Ko e hā ʻoku mole ai ha niʻihi ʻo e Ngaahi Manatu Melié ʻi Heʻeku Tānakiʻanga Fakamatalá (Gallery)?

ʻI he lolotonga hono seivi kimuí ni mo hiki ha tatau talifaki ʻo e ngaahi fakamatalá, naʻe fehalaaki ai ʻemau tamateʻi ha Ngaahi Manatu Melie mei he ʻākaivi FamilySearch. Meʻapangó, ʻoku ʻi ai ha kiʻi peseti siʻisiʻi ʻo e Ngaahi Manatu Melie naʻe tamateʻí he ʻikai ke toe lava ʻo fakafoki kakato mai. Naʻe toe maʻu ʻa e tefitoʻi fakamatala ki he Manatu Melie takitaha, hangē ko e hingoá mo e fakamatalá, ka ʻoku ʻikai toe maʻu ʻa e ngaahi failé mo ha ngaahi fakamatala ʻe niʻihi. ʻOku mau kole fakamolemole atu ʻi ha faʻahinga palopalema ʻe ala hoko ʻi he fehalaaki ko ʻení. Kuo mau fokotuʻu ha ngaahi maluʻi foʻou ke fakapapauʻi he ʻikai toe hoko ia.

Founga ke toe maʻu mai ai hoʻo Ngaahi Manatu Melié

Kuo mau faʻu ha polokalama ki hono Toe Maʻu ʻo e Ngaahi Manatu Melié ʻa ia ʻoku fakaʻasi mai ai ʻa e Ngaahi Manatu Melie ne molé. ʻOkú ne ʻoatu ha founga ke ke toe maʻu ai e meʻa ʻoku puliá pea fakafehokotaki ia ki ha faʻahinga fakaikiiki pē ne mau lava ʻo toe maʻu mai. Te ke lava ʻo aʻu ki he polokalamá ʻaki haʻo muimui ʻi he fehokotakiʻanga ʻi he fanongonongó ʻi ʻolunga ʻi hoʻo Tānakiʻanga Fakamatalá (Gallery), pe ʻi he peesi fakafoʻituitui ki he Manatu Melie takitaha ʻoku puliá. ʻE lava ke maʻu atu ʻa e ngaahi fehokotakiʻanga ko ʻení kapau ʻokú ke maʻu ha Ngaahi Manatu Melie ʻi hoʻo Tānakiʻanga Fakamatalá kuo teʻeki ai ke toe maʻu mai pe naʻe tamateʻi.

Fakatokangaʻi ange: Kapau ʻoku ʻikai ke ke sio ki ha fakatokanga ʻi hoʻo Tānakiʻanga Fakamatalá fekauʻaki mo e Ngaahi Manatu Melie ʻoku puliá ʻoku ʻikai fiemaʻu ke ke fai ha meʻa. Naʻe ʻikai uesia hoʻo manatu melié ʻe he mole ʻa e fakamatalá.

Fekauʻaki mo e Meʻangāue ki hono Toe Maʻu e Ngaahi Manatu Melié

Ko ha fakamatala fakanounou ʻeni ʻo e ngaahi tefitoʻi meʻa mahuʻinga ʻo e meʻangāue ki hono toe maʻu maí.

Dashboard

ʻOku ʻasi ʻi he Dashboard ʻo e Ngaahi Manatu Melie Kuo Toe Maʻu Maí ha lisi ʻo e ngaahi Manatu Melie kotoa pē kuo pulia maʻá e tokotaha ʻoku hū ki he polokalamá. ʻOku kau ʻi he dashboard ha:

Lisi fakafaʻahinga ʻo e Manatu Melie takitaha ʻoku puliá fakataha mo ha faʻahinga fakamatala pē ʻoku fekauʻaki mo ia kuo tānaki atu, hangē ko ha hingoa pe fakamatala.
Konga ʻokú ne fakahaaʻi mai ʻa e tuʻunga ʻoku ʻi ai ʻa e fakalakalaka hono toe maʻu maí.
Fakafaʻahinga ke fakaʻaliʻali mai ʻa e “ngaahi manatu melie ʻoku puliá” mo e “ngaahi manatu melie kuo maʻu maí.”
Fefokifokiʻaki ki he ngaahi meʻa ʻoku puli mei he kulupú ʻi he tokotahá pe Manatu Melié.

Te ke lava ʻo toe maʻu mei he dashboard ha ʻīmisi pe ngaahi faile fakamatala, tānaki atu ha fakamatala ʻoku pulia ki he ngaahi talanoá, pe tamateʻi ʻaupito ʻa e ngaahi fakaikiiki fekauʻaki mo e Manatu Melie ʻoku puliá. Ko e ongo tefitoʻi meʻa te ke fakaʻaongaʻí ko e Liliú mo e Tamateʻí.

Liliu/Fakahū

Ko e Manatu Melie kotoa pē ʻoku lisi atu ʻi he dashboard, te ke fili ai pe ʻe fakahū pe liliu ʻo makatuʻunga ʻi ha talanoa pe ʻīmisí/fakamatalá. Fakaʻaongaʻi ʻeni ke toe maʻu mai ʻa e meʻa naʻe molé pea toe fakatahaʻi ʻa e ngaahi fakaikiikí mo e Manatu Melie ʻoku nau kau ki aí.

Manatuʻi, kuo pau ke ʻi he founga faile tatau mo e meʻa naʻe molé ʻa e ʻīmisi pe fakamatala kuo fetongí. Ko ia, kapau ko e ʻuluaki ʻīmisi naʻe fakahuú ko ha JPEG, kuo pau foki ke JPEG mo e fetongi ʻokú ke fakahū ko ha konga ʻo e founga hono toe maʻu maí. Te ke lava ʻo fakaʻaongaʻi e polokalama ki he liliu ʻo e taá ke seivi e ngaahi failé ʻi he fōmeti totonú.

KIʻI TOKONI: Kapau ʻoku ʻikai ke ke fakapapauʻi e feituʻu ʻoku tuʻu ai ha tā pe fakamatala ʻi hoʻo komipiutá pe meʻangāué, feinga ke fakaʻaongaʻi hoʻo polokalama fekumi ʻi hoʻo komipiutá pe meʻangāué (hangē ko ʻení Windows File Explorer, pe Finder ʻi he Mac) ke fekumi ki he meʻa ʻoku puliá ʻo fakaʻaongaʻi ʻa e hingoa totonu ʻo e failé.

Tamateʻi

Kapau ʻoku ʻikai ke ke maʻu ʻa e faile totonú pe kapau ʻoku ʻikai ke ke loto ke toe maʻu mai ha taha ʻo e Ngaahi Manatu Melie ʻoku puliá, te ke lava pē ʻo toʻo ʻa e ngaahi fakaikiiki ʻo e Manatu Melié mei he FamilySearch ʻo fakaʻaongaʻi ʻa e meʻa lomi ke tamateʻí. He ʻikai lava ʻo toe liliu e ngāue ko ʻení, pea ko ʻene tamateʻí pē, he ʻikai lava ke toe maʻu e fakamatalá. Ko e meʻa lelei taha ʻeni ke faí kapau ko e meʻa naʻe molé ko ha tatau ʻasi tuʻo ua ia ʻo ha meʻa ʻe taha ʻi he Ngaahi Manatu Melié.