2025 оны 10-р сарын Ерөнхий чуулган: Ариун сүм, гэр бүлийн түүхийн талаарх эшлэлүүд

2025 оны 10-р сарын ерөнхий чуулганаар ерөнхийлөгч Даллин Х.Өүкс Есүс Христийн Хожмын Үеийн Гэгээнтнүүдийн Сүмд гэр бүлийн гол ач холбогдлыг “Есүс Христийн Хожмын Үеийн Гэгээнтнүүдийн Сүмийн сургаал гэр бүлд төвлөрдөг. Ариун сүм нь гэр бүлийн талаарх сургаалд нэн чухал. Тэнд хүлээн авдаг ёслолууд нь биднийг Тэнгэрлэг Эцэгийн оршихуйд мөнхийн гэр бүлээрээ буцаж очих боломжтой болгодог” хэмээн онцолсон.

Тэрээр гэр бүл, ариун сүмийн лацдан холболтын талаар хүчирхэг сургаалуудыг хуваалцаж, биднийг гэр бүлүүдийг мөнхөд нэгтгэх ажилд оролцоход урьсан. Ерөнхийлөгч Өүкс ерөнхийлөгч асан Рассэлл М.Нэлсоны үгийг эш татан, “Өргөмжлөл бол гэр бүлийн ажил хэрэг. Зөвхөн Есүс Христийн сайн мэдээний авралын ёслолуудаар дамжуулан гэр бүлүүд өргөмжлөгдөх боломжтой” гэж тунхагласан.

Гэр бүлд анхаарлаа төвлөрүүлэх, гэрээ байгуулах, ариун сүмийн ажилд оролцох зэргээс бидний хүлээн авдаг адислалуудын талаар саяхны чуулганаар заасан зүйлээс урам зориг авахын тулд үргэлжлүүлэн уншина уу. Энэхүү эшлэлүүд таныг ариун сүмд шүтэн биширч, гэр бүлийн түүхийн ажилд оролцоход урам зориг өгнө гэж найдаж байна. Та мөн эдгээрийг хуулж эсвэл татаж аваад гэр бүл, найз нөхөдтэйгөө хуваалцаж болно.

Зүрх сэтгэлээ Есүс Христэд нийцүүл: Хүүхдийн хэсгийн дуу хөгжмийн ариун нандин бэлэг—Трэйси Ю.Браунинг эгч

Хүүхдийн хэсгийн ерөнхий ерөнхийлөгчийн хоёрдугаар зөвлөх Трэйси Ю.Браунинг эгч Хүүхдийн хэсэгт заадаг хүүхдийн сүсэг бишрэлийн дуу хөгжим нь хэрхэн сайн мэдээний сургаалын захиасуудыг агуулдаг болох талаар хуваалцсан. Тэрээр мөн ариун сүмд хийгддэг гэрээнүүдийн адислалуудыг гэрчилсэн. 

"Их Эзэний ариун сүмүүд газар дэлхий дээрх Түүний өргөө гэдгийг би мэднэ. Тэдгээрт бид ариун нандин гэрээнүүдийг байгуулж, мөнхийн адислалуудыг хүлээн авч, Түүний талаар илүү ихийг суралцаж, Түүний оршихуйг илүүтэй мэдэрдэг.” —Трэйси Ю.Браунинг эгч 

“Ариун сүм бол суралцах, амьдралдаа бэлтгэх, амар амгалангийн газар юм.” —Трэйси Ю.Браунинг эгч

“Бурхан амлалтаа сахидаг учраас Түүний гэрээнүүд хүчтэй тайвшрал, хоргодох газрыг санал болгодог төдийгүй Есүс Христ болон цагаатгагч хүчинд нь найдаж, тууштай итгэхэд урьдаг.” —Трэйси Ю.Браунинг эгч

Их Эзэн зүрх сэтгэлийг нь хардаг—Ахлагч Роналд М.Барсэллос

Далын ерөнхий эрх мэдэлтэн ахлагч Роналд М.Барсэллос Бурхан биднийг сүсэг бишрэл, үйлчлэлийн үйлс бүрээр дамжуулан чин сэтгэлээсээ, чин эрмэлзэлтэйгээр бүх зүрх сэтгэлээ Өөрт нь хандуулаасай гэж хүсдэг гэдгийг бидэнд зааварласан.

“Их Эзэний биднээс хүссэн бүх зүйлийг буюу зарлигуудыг сахих, ариун ёслолоос хүртэх, ариун сүмд шүтэн бишрэх, бусдад үйлчлэх зэргийг чин сэтгэлээсээ, зүрх сэтгэлийн чин эрмэлзэлтэйгээр хийхийг сонгох юм бол үйлчлэл, шүтэн бишрэх үйлдэл бүр нь бидний итгэл, гэрчлэлийг бэхжүүлэх хүчирхэг сүнслэг туршлага болох төдийгүй зүрх сэтгэлийг маань баяр баясгалангаар, Бурханыг болон бусдыг хайрлах хайраар дүүргэдэг.” —Ахлагч Роналд М.Барсэллос

“[Аврагч] биднийг Өөртэй нь гэрээ байгуулж, сахих замаар хайраа харуул хэмээн урьдаг.” —Ахлагч Роналд М.Барсэллос 

Өөрийнхөө үнэхээр хэн бэ гэдгийг таньж мэд - Ахлагч Брик В.Айр

Далын ерөнхий эрх мэдэлтэн ахлагч Брик В.Айр Бурхантай харилцах харилцаагаа сайжруулах нэг арга бол ариун сүмийн сүсэг бишрэл гэж гэрчилсэн.

“Залбирлынхаа давтамж, эрчийг нэмэхийн зэрэгцээ өдөр бүр Мормоны Номыг судалж, ариун сүмд шүтэн бишрэх нь бидний оюуныг илчлэл хүлээн авахад бэлтгэдэг.” —Ахлагч Брик В.Айр

Бурхантай эвлэр—Ахлагч Кэлли Р.Жонсон

Далын ерөнхий эрх мэдэлтэн ахлагч Кэлли Р.Жонсон Бурхантай эвлэрэх гэдэг нь бид хүсэл болон үйлдлээ Бурханыхтай уялдуулахыг хэлнэ гэж гэрчилсэн. Гэрээнүүдээ сахих нь Аврагчтай харилцах харилцааг маань бэхжүүлдэг.

“Гэрээнүүдийг байгуулж, сахиснаар Аврагч болон бидний хоорондын холбоо хүчирхэгжиж, улмаар бид устгалд бэлтгэгдэн боловсорч гүйцэхээс [зайлсхийдэг] гэдгийг би гэрчилж байна.” —Ахлагч Кэлли Р.Жонсон

Даруухан бодгалиуд тахилын ширээний өмнө сөхөрдөг—Ахлагч Жэрэми Р.Яагги

Далын ерөнхий эрх мэдэлтэн ахлагч Жэрэми Р.Яагги биднийг Их Эзэний тахилын ариун ширээ рүү ирж, Түүнтэй гэрээ байгуулахад урьсан.

“Ариун ёслолын болон ариун сүмийн тахилын ширээнүүд нь Есүс Христийн золиос, Түүний хязгааргүй Цагаатгалыг бэлгэддэг.” —Ахлагч Жэрэми Р.Яагги

“Бид гэрээ байгуулан, гэрээгээ эрхэмлэн дээдэлж, сүмд ариун ёслолоос хүртэн, ариун сүмд хишиг хүртэн, лацдан холбуулснаар өөрсдийгөө Аврагчтай холбож, Түүний нигүүлсэл, хамгаалалт, ариусгал, эдгэрэл, амралтыг илүү ихээр хүртэх боломжтой болдог.” —Ахлагч Жэрэми Р.Яагги

"Бидний Аврагч гараа дэлгэж, ширээгээ зассан байна. Бурханы Хүүг шүтэн бишрэхээр Түүний тахилын ариун ширээнд ирцгээгтүн.” —Ахлагч Жэрэми Р.Яагги

“Би ариун тахилын ширээний дэргэд байгуулсан гэрээнүүдээр дамжуулан Аврагчтай харилцдаг туршлагаа ямар их нандигнадаг гээч.” —Ахлагч Жэрэми Р.Яагги

“Биднийг Их Эзэнтэй гэрээ байгуулахад хоёр талын харилцаа бий болдог. Бид өөрсдийн үнэнч байдал, хайрыг Түүнд харуулдаг. Амлалт өгч, үүнийгээ сахих бүрд бидний хүч, чадал өсөн нэмэгддэг.” —Ахлагч Жэрэми Р.Яагги

"Бид тахилын ширээний өмнө ирснээрээ шагнал хүртдэггүй. Харин Бэлэг өгөгчийн талаар суралцдаг. Тэрхүү суралцахуй ба гэрээт барилдлагаас эдгэрэл ирдэг.” —Ахлагч Жэрэми Р.Яагги

Хэн ч ганцаар суухгүй—Ахлагч Гэррит В.Гонг

Арван хоёр төлөөлөгчийн чуулгын ахлагч Гэррит В.Гонг Есүс Христ биднийг эдгэрэхэд туслахын тулд биднийг Өөрийн дэн буудалд авчирдаг гэж гэрчилсэн. Сайн cамари хүний сургаалт зүйрлэлийн нэгэн адил Тэр биднийг Өөрийнх нь Сүмд бүх хүнд өрөө гаргахад урьдаг.

“Түүний Сүмд мөн Түүний ёслол, гэрээнүүдээр дамжуулан бид бие биедээ болон Есүс Христэд ирдэг.” —Ахлагч Гэррит В.Гонг

Христ доторх энгийн байдал—Ахлагч Майкл Сиэсла

Далын ерөнхий эрх мэдэлтэн ахлагч Майкл Сиэсла бидэнд Есүс Христийн сайн мэдээний дагуу өдөр бүр энгийнээр амьдрах нь бидний амьдралд хүч чадал авчирдаг гэдгийг сануулсан.

“Заримдаа бид залбирах, мацаг барих, судраас судлах, өдөр тутам наманчлах, долоо хоног бүр ариун ёслолоос хүртэх, Их Эзэний өргөөнд тогтмол шүтэн бишрэх зэрэг энгийн үйлдлээс ирдэг хүч чадлыг дутуу үнэлэх нь бий. Гэсэн ч бид “бэрх зүйл[с]ийг [хийх]” хэрэггүй, харин цэвэр, энгийн сургаалд анхаарлаа хандуулах хэрэгтэй гэдгээ ухаарах үедээ сайн мэдээ бидэнд сорилт бэрхшээлээр дүүрэн хамгийн хэцүү үед ч “ашиг тусаа өгдөг” болохыг ойлгож эхлэх болно.” —Ахлагч Майкл Сиэсла

Их Эзэн Өөрийн ажлыг яаравчлуулж байна—Ахлагч Квинтин Л.Күк

Арван хоёр төлөөлөгчийн чуулгын ахлагч Квинтин Л.Күк Их Эзэнийг ажлаа яаравчлуулах үед гэгээнтнүүдийн хийх ёстой зүйлсийн талаар, түүний дотор ариун сүмийн ёслолуудад анхаарлаа хандуулах талаар ярьсан.

"Сүмийн гишүүдийн итгэл болоод бүхнээ зориулсны ачаар бүхэл дэлхий даяар цуглааны байр, ариун сүм баригдахын зэрэгцээ цуглааныг дэмжих эх сурвалжууд хүртээмжтэй болсон. Зохих санваарын түлхүүрүүд болон эх сурвалжуудаар дамжуулан дэлхийн ихэнх хэсэгт авралын ёслолыг гүйцэтгэх боломжтой боллоо.” —Ахлагч Квинтин Л.Күк

“Ёслол, гэрээнүүдийг хүлээн авч, зарлигуудын дагуу амьдрах нь чухал. Өргөмжлөлд шаардлагатай гэрээнүүд дээрээ төвлөр. Сайн мэдээ нь өргөмжлөлийг боломжтой болгодог ба энэ нь биднээс Бурхантай ариун нандин гэрээ байгуулж, сахихыг шаарддаг.” —Ахлагч Квинтин Л.Күк

“Баптисм хүртэх, гишүүнээр батлуулах, эрэгтэйчүүд Мелкизедек санваарт томилогдох зэргээс өөр бидний нэгддэг гэрээнүүдийг ариун сүмд гүйцэтгэдэг. Нас барагсдын хувьд эдгээр авралын ёслолыг зөвхөн ариун сүмд гүйцэтгэдэг. Иймээс өөрсдийгөө ариун сүмд ороход бэлтгэхийг бид нэн даруй зорилго болгох хэрэгтэй.” —Ахлагч Квинтин Л.Күк

“Бид ариун сүм болон ариун сүмийн ёслолуудыг эн тэргүүнд тавих хэрэгтэй.” —Ахлагч Квинтин Л.Күк

Их Эзэний хонийг санагтун—Ахлагч Виллиам К.Жэксон

Далын ерөнхий эрх мэдэлтэн ахлагч Виллиам К.Жэксон бусдыг нэрээр нь дурсан санаж, тэдэнд тохинуулах нь сайн хоньчин байж, Аврагчийн үлгэр жишээг дагахын чухал хэсэг гэж заасан. Тэрээр үгэндээ Христийн сүмийн гишүүд, удирдагчид Бурханы хүүхдүүдийг хэрхэн "тоолж, бүртгэж", төөрснийг нь олж, тэдэнд тохинуулахад нь хэрхэн тусалж болох талаар олон жишээг багтаасан.

Ахлагч Жэксон удирдагчдыг "Хэн хэнд ...ариун сүмд гэр бүлийнхнийхээ нэрсийг авч ороход тусламж хэрэгтэй байна вэ?" гэсэн асуултыг бодож үзэхэд урьсан. Түүний хуваалцсан нэг жишээ нь ахлагчийн чуулгын ерөнхийлөгчөөс “Энэ жил гэр бүлээрээ ариун сүмд ороход нь тусалж болох идэвх султай ахлагчийн чуулгын гишүүнийг нэрлээч?” гэж асуусан “ухаалаг гадасны ерөнхийлөгч” байв.

Ахлагч Жэксон удирдагчид сайн хоньчид байдгийн бас нэгэн жишээг хэлсэн. "Хамгийн ойр байх ариун сүм рүү хэдэн цаг нисэж очих зайд байдаг нэгэн дүүргийг би санаж байна. Тэнд, бараг л ашиглахгүй ч ариун сүмийн зөвшөөрлийн бичгээ хүчинтэй байлгахыг чухалчилж үздэг байсан. Сар бүрийн эхний ням гарагт удирдагчид бүртгэх хэрэгслээ ашиглан хишиг хүртсэн гишүүдээ бүртгэдэг. Хэн нэгний зөвшөөрлийн бичгийн хугацаа дуусах гэж байвал гүйцэтгэх нарийн бичиг нь сунгах ярилцлагын цагийг товлодог байна. Зөвшөөрлийн бичиг нь хүчингүй болсон хүмүүсийн талаар зөвлөлдөн ярилцаж, гэрээний замдаа эргэн ирэхэд нь туслахыг хичээдэг.” —Ахлагч Виллиам К.Жэксон

Би одоо харж байна—Ахлагч Жэффри Р.Холланд

Бурхан биднийг Өөрийн сонгосон ямар ч арга замаар, сохор хүнийг эдгээсний адил шүлс, шороогоор эсвэл Их Эзэний онцгойлон адислагдсан өргөөнд төлөөлөн гүйцэтгэдэг авралын ажлаар адисалж чадна гэж Арван хоёр төлөөлөгчийн чуулгын ахлагч Жэффри Р.Холланд гэрчилсэн.

“Түүнчлэн өршөөлийн бэлгийг ойлгодог сүмд эдгээр адислал, гэрээ биднээс өмнө амьдарч байсан гэр бүлийнхэн, өөд болсон төрөл төрөгсдөд маань очихыг харах нь тэрхүү сүмийн үнэн байдлын өөр нэг гайхамшигтай нотолгоо биш гэж үү? Өөд болсон өвөг дээдэс маань сайн мэдээг хүлээн авах боломжгүй байсан эсвэл тэнгэрлэг ёслол, гэрээнүүдийг авах боломжгүй цаг үед газар нутагт төрсөн учраас шийтгүүлэх ёстой юу?” —Ахлагч Жэффри Р.Холланд

“Есүс Христийн Хожмын Үеийн Гэгээнтнүүдийн Сүмд эдгээр нас барсан хүний өмнөөс төлөөлөн гүйцэтгэх энэрэнгүй, авралын ажлууд өдөр шөнөгүй хийгддэг, амьд хүмүүст шүтэн бишрэх боломж, ёслолуудыг санал болгодог Их Эзэний онцгойлон адисалсан, ариун нандин өргөөнүүд бий.” —Ахлагч Жэффри Р.Холланд

Өөрийгөө захирах ариун журмаар чимэн гоёсон—Ахлагч Үлиссэс Соарэс

Арван хоёр төлөөлөгчийн чуулгын ахлагч Үлиссэс Соарэс Ерөнхийлөгч Нэлсоны нэгэн зүйрлэлийг хуваалцсан бөгөөд уг зүйрлэлд Солт Лэйкийн ариун сүмийн засварыг өөрсдийн сүнслэг суурийг бэхжүүлэхтэй харьцуулсан.

“Байгалийн хүчийг тэсвэрлэхийн тулд ариун сүмийн суурийг улам бат бөх болгох томоохон арга хэмжээ авах нь зайлшгүй байсан шиг бид ч бас Есүс Христэд суурилсан өөрсдийн сүнслэг байдлын суурийг бэхжүүлэхийн тулд магадгүй урьд өмнө хэзээ ч авч байгаагүй онцгой арга хэмжээнүүдийг авч хэрэгжүүлэх хэрэгтэй гэж бидний хайрт бошиглогч тэр үед заасан юм.” -Ахлагч Үлиссэс Соарэс

Тусламж хэрэгтэй нэгэнд тохинуулахын хүч—Ахлагч Питэр М.Жонсон

Далын ерөнхий эрх мэдэлтэн ахлагч Питэр М.Жонсон биднийг Их Эзэний өргөөнд шүтэн бишрэхдээ Христэд ирэхэд хөтлөх арга замаар бие биедээ тохинуулахад урамшуулсан.

“Бид Есүс Христийн үнэхээр үнэнч шавь болж мөн бусдад тийн шавь болоход нь туслахдаа Ариун Сүнсний нөлөөг танин мэдэх болтугай мөн Их Эзэний өргөөнд шүтэн биширч байхдаа Түүний баяр баясгаланг мэдрэх болтугай хэмээн би залбирч байна.” —Ахлагч Питэр М.Жонсон

"Бид тусламж хэрэгтэй нэгэнд тохинуулахдаа тэр хүнийг Христ рүү ирж, Их Эзэний гэтэлгэгч хүчийг хүлээн авахын тулд Түүний өргөөнд шүтэн бишрэхэд урьдаг.” —Ахлагч Питэр М.Жонсон

“Бид Христийн сургаалын дагуу амьдарч, Их Эзэний өргөө рүү хөтлөх арга замаар тусламж хэрэгтэй нэгэнд тохинуулснаар Есүс Христэд итгэх итгэлээр урагш тэмүүлэх болно гэдгийг амлая. Энэ нь бүр хариултгүй асуулттай байх үед, өөрийгөө чухал биш, ганцаардсан, урам хугарсан, хэнд ч анзаарагддаггүй нэгэн гэж бодох үед ч гэсэн боломжтой.” | Ахлагч Питэр М.Жонсон

“Бид тусламж хэрэгтэй нэгнийг Есүс Христэд ирж, Түүний гэтэлгэгч хүч, хайрыг хүлээн авахын тулд Их Эзэний өргөөнд шүтэн бишрэхэд урих болно.” —Ахлагч Питэр М.Жонсон

Ахлагч Жонсон ерөнхийлөгч Рассэлл М.Нэлсоны үгийг эш татан, “Эзэний өргөөнд бид [Аврагчийн] хайрыг мэдэрч, сэтгэлийг [маань] хамгийн их шаналгаж байгаа асуултууддаа хариулт авч, [түүнчлэн] Түүний сайн мэдээний баяр баясгаланг илүү сайн ойлгох болно.” (Рассэлл М.Нэлсон, “Их Эзэн Есүс Христ эргэн ирнэ,” 2024 оны 11-р сарын Лиахона, 122.)’ гэж хэлсэн.

Нигүүлслээ бүү умартагтун — Ахлагч Мэттью С.Холланд

Аврагчийн цагаатгалаар дамжуулан нигүүлсэл бидний хүн нэг бүрд хувьчлан ирдэг гэж Далын ерөнхий эрх мэдэлтэн ахлагч Мэттью С.Холланд тайлбарлав.

"Наманчлагч Ионагийн үлгэр жишээг дагагтун. Бурханд хандан залбирч гуй. Ариун сүмд оч. Гэрээнүүдээ сахь. Золиос гарган, Их Эзэнд, Түүний Сүмд мөн бусдад талархалтайгаар үйлчил.” —Ахлагч Мэттью С.Холланд

Гэр бүлд төвлөрсөн Есүс Христийн сайн мэдээ—Ерөнхийлөгч Даллин Х.Өүкс

Есүс Христийн Хожмын Үеийн Гэгээнтнүүдийн Сүмийн ерөнхийлөгч Даллин Х.Өүкс Тэнгэрлэг Эцэгийн Төлөвлөгөөн дэх гэр бүлүүдийн ач холбогдлын талаар гэрчилсэн. Тэрээр гэр бүлийн харилцааг бэхжүүлж, ариун сүмийн ёслолуудад оролцохыг урамшуулсан.

“Ганц бие ээж бүр Тэнгэрлэг Эцэгийн хайрын талаар болон ариун сүмийн гэрлэлтээс хожим ирэх адислалуудын талаар зааж чадна. Та ч бас чадна!” —Ерөнхийлөгч Даллин Х. Өүкс

“Бид бүгд ариун сүмийн гэрлэлтэд мөн гэр бүлээрээ мөнхөд лацдан холбогдсоноор ирдэг адислалуудад талархдаг.” —Ерөнхийлөгч Даллин Х.Өүкс

“Гэр бүлүүд ариун сүм рүү хөтөлдөг өвөг дээдсээ дурсан санах гэр бүлийн ургийн баярыг зохион байгуулж байх хэрэгтэй.” — Ерөнхийлөгч Даллин Х.Өүкс

“Гэр бүлийн түүхүүдээ хуваалцаж, гэр бүлийн уламжлалыг бий болгож мөн ариун нандин туршлагуудаа хуваалцсанаар гэр бүлийн холбоо харилцаа бэхэждэг.” —Ерөнхийлөгч Даллин Х.Өүкс

"Ерөнхийлөгч Спэнсэр В.Кимбалл бидэнд 'бидний өөрсдийн болон өвөг дээдсийн маань амьдралаас урам зориг авсан түүхүүд нь … хүчирхэг заах хэрэгсэл' гэдгийг сануулсан байдаг. Тэдгээр нь бидэнд төдийгүй үр хүүхдүүдэд маань урам зориг авах хамгийн сайн эх үүсвэр болдог." —Ерөнхийлөгч Даллин Х.Өүкс

Көртландын ариун сүмд сэргээгдсэн түлхүүрүүдээр удирдуулсан санваарын лацдан холбох хүч нь гэр бүлүүдийг мөнхөд нэгтгэдэг. Үүнийг одоо дэлхий даяарх өсөн нэмэгдэж буй Их Эзэний ариун сүмүүдэд хэрэгжүүлдэг. Энэ бол бодит юм. Үүний нэг хэсэг нь байцгаая. | Ерөнхийлөгч Даллин Х.Өүкс

Ариун сүмд орохоор бэлтгэх

Бишоп зэрэг харьяа нэгжийн удирдагчид танд Их Эзэний өргөөнд шүтэн бишрэх зөвшөөрлийн бичиг авахад туслах болно. Ариун сүмд ороход бэлтгэх эсвэл гэр бүлийнхээ хүмүүсийн нэрийг олж, бэлтгэхэд тань туслах бусад мэдээллийг доорх холбоосуудаас авч болно:

• Их Эзэний өргөөнд орохоор бэлтгэх нь: Илүү хувийн, утга учиртай туршлагыг олж авах
• Өвөг дээдсийнхээ нэрийг ариун сүмд авч очих

Энэхүү нийтлэл дэх эшлэлүүдийг татан авч, хуваалцах

Энэхүү нийтлэл дэх эшлэлүүдийг чөлөөтэй хуулж аван хуваалцах боломжтой.

Суурин компьютер дээр эшлэлийн зургуудыг татан авч, хуваалцахын тулд сонгосон зураг дээрээ дараад, баруун товчийг дарах (Windows ашигладаг бол) эсвэл зураг дээр дарангаа Control дээр (Mac ашигладаг бол) дарвал хадгалах болон татаж авах сонголтууд гарч ирнэ. Та зургийг хадгалсныхаа дараа сошиал медианы дуртай сайт руугаа оруулж эсвэл найздаа илгээж болно.

Зургийг зөөврийн төхөөрөмж дээр хуваалцах эсвэл хадгалахын тулд зураг дээр дарж нээгээд, сонголтын цэс гарч ирэх хүртэл хуруугаараа дээр нь удаан дарснаар та зургийг татаж авах эсвэл хуваалцах боломжтой болно.

Түүнчлэн та дараах товчийг ашиглан, бүх эшлэлийг нэг дор зип файл хэлбэрээр татаж авах боломжтой.

Есүс Христийн Хожмын Үеийн Гэгээнтнүүдийн Сүмийн 2025 оны 10-р сарын Ерөнхий чуулганы бүрэн видео, аудио болон бичвэрийг олж авахын тулд ChurchofJesusChrist.org хаягаар зочилно уу.

Энэ чуулганы өөр эшлэл, түүхүүдийг Church Newsroom, LDS Living,  Church News дээрх нийтлэлүүдээс тус тус олох боломжтой.