“Ang atong natural nga mga pangandoy alang sa mga koneksyon sa pamilya matuman kon kita nasumpay ngadto sa atong mga katigulangan pinaagi sa sagrado nga mga ordinansa sa templo.”
(Russell M. Nelson, “Mga Kaliwatan Nasumpay sa Gugma,” Liahona, Mayo 2010, 92).
Si Jesus mitudlo nga ang tanang tawo kinahanglan nga mabunyagan aron makabalik ngadto sa gingharian sa langit. Sa dihang kamo mabunyagan, kamo nakigsaad sa Dios sa pagsunod sa mga panudlo ug ehemplo ni Kristo. Human sa inyong bunyag, makatabang kamo sa inyong mga katigulangan sa paghimo usab og sagrado nga mga pakigsaad.
Kini nga artikulo makagiya kaninyo samtang mainampuon kamo nga magpundok sa gikinahanglan nga impormasyon bahin sa inyong mga paryente ug mobisita sa templo aron magpabunyag alang kanila.
Andama ang Gikinahanglan nga Impormasyon
Gamita ang FamilySearch.org aron sa pagtabang kaninyo sa pagpundok sa impormasyon bahin sa inyong mga paryente ug mohangyo sa pagbuhat sa ilang bunyag.
1. Paghimo og Libre nga FamilySearch Account.
Paghimo og account gamit ang FamilySearch.org o sa Family Tree app. Siguroha nga ibutang nga ikaw usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ang FamilySearch mangayo sa imong rekord sa pagkamiyembro sa Simbahan. Mahimo nimong makita kini nga numero pinaagi sa pagtan-aw sa imong rekomend sa templo, pagpangutana sa klerk sa inyong ward, o pagpangutana sa sakop sa inyong bishopric.
2. Pagdugang og mga Sakop sa Pamilya ngadto sa Family Tree.
Ang Family Search naggamit sa Family Tree aron pagtabang sa pagsubay hain sa mga paryente ang nakakompleto na sa ilang mga ordinansa ug hain ang wala.
Diha sa Family Tree, pagdugang og sukaranan nga impormasyon alang sa mga henerasyon taliwala nimo ug sa paryente nga buot nimo nga serbisyohan sa templo. Sama pananglit, kon ikaw gusto nga mopahigayon og mga ordinansa alang sa usa ka apohan, una idugang ang ngalan sa imong ginikanan, ug dayon idugang ang apohan. Sa paghangyo sa pagbuhat og ordinansa alang sa usa ka tawo, nagkinahanglan ka nga mobutang sa ngalan sa tawo, sekso, ug usa ka petsa ug dapit alang sa labing minos usa ka panghitabo sa kinabuhi, sama sa pagkatawo, kaminyoon, o kamatayon.
Kon ikaw magdugang og usa ka patay na nga katigulangan, ang FamilySearch mopakita kanimo sa posible nga mga motakdo kon ang imong paryente anaa na sa Family Tree. Kining posible nga mga katakdo makatabang kanimo sa pagtan-aw kon ang mga ordinansa nakompleto na alang niana nga tawo.
3. Paghangyo og Kard sa Ngalan sa Pamilya
Ang mga kard sa ngalan sa pamilya gamiton aron sa pagpakita kon alang kang kinsa ang gibuhatan nimo og mga ordinansa diha sa templo. Human nimo madugang ang imong paryente ngadto sa Family Tree, gamita ang Mga Ordinansa nga tab diha sa pahina sa tawo aron sa paghangyo ug pagreserba og ordinansa. (Tan-awa ang ehemplo sa ubos.)
Kon ang usa ka paryente mitaliwan sulod sa milabay nga 110 ka tuig, palihog pangayo og pagtugot gikan sa labing suod nga buhing sakop sa pamilya sa tawo sa dili pa mag-andam sa kard sa ngalan sa pamilya.
Timan-i: Importante nga tahoron ang mga hangyo sa ubang buhi nga mga sakop sa pamilya sa higayon nga serbisyohan ang pareho ninyo nga paryente. Kon ikaw manghangyo og pagtugot, mahimong makatabang ang pagpasabot nga ang pagserbisyo sa templo alang sa uban gitanyag diha sa gugma, ug kadtong kinsa nangamatay na makapili kon modawat ba sa ordinansa.
Sa dihang ikaw nakahangyo og ngalan sa pamilya, ang FamilySearch mangutana kanimo kon ikaw ba mismo ang moprinta sa kard sa ngalan sa pamilya o mohatag kanimo og impormasyon nga dad-on ngadto sa templo kon gusto ka nga iprinta kini didto.
Pagserbisyo diha sa Templo
Samtang ikaw nagserbisyo sa imong pamilya diha sa templo, makadawat ka sa pipila ka mga panalangin nga gisaad sa Apostoles sa modernong panahon:
“Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa nagkakusog nga impluwensya sa kaaway.”
(David A. Bednar, “Ang mga Kasingkasing sa mga Anak Mobati,” Liahona, Nob. 2011, 24–27).
