RootsTech មានសេចក្តីរំភើបក្នុងការប្រកាសពីវត្តមានរបស់វិចិត្រករ ដាណា តាណាម៉ាឈី ជាវាគ្មិនសំខាន់សម្រាប់ RootsTech ឆ្នាំ២០២៥ ។ ការងាររបស់ដាណា ជារឿយៗបង្ហាញពីអារម្មណ៍នៃឥទ្ធិពលរបស់មនុស្ស និងទំនាក់ទំនងគ្រួសារ ដែលជាគុណសម្បត្តិធ្វើឲ្យគាត់ស័ក្ដិសមយ៉ាងឥតខ្ចោះសម្រាប់កម្មវិធី RootsTech ។ ប្រសិនបើអ្នកចូលចិត្តសិល្បៈ ហើយអ្នកស្រឡាញ់ពង្សប្រវត្តិ នេះគឺជាចំណុចសំខាន់របស់ RootsTech សម្រាប់អ្នក ។ សូមមកស្គាល់ ដាណា តាណាម៉ាឈី បន្ទាប់មកត្រូវប្រាកដថាមើលគាត់នៅ RootsTech—ដោយផ្ទាល់នៅទីក្រុង សលត៍ លេក ឬតាមអនឡាញពីគ្រប់ទីកន្លែងក្នុងពិភពលោក ។
មកស្គាល់ ដាណា
សិល្បៈរបស់ដាណា ត្រូវបានដាក់នៅលើក្របទស្សនាវដ្តី O Magazine, Time Magazine និងសូម្បីតែនៅលើត្រាប្រៃសណីយ៍របស់សហរដ្ឋអាមេរិក ! នៅឆ្នាំ២០២២ គាត់បានគូរគំនូរនៅលើជញ្ជាំងនៃអគារបីជាន់ឲ្យហាង Starbucks ដែលនៅខាងក្នុងអគារ Empire State ហើយគាត់ត្រូវបានផ្តល់កិត្តិយសជាមួយនឹងស្នាដៃឆ្លាក់អក្សរដោយទឹកថ្នាំពណ៌មាសជាង ៥០០ សម្រាប់ព្រះគម្ពីរប៊ីប ESV Illuminated Bible ដែលជារូបភាពទំនើបនៃព្រះគម្ពីរប៊ីបមជ្ឈិមសម័យ ។ គាត់បានធ្វើកិច្ចការទាំងអស់នេះ និងច្រើនទៀតពេលកំពុងធ្វើការឲ្យម៉ាក និងយីហោធំៗមួយចំនួននៅលើភពផែនដីនេះ !
ស្វែងយល់ពីសិល្បៈប្រភេទថ្មី
តើអ្នកមានហាងដែលចូលចិត្ត ដែលមានកាបូប ឬការវេចខ្ចប់ផលិតផលដ៏ស្រស់ស្អាតបំផុតដែរឬទេ ? តើអ្នកធ្លាប់ទៅភោជនីយដ្ឋានដែលការសរសេរនៅលើក្ដារខៀនធ្វើឲ្យអ្នកចាប់អារម្មណ៍ស្នាដៃសិល្បៈច្រើនជាងចាប់អារម្មណ៍ម៉ឺនុយម្ហូបដែរឬទេ ? ប្រហែលជាអ្នកថែមទាំងចង់ថតរូបនៅពីមុខក្ដារខៀននោះផងដែរ ! ប្រសិនបើអ្នកអាចឆ្លើយថាបាទ ឬចាសចំពោះសំណួរទាំងពីរនេះ នោះអ្នកនឹងចូលចិត្តការងារសិល្បៈរបស់វិចិត្រករ ដាណា តាណាម៉ាឈី ដែលមានមូលដ្ឋាននៅទីក្រុងប្រូកលីន ដែរ ។
នៅពេលអ្នកដឹងថា ដាណាមានប្រជាប្រិយភាព និងជោគជ័យប៉ុនណា អ្នកប្រហែលជាស្មានថា គាត់បានកំពុងធ្វើអ្វីៗទាំងនេះអស់ជាច្រើនទសវត្សរ៍មកហើយ ឬថាមានក្រុមតូចមួយនៃនាយកច្នៃប្រឌិត និងសហការីផ្នែកទីផ្សារនៅពីក្រោយភាពជោគជ័យរបស់គាត់ ។ ជាក់ស្តែង ដំណើររបស់ដាណា ក្នុងការក្លាយជាវិចិត្រករដ៏ល្បីលើពិភពលោក បានចាប់ផ្តើមស្ទើរតែដោយភាពចៃដន្យ ហើយប្រសិនបើមិនមានមិត្តភក្តិដែលបានលើកទឹកចិត្ត និងចែកចាយការងារសិល្បៈរបស់គាត់ទេ នោះប្រហែលជាវាមិនបានចាប់ផ្តើមឡើងឡើយ ។
ដំណើររឿងនេះចាប់ផ្ដើមនៅថ្ងៃមួយក្នុងឆ្នាំ២០០៩ នៅពេលដែលដាណា នៅផ្ទះមិត្តភក្ដិម្នាក់ជួយតុបតែងលម្អសម្រាប់ពិធីជប់លៀង ។ បាវចនាសម្រាប់ពិធីជប់លៀងគឺ The Great Gatsby ។ នៅខាងក្នុងផ្ទះ មិត្តភក្តិរបស់ដាណា ទើបតែបានដំឡើងជញ្ជាំងដោយមានផ្ទាំងគំនូរពីក្ដារខៀន ជាលក្ខណៈពិសេសដែលមិនមានមនុស្សជាច្រើនបានឃើញពីមុនមកទេនៅអំឡុងពេលនោះ ។ នៅពេលកំពុងតុបតែង មិត្តភក្តិនោះបានហុចដីសមួយដុំឲ្យដាណា ហើយសុំឲ្យគាត់សរសេរអ្វីមួយនៅលើជញ្ជាំង ដើម្បីជួយបញ្ជាក់ពីបាវចនានាពេលល្ងាចនោះ ។ ពីមួយអក្សរទៅមួយអក្សរ ដាណាបានខិតខំអស់ពីសមត្ថភាពរបស់គាត់ដើម្បីបង្កើតចំណាប់អារម្មណ៍បែបយុគសម័យភ្លេងហ្សាសនាទសវត្សរ៍ឆ្នាំ១៩២០ ។ នៅក្នុងពិធីជប់លៀងយប់នោះ មនុស្សម្នាពិតជាចូលចិត្តអក្សរនៅលើក្ដារខៀននោះណាស់ ។
ចេញពីសិល្បៈដីស ទៅគូរលើម៉ាក Nike
ជាការពិតណាស់ រូបថតជាច្រើនសន្លឹកពីសិល្បៈរបស់ដាណា ដែលមនុស្សថតនៅយប់នោះ ត្រូវបានចុះផ្សាយនៅលើប្រព័ន្ធផ្សព្វផ្សាយសង្គម ។ នៅប៉ុន្មានសប្តាហ៍បន្ទាប់មក ដាណាបានសរសេរនៅលើក្ដារខៀនសម្រាប់ពិធីជប់លៀងរបស់មិត្តភក្តិផ្សេងទៀត ហើយមិនយូរប៉ុន្មាន មនុស្សដែលគាត់មិនធ្លាប់ជួបពីមុនបានទាក់ទងមក និងស្នើសុំគាត់ឲ្យបង្កើតអ្វីដែលស្រដៀងគ្នាសម្រាប់ព្រឹត្តិការណ៍សំខាន់ៗរបស់ពួកគេ ។
បន្ទាប់មក អាជីវកម្មនានាបានចាប់ផ្តើមទាក់ទងមកដាណា និងជួលគាត់ដើម្បីជួយគូរផ្នែកខាងក្នុងនៃហាងរបស់ពួកគេ ។ ដាណាក៏ព្យាយាមក្ដាប់យកឱកាសទាំងនោះ ។ « ដំបូងឡើយ ខ្ញុំមិនបានចុះផ្សាយការងាររបស់ខ្ញុំតាមអនឡាញទេ » គាត់និយាយថា « ព្រោះគំនិតរិះគន់ផ្ទាល់ខ្លួនក្នុងចិត្តខ្ញុំបានប្រាប់ខ្ញុំថា ប្រាកដណាស់មានគេផ្សេងទៀតបានធ្វើរឿងនេះរួចហើយ ហើយធ្វើវាបានល្អជាងដែលខ្ញុំអាចធ្វើបានទៅទៀត ។ ប៉ុន្តែជាក់ស្ដែងគ្មាននរណាម្នាក់បានធ្វើរឿងនេះនោះទេ ។ ហើយប្រហែលប្រាំឆ្នាំក្រោយ គេក៏ហៅខ្ញុំថា មនុស្សស្រីដីស ។ ហើយមកដល់ចំណុចមួយនោះ ខ្ញុំក៏ក្លាយជារាជនីដីស ។ ប៉ុន្តែខ្ញុំនៅតែគិតថា ខ្ញុំចូលចិត្តគេហៅថា ដាណា ច្រើនជាង » ( ដាណា តាណាម៉ាឈី Adobe Max ឆ្នាំ២០២៣ សម្រង់ទាំងអស់នៅក្នុងអត្ថបទនេះគឺមកពីប្រភពនេះ ) ។
នៅពេលនោះ ក្រុមហ៊ុនជាច្រើនចង់បានការរចនាម៉ូដរបស់ដាណា សម្រាប់ទស្សនៈផ្សេងៗនៃអាជីវកម្មរបស់ពួកគេ—សម្រាប់ស្លាក ការវេចខ្ចប់ កាបូប ក្របសៀវភៅ ប័ណ្ណប្រកាស និងជាច្រើនទៀត ។ ដាណានិយាយថា « រាល់កម្រៃជើងសាថ្មីបានធ្វើឲ្យខ្ញុំភ្ញាក់ផ្អើល និងធ្វើឲ្យខ្ញុំមានចិត្តរាបទាប » ។ « ខ្ញុំមិននិយាយលេងទេ ។ ខ្ញុំពិតជាមិនចង់ជឿទេថាគេបង់ប្រាក់ឲ្យខ្ញុំធ្វើកិច្ចការនេះ » ។
ទន្ទឹមនឹងនេះ បញ្ជីអតិថិជនរបស់ដាណា បានបន្តកើនឡើង ។ សព្វថ្ងៃនេះ បញ្ជីនោះរួមមានយីហោល្បីៗនៅក្នុងពិភពអាជីវកម្ម ក្រុមហ៊ុនជាច្រើនដូចជា Nike, Google, Target និង Starbucks នេះគ្រាន់តែលើកឡើងពីរបីក្រុមហ៊ុនប៉ុណ្ណោះ ។ ប្រហែលជាអ្នកធ្លាប់មានឱកាសបានឃើញការរចនារបស់គាត់ដោយមិនដឹងខ្លួននៅលើដំណើរទិញទំនិញផ្ទាល់ខ្លួនរបស់អ្នក ឬយ៉ាងហោចណាស់បានប្រាស្រ័យទាក់ទងនឹងក្រុមហ៊ុនដែលបានព្យាយាមចម្លងតាមរចនាបថរបស់គាត់ ។
ឥទ្ធិពលនៃ gaman
នៅក្នុងជីវិតរបស់គាត់ ដាណាបានរកឃើញការលួងលោម និងកម្លាំងពីគោលគំនិតរបស់ប្រជាជនជប៉ុននៃពាក្យថា gaman—ពាក្យទស្សនវិជ្ជាដែលមានន័យថា « ការស៊ូទ្រាំដោយការអត់ធ្មត់ និងសេចក្តីថ្លៃថ្នូរចំពោះរឿងរ៉ាវដែលហាក់ដូចជាមិនអាចទ្រាំទ្របាន »—និងរបៀបដែលមនុស្សក្នុងមែកធាងគ្រួសាររបស់គាត់បានប្រើប្រាស់អំណាចនៃការច្នៃប្រឌិត និងអាចអនុវត្ត gaman អំឡុងពេលគ្រាលំបាកក្នុងជីវិតរបស់ពួកគេ ។
លោកតាលោកយាយជនជាតិជប៉ុនអាមេរិកាំងរបស់ដាណា បានជួបគ្នាពេលរស់នៅក្នុងជំរំឃុំឃាំងក្នុងអំឡុងសង្គ្រាមលោកលើកទីពីរ ។ នៅពេលដែលពួកគាត់ទាំងពីរនាក់មានអាយុ ១៩ឆ្នាំ គ្រួសាររបស់ពួកគាត់ត្រូវបានបង្ខំឲ្យចាកចេញពីផ្ទះរបស់ពួកគាត់នៅជិតឆ្នេរសមុទ្រកាលីហ្វ័រញ៉ា ហើយផ្លាស់ទីលំនៅទៅកន្លែងដាច់ស្រយាល ។ ទោះបីជាលក្ខខណ្ឌរស់នៅមិនងាយស្រួល និងលំបាក ហើយមិនដឹងថា ពួកគាត់នឹងនៅទីនោះរយៈពេលប៉ុន្មានក៏ដោយ លោកតាលោកយាយរបស់ដាណា និងក្រុមគ្រួសាររបស់ពួកគាត់បានរកឃើញសេចក្តីសុខសាន្ត និងកម្លាំងដោយការបង្កើតសិល្បៈចេញពីសម្ភារតិចតួចដែលពួកគាត់មាន—កាកសំណល់ក្រដាស កំណាត់ដុំឈើ បំណែកសម្រាមប្លាស្ទិក ។ ពួកគាត់បានធ្វើបែបនេះក្នុងកិច្ចខិតខំប្រឹងប្រែងដើម្បី « ធ្វើឲ្យធម្មតា » នូវរាល់ស្ថានភាពដែលមិនធម្មតា មិនត្រឹមតែសម្រាប់ខ្លួនឯងប៉ុណ្ណោះទេ ប៉ុន្តែសម្រាប់កុមារនៅក្នុងជំរំនោះដែរ ។ តាមការសិក្សាដំណើររឿងរបស់ពួកគាត់ ដាណាមើលឃើញ gaman នៅក្នុងស្នាដៃការបត់ក្រដាសធ្វើជារូបផ្សេងៗដ៏ស្មុគស្មាញដែលមានឥឡូវនេះ ថាជាមរតកគ្រួសារ ។ ឧទាហរណ៍មួយក្នុងចំណោមឧទាហរណ៍ដែលគាត់ចូលចិត្ត គឺកូនឆ័ត្រទំហំប៉ិនបាតដៃដែលសមាជិកគ្រួសាររបស់គាត់បានបង្កើតចេញពីឈើគូស និងក្រដាសពីកញ្ចប់បារីដែលរើសចេញពីធុងសម្រាម ។
សិល្បៈនៅគ្រាមានទុក្ខលំបាក
ដំណើររឿងគ្រួសាររបស់ដាណា និងមរតកសិល្បៈដ៏មានអត្ថន័យជាពិសេសចំពោះគាត់កាលពីប៉ុន្មានឆ្នាំមុន នៅពេលគាត់បានទទួលកម្រៃជើងសាដើម្បីបង្កើតការឆ្លាក់អក្សររូបភាពដែលប្រើទឹកថ្នាំពណ៌មាសជាង ៥០០ សម្រាប់ ESV Illuminated Bible ជាគម្រោងមួយដែលរំឭកដល់អ្នកអានពីឯកសារដ៏ស្រស់ស្អាត ដែលបានបង្កើតអំឡុងពេលមជ្ឈិមសម័យ ។ ជាលទ្ធផល គម្រោងនេះជួបប្រទះនឹងរដូវកាលលំបាក និងឈឺចាប់បំផុតមួយនៃជីវិតរបស់ដាណា ហើយគាត់បានគិតយ៉ាងហ្មត់ចត់អំពីការបោះបង់ចោល ឬយ៉ាងហោចណាស់ផ្អាកគម្រោងនេះសិនដែរ ។ គំរូរបស់បុព្វការីជនរបស់គាត់អំពី gaman បាន បំផុសគំនិតឲ្យគាត់តស៊ូ ។
« ខ្ញុំធ្លាប់បានឮនរណាម្នាក់និយាយទាក់ទងនឹងរដូវកាលដ៏លំបាកក្នុងជីវិត ទាំងបច្ចុប្បន្នដែលអ្នកកំពុងស្ថិតនៅក្នុងរដូវកាលមួយ ឬអ្នកកំពុងចេញពីរដូវកាលមួយ ឬអ្នកហៀបនឹងឈានជើងចូលទៅក្នុងរដូវកាលមួយ » គាត់បាននិយាយ ។ « ហើយពីដំបូង វាអាចស្ដាប់ទៅដូចជាអស់សង្ឃឹមខ្លាំងណាស់ ។ ប៉ុន្តែទោះបីជាយើងមិនអាចគ្រប់គ្រងអ្វីដែលជីវិតនឹងទម្លាក់មកលើយើងក្ដី ក៏យើងអាចគ្រប់គ្រងការឆ្លើយតបរបស់យើង និងឥរិយាបថដែលយើងជ្រើសរើសបង្ហាញនៅពេលប្រឈមមុខនឹងការលំបាកនោះបានដែរ ។ តើយើងនឹងទទួលយកវា ឬរត់ចេញពីវា ? » ការធ្វើតាមគំរូនៃជនដែលបានលាចាកលោកទៅ ដាណាបានជ្រើសរើសទទួលយកអ្វីដែលគាត់កំពុងឆ្លងកាត់ ហើយការធ្វើដូច្នេះ បានជំរុញការងាររបស់គាត់ទៅកាន់ចំណុចថ្មីដ៏មានអត្ថន័យ និងការយល់ចិត្ត ។
វាគឺជាគម្រោងមួយដែលមានឥទ្ធិពលយ៉ាងជ្រាលជ្រៅលើជីវិតរបស់ដាណា និងបានផ្លាស់ប្តូររបៀបដែលគាត់តទល់នឹងបញ្ហាប្រឈមនានា ។ « នៅក្នុងសម័យទំនើបនេះ មិនមានកង្វះច្រកចេញពីស្ថានភាពដែលមានឧបគ្គនោះទេ » គាត់និយាយ ។ « យើងអាចជ្រើសរើសវិធីសាស្រ្តជាច្រើនដើម្បីមិនរវីរវល់ ចៀសវាង ទប់ទល់ ឬគ្រាន់តែបន្តទៅមុខទៀត ។ ប៉ុន្តែវាជាពេលដែលយើងជ្រើសរើសធ្វើ មិនបោះបង់ និងតស៊ូក្នុងការឈឺចាប់របស់យើង ដែលវាបង្កើតនូវអ្វីដែលមិនធម្មតានៅខាងក្នុងយើង ៖ ភាពធន់ និងភាពក្លាហានដែលយើងមិនធ្លាប់ដឹងថាយើងមាន » ។
សូមអបអរដល់គ្រួសារ ដំណើររឿង និង Gaman ជាមួយ ដាណា តាណាម៉ាឈី នៅ RootsTech !
ត្រៀមខ្លួនរួចរាល់ដើម្បីទទួលអារម្មណ៍នៃការបំផុសគំនិតហើយឬនៅ ? រឿងតែមួយគត់ដែលល្អជាងការអានអំពីដំណើររបស់ ដាណា តាណាម៉ាឈី ក្នុងការក្លាយជាវិចិត្រករដ៏ល្បីលើពិភពលោក គឺជាស្តាប់គាត់និយាយអំពីដំណើររឿងរបស់គាត់ផ្ទាល់ ! សូមចូលរួមជាមួយយើងផ្ទាល់នៅ RootsTech—ដោយផ្ទាល់ ឬតាមអនឡាញ—ដើម្បីស្តាប់អ្វីដែលគាត់និយាយ ។ គាត់គឺជាវាគ្មិនដ៏ល្អឥតខ្ចោះសម្រាប់ព្រឹត្តិការណ៍សកលដែលនិយាយអំពីការប្រារព្ធពង្សប្រវត្តិរបស់អ្នក ។ បន្ទាប់មកកុំទៅណា និងពិនិត្យមើលថ្នាក់មួយចំនួនដែលអ្នកនឹងបានស្តាប់បទបង្ហាញដ៏អស្ចារ្យកាន់តែច្រើន និងរៀនជំនាញដ៏មានតម្លៃដែលអាចជួយអ្នកស្វែងរកពង្សប្រវត្តិរបស់អ្នកផ្ទាល់ ។
តើ RootsTech គឺជាអ្វី ?
RootsTech គឺជាកន្លែងមួយដើម្បីរៀន ទទួលបានការបំផុសគំនិត និងបង្កើតទំនាក់ទំនងតាមរយៈពង្សប្រវិត្ត ។ រៀបចំដោយ កម្មវិធីស្រាវជ្រាវក្រុមគ្រួសារ និងឧបត្ថម្ភដោយអង្គភាពពង្សាវលីឈានមុខគេផ្សេងទៀត យើងមានថ្នាក់ជំនាញរាប់រយ វីដេអូអំពីគន្លឹះ និងដំណោះស្រាយ និងដំណើររឿងដ៏បំផុសគំនិតជាច្រើន ដែលអាចជួយអ្នកឲ្យទទួលបានបទពិសោធន៍ពង្សប្រវត្ដិដែលអ្នកមិនធ្លាប់មានពីមុនមក ។ សូមចូលមើលបណ្ណាល័យសិក្សារបស់យើងនៅពេលណាក៏បាន ឬដាក់ផែនការដើម្បីចូលរួមនឹងយើងសម្រាប់ព្រឹត្ដិការណ៍សន្និសីទតាមអនឡាញ ឬដោយផ្ទាល់ ។
អត្ថបទដែលទាក់ទង
