Kapau ʻoku ʻi ai haʻo ngaahi kui mei Siaina, Siapani, pe Kōlea, te ke ala maʻu ha ngaahi fehalaaki taʻe-ʻamanekina ʻi he ngaahi ʻaho kuo vahe ki he ngaahi meʻa ʻoku hoko ʻi he moʻui ʻa hoʻo ngaahi kuí. Ko hono ʻuhingá ʻeni:
- ʻOku fakahaaʻi ʻe he fakamatala foʻoú mo e tekinolosia lelei angé ha ngaahi lekooti ʻoku ʻasi tuʻo ua ʻi he Fuʻu ʻAkau Fakafāmilí. Ko e ngaahi lekooti ʻoku ʻasi tuʻo ua maʻá e tokotaha tatau pē, ka ʻe lava ke ʻi ai ha fakamatala kehe ʻoku fakafuofuaʻi.
- ʻI he taimi ʻe lava aí, ʻoku feinga ʻa e FamilySearch ke fakatahaʻi ʻa e ngaahi lekooti ʻoku ʻasi tuʻo ua ʻi he temipalé ki ha lekooti pē ʻe taha. ʻOku ui ʻa e founga ko ʻení ko hano fakatahaʻi (merge).
- Kapau ʻoku ʻasi ʻi he ngaahi lekooti ʻoku ʻasi tuʻo uá ha ngaahi ʻaho kehekehe ki he meʻa tatau ʻoku hoko ʻi he moʻuí, ʻe ʻasi mai leva ʻa e lekooti naʻe toki fakatahaʻi foʻou ʻi he Fuʻu ʻAkau Fakafāmilí ʻa e ʻaho ko ia naʻe toki fakahū fakamuimui tahá. Ko e taimi ʻe niʻihi ʻoku faʻa hala ʻa e fakahū fakamuimui tahá.
- ʻOku fakaafeʻi ʻa e kau pataloní ke nau fakatonutonu ʻa e ngaahi fehalaākí ʻi he taimi ʻoku nau fetaulaki ai mo iá. Fakapapauʻi ke fakakau ha maʻuʻanga fakamatala pe fakamatalaʻi ʻa e ʻuhinga ʻokú ke fakahoko ai iá.
ʻOku fakamatalaʻi fakaikiiki lahi ange ʻe he ngaahi meʻá ni ʻa e founga ʻoku hoko mai ai ʻa e ngaahi fehalaaki ko ʻení mo e founga lelei taha ke fakaleleiʻi ʻaki kinautolú.
Fakamatalaʻi ʻo e ngaahi fehalaākí
ʻI he feituʻu ʻoku siʻisiʻi ai ʻa e ngaahi fakamatala fakahisitōliá, ʻoku fakafuofuaʻi ʻe he kau pataloni ʻo e FamilySearch ʻi he taimi ʻe niʻihi ʻa e ngaahi ʻaho ʻo e ngaahi meʻa mahuʻinga taha naʻe hoko ʻi he moʻui ʻa ʻenau ngaahi kuí. Kuo hoko ʻeni ko ha meʻa fakahisitōlia ki he kau pataloni ʻoku ʻi ai ʻenau ngaahi kui mei Siaina, Siapani, mo Kōleá.
ʻIkai ngata aí, ka naʻe faʻu ʻe ha kakai tokolahi ʻoku nau ngāue tauʻatāina ʻiate kinautolu pē, ʻi ha ngaahi taʻu lahi, ha ngaahi lekooti lahi ʻi he Fuʻu ʻAkau Fakafāmilí—kotoa ia maʻá e tokotaha tatau pē. ʻOku ui ʻeni ko e ngaahi lekooti ʻoku ʻasi tuʻo ua, pea taimi ʻe niʻihi ʻoku ʻi ai ha fakamatala ʻoku fepakipaki.
ʻI he taimi ʻe lava aí, ʻe feinga ʻa e FamilySearch ke maʻu ha tatau ʻe ua pea fakatahaʻi kinaua ki ha lekooti pē ʻe taha. Ka neongo ia, kapau ʻoku tuʻu fehangahangai ʻa e ngaahi ʻahó mei he ngaahi lekooti ʻoku fakatahaʻí, kuo pau ke fili ʻe heʻetau polokalamá ʻa e ʻaho ʻe ʻasi ʻi he lekooti kuo fakatahaʻí. ʻI he lolotonga ní, ʻoku fili ʻe heʻetau polokalamá ʻa e ʻaho naʻe toki fakahū fakamuimui taha ki he Fuʻu ʻAkau Fakafāmilí.
Ko e moʻoni ʻe lava ke hala ʻa e ʻaho naʻe fakahū fakamuimui tahá. ʻOku mau fakatokangaʻi ʻeni pea kuo mau fakaʻilongaʻi ha ngaahi lekooti ʻi he Fuʻu ʻAkau Fakafāmilí ʻoku ʻi ai ha ngaahi palopalema ʻi he fakamatalá. ʻOku mau fakatauange te mou tuku ha taimi ke fakatonutonu ʻa e ngaahi fehalaaki ko ʻení ʻi he taimi te mou fetaulaki ai mo e ngaahi meʻa peheé.
Ko e ngāue ʻa ha timi
Ko e taimi pē te ke fakahoko ai ha fakatonutonu, fakapapauʻi ʻokú ke ʻomi ha maʻuʻanga fakamatala kapau te ke lava, pe ko ha fakamatala mahino ki hono ʻuhingá ke ne fakapapauʻi hoʻo liliú. Kapau te ke fakahoko ia, ʻe siʻisiʻi ange hano toe liliu pe toʻo ia ʻe he niʻihi kehe te nau ala fakafehuʻia ʻa e liliú.
ʻI he taimi ʻoku lisi ai ʻa e FamilySearch ko e tokotaha ia naʻá ne ʻomi ʻa e tokoní
Kimuʻa ʻi he 1994, naʻe teuteuʻi nima pē ʻa e ngaahi kaati hingoa naʻe fakahū ki he ngaahi ouau fakatemipalé ʻi he temipale Siainá, Siapaní, mo Kōleá. Neongo kuo tauhi fakalelei ʻa e fakamatala ouaú ʻi he ngaahi kaati ko ʻení, ka ʻoku ʻikai ke hā ai ʻa e ngaahi hingoa ʻo kinautolu naʻa nau fakahoko ʻa e tokoní. ʻE lava ke iku ʻeni ki he kau pataloni ʻo e FamilySearch ʻi he ʻaho ní ke nau sio ki he hingoa "FamilySearch" ʻoku lisi ʻa e tokotaha naʻá ne ʻomi ʻa e tokoní ki ha konga ʻo e fakamatalá.