះបាន ។ ( មុខងារតម្រងនេះមិនមាននៅលើកម្មវិធីទេ ) ។
- នៅខាងស្តាំដៃផ្នែកខាងលើនៃទំព័រ សូមចុចលើប៊ូតុង តម្រង ។
- សូមចុចលើ ការដាក់បញ្ចូលគ្នា ។
ការប្រើឧបករណ៍ការវិភាគការដាក់បញ្ចូលគ្នា ដើម្បីប្រៀបធៀបប្រវត្តិរូបពីរដែលបានដាក់បញ្ចូលគ្នា
កាលពីអតីតកាល ធាតុដែលដាក់បញ្ចូលគ្នានៅក្នុងកំណត់ហេតុការផ្លាស់ប្តូរបានបង្ហាញសេចក្តីសង្ខេបនៃការផ្លាស់ប្តូរដែលបានធ្វើឡើងដោយការដាក់បញ្ចូលគ្នា ។ ទោះជាយ៉ាងណាក៏ដោយ ព័ត៌មាននេះអាចពិបាកអាន និងយល់ ។ ឥឡូវនេះ ឧបករណ៍ការវិភាគការដាក់បញ្ចូលគ្នា ធ្វើឲ្យវាកាន់តែងាយស្រួលក្នុងការពិនិត្យមើលការដាក់បញ្ចូលគ្នា និងកែតម្រូវវាប្រសិនបើចាំបាច់ ។ ឧបករណ៍នេះអាចរកបានសម្រាប់រាល់ការដាក់បញ្ចូលគ្នានៅក្នុងកំណត់ហេតុការផ្លាស់ប្តូរ លើកលែងតែអ្នកដែលបានធ្វើការដាក់បញ្ចូលពីមុន ថ្ងៃទី ១ ខែសីហា ឆ្នាំ២០១៦ ។
ការចុចលើ ការវិភាគការដាក់បញ្ចូលគ្នា បង្ហាញទិដ្ឋភាពទន្ទឹមគ្នានៃប្រវត្តិរូបទាំងពីរមុនពេលដាក់បញ្ចូលគ្នា ហើយបន្តដោយប្រវត្តិរូបដែលនៅសល់ ។
សម្រាប់ជំនួយបន្ថែមក្នុងការប្រើប្រាស់ឧបករណ៍ការវិភាគការដាក់បញ្ចូលគ្នានៅក្នុងមែកធាងគ្រួសារ សូមពិនិត្យមើលអត្ថបទមានប្រយោជន៍នេះ ៖
របៀបដើម្បីកំណត់បើសិនជាការដាក់បញ្ចូលគ្នាពិតជាមិនត្រឹមត្រូវ
នៅពេលដែលអ្នកអាចមើលព័ត៌មានសម្រាប់ប្រវត្តិរូបដែលបានដាក់បញ្ចូលគ្នានៅទន្ទឹមគ្នា តើអ្នកអាចកំណត់ថាតើការដាក់បញ្ចូលគ្នានេះពិតជាមិនត្រឹមត្រូវយ៉ាងដូចម្ដេច ?
ការដាក់បញ្ចូលគ្នាមិនត្រឹមត្រូវមួយចំនួនគឺងាយស្រួលក្នុងការរកឃើញ នៅពេលដែលព័ត៌មានសម្រាប់ប្រវត្តិរូបដែលដាក់បញ្ចូលគ្នាទាំងពីរគឺខុសគ្នាយ៉ាងច្បាស់ ។ ទោះជាយ៉ាងណាក៏ដោយ វាអាចមានការលំបាកជាងនេះនៅពេលដែលមានតែភាពខុសគ្នាតិចតួចរវាងប្រវត្តិរូបទាំងពីរនោះ ។ ផ្ទៀងផ្ទាត់ជានិច្ចថា ព័ត៌មានសំខាន់ៗត្រូវបានគាំទ្រដោយកំណត់ត្រាប្រវត្តិសាស្រ្ត ។
នេះគឺជាបញ្ជីនៃអ្វីដែលត្រូវពិនិត្យមើល ឬពិចារណានៅពេលស្វែងរកការដាក់បញ្ចូលគ្នាមិនត្រឹមត្រូវដែលអាចកើតមាន ៖
- តើប្រវត្តិរូបទាំងពីរមាននាមត្រកូលដូចគ្នាដែលអាចបង្កឲ្យមានភាពច្រឡំគ្នាដែរឬទេ ? ការដាក់បញ្ចូលគ្នាមិនត្រឹមត្រូវមានទំនោរកើតឡើងញឹកញាប់ជាមួយនឹងនាមត្រកូលដូចគ្នា ។
- តើប្រវត្តិរូបទាំងពីរមានឈ្មោះដូចគ្នា ឬស្រដៀងគ្នា ប៉ុន្តែកាលបរិច្ឆេទ និងទីកន្លែងខុសគ្នាយ៉ាងខ្លាំងសម្រាប់ព្រឹត្តិការណ៍ជីវិតដែរឬទេ ? នរណាម្នាក់អាចបានដាក់បញ្ចូលប្រវត្តិរូបទាំងពីរដោយសារតែឈ្មោះ ខណៈពេលដែលព្រឹត្តិការណ៍ជីវិតបង្ហាញថាប្រវត្តិរូបទាំងពីរគឺសម្រាប់មនុស្សផ្សេងគ្នា ។ ឧទាហរណ៍ វាអាចទៅរួចបានដោយមានស្ត្រីពីរនាក់ឈ្មោះ « អាណា ថមសុន » រៀបការជាមួយបុរសឈ្មោះ « ចន ស្មីធ » រស់នៅក្នុងទីក្រុងដូចគ្នា ។
- តើទំនាក់ទំនងមួយចំនួនមិនសមហេតុផលទេឬ ? ឧទាហរណ៍ តើប្រវត្តិរូបមួយមានឪពុកម្តាយមួយគូរ ខណៈដែលប្រវត្តិរូបមួយទៀតមានឪពុកម្តាយមួយគូរផ្សេងទៀតដែលមានឈ្មោះខុសគ្នាទាំងស្រុងដែរឬទេ ?
- តើថ្ងៃខែឆ្នាំកំណើត កាលបរិច្ឆេទអាពាហ៍ពិពាហ៍ និងកាលបរិច្ឆេទស្លាប់ជិតគ្នាប៉ុន្មាន ?
- មនុស្សដែលរក្សាកំណត់ត្រាប្រវត្តិសាស្រ្តមិនកត់ត្រាព័ត៌មានត្រឹមត្រូវទាំងស្រុងជានិច្ចនោះទេ ប៉ុន្តែកាលបរិច្ឆេទសំខាន់ៗនៃជីវិតរបស់មនុស្សម្នាក់គួរតែមានភាពត្រូវគ្នានៅទូទាំងកំណត់ត្រាប្រវត្តិសាស្ត្រទាំងមូល ។ ប្រសិនបើប្រវត្តិរូបនេះមានថ្ងៃខែឆ្នាំកំណើតក្នុងរយៈពេល ៥ ឆ្នាំពីគ្នា នោះ ប្រវត្តិរូបទាំងពីរនោះនៅតែអាចមានសក្តានុពលសម្រាប់បុគ្គលដូចគ្នា ។ ប៉ុន្តែប្រសិនបើបុគ្គលម្នាក់កើតនៅឆ្នាំ១៨៦៣ និងម្នាក់ទៀតកើតនៅឆ្នាំ១៨៤៥ នោះភាពខុសគ្នាខ្លាំងបែបនេះអាចបង្ហាញថាប្រវត្តិរូបទាំងពីរគួរតែសម្រាប់មនុស្សផ្សេងគ្នា ។
- តើមានភាពខុសគ្នារវាងប្រភពដើមទាំងឡាយដែរឬទេ ? ឧទាហរណ៍ តើប្រវត្តិរូបមួយមានប្រភពជំរឿនឆ្នាំ១៨៨១ មកពីទីក្រុងកេបិច ប្រទេសកាណាដា និងមួយទៀតមានប្រភពជំរឿនឆ្នាំ១៨៨១ មកពីទីក្រុងអនតារីយ៉ូ ប្រទេសកាណាដាឬទេ ?
ប្រសិនបើអ្នកឆ្លើយថា « បាទ ឬចាស » ចំពោះសំណួរមួយ ឬច្រើនខាងលើ នោះការដាក់បញ្ចូលគ្នាប្រហែលជាមិនត្រឹមត្រូវទេ ។ ប្រើជំនាញស៊ើបអង្កេតរបស់អ្នកដើម្បីស្វែងរកកំណត់ត្រាដែលនឹងបញ្ជាក់កាលបរិច្ឆេទ និងទីកន្លែងសំខាន់ៗ ក៏ដូចជាទំនាក់ទំនងសម្រាប់មនុស្សដែលនៅក្នុងសំណួរនេះ ។
នៅពេលដែលអាចធ្វើទៅបាន សូមមើលរូបភាពដើមនៃឯកសារ ហើយមិនមែនគ្រាន់តែព័ត៌មានដែលបានធ្វើលិបិក្រមប៉ុណ្ណោះទេ ។ ពេលខ្លះ លិបិក្រមសម្រាប់កំណត់ត្រាប្រវត្តិសាស្ត្រមិនត្រឹមត្រូវទាំងស្រុងទេ ហើយការសរសេរប្រវត្តិសាស្រ្តដោយដៃអាចពិបាកអាន ។ អ្នកប្រហែលជាអាចស្វែងយល់ពីភាពខុសគ្នានៃឈ្មោះ និងកាលបរិច្ឆេទដោយមើលរូបភាពដើម ដើម្បីពិនិត្យមើលថាព័ត៌មានដែលបានធ្វើលិបិក្រមត្រូវបានចម្លងយ៉ាងត្រឹមត្រូវ ។
ប្រសិនបើអ្នករកឃើញព័ត៌មានបញ្ជាក់ច្បាស់លាស់ដែលមិនបានដាក់បញ្ចូលនៅក្នុងប្រភពដើម នោះត្រូវប្រាកដថាបានបន្ថែមកំណត់ចំណាំទៅនឹងប្រវត្តិរូបរបស់បុគ្គលនោះនៅលើផ្ទាំង សហប្រតិបត្តិការ ដើម្បីជួយអ្នកប្រើប្រាស់ផ្សេងទៀតចៀសវាងការដាក់បញ្ចូលគ្នាមិនត្រឹមត្រូវនាពេលអនាគត ។
ការកែតម្រូវការដាក់បញ្ចូលគ្នាមិនត្រឹមត្រូវនៅក្នុងមែកធាងគ្រួសារនៃកម្មវិធីស្រាវជ្រាវក្រុមគ្រួសារ
អ្នកអាចកែតម្រូវបញ្ហាការដាក់បញ្ចូលគ្នាមិនត្រឹមត្រូវតាមវិធីពីរយ៉ាង ។ វិធីសាស្រ្តដែលអ្នកប្រើអាស្រ័យលើថា តើមានការផ្លាស់ប្តូរត្រូវបានធ្វើឡើងនៅលើប្រវត្តិរូបឬអត់ ចាប់តាំងពីពេលដាក់បញ្ចូលគ្នានោះមក ។
ការត្រឡប់ការដាក់បញ្ចូលគ្នាមកវិញ
ប្រសិនបើមិនមានការផ្លាស់ប្តូរណាមួយត្រូវបានធ្វើចាប់តាំងពីការដាក់បញ្ចូលគ្នាទេ នោះអ្នកអាចត្រឡប់ការដាក់បញ្ចូលគ្នាមកវិញបានយ៉ាងងាយស្រួល ។ សូមធ្វើតាមជំហានទាំងនេះ ៖
- នៅក្នុងកំណត់ហេតុការផ្លាស់ប្តូរ សូមចុចលើ ការវិភាគការដាក់បញ្ចូលគ្នា សម្រាប់ការដាក់បញ្ចូលគ្នាដែលអ្នកចង់កែតម្រូវ ។
- សូមចុចលើ លែងដាក់បញ្ចូលគ្នា នៅខាងស្តាំដៃផ្នែកខាងលើនៃអេក្រង់ការវិភាគការដាក់បញ្ជូលគ្នា ។ ចំណាំ ៖ ប្រសិនបើអ្នកមិនឃើញការផ្លាស់ប្តូរណាមួយចាប់តាំងពីការដាក់បញ្ចូលគ្នាទេ ប៉ុន្តែប៊ូតុង ការត្រឡប់ការដាក់បញ្ចូលគ្នាមកវិញ មិនអាចប្រើបាន នោះការផ្លាស់ប្តូរអាចត្រូវបានធ្វើឡើងដោយប្រព័ន្ធដោយមិនបានជូនដំណឹង ។ អនុវត្តតាមការណែនាំនៅក្នុងផ្នែក ការស្តារប្រវត្តិរូបឡើងវិញ ជំនួសវិញ ។
- នៅក្នុងប្រអប់ មូលហេតុដែលការដាក់បញ្ចូលគ្នានេះមិនត្រឹមត្រូវ ពន្យល់ដោយសង្ខេបថាមូលហេតុអ្វីបានជាប្រវត្តិរូបទាំងពីរនេះមិនមែនសម្រាប់មនុស្សដូចគ្នាទេ ។ ឧទាហរណ៍ « ចូអាន សាមសុន ABCD-123 កើតនៅក្រុងលីនខុនសៀ ប្រទេសអង់គ្លេសក្នុងឆ្នាំ១៨៥២ ។ ឪពុកម្តាយរបស់នាងគឺ ចន និង ម៉ារី សាមសុន ។ ចូអាន សាមសុន ZYXW-789 កើតនៅក្រុងយ៉កសៀ ប្រទេសអង់គ្លេសក្នុងឆ្នាំ១៨៥៨ ។ ឪពុកម្តាយរបស់នាងគឺ ជេមស៍ និង អាន សីមសុន ។ ពួកគេគឺមិនមែនជាមនុស្សតែមួយទេ ។
- សូមចុចលើ បញ្ជូន ។ សកម្មភាពនេះនឹងបំបែកប្រវត្តិរូបដែលបានដាក់បញ្ចូលគ្នាទាំងពីរនេះ ហើយត្រឡប់ប្រវត្តិរូបទាំងនេះទៅរករបៀបដើមពីមុនពេលដែលប្រវត្តិរូបទាំងពីរនេះបានដាក់បញ្ចូលគ្នា ។
ការស្តារប្រវត្តិរូបដែលបានលុបចោលនៅក្នុងការដាក់បញ្ចូលគ្នា
ប្រសិនបើការផ្លាស់ប្តូរត្រូវបានធ្វើឡើងចំពោះប្រវត្តិរូបរបស់បុគ្គលនេះចាប់តាំងពីពេលដាក់បញ្ចូលគ្នា នោះជម្រើស ការត្រឡប់ការដាក់បញ្ចូលគ្នាមកវិញ មិនអាចប្រើបានទេ ។ ( ប៊ូតុងនេះត្រូវបានដាក់ជាពណ៌ប្រផេះ ហើយការចុចលើវាមិនដំណើរការទេ ) ។
ផ្ទុយទៅវិញ អ្នកត្រូវស្តារបុគ្គលដែលបានលុបចោលឡើងវិញ ។ សូមធ្វើតាមជំហានទាំងនេះ ៖
- នៅក្នុងកំណត់ហេតុការផ្លាស់ប្តូរ សូមចុចលើឈ្មោះរបស់បុគ្គលដែលបានលុបចោលនោះ ។ អ្នកអាចធ្វើការណ៍នេះនៅក្នុងបញ្ជីនៃការផ្លាស់ប្តូរ ឬនៅលើអេក្រង់ ការវិភាគការដាក់បញ្ចូលគ្នា ។
- នៅលើកាតសង្ខេបដែលបង្ហាញ សូមចុចលើ បុគ្គល នោះ ។
- នៅខាងស្តាំផ្នែកខាងក្រោមនៃរបារពណ៍ខ្មៅដែលបង្ហាញថាអ្នកកំពុងមើលប្រវត្តិរូបដែលបានលុបចោល សូមចុចលើ ស្ដារបុគ្គលឡើងវិញ ។
- នៅក្នុងប្រអប់មូលហេតុស្តារបុគ្គលនេះឡើងវិញ សូមពន្យល់ដោយសង្ខេបថាហេតុអ្វីបានជាប្រវត្តិរូបទាំង២នេះមិនមែនជាបុគ្គលដូចគ្នា ។ ឧទាហរណ៍ « អាន ស្ទ័រលែន ABCD-123 និង អាន ស្ទ័រលែន ZYXW-789 គឺជាបងប្អូនស្រីបង្កើត ។ អាន ស្ទ័រលែន ABCD-123 បានស្លាប់ក្នុងឆ្នាំ១៨៥៣ ។ អាន ស្ទ័រលែន ZYXW-789 កើតនៅឆ្នាំ១៨៥៥ ពីរឆ្នាំបន្ទាប់ពីបងស្រីរបស់នាងស្លាប់ » ។
- សូមចុចលើ ស្ដារឡើងវិញ ។
ចំណាំ ៖ ដំណើរការនេះស្តារប្រវត្តិរូបរបស់បុគ្គលដែលបានលុបចោលទៅកាន់ស្ថានភាពរបស់វាពីមុនពេលដាក់បញ្ចូលគ្នា ប៉ុន្តែប្រវត្តិរូបផ្សេងទៀតនៅតែរក្សាទុកការផ្លាស់ប្តូរទាំងអស់ដែលបានធ្វើឡើងចាប់តាំងពីការដាក់បញ្ចូលគ្នា ។ ប្រសិនបើការផ្លាស់ប្តូរមួយចំនួនទាំងនោះត្រូវបានធ្វើឡើងដោយមានកំហុស នោះការផ្លាស់ប្តូរទាំងនោះអាចត្រូវបានកែតម្រូវជាលក្ខណៈបុគ្គលបាន ។
គន្លឹះសម្រាប់ការពារការដាក់បញ្ចូលគ្នាមិនត្រឹមត្រូវនាពេលអនាគត
ដើម្បីកាត់បន្ថយឱកាសនៃប្រវត្តិរូបដែលត្រូវបានដាក់បញ្ចូលគ្នាមិនត្រឹមត្រូវនាពេលអនាគត សូមពិនិត្យមើលប្រវត្តិរូបទាំងពីរ ហើយធ្វើឲ្យប្រវត្តិរូបទាំងនោះត្រឹមត្រូវ និងពេញលេញតាមដែលអ្នកអាចធ្វើទៅបាន ។ ដំណើរការនេះអាចរួមបញ្ចូល ការភ្ជាប់ប្រភពបន្ថែម ការកែតម្រូវភាពមិនត្រូវគ្នា និងកំហុស ទីកន្លែង ឈ្មោះ និងកាលបរិច្ឆេទតាមទីកន្លែងតាមបទដ្ឋាន ហើយនឹង ការបន្ថែមកំណត់ចំណាំពន្យល់ នៅលើផ្ទាំងសហប្រតិបត្តិការ ។
មនុស្សគ្រប់គ្នាអាចធ្វើឲ្យមានកំហុស ដូច្នេះកុំមានអារម្មណ៍អន់ចិត្តឡើយប្រសិនបើអ្នកដាក់បញ្ចូលប្រវត្តិរូបពីរចូលគ្នា ដោយចៃដន្យនោះ ។ ប្រសិនបើអ្នកជួបបញ្ហា ឥឡូវនេះអ្នកដឹងពីរបៀបកែតម្រូវវាហើយ !
ជំនួយបន្ថែម
ការដាក់បញ្ចូលគ្នា និងការឈប់ដាក់បញ្ចូលគ្នានៅក្នុងមែកធាងគ្រួសារនៃកម្មវិធីស្រាវជ្រាវក្រុមគ្រួសារ អាចមានសភាពស្មុគស្មាញ ។ ប្រសិនបើអ្នកចង់បានជំនួយក្នុងបញ្ហាការដាក់បញ្ចូលគ្នា បុគ្គលដែលមានចំណេះដឹងអាចជួយអ្នកដោយឥតគិតថ្លៃនៅឯ មជ្ឈមណ្ឌលកម្មវិធីស្រាវជ្រាវក្រុមគ្រួសារ ក្នុងមូលដ្ឋានរបស់អ្នក ។
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
