I lenei tausaga i le taimi o le Aso o le Iloaina o Aiga, sa maimoaina ai e tagata auai i le RootsTech se ata tifaga e lei vaaia muamua lava e uiga i le soifuaga o Peresitene M. Russell Ballard. E mulimuli le ata ia Peresitene Ballard a o ia asiasi atu i le tuugamau o lona faletua ma le tele o nofoaga e totonugalemu i le talalelei toefuataiina a Iesu Keriso.
I nofoaga taitasi, o loo talanoa ai Peresitene Ballard e uiga i le taua o le manatuaina—o le autu mo le Konafesi o le RootsTech o lenei tausaga—ma le mana o loo i le perisitua e fusifusia ai aiga mo le faavavau. E mafai ona e maimoa i lenei vitio i luga o tulaga eseese e faaaoga ai le faamau o loo i lalo. E mafai foi ona e faitau e uiga i savali musuia a Peresitene Ballard ma le tala i lenei tusiga i le poloka tusitusi, e aofia ai ni upusii e le mafaagaloina.
Na soifua mai i ni Matua Lelei
Na soifua mai Peresitene Ballard i le Aai o Sate Leki, Iuta i le aso 8 o Oketopa, 1928, ia Melvin R. ma Geraldine Smith Ballard. O tamamatutua uma a Peresitene Ballard na auauna atu o ni aposetolo, ma o ia o se e tupuga tonu mai ia Ailama Samita, le uso o le perofeta o Iosefa Samita.
E ui lava i lona gafa ofoofogia faaleaiga, ae sa faamatalaina e Peresitene Ballard lona olaga talavou lea “ua na o se tamaitiiti masani, e iai ni uiga eseese.” Fai mai o ia, sa saunia e ona matua mo ia se aiga alofa ma sa faia e uo lelei se matafaioi taua i lona olaga.
“O le mea e faafetai ai, sa i ai ni au uo lelei,” o lana tala lea. “Afai e mafai e tagata talavou ona maua ni uo lelei e faia ni mea lelei ma tuuina atu se faataitaiga lelei, ua ia i latou se meaalofa taua, taua tele. Ma sa faamanuiaina a’u i ni uo lelei. O ni aso maoa’e na aso.”
O Peresitene Ballard o le atalii o le atalii o Elder Ailama Maki Samita ma Elder Melvin J. Ballard, o e sa auauna uma i le Korama a Aposetolo e Toasefululua. Na maliu Elder Smith a o lei fanau mai Peresitene Ballard, ae sa silafia e Peresitene Ballard lona Tamamatua o Ballard ma manatua le alu i le faleie femalagaai o faafiafiaga faatasi ma ia ina ua na o le 8 tausaga le matua.
Fiafia i Talafaasolopito o Aiga mai le Laitiiti
I tausaga o lona laitiiti ma lona talavou, sa lei toaaga matua o Peresitene Ballard i le Ekalesia. O se taunuuga, e lei faalogo lava Peresitene Ballard i lona tamamatua o Ballard o lauga i le lotu—o se avanoa na misia lea na saunoa ai Peresitene Ballard sa ia faanoanoa ai i taimi uma.
Na maliu Elder Melvin J. Ballard ina ua 11 tausaga o Peresitene Ballard, ma o le falelauasiga i totonu o le Tapeneko ma le solo na sosoo ai sa i ai se aafiaga loloto ia Peresitene Ballard, ma avea ai ma se mea na suia ai o ia.
“Sa faatumulia le Tapeneko,” na ia manatuaina. “Sa ou i ai i totonu o le taavale a’o mulimuli atu i le taavale maliu i le auala o South Temple ma vaaia ai le faananauga a tagata mo lo’u tamamatua, ma sa ou malamalama ai o ia o se tagata e sili ona faapitoa. Ona ou aoaoina lea o mea uma e mafai ona ou aoaoina e uiga ia te ia. Ma o lena mea na faaosofia ai se fiafia i le manao e aoao mea uma ou te mafaia e uiga i le tama o lo’u tina ma lona tina.”
O Se Ofu Mafanafana Piniki mo le Teine o ana Miti
I le 1948, na valaauina ai Peresitene Ballard e auauna atu i se misiona i le Malo Aufaatasi [United Kingdom]—o se aafiaga na suia ai lona olaga ma saunia ai o ia mo le auaunaga i le Ekalesia i le lumanai. “O la’u misiona o se aafiaga maoa’e o le tuputupu a’e ai o se taitai,” o lana tala lea. “Sa tuuina mai ia te a’u ni avanoa e taitai ai, ma ou te manatu o ni faavae i nisi o mea sa talosagaina au e fai i se taimi mulimuli ane.”
Ina ua lata i le faaiuga o lana misiona, sa auina atu Peresitene Ballard i Sikotilani, lea na ia matauina ai se ofu mafanafana lanu piniki matagofie i le faamalama o se faleoloa o laei. Sa tonu ia te ia e faatau le ofu mafanafana ma avatu i lona toalua i le lumanai, e ui ina sa leai sona iloa po o ai lona toalua i le lumanai. Mulimuli ane, sa tatau ona ia faamalamalama atu i ona matua le mafuaaga na ia faatauina ai.
“Ina ua ou sau i le fale, sa tatala la’u ato e ave i fafo o’u lavalava, ma sa fai mai lo’u tina, ‘O le a lenei mea?’ Ma sa ou fai atu, ‘O se ofu mafanafana lenei, ma e piniki, ma o le a ou sueina se teine ma o le a ou faaipoipo ia te ia!’”
Sa feiloai Peresitene Ballard i lona faletua i le lumanai i se “Siva Faafeiloai” i le Iunivesite o Iuta. Sa ia fai mai sa la sisiva mo na o ni nai minute a o lei popo mai o ia e se isi tagata siva ma faamalosia ai lona la’a ese. Ae, sa tosina atu i ai lona faananau i le tamaitai talavou.
“Sa ou feiloai i le teine e sili ona lalelei i luga o le fola o le siva, o Barbara Bowen,” na saunoa ai Peresitene Ballard i le vitio. “Sa na o le pau lena o le mea na manaomia. Sa ou sau i le fale i le 1950 ia Setema, ma sa ou tuuina atu ia te ia [le ofu mafanafana] i le taimi o le Kerisimasi.” Mulimuli ane sa faaipoipo i la’ua i le Malumalu o Sate Leki. O Harold B. Lee, o se aposetolo i lena taimi, na taitaiina le sauniga.
“O se tasi o aafiaga maoae ma sili ona taua i lo’u olaga o le tootuli i totonu o le Malumalu o Sate Leki ma uuina le lima o Barbara Bowen,” sa saunoa ai Peresitene Ballard. “O se taimi sili lena ona manino ia te a’u i le asō e pei faatoa tupu ananafi.” Na maliu Sister Ballard i le aso 1 o Oketopa 2018, ae i le toe faamatalaina o ona aafiaga, na saunoa ai Peresitene Ballard, “Ou te vaai i ona foliga, ma toetoe lava—i nisi o taimi—ou te lagona e pei e mafai ona ou toe pai atu i lona lima.”
Manatu mai le Malumalu o Katelani ma le Falepuipui o Karefasi
“O le meaalofa sili e mafai ona ou tuuina atu i la’u fanau o ni manatuaga lelei,” na saunoa ai Peresitene Ballard. “Ma o lea, sa ou aveina atu ai i latou i nofoaga autu uma o talafaasolopito o le Ekalesia. Sa ou faatasi ma i latou i nofoaga e sili ona taua. Sa ou faatasi ma i latou i Palamaira. Sa ou faatasi ma i latou i Navu. Sa ou faatasi ma i latou i Karefasi.”
O se vaega o le ripoti faamauina, sa asiasi atu ai Peresitene Ballard i totonu o le Malumalu o Katelani. Sa ia ta’ua faaaliga na maua iina e le Perofeta o Iosefa Samita “o se maatulimanu, i le tele o auala, mo le toefuataiga o le atoaga o le Talalelei aemaise lava o le faaolataga e faavavau ma sootaga faamauina e oo mai e ala i sauniga o le malumalu.”
“O le iloaina na ma tootutuli ma Barbara i se fatafaitaulaga ma uu lima ma e ala i le mana o le perisitua sa ma faaipoipo ai ma faamauina ai le tasi i le isi mo le olaga nei ma le faavavau atoa—o se lagona maoae o le faamafanafanaga lena ia te a’u. O ia ua mo a’u, ma o a’u ua mo ia, ma o loo faatalitali mai o ia mo a’u.”
Mo Peresitene Ballard, o nei uluai fausaga o le Ekalesia o ni faamaoniga ia o le faatuatua tele ma le lototele o uluai tagata o le Ekalesia. “Ou te nofo iinei o le atalii o le atalii o le atalii o le atalii o Ailama Samita, o le sa eliina le uluai fusifaavae,” na ia saunoa ai. “Sa lei tele ni mea na i ai i le au paia i na aso. O mea sa ia i latou na latou tuuina atu ma le loto i ai e fausia ai le maota o le Alii.”
Sa ia faamamafa mai o tagata o le Ekalesia i aso nei ua i ai se tiutetauave e manatua ai mea sa faia mo i latou ma mea na ositaulagaina. “E le tatau lava ona galo ia i tatou o tatou tuaa paionia, pe afai e galo ia i tatou o tatou tuaa ma i latou o e ua mafai ai ona maua mea ua tatou maua, o le a aveesea se mea e le mafai ona toe suia,” na ia saunoa ai.
Ina ua mavae Katelani, sa asiasi atu Peresitene Ballard i le Falepuipui o Karefasi, lea na ia toe faamatalaina ai mea na tutupu e tau atu i le maliliu o le Perofeta o Iosefa ma lona uso o Ailama. A’o nofo ai i totonu o le potu lava e tasi lea na osofaia ai nei alii e le au faatupu faalavelave, sa talanoa Peresitene Ballard e uiga i nisi o lagona na te lagonaina pe a mafaufau i ona tuaā.
“A o e i ai i lenei potu, ou te manatu i le tele o auala, ua e i ai i laueleele paia,” o lana tala lea. “Ou te lagona le lofituina i le malosi ma le mana o ou tuaā Samita ma le faamoemoe e mafai ona ou faia la’u vaega.”
Amataina i le Talafaasolopito o Aiga
“Ou te manatu o se mea matagofie pe a i ai i tagata se lagona o le fia iloa po o ai i latou,” na saunoa ai Peresitene Ballard. Ae o fea e tatau ona amata ai se tasi?
Mo Peresitene Ballard, o le tali i lenei fesili e faigofie lava. “O talafaasolopito o aiga ua faatatau tonu lava i le, o ai a’u?” na ia saunoa ai, “O le a se mea ua avea ai a’u ma Russell Ballard? Ia, o lo’u tina ma lo’u tama. O lea la, ou te fia iloa mea uma ou te mafaia e uiga i lo’u tama ma lona aiga, ma ou te fia iloa mea uma ou te mafaia e uiga i lo’u tina ma lona aiga. I lena auala, ou te iloa ai po o ai au, ma ou iloa ai le mea ou te sau ai.”
Sa fautuaina e Peresitene Ballard tagata i soo se mea ina ia “saili atu ma iloa mea latou te mafaia e uiga ia i latou o e na faataatiaina galuega faavae mo i latou ina ia maua mea ua latou maua i o latou olaga.”
O Se Molimau Faaiu
I le agai atu i le faaiuga o le ata, sa faamatala ai e Peresitene Ballard le tala i le taimi na valaauina ai o ia e avea ma se aposetolo. “Sa valaauina au e Peresitene Hinckley i le taeao o le Aso Sa o le Konafesi Aoao,” na ia saunoa ai. “Sa ia valaau mai ia te au, ma sa ia fai mai, ’Russ, ua e i fafo ma le faleta’ele?’ Ma sa ou fai atu, ’Ioe lau susuga, i se taimi ua leva lava. Ua ou sauni e alu atu i le Konafesi.’”
Sa talosagaina e Peresitene Hinckley ia Peresitene Ballard e feiloai muamua ia te ia i lona ofisa. Sa ioe i ai Peresitene Ballard, ma ina ua feiloai nei alii e toalua, sa saunoa peresitene Hinckley sa faatagaina o ia e Peresitene Spencer W. Kimball, le perofeta, e valaaulia Peresitene Ballard e avea ma se aposetolo.
I le ata, na saunoa ai Peresitene Ballard, “Ou te faitauina o le faamanuiaga silisili e mafai ona oo mai i se alii—o le avea o se aposetolo, e folafola atu le soifuaga ma le galuega a le Alii o Iesu Keriso i atunuu o le lalolagi. Ua matuai faamanuiaina lava a’u, e le mafai ona ou faamatalaina i upu.”
E faaiu le ata i se molimau mamana mai ia Peresitene Ballard i malumalu ma sauniga faaola na faatinoina iina e fai ma sui o e pele ma tuaā—o se aoaoga faavae sa sili ona taua ia te ia i lona olaga atoa. “O le perisitua, o le pule e faatino ai sauniga o loo fusia ai i itu uma e lua o le veli, ua toe i ai foi i luga o le fogaeleele,” na ia saunoa ai. “O se mea maoae lena e iloa, ma o se mea ofoofogia e aoao atu.”
“Ou te faamoemoe a ou oti, o le a i ai ni nai tagata iina o e o le a fai mai faafetai atu ia te oe mo atonu ona o sina mea lelei itiiti sa ou faia i le ala. O le mea lena o loo ou taumafai e fai, tau lava o le fesoasoani i le mea ou te mafaia.”
Sa faauuina Peresitene Ballard o se aposetolo i le aso 10 Oketopa, 1985 ma maliu ai i le aso 12 Novema, 2023. E mafai ona e maimoa i le ata atoa o le Aso o le Iloaina 2024 ii:
O le a le RootsTech?
O le RootsTech o se nofoaga e aoao ai, e musuia ai, ma fai ai sootaga e ala i talafaasolopito o aiga. E talimalo ai le FamilySearch ma lagolagoina e isi faalapotopotoga taulamua i gafa, e faitau selau a matou vasega atamamai, vitio o motugaafa ma faiga faafaigofie, ma tala musuia e mafai ona fesoasoani ia te oe e iloa talafaasolopito o aiga i se ala e lei faia muamua. Asiasi i la tatou potutusi manaomia tele e aoao ai, pe fai ni fuafuaga e auai faatasi ma i matou mo le isi a tatou gaoioiga o le konafesi i luga o le initoneti pe faafesagai foi.
