ʻʻOku fakakakato ʻetau ngaahi fakaʻamu fakanatula ke fehokotaki fakafāmilí ʻi he taimi ʻoku tau fakafehokotaki ai ʻetau ngaahi kuí ʻo fakafou ʻi he ngaahi ouau toputapu ʻo e temipalé.”
(Russell M. Nelson, “Ngaahi Toʻu Tangata Fehokotaki ʻi he ʻOfá,” Ensign pe Liahona Mē 2010, 92).
Naʻe akoʻi ʻe Sīsū kuo pau ke papitaiso ʻa e kakai kotoa pē ke nau foki ki he puleʻanga ʻo e langí. ʻI he taimi ʻokú ke papitaiso aí, ʻokú ke fuakava ai mo e ʻOtuá ke muimui ki he ngaahi akonaki mo e sīpinga ʻa Kalaisí. Hili hoʻo papitaisó, te ke lava ʻo tokoni ki hoʻo ngaahi kuí ke nau fakahoko foki mo e ngaahi fuakava toputapú.
ʻE lava ke tataki koe ʻe he fakamatala ko ʻení ʻi hoʻo tānaki ʻi he faʻa lotu ʻa e fakamatala ʻoku fiemaʻu fekauʻaki mo hoʻo kāingá pea ʻaʻahi ki he temipalé ke papitaiso maʻanautolu.
Teuteuʻi e Fakamatala ʻOku Fiemaʻú
Fakaʻaonga ʻa e FamilySearch.org ke tokoni atu ʻi hono tānaki e fakamatala fekauʻaki mo hoʻo kāingá pea kole ke fakahoko honau papitaisó.
1. Faʻu ha ʻAkauni FamilySearch Taʻetotongi
Faʻu ha ʻakauni ʻo fakaʻaongaʻi ʻa e FamilySearch.org pe ko e polokalama Fuʻu ʻAkau Fakafāmilí. Fakapapauʻi ke fakahaaʻi ko ha mēmipa koe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻE kole atu ʻe he FamilySearch hoʻo fika lekooti ʻi he Siasí. Te ke lava ʻo maʻu e fika ko ʻení ʻaki haʻo sio ki hoʻo lekomeni temipalé, ʻeke ki hoʻo kalake fakauōtí, pe kole ki ha mēmipa ʻo hoʻo kau pīsopelikí.
2. Tānaki Atu e Kau Mēmipa ʻo e Fāmilí ki he Fuʻu ʻAkau Fakafāmilí.
ʻOku fakaʻaongaʻi ʻe he FamilySearch ʻa e Fuʻu ʻAkau Fakafāmilí ke tokoni ki hono muimuiʻi pe ko e kāinga fē kuo ʻosi fakakakato honau ngaahi ouaú mo kinautolu ʻoku teʻeki ai ke fakakakató.
ʻI he Fuʻu ʻAkau Fakafāmilí, tānaki atu ha fakamatala tefito ki he ngaahi toʻu tangata ʻi hoʻo vahaʻá mo e kāinga ʻokú ke fie ngāue ki ai ʻi he temipalé. Hangē ko ʻení, kapau ʻokú ke fie fakahoko e ngaahi ouau ki haʻo kui, ʻuluaki tānaki atu e hingoa hoʻo mātuʻá, pea toki tānaki atu e kuí. Ke kole ke fai ha ouau maʻa ha taha, ʻe fiemaʻu ke ke fakafonu e hingoa ʻo e tokotahá, tuʻunga tangata pe fefiné, mo ha ʻaho mo ha feituʻu ki ha meʻa ʻe taha pe lahi ange ne hoko ʻi he moʻuí, hangē ko e fāʻeleʻí, malí, pe maté.
ʻI he taimi te ke tānaki atu ai ha kui kuo pekiá, ʻe fakaʻasi atu ʻe he FamilySearch ha ngaahi meʻa ʻe lava ke tatau kapau naʻe ʻosi ʻi he Fuʻu ʻAkau Fakafāmilí hoʻo kāingá. ʻE lava ke tokoni atu e ngaahi hoa tatau ko ʻení ke ke ʻiloʻi pe kuo ʻosi fakakakato e ngaahi ouau maʻá e tokotahá.
3. Kole ha Kaati Hingoa Fakafāmili
ʻOku fakaʻaongaʻi ʻa e ngaahi kaati hingoa fakafāmilí ke fakahaaʻi ʻa e tokotaha ʻokú ke fakahoko ki ai e ngaahi ouau ʻi he temipalé. Hili hoʻo tānaki atu hoʻo kāingá ki he Fuʻu ʻAkau Fakafāmilí, fakaʻaongaʻi ʻa e tab Ngaahi Ouaú ʻi he peesi ʻa e tokotahá ke kole mo fakatatali ha ouau. (Vakai ki he sīpinga ʻi laló.)
Kapau naʻe pekia ha kāinga ʻi loto he taʻu ʻe 110 kuohilí, kātaki ʻo kole ha ngofua mei he mēmipa ofi taha ʻo e fāmili ofi taha ʻoku kei moʻuí kimuʻa pea toki teuteuʻi ha kaati hingoa fakafāmili. (Lau heni ki he founga ke kole ai ha fakangofua makehé.)
Fakatokangaʻi ange: ʻOku mahuʻinga ke fakaʻapaʻapaʻi e fakaʻamu ʻa e kau mēmipa kehe ʻo e fāmilí ʻoku kei moʻuí ʻi he taimi ʻokú mo fakatou tokoni ai ki haʻo kāingá. ʻI hoʻo kole ha fakangofuá, ʻe ala tokoni ke fakamatalaʻi ange ʻoku fakahoko ʻa e ngāue fakatemipale maʻá e niʻihi kehé ʻi he ʻofa, pea ko kinautolu kuo pekiá te nau lava ʻo fili pe te nau tali ʻa e ouaú.
Ko hoʻo kole pē ha hingoa fakafāmili, ʻe fakahā atu leva ʻe he FamilySearch ke ke paaki pē ʻe koe ʻa e kaati hingoa fakafāmilí pe ʻoatu ha fakamatala ke ʻave ki he temipalé kapau ʻokú ke fie paaki ia ai.
Ngāue Tokoni ʻi he Temipalé
ʻI hoʻo tokoniʻi hoʻo fāmilí ʻi he temipalé, te ke lava ʻo maʻu ha niʻihi ʻo e ngaahi tāpuaki kuo talaʻofa mai ʻe he Kau ʻAposetolo ʻo onopōní:
ʻE tupulaki ʻa hoʻomou ʻofa mo e houngaʻia ʻi hoʻomou ngaahi kuí. ʻE loloto mo tolonga hoʻomou fakamoʻoní mo e ului ki he Fakamoʻuí. Pea ʻoku ou palōmesi atu ʻe maluʻi ʻa kimoutolu mei he ivi tākiekina mālohi ʻo e filí.
(David A. Bednar, “ʻE Liliu ʻa e Loto ʻo e Fānaú,” Ensign pe Liahona, Nōvema 2011, 26–27).
