Цаг хугацааны капсул гэдэг нь хожим онгойлгох зориулалттай тодорхой цаг үеийн дурсгалт зүйлсээр дүүргэсэн сав юм. Цаг хугацааны капсул нь цагийг бүтээлч, бодолтой өнгөрүүлэх арга зам бөгөөд үүнийг ирээдүйд хүлээн авах хүн, тэр дундаа та өөрөө хожим өөр цаг үе рүү өнгийн харсандаа талархах болно.
Хэдийгээр та хуучин гутлын хайрцаг, одоо байгаа сонины хайчилбараар цаг хугацааны капсул бүтээж болох ч дараах капсул бүтээх зугаатай, бүтээлч санаануудыг ашиглан үүнийгээ яагаад 21-р зуунд авчирч болохгүй гэж? Дараах цаг хугацааны капсулын санаанууд нь зугаатай, амар хялбар байгаад зогсохгүй гар доор, дижитал хэлбэрээр үүрд хадгалах боломжийг олгоно (мөн хүсвэл хэвлэн авч, гэртээ хадгалах боломжтой).
Дууны тоглуулах жагсаалт гаргах
Дуу биднийг уг дууг анх сонссон гэр бүлийн аялал руу эргүүлэн аваачих юм уу бидэнд дууг дагаж дуулах дуртай хамгийн сайн найзыг маань сануулж чадна. Мэргэжилтнүүдийн үзэж байгаагаар, дуу хөгжим дурсамжийг сэргээдэг бөгөөд энэ нь бидний үзэж туулсныг илтгэх цаг хугацааны төгс капсул болдог.
Дуу хөгжим бүхий цаг хугацааны капсул бүтээх нь харьцангуй амархан. Та дуртай дуу хөгжмийн платформ дээрээ тоглуулах жагсаалт үүсгэж эсвэл тухайн цаг мөчийг илэрхийлсэн дуунуудаа жагсаан бичиж болно. Энэ капсул бүтээх санаа уян хатан байж болох ба таны яг одоо сонсож байгаа дуу орсон байх шаардлагагүй. Энэ нь тодорхой хүмүүс эсвэл туршлага дээр суурилсан сэдэвтэй байж болно. Юуг оруулахаа шийдэхэд тань туслах хэдэн асуултыг доор өгөв.
- Та яг одоо ямар дууг давтан сонсож байна вэ?
- Ямар дуу танд эцэг эх, дотнын найз, гэр бүлийн гишүүнийг тань санагдуулдаг вэ?
- Та гунигтай үедээ ямар дуу сонсдог вэ? Та аз жаргалтай байхдаа ямар дуу сонсдог вэ?
- Хэрэв танд өнгөрсөн сар эсвэл он жилийг тодорхойлсон дуунуудыг сонгох шаардлага гарвал ямар дуунууд байх вэ?
Дуртай онлайн зурвасуудаа хадгалах
Төрсөн өдрийн хуучин ил захидал, захиаг хадгалах нь ердийн зүйл боловч гэр бүл, найз нөхдийн хоорондын онлайн харилцааг яах вэ? Сэтгэлийг хамгийн их хөндсөн харилцаа, хамгийн хөгжилтэй харилцан яриаг текст эсвэл шууд зурвас илгээх хэлбэрээр солилцсон байж болно.
Эдгээр харилцан яриаг хадгалах хамгийн хялбар аргуудын нэг бол утсаараа эсвэл компьютер дээрээ дэлгэцийн зургийг авч, дараа нь зургийг дижитал цомогт нэмэх явдал юм. Хавтас эсвэл цомогтоо “Дуртай зурвасууд” эсвэл “Намайг инээмсэглүүлдэг гэр бүлийн групп чат” гэх мэт нэр өг.
Гэр орон, төрсөн газрынхаа зургийг авах
Танд амралтаараа авсан хэдэн зуун зураг байж болох юм. Харин өдөр тутмын амьдралыг тань харуулсан зураг байдаг уу? Өнөөдрөөс хойш олон жилийн дараа та охиныхоо багад нь байсан унтлагын өрөө эсвэл гэр бүлийн онцлогийг харуулсан машин зэрэг өдөр тутмын, байнга өөрчлөгдөж байдаг зүйлсийн зургийг авдаг байж гэж бодож магад.
Унтлагын өрөөнийхөө зургийг авах эсвэл гэрээ танилцуулсан видео хийх замаар гэрийнхээ цаг хугацааны капсулыг бүтээ. Цаг хугацааны капсул бүтээх санаа нь зөвхөн таны гэр орноор хязгаарлагдах шаардлагагүй. Орон нутгийнхаа дуртай газруудын зургийг авч эсвэл төрөлх хотынхоо газрын зургийг зурж, дуртай ресторан, очих дуртай газруудынхаа талаар тэмдэглэл хөтөл.
Хамгийн сүүлийн үеийн загваруудыг буулгаж ав
Камераа мөн дуртай хувцсаа гаргаж, зураг авч эхлээрэй! Загварын чиг хандлага үргэлж өөрчлөгдөж байдаг тул загварын цаг хугацааны капсул бүтээх нь тухайн үеийн болон өнөөгийн цаг үеийг хамгийн үр өгөөжтэй харьцуулан харах боломжийг олгох юм. Ирээдүйн та загварын хуучин хандлага, хуучны хувцаснуудаа хараад инээхийн зэрэгцээ, санагалзан дурсаж байж мэднэ.
Та мөн онлайн эсвэл сэтгүүл дээрх загварын зургуудыг цуглуулж, хадгалж болох ч өөрөө зураг авах нь илүү хөгжилтэй, илүү хувийн шинж чанартай байдаг.
Дуртай дурсамжаа бичих
Цаг хугацааны капсул бүтээхэд хэзээ ч оройтдоггүй. Олон жилийн өмнө тохиолдсон зүйлсийн талаар ч мөн адил хийж болно! Хэзээ ч мартмааргүй байгаа үйл явдал, дурсамжаа бичиж эхэл. Хэдийгээр та тэдгээр дурсамжаа цаасан дээр буулгаж, аюулгүй газар хадгалах боломжтой ч дижитал цаг хугацааны капсул нь бичвэрээ гэртээ гэмтээж, алдагдахгүй байх боломжийг олгоно.
Дурсамжийг тань FamilySearch.org сайт дээр онлайн хэлбэрээр хадгалах боломжтой.
