ʻOku ʻikai faingofua maʻu pē ke ʻiloʻi ha meʻa ʻoku faitatau. Ko ha fakahinohino ʻeni mei ha kau mataotao ke tokoni atu ke ke fakapapauʻi pe ʻoku tatau ha lekooti mo ha kui pe ʻikai:
- Fehuʻi pē kiate koe, “ʻOku tatau nai ʻa e maʻuʻanga fakamatalá mo e ngaahi ʻaho, feituʻu, mo e ngaahi vā fetuʻutaki mahuʻinga ʻi he Fuʻu ʻAkau Fakafāmilí?”
- Fehuʻi pē kiate koe, “ʻOku ʻi ai nai ha fakamatala feʻunga ke aofangatuku ʻaki ʻoku fakamatalaʻi ʻe he lekōtí mo e Fuʻu ʻAkau Fakafāmilí ʻa e tokotaha tatau?” Hangē ko ʻení, ʻoku hiki ʻi he ngaahi lekooti tāpuaki ʻe niʻihi ha hingoa ʻo ha faʻē pe tamai ka ʻoku ʻikai ha toe fakamatala mahuʻinga kehe, hangē ko e taʻu motuʻá pe ʻaho fāʻeleʻí. Neongo ʻoku mahuʻinga ha hingoa, ka ʻoku ʻikai ko ha fakakaukau lelei ia ke aofangatuku ʻaki ʻoku fekauʻaki e maʻuʻanga fakamatalá mo ha tokotaha pau ʻi he Fuʻu ʻAkau Fakafāmilí ʻo fakatefito pē ʻi he hingoá.
- Fehuʻi pē kiate koe, “ʻOku ʻi ai nai ha ngaahi meʻa ʻoku ngalikehe?” Hangē ko ʻení, fakakaukau ki ha tūkunga ʻoku meimei tatau ai e konga lahi ʻo e ngaahi fakaikiiki ʻi he lekōtí mo e Fuʻu ʻAkau Fakafāmilí—tukukehe ʻa e taʻu fāʻeleʻí, ʻa ia ʻoku kehekehe ʻaki e taʻu ʻe 15. ʻI he tuʻunga ko iá, mahalo ko e lekōtí ia ʻa ha kāinga.
- Fehuʻi pē kiate koe, “ʻOku fēfē nai 'a e tuʻunga falalaʻanga ʻo e lekōtí?” Ko hono fakalūkufuá, ko e lekooti fakahisitōlia ofi taha ki he meʻa naʻe hokó ʻoku falalaʻanga tahá. Hangē ko ʻení, ʻoku falalaʻanga ange ʻa e lekooti fāʻeleʻí ki he fakamatala fāʻeleʻí ʻi ha lekooti pekia ʻa ia ʻe lava foki ke kau ai mo e fakamatala fāʻeleʻí.
Fakaʻosí, manatuʻi ʻe lava ke angamaheni ange ʻa e ngaahi fehalākí ʻi ha faʻahinga lekooti pau ʻi ha niʻihi. Hangē ko ʻení, mahalo naʻe hiki ʻe ha taha tohi kakai ʻa e ngaahi hingoá ʻo ʻikai ʻeke e founga hono sipela totonú. Pe mahalo naʻe fakafuofuaʻi pē e taʻu motuʻa ʻo ha taha.
ʻI he tafaʻaki ʻe tahá, ʻe falalaʻanga ange ʻa e ngaahi fakaikiiki peheé ʻi ha tohi taʻu.