ʻOku hoko ʻa Sesikā Sohoi ko ha faiongoongo ikuna fakalangilangi mo ha tokotaha fakamafola televīsone mei he ʻOtu Filipainí mo ha meʻafoaki ki hono fai ʻo e ngaahi talanoá. Kuo hoko ʻene malava ke fakamatalaʻi e ngaahi aʻusia ʻa e kakai moʻoní mo vahevahe ia ʻi ha founga mālié, ke ne maʻu ai ha fakalāngilangi mei he ngaahi kautaha faiongoongo tuʻukimuʻa tahá, kau ai ha Kātoanga TV ʻi Niu ʻIoke mo e Pale Fakalāngilangi ʻi he Heleʻuhilá. Ko e fuofua tokotaha Filipaini foki ia ke ne ikuna ʻa e George Foster Peabody Award ʻa ia ʻoku ʻiloa hono fakaʻamuá.
ʻI he Māʻasi ko ʻení, ʻe ʻomi ʻe Sesikā hono talēniti ʻi he fakamatalaʻi e ngaahi talanoá ki he RootsTech 2026, ʻa ia te ne talanoa ai fekauʻaki mo ʻene ngāué mo e malava ko ia ʻe he ngaahi talanoá ke fakafiemālieʻi, fakatahaʻi, pea mo fakamoʻui kitautolú. Lesisita ʻi he RootsTech.org ke mamataʻi taʻetotongi ʻa e lea ʻa Sesikā ʻi he ʻinitanetí.
Lolotonga ʻene ngāue maʻuʻanga moʻui ʻi ha taʻu 40, kuo fai ʻe Sesikā Sohoi ha ngaahi lipooti mei he sea ʻo ha tangikē tau lolotonga ha feinga liukava, mei ha vakapuna ʻoku fakaʻau ke maha hono penisiní, pea mei ha helikopeta ʻoku lolotonga fepunaʻaki ʻi he uhouhonga ʻo e ngaahi haʻahaʻa fakamamahi hili e ngaahi afā mālohi angamaheni ʻi hono fonuá Naʻá ne meimei tuʻu ʻi ha foʻi pomu ne tanu ʻi ʻAfikanisitani pea kuo puke pōpula ia ʻe he kau angatuʻú ʻi heʻenau feinga ke liukava e puleʻanga ʻo hono fonuá.
Ko e meʻa ʻoku “lipooti” ʻe Sesikaá, ko ha konga siʻi pē ia ʻo ʻene ngāué. Ko e meʻa moʻoni ʻokú ne faí ko hono fakamatalaʻi e ngaahi talanoa ʻo ha kakai moʻoni mo ʻenau ngaahi tali loto-toʻa ʻi he uhouhonga ʻo e ngaahi tūkunga taʻe-malavá. ʻOkú ne angaʻofa, manavaʻofa, mohu fakakaukau, mo fakalotoa ha taha ke fai lelei—ko e ngaahi ʻulungaanga kotoa ʻokú ne ʻai ia ke feʻunga mo e RootsTech!
Fiemaʻu ha Niʻihi ke Nau Fai ha Talanoa
Naʻe tupu hake ʻa Sesikā ʻi Seni Fenanitō, La ʻIunioni, Filipaini, ʻi ha ngaahi tūkunga faingataʻa. ʻI hono taʻu 8, naʻe mālōlō ʻene faʻeé. ʻOkú ne fakamālō ki heʻene ongo kui fefiné ʻi hono akoʻi kiate ia ʻa e mahuʻinga ʻo e ngaahi talanoá mo honau mālohi ke fakafehokotaki, fakatahatahaʻi, mo fakatolonga ha ngaahi tuʻunga ʻulungaanga mahuʻingá.
ʻI he ʻunivēsití, naʻe hanga ʻe he saiʻia ʻa Sesikā ʻi he fai ha talanoá ʻo tohoakiʻi ia ki he faiongoongó, pea naʻá ne maʻu kimui ange ha mataʻitohi ʻi he faiongoongó ʻi he ʻUnivēsiti Filipaini Tilimaní. Hili ʻene ʻosi mei he akó, naʻá ne tohi kole ki ha lakanga ʻi he GMA News—kae ʻikai ko ha taha faiongoongo. Hili ha taimi nounou mei heʻene hū ʻo ngāué, naʻe ʻikai ha taha faiongoongo ʻi he timi fakatotolo ʻa e kautahá, pea naʻe ʻikai fuoloa kuo hū leva ʻa Sesikā ʻo ngāue ai.
Talu mei ai mo ʻene fai ha ngaahi talanoa.
Ko ha Fononga Hokohoko
Kuo hoko e talēniti fakamatala ʻo Sesikaá ke ne fefolauʻaki holo ai ʻi ʻĒsia Tonga-hahake mo ha konga lahi ʻo e māmaní. Kuó ne aʻu ki ha ngaahi tūkunga faingataʻa mo fakatuʻutāmaki kehekehe—mei he ngaahi matangi mo e mofuike lalahí ki he ngaahi feituʻu ʻo e taú mo e ngaahi faingataʻa fakamālohí, ʻo aʻu ki hono puke fakamālohi ia!
ʻOku faʻa fakahikihikiʻi ʻa Sesikā ʻi heʻene founga fakataautaha mo mahuʻinga ko ha taha faiongoongó. ʻOkú ne fai ha ngaahi fehuʻi ʻokú ne fakaʻohovaleʻi ʻa e kakaí mo fakahaaʻi ha tokanga moʻoni ki he kakai ʻoku ʻinitaviú. ʻOkú ne hoko ko ha tokoua, mehikitanga, pe ko ha kaungāmeʻa mamae. Ko ha ʻulungaanga ia kuo saiʻia ai ʻa e kakai Filipainí fekauʻaki mo ia, pea ko e taha ia ʻo e ngaahi tefitoʻi ʻuhinga naʻá ne maʻu ai ʻa e pale ʻo e Readerʻs Digest Asia ko e “Most Trusted TV Host for News and Current Affairs [Tokotaha Polokalama TV Falalaʻanga Taha ʻi he Faiongoongó mo e Ngaahi Meʻa Lolotongá]” ʻi ha taʻu hokohoko ʻe 13.
Mamataʻi ʻa e Lea ʻa Jessica Soho ʻi he ʻInitanetí ʻi he RootsTech 2026
ʻI ha meʻa ne toki hoko kimuí ni mai, naʻe talaange ʻe Sesikā ki heʻene kau fanongó, “Ngāue mālohi pea ʻe muiaki mai ha ngaahi meʻa lelei.” ʻOku hoko ʻene moʻuí mo ʻene ngāue maʻuʻanga moʻuí ko ha fakamoʻoni ʻoku ʻikai ko ha kupuʻi lea taʻeʻuhinga pē ʻeni ka ko ha founga ia ki he lavameʻa moʻoni mo mahuʻingamālié! Ko hono hala fononga mei he ngaahi hala ʻo La ʻIunioni ke hoko ko ha tokotaha tuʻukimuʻa fakafonuá, ko ha talanoa ia he ʻikai ke ke loto ke ke tō mei ai. Ko e meʻa pē ʻoku fiemaʻu ke ke fai ke fanongo ai ki aí ko hoʻo lesisita ʻi he RootsTech 2026—ko e polokalama lahi taha ʻi he māmaní ki he fekumi fakafāmilí—mei he ʻaho 5–7 ʻo Māʻasí.
Lolotonga hoʻo fai iá, fakapapauʻi ke laukonga fekauʻaki mo e kau lea fakaofo kehe kotoa pē kuo fakataimi-tēpileʻi ki he konifelenisi ʻo e taʻu ní. Pe—kapau ʻokú ke fiemaʻu ha fakalotoa he ʻahó ni—mamata ʻi ha taha ʻo e ngaahi lea mahuʻinga mei he taʻu kuo ʻosí!
Ko e Hā ʻa e RootsTech?
Ko e RootsTech ko ha feituʻu ia ke ako ai, ke ueʻi fakalaumālie, pea fakafehokotaki ʻo fakafou ʻi he hisitōlia fakafāmilí. ʻOku fakalele ia ʻe he FamilySearch pea siponisā ʻe ha ngaahi kautaha lalahi kehe ʻi he tohihohokó, ʻoku ʻi ai ha ngaahi kalasi mataotao ʻe laungeau ʻi he RootsTech, ko ha fanga kiʻi tokoni mo e ngaahi vitiō fakaʻaliʻali, mo ha ngaahi talanoa fakalaumālie ʻe ala tokoni atu ke ke aʻusia e hisitōlia fakafāmilí ʻo laka ange ia ʻi ha toe taimi kimuʻa. ʻAʻahi ki heʻemau laipeli ako ʻoku fuʻu fiemaʻuá, pe palani ke kau fakataha mo kimautolu ʻi heʻemau polokalama konifelenisi fakaʻilekitulōnika hokó pe konifelenisi ke kau tonu ki aí.
ʻOku mau tokanga ke fakafehokotaki koe ki ho fāmilí ʻi he FamilySearch pea ʻoku mau ʻoatu taʻetotongi ha ngaahi aʻusia fakafiefia ʻo e ʻiló mo e hisitōlia fakafāmilí. Ko e hā e ʻuhingá? Koeʻuhí ʻoku mau mataʻikoloa ʻaki ʻa e ngaahi fāmilí mo tui ʻe lava ke fakaleleiʻi ʻetau moʻuí ʻi he taimí ni pea taʻengata ʻi hono fakafehokotaki ʻo e ngaahi toʻu tangatá. Ko ha kautaha ʻikai fakatupu paʻanga kimautolu ʻoku fakapaʻanga ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ke ʻilo lahi ange fekauʻaki mo e ngaahi meʻa ʻoku mau tui ki aí, lomiʻi heni.
