FamilySearch нь FamilySearch.org хэмээх нэр хүндтэй, үнэгүй вэбсайтаараа дэлхий дахинаа танигдсан билээ. Төв нь Юта мужийн Солт Лэйк Сити дэх Гэр бүлийн түүхийн номын сан бөгөөд асар их хэмжээний баримт бүртгэлийн цуглуулга, гэр бүлийн түүхийн үнэгүй ганцаарчилсан тусламж, нээн илрүүлэх туршлага, өндөр зэрэглэлийн вэбсайтуудад нэвтрэх эрх өгдөг зэргээрээ алдартай. Дэлхий даяарх 5000 гаруй гэр бүлийн түүхийн төвүүдэд мөн эдгээр үйлчилгээг авах боломжтой байдаг.
FamilySearch нь Солт Лэйк Ситид байрладаг Гэр бүлийн түүхийн номын сангийн нэрээ FamilySearch номын сан болгон өөрчлөхөө зарлажээ. Гэр бүлийн түүхийн төвүүдийг “FamilySearch төв” гэж нэрлэх болно. Шинэчлэгдсэн нэрс нь тэдгээрийг FamilySearch-ийн харьяа гэдгийг харуулах бөгөөд хүмүүст өвөг дээдсээ олоход нь туслахын төлөөх нэгдмэл хүчин чармайлтыг нь тодотгож байгаа юм. Дээд зэргийн үйлчилгээ, нээн илрүүлэх туршлагуудыг үргэлжлүүлэн явуулах болно.
Дэлхий даяар улам олон хүн гэр бүлдээ анхаарч, гэр бүлтэйгээ холбоо тогтоох болсон. FamilySearch дэлхий нийтийн дэмжлэг, технологи, их хэмжээний онлайн эх сурвалжийн өсөлтөөр дамжуулан энэхүү эрэлт хэрэгцээг хангахад онцгойлон тохирдог.
FamilySearch-ийн өсөлт хөгжил
FamilySearch-ийн хувьд нэр өөрчлөгдөх асуудал шинэ зүйл биш юм. Тус байгууллага нь 1894 онд Есүс Христийн Хожмын Үеийн Гэгээнтнүүдийн Сүмийн удирдлага доор Сүмийн албаны байрны нэгэн жижиг өрөөнд үйл ажиллагаагаа эхэлж байжээ. Тухайн үед Юта мужийн Удмын бичгийн нийгэмлэг гэдэг нэртэй байв. Байгууллагын зорилго нь удмын бичгийн талаар мэдээлэл хуваалцах, олон нийтэд боловсрол олгох явдал байлаа. Харьяа номын сан нь тухайн үедээ Удмын бичгийн номын сан хэмээн олонд танигджээ. Цуглуулга нь нэмэгдэж, технологи ашиглах болсноор уг номын сан хэд хэдэн удаа нүүсэн байна. Одоогийн 13000 метр.кв байр нь 1985 оны 10-р сарын 23-ны өдөр онцгойлон адислагдсан бөгөөд уг үйл явдлын дараа тус номын сан Гэр бүлийн түүхийн номын сан гэдэг нэртэй болжээ.
FamilySearch хамтран ажилладаг номын сангууд
FamilySearch өөрийн номын сан, төвүүдээс гадна 1700 гаруй хамтран ажилладаг номын сангууд (нийтийн номын сангууд, музей, их дээд сургууль, архив)-тай баримт бүртгэлээ хуваалцахаар холбоо тогтоогоод байна. Эдгээр номын сан FamilySearch-тэй хамтран ажилласнаар удмын бичгийн өргөн хүрээний эх сурвалжуудыг санал болгох боломжтой байдаг. Өөр байгууллагууд эдгээр номын санг эзэмшдэг тул FamilySearch-ийн хамтран ажилладаг номын сангуудын нэр өөрчлөгдөхгүй, харин хамтын ажиллагаа нь үргэлжлэх болно.
Тантай ойрхон байрладаг FamilySearch төв эсвэл хамтран ажилладаг номын сан байдаг уу?
FamilySearch төвүүд, хамтран ажилладаг номын сангууд нь өвөг дээдсийнхээ талаар илүү ихийг олж мэдэн, гэр бүлтэйгээ холбоо тогтоох гайхалтай газрууд юм. Та шинэ баримт бүртгэл үзэхийг хүсвэл эсвэл удмын бичгийн талаарх зөвлөгөөг биечлэн авах шаардлага гарвал FamilySearch танд туслахад бэлэн байна.
Та тухлан зочлоорой! Та өөрт тань ойрхон FamilySearch-ийн байршлыг энэ холбоосыг ашиглан олно уу.
Холбоотой
