Өвөг дээдсийнхээ патриархын адислалын хуулбарыг авах хүсэлт хэрхэн гаргах тухай

Патриархын адислал нь бидний амьдралд удирдамж, алсын хараа болдог сүнслэг газрын зурагтай адил юм. Гэхдээ та өөрийн шууд удмын өвөг дээдсийнхээ патриархын адислалын хуулбарыг авах хүсэлтийг гаргах боломжтой гэдгээ мэдсэн үү? Энэ өгүүлэлд бид патриархын адислал гэж юу болох, хүн яагаад өвөг дээдсийнхээ адислалыг уншихыг хүсэж болох, өвөг дээдсийнхээ патриархын адислалын тэмдэглэгдэж үлдсэн хуулбарыг авах хүсэлтийг хэрхэн гаргах талаар ярилцах болно.

Энд дарж адислалын хуулбарыг авах хүсэлт гаргах алхмууд руу шууд очно уу.

Патриархын адислал гэж юу вэ?

Патриархын адислал нь тухайн хүнд Тэнгэрлэг Эцэгээс өгсөн сүнслэг удирдамжийг агуулсан онцгой адислал юм. Энэхүү адислалаар тухайн хүн Израилын угсаан дахь удмын овгийн тунхаглал, хувийн тодорхой адислалууд, мөн амьдралынхаа болон ирээдүйн талаарх зөвлөгөөг хүлээн авдаг. Эдгээр адислал, зөвлөгөөг залбиралтайгаар тунгаан бодож, дагах юм бол удирдамж, тайтгарал, хамгаалалтыг авах боломжтой.

Патриархын адислалыг өгөхдөө патриарх (эдгээр адислалыг өгөх Бурханы санваарын эрх мэдэл, хүч бүхий хүн) гараа тухайн хүний толгой дээр тавьж, Бурханы сүнслэгээр өдөөгдсөн адислал, амлалт, зөвлөгөөг илчлэлтээр хүлээн авч, хэлж өгдөг. Патриархын адислал нь хүн нэг бүрийн хувьд онцгой байдаг. Эдгээр адислал ариун нандин, хувийн шинж чанартай байдаг тул голдуу зөвхөн ойр дотны гэр бүлийн гишүүдтэй хуваалцаж болдог.

Ахлагч Казүхико Ямашита заахдаа, “Патриархын адислал нь үүрдийнх бөгөөд хэрэв та зөв зохистой амьдарвал энэ амьдралд биелээгүй адислалууд нь ирэх амьдралд өгөгдөх болно” гэсэн (“Патриархын адислалаа хэзээ авах вэ,” 2023 оны 4-р сарын Ерөнхий чуулган). Патриархын адислалд агуулагддаг амлалтууд өөрөө биелдэггүй, харин өгсөн зөвлөгөөг дагаснаар тэдгээр амлалтыг хүлээн авах боломжтой байдаг.

Патриархын адислалын түүх

Патриархын адислал болон эцгийн адислалыг хүлээн авах нь Библи, Мормоны Ном зэрэг судруудад гардаг эртний зан үйл юм. Тухайлбал, эртний патриарх Иаков өөрийн үр удам болох Ефраим, Манассе хоёрт өв залгамжлалын адислалыг өгсөн. Мормоны Номд гардаг анхны бошиглогчдын нэг болох Лихай нас барахаасаа өмнө хүүхдүүддээ адислал өгсөн. Тэрээр хүүхдүүдээ адислахдаа тэдний ирээдүй болон амьдралдаа замнах ёстой замналынх нь талаар хэлжээ. 19-р зуунд бошиглогч Иосеф Смит энэ зан үйлийг Есүс Христийн Хожмын Үеийн Гэгээнтнүүдийн Сүмд сэргээхэд тусалсан.

Анхандаа, эцгүүд хүүхдүүддээ адислал өгөх зан үйлийг Иосеф Смит шинэчилж, зарим үед үүнийг патриархын адислал гэж нэрлэдэг байв. Патриархын албан тушаал Ахмад Иосеф Смит Сүмийн анхны патриархаар томилогдох үед буюу 1834 оноос эхэлжээ. Түүний үүрэг нь эцгээсээ хагацсан хүмүүст патриархын адислал өгөх байв. 1837 онд Сүмийн өсөн нэмэгдэж буй гишүүдэд адислал өгөхийн тулд Ахмад Иосеф Смитээс гадна өөр патриархыг орон нутгаас нь томилж эхэлсэн.

Өнөө үед Хожмын үеийн гэгээнтнүүд патриархын адислал өгөхийг томилогдсон патриархаас хүсэж болно. Энэ адислалыг уламжлал ёсоор бичиж бүртгэн, Сүмийн түүхийн архивт хадгалдаг. Тухайн хувь хүнд хуулбарыг нь өгдөг.

Яагаад өвөг дээдсийнхээ патриархын адислалын хуулбарыг авах хүсэлт гаргах хэрэгтэй вэ?

Өвөг дээдэст тань өгсөн патриархын адислалыг унших нь тайтгарал, урам зоригийн эх сурвалж болдог. Та өвөг дээдсийнхээ амьдралд амлалтууд хэрхэн биеллээ олсныг харах боломжтой. Бид бүгдээрээ Бурханы хайрт хүүхдүүд гэсэн таны ойлголт илүү гүнзгийрнэ.

Хэн Патриархын адислалынхаа хуулбарыг авах хүсэлт гаргаж болох вэ?

Энэ адислалын хувийн болон ариун нандин мөн чанарын улмаас патриархын адислалын хуулбарыг авах хүсэлтийг зөвхөн уг адислалыг хүлээн авсан хүн, нас барсан хүний тухайд шууд үр удам эсвэл хань ижил гэх мэт амьд байгаа ойр дотны хүн хүсэлт гаргах боломжтой.

Өөрийн өвөг дээдсийн патриархын адислалын хуулбарыг авах хүсэлт гаргах алхмууд

Өвөг дээдсийнхээ патриархын адислалын хуулбарыг авах хүсэлт гаргах алхмууд:

• Өөрийн шууд удмын өвөг дээдсийг ол. Өөрийн шууд удмын өвөг дээдэс гэдэг нь эх эцэг, эмээ өвөө, элэнц эмэг, өвөг зэрэг таны шууд удмын хэн нэгнийг хэлнэ. Үүнд нагац, авга, үеэл, асран хамгаалагч эх эцэг, хадмууд орохгүй. Хэн нэгнийг шууд удмын өвөг дээдэс эсэхийг олж мэдэх нэг арга бол гэр бүлийн модыг ашиглан өвөг дээдсээ харах юм. FamilySearch.org/tree руу нэвтэрч ороод, гэр бүлийн модоо харах эсвэл эхлүүлнэ. Та өвөг дээдсээ хялбархан харах эсвэл бүртгэж тэмдэглэх боломжтой бөгөөд FamilySearch нь дундын модны загвар ашигладаг тул мэдэхгүй байсан өвөг дээдсийнхээ талаар мэдээлэл мөн олох боломжтой юм. Өвөг дээдэс тус бүрийн хуудсанд та тухайн өвөг дээдэс Есүс Христийн Хожмын Үеийн Гэгээнтнүүдийн Сүмийн гишүүн эсэх талаар дурдсан зүйл байгаа үгүйг намтар, дурсамжаас нь нягталж үзэх боломжтой. Хэрэв таны өвөг дээдэс гишүүн байсан бол тэд патриархын адислалаа хүлээн авсан байж магадгүй.
• Өвөг дээдсийнхээ төрсөн болон нас барсан огноог шалга. Есүс Христийн Хожмын Үеийн Гэгээнтнүүдийн Сүм патриархын адислалын зан үйлийг 1834 онд сэргээсэн. Сүм хэдийгээр тэдгээр адислалын бүртгэлийг 1920-иод он хүртэл албан журмаар хийж эхлээгүй байсан хэдий ч та хүсэлт гаргаж, зарим тохиолдолд 1800-аад онд эсвэл 1900-аад оны эхэн үед өгөгдсөн адислалуудыг авах боломжтой. Өвөг дээдсийнхээ төрсөн болон нас барсан огноог харахдаа тэд 1830-аад оны үед буюу түүнээс хойш амьд байсан эсэхийг нягтлаарай. Тэд патриархын адислалаа хэдэн ч насандаа авсан байж болно.
• Шаардагдах мэдээллийг цуглуул. Патриархын адислал авсан шууд удмын өвөг дээдсээ олж мэдсэнийхээ дараа хүсэлт гаргахад тань шаардагдах бүх мэдээллийг цуглуул. Үүнд дараах мэдээлэл орно:
  
  • Та уг өвөг дээдэстэйгээ ямар холбоо хамааралтай болох
  • Тухайн өвөг дээдсийнхээ овог нэр, төрсөн огноо, нас барсан огноо
  • Тухайн өвөг дээдсийн эцэг эхийн нэр
  • Та уг өвөг дээдэстэйгээ хэрхэн холбогдож байгаагаа харуулахын тулд өөрийн угсааны талаар аль болох их мэдээлэл бэлдэх хэрэгтэй.

• Адислалын хуулбарыг авахаар хүсэлт гарга. Та шаардагдах бүх мэдээллийг цуглуулсныхаа дараа хүсэлтээ энд гаргана уу.

  Патриархын адислалын хуулбарыг авахаар хүсэлт гаргахын тулд та ChurchofJesusChrist.org дээр аккаунттай байх шаардлагатай. Та аккаунттай байхын тулд Сүмийн гишүүн байх албагүй! (Аккаунтаа сэргээхийн тулд энд дарна уу, эсвэл аккаунт үүсгэхээр энд бүртгүүлнэ үү.)

• Адислалын хуулбарыг хүлээ. Дэлхий даяарх хүсэлтийн тоо хэмжээнээс хамаарч гэр бүлийн адислалын хуулбарыг хүлээн авахад 3 сар орчим болно. Хүсэлтийнхээ явцыг энд шалгана уу. 

Өвөг дээдсийн патриархын адислал нь хувийн патриархын адислалын адил ариун нандин билээ. Та өвөг дээдсийнхээ патриархын адислалын хуулбарыг хүлээн аваад, өөрийн шууд удмын бусад хүнтэй хуваалцаж болно. Харин FamilySearch-д олон нийтэд зориулсан дурсамж хэлбэрээр эсвэл олон нийт харах боломжтой ямар нэг газар хуваалцаж болохгүй.