Есүс Христийн Хожмын Үеийн Гэгээнтнүүдийн Сүмийн гишүүний хувьд би заримдаа өөрөөсөө хэт их зүйлийг хүлээдэг юм шиг санагддаг. Миний хийх зүйлсийн жагсаалт улам нэмэгдэж уртассаар, заримдаа бүр зорилгоо алдаж байгаа юм шиг санагддаг.
Миний амьдралд ариун сүм жагсаалтын хамгийн сүүлд орох нь олонтоо. Би урьдчилан төлөвлөх, цаг зав гаргах, хүүхэд асрагч олох гэх мэтийг хийхээ мартчихдаг. Энэ нь сүрдмээр ажил мэт санагддаг байж болно.
Гэвч бодит байдал дээр ариун сүмд очих нь ачаа нэмэх биш, харин хөнгөлж болох юм. Их Эзэний өргөөнд бид Христэд болон нас барсан гэр бүлийн гишүүддээ Түүгээр дамжуулан илүү ойртох боломжтой байдаг. Тэрхүү харилцаанаас амар амгалан, тайвшрал ирдэг.
"Ариун сүмд бид … хамгаалалт хүлээн авч, Есүс Христийн болон Тэнгэрлэг Эцэгийнхээ цэвэр хайрыг үлэмж ихээр хүртэж, дэлхий үймээн самуунтай байхад амар амгалан, сүнслэг баталгааг мэдэрнэ.”
Рассэлл М.Нэлсон, “Их Эзэн Есүс Христ эргэн ирнэ,” Лиахона, 2024 оны 11-р сар, 121.
Мөнхийн бэлгүүд
“Та нарын Бурхан, Есүс Христ хоёртой байгуулсан гэрээт харилцаа бол хайр, итгэл найдварын харилцаа бөгөөд үүгээр та Тэдний ач ивээл, тэнгэрлэг тусламж, хүч чадлын хишиг, боломж олгогч хүчийг илүү ихээр хүртэх боломжтой.
Брадли Р. Вилкокс, "Ай, ууган хүүгийн эрхтэй эрхэм өсвөр үеийнхэн минь," 2024 оны 10-р сарын Лиахона, 95
Никки Кэлли
Нөхөр минь 19 настай, коллежийн шинэхэн оюутан байхдаа Сүмд нэгдсэн юм. Сүмд нэгдэх шийдвэрт нь олон хүн нөлөөлсөн ч эмээ Стивий нь хамгийн их нөлөөлсөн ажээ. Тэрээр биднийхээс өөр шашин шүтлэгтэй байсан ч Бурханаас эмээдэг сүсэг бишрэлтэй эмэгтэйн мөн чанарыг өөртөө бий болгосон эмэгтэй байв. Стивий үг, үйлдлээрээ нөхөрт маань хайр, тууштай байдал, Бурханд итгэх итгэлийн үнэ цэнийг ойлгуулсан.
Хэдэн жилийн өмнө надад түүний ариун сүмийн ажлыг гүйцэтгэх эрхэм боломж тохиосон юм. Би түүний анхдагч ёслолыг гүйцэтгээд дуусах үед нэгэн ер бусын зүйлийг мэдэрсэн. Түүний хөөрч баясан батлан зөвшөөрч байгаа оршихуйг би маш хүчтэй мэдэрч билээ. Тэр үед би төрсний дараах сэтгэл гутралын асуудалд гүн орсон, ганцаардал, цөхрөлтэй тэмцэж байлаа. Гэтэл тэрхүү ариун нандин ёслолын үеэр тэрээр яг л миний дэргэд байгаа мэт санагдсан.
Түүний оршихуй надад амар амгалан, урам зоригийг гүн гүнзгий мэдрүүлсэн юм. Тэр намайг ариун сүмээс, итгэлээсээ, өөрөөсөө хүч чадал олж чадна гэж хэлж байсан мэт санагдав. Энэхүү туршлага надад хамгийн хүнд хэцүү өдрүүдэд ч гэсэн ариун сүмд үргэлжлүүлэн ордог байхад минь сүнслэгээр нөлөөлсөн юм. Түүний хайр, үлгэр жишээ үе удмаа холбох, бидний сүнслэг аяллыг хүчирхэгжүүлэх мөнхийн бэлэг болсон билээ.
Та ганцаараа биш!
"Ариун сүмд шүтэн биширдэг бүхэн Бурханы сүр хүчтэйгээр урагш одож, мөн тэнгэр элч нар ‘тэдний дээр захирч’ байдаг. Амьдралын шуургыг ганцаараа туулахгүй гэдгээ мэдэх нь та нарын өөртөө итгэх итгэлийг хэр их нэмэх вэ? Тэнгэрлэг элч нар танд үнэхээр тусална гэдгийг мэдэх нь танд хэр их урам зориг өгөх вэ?
Рассэлл М.Нэлсон, "Санваарын түлхүүрүүд өгөгдсөнд баяс," Лиахона, 2024 оны 5-р сар
Марко Госэвинкэл
Би өвөг дээдсээ олохын тулд FamilySearch-ийг олон жилийн туршид ашиглаж байна. Үүнийг Есүс Христийн Сүмтэй холбоотой гэдгийг би мэддэг байсан. Гэлээ ч би Сүмийг эсвэл үүний сургаалыг сонирхдоггүй байв.
Хэсэг хугацааны дараа би Есүс Христийн Сүмийн гишүүд яагаад өвөг дээдсээ хайдаг юм бол гэж бодож эхлэв. Мормоны Номд удмын бичгийн талаар ямар нэгэн зүйл байдаг болов уу гэж бодож, уг номыг онлайнаар захиалсан юм. Маргааш нь номлогчид надтай холбоо барьж, бид тогтмол уулздаг болж эхлэв. Мормоны Номоос өөрийн удмын бичгийг тодорхойлох ямар ч тусламж олоогүй ч үнэнүүд, хариултуудыг би олсон юм.
Би баптисм хүртэхийнхээ өмнө номлолын ерөнхийлөгчтэй уулзсан. Тэр надаас яагаад угийн бичгээ хөтөлдөг болохыг минь асуув. Энэ асуултын хариулт надад байгаагүй ч тэрээр: "Учир нь чиний өвөг дээдэс олдохыг хүсдэг учраас" гэж хариулсан юм.
Дөрвөн сарын дараа Франкфурт ариун сүмд анх удаа очиж, дөрвөн элэнц өвөөгийнхөө өмнөөс баптисм хүртэх боломж надад олдсон юм. Би яг юу болохыг мэдэхгүй байсан учраас сандарч байлаа.
Баптисмын усан сангийн танхимд суугаад, залбирч байснаа одоо хүртэл санадаг. Гэнэт зүрх сэтгэлд минь дулаан мэдрэмж төрж, би Ариун Сүнсийг маш хүчтэй мэдэрсэн. Тэр үед өвөг дээдэс минь надтай хамт байсныг би мэдэрсэн юм. Би тэр туршлагыг хэзээ ч мартахгүй.
Стэфани В.
Би ариун сүмд 20 жилийн өмнө лацдан холбуулсан. Гэр бүлээсээ би ганцаараа Сүмийн гишүүн байсан учраас лацдан холболтын өрөөнд орохдоо ганцаардаж байлаа. Гэр бүлээс маань хэн ч надтай хамт байсангүй.
Үүнээс өмнө би ариун сүмийн ёслолуудыг нь төлөөлөн гүйцэтгэхээр гэр бүлийн олон гишүүний нэрийг олж, бэлтгэхэд олон сарыг зориулсан. Би лацдан холбуулсан тэр өдөр өрөөн доторхыг хараад, тэднийг надтай хамт байгааг мэдэрсэн юм. Би үнэндээ тэднийг хараагүй ч тэнд байгааг нь мэдэж байлаа. Би тэднийг миний төлөө баярлаж, намайг хайрлаж байгааг мэдэрсэн.
Биднийг лацдан холбуулсны дараа тэнд байсан хүн болгон биднийг тэвэрч, баяр хүргэж байв. Хадам эгч маань намайг чанга тэвэрч, "Би ч гэсэн тэдний энд байгааг мэдэрч байна. Тэд чамд их хайртай шүү!” гэж билээ. Хадам эгч маань үүнийг гэрчлэх хоёр дахь гэрч болсон юм. Хөшигний нөгөө талд байгаа хүмүүсээ үргэлжлүүлэн хайх үед тэрхүү гэрчлэлийн хүч үргэлж надтай байсан.
Ариун сүмд нэг нэгэнтэйгээ улам дотносох нь
"Их Эзэний өргөөнд тогтмол үйлчилж, тэнд байгуулсан ариун гэрээнүүдээ сахихыг хичээх нь Аврагчтай илүү адилхан болоход шаардлагатай зүрх сэтгэл, хүч чадал, оюун ухаан, бодгалийн өөрчлөлтийг мэдрэх бидний хүсэл, чадварыг нэмэгдүүлнэ."
Хорхе М.Альварадо, "Их Эзэний наманчлалын бэлгийг хүлээн ав," 2024 оны 10-р сарын Лиахона, 89
Р.Пэтэрсон
Баяр ойртох болгонд би ариун сүмийн тухай боддог. Манай гэр бүл бусад ажил үүргээсээ амрах үедээ ариун сүм рүү хамтдаа явна гэсэн зорилгыг олон жилийн турш тавьсан байсан юм.
Биднийг энэ уламжлалыг эхлүүлэхээс өмнө хамгийн ойрхон оршдог ариун сүмд хэдэн сарын өмнө цаг авсан байх хэрэгтэй байлаа. Эцэст нь арай хийж ариун сүмд орох боломж гарч ирэхэд бид өөр тийш явж, ариун сүмд дахиад л орж чадахгүй нь гэдгээ мэдэж авав.
Бидний очсон хотод ариун сүм байв. Тэндхийн баптисмын ёслолд хэдэн сарын өмнөөс цаг товлох шаардлагагүй байсан учраас аав, ээж хоёр маань дүүг тэнд баптисм гүйцэтгүүлэхээр авч явсан юм. Жилийн дараа ах маань үүнд нэгдсэн бөгөөд түүний дараа жил энэ нь уламжлал болсон байв.
Ариун сүмийн ийм аялал нь анхандаа ая тухаас үүдэлтэй байсан ч удалгүй ариун сүмийг, өвөг дээдсээ хайрлах жинхэнэ хайр болон хувирсан юм. Бид гэр бүлээрээ хаа нэгтээ явах тоолондоо урт амралтын өдрүүдэд ч гэсэн хамгийн ойрын ариун сүмийг эрж олоод, тийшээ орох цаг гаргадаг.
Ариун сүмд орохыг амралтаасаа завсарлага авах "үүргүүдийн" нэг гэж үзэх байсан ч ариун сүмийг эн тэргүүнд тавьсан маань манай гэр бүлийг өөрчилсөн билээ. Аялал болгоны дараа бидний үг яриа, биеэ авч явах байдал илт өөр болдог нь анзаарагддаг байв. Бид бие биедээ илүү найрсаг, илүү тэвчээртэй хандаж, илүү сайн ойлгодог болсон.
Гэр бүлийнхэнтэйгээ амралтаа хамт өнгөрүүлэх нь та нарыг аяндаа нэг нэгэнтэйгээ ойр дотно болгодоггүй. Амьд байгаа, нас барсан мөнхийн гэр бүлийн гишүүдтэйгээ аль алинтай нь ариун сүмд цаг өнгөрүүлэх нь үргэлж биднийг илүү дотно болгодог.
Нэр хайж олох нь
Хэрэв та ариун сүмд гэр бүлийнхээ нэрсийг авчрахыг хүсэж буй ч хэрхэн гэдгээ мэдэхгүй байгаа бол FamilySearch дээр нэр олох боломж олгодог олон эх сурвалж байгаа. Дараах холбоосууд танд тусалж болох юм. Үүнд:
- Ёслолууд нь бэлэн
- Нэрс бэлтгэх нь
- Ариун сүмд орох цаг товлох
- Гэр бүлийн модноос ариун сүмийн ажлыг нь хийх шаардлагатай өвөг дээдсээ олох
FamilySearch дээр бид таныг гэр бүлтэй чинь холбож, хөгжилтэй танин мэдэхүй болон гэр бүлийн түүхийн үйлчилгээг санал болгодог. Яагаад? Учир нь бид гэр бүлүүдийг нандигнаж, үе удмуудыг хооронд нь холбох нь бидний амьдралыг одоо болон үүрд сайжруулдаг гэдэгт итгэдэг. Бид Есүс Христийн Хожмын Үеийн Гэгээнтнүүдийн Сүмээс санхүүждэг ашгийн бус байгууллага юм. Бидний итгэдэг зүйлсийн талаар дэлгэрэнгүй мэдэхийг хүсвэл энд дарна уу.
