“O o tatou faanaunauga faalenatura mo fesootaiga faaleaiga ua faataunuuina pe a sosooina atu i tatou i o tatou tuaa e ala i sauniga paia o le malumalu.”
(Russell M. Nelson, “O Tupulaga e Sosoo i le Alofa,” Ensign ma le Liahona, Me 2010, 92).
Na aoao mai Iesu e tatau ona papatisoina tagata uma ina ia toe foi atu ai i le malo o le lagi. A e papatiso, ua e osifeagaiga ma le Atua e mulimuli i aoaoga ma faataitaiga a Keriso. A uma lou papatisoga, e mafai ona e fesoasoani i ou tuaa e osia foi feagaiga paia.
O lenei tusiga e mafai ona taialaina ai oe a o e aoina ma le agaga tatalo faamatalaga manaomia e uiga i ou aiga ma asiasi atu i le malumalu ina ia papatisoina mo i latou.
Saunia Faamatalaga Manaomia
Faaaoga le FamilySearch.org e fesoasoani ai ia te oe e ao mai faamatalaga e uiga i ou aiga ma talosaga e fai o latou papatisoga.
1. Fatu se Faitotoa Maua Fua o le FamilySearch.
Fatu se faitotoa e faaaoga ai le FamilySearch.org po o le polokalama o Gafa o le Aiga. Ia mautinoa e ta’u mai pe o oe o se tagata o Le Ekalesia a Iesu Keriso o le Au Paia o Aso e Gata Ai. O le a fesili atu le FamilySearch ia te oe mo lau numera o le pepa faamaumau a le Ekalesia. E mafai ona e maua lenei numera i lou tilotilo i lau pepa faataga o le malumalu, fesili i le failautusi o lau uarota, po o le fesili i se tasi o lau au epikopo.
2. Faaopoopo Tagata o le Aiga i le Gafa o le Aiga.
E faaaoga e le FamilySearch le Gafa o le Aiga e fesoasoani ai e siaki po o ai tagata o le aiga ua maea o latou sauniga ma e foi e lei faia.
I le Gafa o le Aiga, faaopoopo i ai faamatalaga autu mo augatupulaga i le va o oe ma le tagata o lou aiga e te manao e auauna atu i ai i le malumalu. Mo se faataitaiga, afai e te manao e faatino ia sauniga mo se matua o matua, ia muamua faaopoopo le igoa o lou matua, ona faaopoopo lea i ai o le matua o matua. Ina ia talosaga e faia se sauniga mo se tasi, o le a manaomia ona e faatumuina le igoa o le tagata, itupa, ma se aso ma se nofoaga mo se mea e tasi na tupu i le olaga, e pei o le fanau mai, faaipoipoga, po o le maliu.
A e faaopoopoa se tuaa ua maliu, o le a faaali atu e le FamilySearch ia te oe ni faamatalaga e ono fetaui pe afai ua uma ona i ai lou tauaiga i totonu o le Gafa o le Aiga. O nei faamatalaga e ono fetaui e mafai ona fesoasoani ia te oe e iloa ai pe ua uma ona faamaeaina sauniga mo le tagata.
3. Talosaga se Kata o Igoa Faaleaiga
O kata o igoa faaleaiga e faaaoga e faaali atu ai po o ai le tagata o loo e faia sauniga i le malumalu. A uma ona e faaopoopoina lou aiga i le Gafa o le Aiga, faaaoga le faailoga Sauniga i luga o le itulau a le tagata e talosaga ai ma faaleoleo se sauniga. (Tagai i le faataitaiga i lalo ifo.)
Afai na maliu se tagata o le aiga i totonu o le 110 tausaga ua tuanai, faamolemole saili se faatagaga mai le tagata o le aiga o loo soifua e sili ona latalata i ai a o lei sauniaina se kata o igoa faaleaiga. (Faitau iinei mo le auala e talosaga ai se faatagaga faapitoa.)
Manatua: E taua le faaaloalo i moomooga o isi tagata o le aiga o loo soifua pe a e auauna atu i se tagata o le aiga e te lua taufai fefaasoaai. Pe a e talosagaina se faatagaga, e mafai ona fesoasoani le faamalamalama atu o auaunaga i le malumalu mo isi e ofoina atu i le alofa, ma o i latou ua maliliu e mafai ona filifili pe talia le sauniga.
A uma loa ona e talosagaina se igoa o le aiga, o le a faatonu oe e le FamilySearch pe lolomi e oe lava le kata o igoa faaleaiga pe tuuina atu ia te oe faamatalaga e ave i le malumalu pe afai e te manao e lolomi iina.
Auauna atu i le Malumalu
A o e auauna atu i lou aiga i le malumalu, e mafai ona e maua nisi o faamanuiaga ua folafola mai e Aposetolo o aso nei:
“O le a faateleina lou alofa ma lou lotofaafetai mo ou tuaa. O le a loloto ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai tosinaga faateleina a le tiapolo.”
(David A. Bednar, “O Le A Liliu Atu Loto o Fanau i o Latou Tama,” Ensign po o le Liahona, Nov. 2011, 26–27).
