2024 оны 10-р сарын Ерөнхий чуулганы ариун сүмтэй холбоотой эшлэлүүд

Ерөнхийлөгч Рассэлл М.Нэлсон Есүс Христийн Хожмын Үеийн Гэгээнтнүүдийн Сүмийн 2024 оны 10-р сарын Ерөнхий чуулган дээр хэлсэн үгэндээ 17 шинэ ариун сүмийг зарлаж, биднийг амьдралаа Есүс Христэд дахин онцгойлон зориулахыг уриалсан билээ. Тэрээр Их Эзэн ариун сүмийг урьд өмнө байгаагүй хурдацтайгаар бариулж байгааг тунхаглахын зэрэгцээ ариун сүмийн адислалууд биднийг болон дэлхийг Аврагчийн Хоёр дахь ирэлтэд хэрхэн бэлтгэж байгаа талаар ярьсан юм.

Чуулганы туршид төлөөлөгчид, ерөнхий эрх мэдэлтнүүд, сүмийн ерөнхий албан тушаалтнууд Их Эзэний өргөөнд ойр ойрхон очсоноор олж авах боломжтой адислалууд, хүч, ариун байдал, гэрээт холбооны талаар заасан.

Бид өмнөх чуулгануудын адил ариун сүмийн болон гэр бүлийн түүхийн тухай сургаалуудыг түүвэрлэн та бүхэнтэй хуваалцахыг хүслээ. Бид эдгээр эшлэл нь танд сүнслэгээр нөлөөлж, урам зориг өгнө гэж найдаж байгаа бөгөөд эдгээрийг хуулж эсвэл татаж аваад гэр бүл, найз нөхөдтэйгөө хуваалцахад та бүхнийг урьж байна.

Найдварын ялалт—Ахлагч Нийл Л.Андэрсэн

Их Эзэнд итгэх итгэлээ нэмэгдүүлэхийн хэрээр найдвар ирдэг гэсэн ахлагч Нийл Л.Андэрсэны амлалт бидэнд гүн сэтгэгдэл төрүүлсэн билээ. Тэрээр Их Эзэний өргөөнд шүтэн бишрэх нь итгэл, найдвараа өсгөх нэг арга зам хэмээжээ.

"Их Эзэний өргөөнд Бурхантай байгуулсан гэрээнүүддээ итгэж, тэдгээрээс зууран барих үед . . . юу ч бидний найдварыг бөхөөж чадахгүй. Энэ бол гэрэл гэгээний өргөө; итгэл найдварын өргөө мөн."

Гэрээнүүдийн талаар илүү ихийг эндээс мэдэж аваарай.

Онцгой эрхдээ тэнцэхүйц амьдар—Ерөнхийлөгч Эмили Бэлл Фриймэн

Залуу эмэгтэйчүүдийн ерөнхий ерөнхийлөгч Эмили Бэлл Фриймэн ёслолууд, гэрээний амлалтууд бидний амьдралд Бурханы хүчийг нээж өгдөг хэмээн заасан.

"Санваарын ёслолууд, гэрээний амлалтууд нь та нарын дотор та нараар дамжуулан бүрэн зорилго, чадавхдаа хүрэхэд тань та нарыг хүчирхэгжүүлж, чадавхжуулах замаар хэрхэн та нарын амьдралд Бурханы хүчийг агуу нөлөөтэйгөөр урсан орох боломж олгодгийг сураарай." —Ерөнхийлөгч Эмили Бэлл Фриймэн

Гэрээнүүдийн талаар илүү ихийг эндээс мэдэж аваарай.

"Талх, уснаас хүртэх нь зовлон бэрхшээлээ даван туулахад тань туслахаар Түүний хүч таны дотор ажиллаж буйн долоо хоног тутмын сануулга юм. Ариун санваарын өмсгөлийг өмсөх нь таны ямар хүн болох тал дээр туслах Түүний хүчний бэлэг таны дотор ажиллаж буйн өдөр тутмын сануулга юм.” —Ерөнхийлөгч Эмили Бэлл Фриймэн

Эндээс ариун сүмийн ариун нандин өмсгөлийн тухай илүү ихийг мэдэж аван түгээмэл асуудаг асуултуудын хариултыг олж аваарай.

"Бид бүгдээрээ Бурханы хүчний бэлгийг хүлээн авах боломжтой. Бид ариун ёслолоос хүртэх бүрдээ Бурханы хүчний бэлгийг хүлээн авах боломжтой. Бид ариун сүмийн босгыг давах болгондоо Бурханы хүчний бэлгийг хүлээн авах боломжтой. Энэ бол хүндэтгэлийн өдрийн минь хамгийн сайхан цаг мөч байдаг. Энэ бол ариун сүмийн зөвшөөрлийн бичгээ нандигнадаг шалтгаан минь юм. ‘Тиймийн тул, үүний ёслолуудад бурханлаг чанарын хүч илэрхийлэгддэг.’" —Ерөнхийлөгч Эмили Бэлл Фриймэн

Бурханы хамгийн хайртай хүүхэд—Ахлагч Карл Д.Хөрст

Ерөнхий эрх мэдэлтэн Далын ахлагч Карл Д.Хөрст биднийг гэсэн Бурханы хайр биднээс хол байгаа мэт санагдаж болох хэдий ч энэ нь үргэлж бидэнтэй оршдог талаар ярьсан юм. Тэрээр ариун сүмд орох зэрэг Бурханы хайрыг улам ихээр мэдэрч болох арга замуудыг зөвлөсөн.

"Их Эзэний өргөө бол бидний хамгийн эрхэм нандин гэрээнүүдийн гэр бөгөөд бидний аюулгүй байж Эцэгийнхээ хайрын нотолгоонд умбах газар юм." —Ахлагч Карл Д.Хөрст

Христийг дагах нь—Ерөнхийлөгч Даллин Х.Өүкс

Ерөнхийлөгч Даллин Х.Өүкс бидэнд Христийг дагахыг уриалав. Тэрээр Бурханы зарлигуудыг дагах болон гэрээнүүдээ сахих талаар заахдаа цаасан шувуу нисгэх зүйрлэлийг ашигласан.

"Хэрэв бид утсыг таствал цаасан шувуу илүү өндөрт хөөрөхгүй төдийгүй салхинд туугдан хийсэж, газарт гарцаагүй унах болно. Энэ чухал утас бол бидний Тэнгэрлэг Эцэг Бурхан, Түүний Хүү Есүс Христ хоёрыг бидэнтэй холбож байдаг гэрээнүүдийг төлөөлдөг. Бид Тэдний зарлигуудыг дагаж, гэтэлгэлийн төлөвлөгөөг сахих үед Тэдний амласан адислалууд бидэнд селестиел өндөрлөг өөд хөөрөх боломжийг олгодог." —Ерөнхийлөгч Даллин Х.Өүкс

Есүс Христэд бэхлэгдэн холбогдох нь: Дэлхийн давс болох—Хосэ А.Тэйшэйра

Ерөнхий эрх мэдэлтэн Далын ахлагч Хосэ А.Тэйшэйра Есүс Христэд итгэх итгэлийг давстай зүйрлэн, биднийг ариун сүмийн шүтлэг бишрэлээр дамжуулан мөн бусдыг сайн мэдээний дагуу амьдрахад хүчирхэгжүүлж, Сүмд үйлчлэн, цахим харилцааг эергээр ашиглах замаар итгэлээ бэхжүүлэхэд уриалсан билээ.

"Өсвөр үеийнхэн маань гайхалтай эр зориг, хичээл зүтгэлийг харуулж байна. Тэд гэр бүлийн түүхийн ажилд ач холбогдол өгч, Их Эзэний өргөөнд ойр ойрхон ордог ба энэ нь тэдний хичээл зүтгэлийг батлан харуулж байдаг." —Ахлагч Хосэ А.Тэйшэйра

"Ариун сүм бидэнд урьд урьдынхаас илүү ойртож байгаа энэ цаг үед Их Эзэний өргөөнд тогтмол шүтэн бишрэхийг эн тэргүүнд тавих нь хамгийн чухал зүйлүүдэд анхаарлаа чиглүүлж, амьдралаа Христ дээр төвлөрүүлэхэд бидэнд туслах болно." —Ахлагч Хосэ А.Тэйшэйра

"Ариун сүмд бид Есүс Христэд итгэх итгэлийнхээ зүрхийг, Түүнд бүхнээ зориулах бодгалийг олдог." —Ахлагч Хосэ А.Тэйшэйра

Өөрсдийн хүслийг Түүнийхтэй нийцүүлэх нь—Ахлагч Үлиссэс Соарэс

Ахлагч Үлиссэс Соарэс хамгийн үнэт сувд бол тэнгэрийн хаант улс гэдгийг, мөн бид Их Эзэний хүслийг дагаж, гэрээнүүддээ үнэнч үлдвэл үүнийг олж авч чадна гэдгийг гэрчлэв.

"Бид байгуулсан гэрээ бүрдээ үнэнч байж, 'Бурханы амнаас гарах үг бүрээр' амьдрахыг хичээвэл хамгийн үнэтэй сувдаас биднийг холдуулан хөтлөх алдаатай гүн ухааны ойлголт, хуурамч сургаал гэх зэрэг дэлхийн нүгэл, гажуудлын эсрэг дархлаатай байх болно." —Ахлагч Үлиссэс Соарэс

Өдөр тутмын амьдралдаа ариунаас ариуныг Их Эзэнд өргө—Ахлагч Гэррит В.Гонг

Ахлагч Гэррит В.Гонг өдөр тутмын амьдралдаа ариунаас ариуныг Их Эзэнд өргөхийг сонгосноор адислалуудыг хүлээн авсан дэлхий даяарх Сүмийн гишүүдийн түүхийг хуваалцлаа.

"Нэгэн эгч нөхөр нь өөрт нь болон үр хүүхдүүддээ үнэнч бусаа харуулсан ч өдөр бүр чадлаараа хичээдэг. Би түүнийг болон түүнтэй адил хүмүүсийг гүнээ хүндэлдэг. Нэг өдөр түүнийг угаасан хувцсаа эвхэж байхдаа хураасан гармэнт дээрээ гараа тавин, 'Ингэх нь ямар хэрэгтэй юм бэ?' гээд санаа алдахад нь нэгэн эелдэг дуу хоолой 'Чи надтай гэрээ байгуулсан шүү дээ' гэж түүнийг тайтгаруулахыг мэдэрчээ." —Ахлагч Гэррит В.Гонг

Эндээс ариун сүмийн ариун нандин өмсгөлийн тухай илүү ихийг мэдэж аван түгээмэл асуудаг асуултуудын хариултыг олж аваарай.

Ахлагч Гонг ээжийгээ нас барсны дараа аавтайгаа илүү ойр дотно болохыг хичээсэн нэгэн залуу эмэгтэйн тухай түүхийг ярьсан. Тэр долоо хоног бүр аавтайгаа хамт ариун сүмд орох сүнслэг өдөөлтийг хүлээн авчээ. Залуу эмэгтэй ийн хэлсэн нь,
"Их Эзэний өргөөнд цагийг хамтдаа өнгөрүүлсэн маань биднийг эдгээж билээ. Ээж минь амьдадаа бидэнд тусалж чадаагүй ч хөшигний нөгөө талд очоод гомдсон сэтгэлийг эдгээхэд тусалсан юм. Харин ариун сүм нь бүрэн бүтэн байдлаараа мөнхийн гэр бүл болох бидний аян замын маань сүүлийн алхам байв." —Ахлагч Гэррит В.Гонг

Үхлийн дараах амьдралын тухай илүү ихийг эндээс мэдэж аваарай.

"Өдөр тутмын амьдралдаа ариунаас ариуныг Их Эзэнд өргөхөд Их Эзэний ариун өргөөнд байнга орох явдал багтдаг.” —Ахлагч Гэррит В.Гонг

"Манай ариун сүмүүд долоон үгээр бусдыг урьж, 'Ариунаас ариуныг Их Эзэнд. Их Эзэний өргөө' хэмээн тунхагладаг." —Ахлагч Гэррит В.Гонг

Бидний гэтэлгэлийн баяр баясгалан—Кристин М.Еий эгч

Халамжийн нийгэмлэгийн ерөнхий ерөнхийлөгчийн зөвлөлийн хоёрдугаар зөвлөх Кристин М.Еий эгч гэтэлгэл болон Бурханы бидэнтэй бий болгосон гэрээт харилцаатай холбоотой хэд хэдэн зүйлийн талаар гэрчлэв.

"Есүс Христийн гэтэлгэгч хүч бол бидний гэрээний хамгийн агуу амлагдсан адислалуудын нэг юм. Ариун нандин ёслолуудад оролцохдоо үүнийг тунгаагаарай. Үүнгүйгээр бид Тэнгэр дэх Эцэгийнхээ болон хайртай хүмүүсийнхээ дэргэд гэртээ буцаж очиж чадахгүй." —Кристин М.Еий эгч

"Өдийд ялан дийлчихсэн байх ёстой гэж бодож байгаа асуудалтайгаа тэмцэлдсээр байгаа бол битгий бууж өгөөрэй. Өөртөө тэвчээртэй хандаж, гэрээнүүдээ сахин, үе үе наманчилж, шаардлагатай бол удирдагчдаасаа тусламж эрэлхийлж, чадахынхаа хэрээр Их Эзэний өргөө рүү тогтмол оч. Түүний танд өгөх өдөөлтүүдийг сонсож, анхааран дага. Тэр тантай байгуулсан гэрээт харилцаагаа таслахгүй." —Кристин М.Еий эгч

Иеховатай ярьсан тэр нэгэн—Ахлагч Кайл С.Маккэй

Ерөнхий эрх мэдэлтэн Далын ахлагч Кайл С.Маккэй Иосеф Смитээр дамжуулан Есүс Христээр сэргээгдсэн сайн мэдээний бүрэн байдлыг мөн ариун сүмийн ёслолуудыг гэрчилжээ.

"Христ үргэлж Өөрийн хүмүүст ариун сүм барих зарлигийг өгдөг ба тэнд Тэрээр Өөрийгөө үзүүлж, тэнгэрийн хүчээр тэдэнд хишиг хүртээдэг." —Ахлагч Кайл С.Маккэй

Их Эзэний наманчлалын бэлгийг хүлээн ав—Ахлагч Хорхэ М.Алварадо

Ерөнхий эрх мэдэлтэн Далын ахлагч Хорхэ М.Алварадо Христийн Агуу Эдгээгч үүргийн талаар заав. Их Эзэний өргөө бидэнд наманчлалыг заадаг Христийн сургаалаар дамжуулан хувийн цэвэр ариун байдлаа өсгөн нэмэгдүүлэхэд сүнслэгээр нөлөөлдөг.

"Тэнгэрлэг Эцэг, Түүний Хүүгийн ариун сүмийн гэрээнүүдээр дамжуулан боломжтой болгосон адислалуудын бүрэн байдлыг хүртэх зохистой, цэвэр ариун байх нь юутай сайхан зөв шударга хүсэл вэ!" —Ахлагч Хорхэ М.Алварадо

"Биднийг Есүс Христэд ирэх үед чин сэтгэлийн наманчлалын зам маань эцэстээ Аврагчийн ариун сүм рүү хөтөлнө." —Ахлагч Хорхэ М.Алварадо

"Их Эзэний өргөөнд тогтмол үйлчилж, тэнд байгуулсан ариун гэрээнүүдээ сахихыг хичээх нь Аврагчтай илүү адилхан болоход шаардлагатай зүрх сэтгэл, хүч чадал, оюун ухаан, бодгалийн өөрчлөлтийг мэдрэх бидний хүсэл, чадварыг нэмэгдүүлнэ." —Ахлагч Хорхэ М.Алварадо

"Их Эзэний өргөө, Түүний ариун судрууд, Түүний ариун бошиглогч, төлөөлөгчид биднийг Христийн сургаалаар дамжуулан хувийн ариуслыг эрэлхийлэхэд нөлөөлдөг." —Ахлагч Хорхэ М.Алварадо

"Би байгаа юм"—Ерөнхийлөгч Жэффри Р.Холланд

Ерөнхийлөгч Жэффри Р.Холланд Есүс Христийн бурханлаг энэрлийн талаар тайлбарлав. Тэрээр мөн Их Эзэний өргөөнд хүлээн авдаг адислалуудын тухай ярьсан юм.

"Итгэл, наманчлал, баптисм, Ариун Сүнсний бэлэг, Их Эзэний өргөөнд хүлээн авах адислалуудыг бусдад заахад эдгээр суурь 'зарчмууд болон ёслолууд' нь эцсийн дүндээ бидний Бурханаа болон хөршөө хайрлах хайрыг илэрхийлж мөн Христийн үнэн Сүмийг баяртайгаар тодорхойлдог." —Ерөнхийлөгч Жэффри Р.Холланд

Сүнслэг асуултуудад хариулт эрэлхийлэх нь—Трэйси Ю.Браунинг эгч

Хүүхдийн хэсгийн ерөнхий ерөнхийлөгчийн зөвлөлийн хоёрдугаар зөвлөх Трэйси Ю.Браунинг эгч Бурханаас сайн мэдээний талаарх чин сэтгэлийн асуултуудыг асуух хүчийг гэрчлэв. Их Эзэний өргөө бол бид чин сэтгэлийн асуултууддаа хариултыг олж болох ариун газар юм.

"[Бурхан Эцэг болон Түүний Хүү] биднээс Их Эзэний өргөөнд тогтмол шүтэн биширч, 'тэнгэрээс мэдээлэл авахаар' өвдөг сөгдөн залбирахыг чин сэтгэлээсээ хүсдэг." —Трэйси Ю.Браунинг эгч

Мөнх бус байдал үнэхээр үр дүнтэй!—Ахлагч Брүк П.Хэйлс

Ерөнхий эрх мэдэлтэн Далын ахлагч Брүк П.Хэйлсийн хэлсэн үг мөнх бус байдалд тулгарах сорилт бэрхшээлүүдээс үл хамааран бид Их Эзэнд найдаж болно гэсэн баталгааг өгсөн.

"Бид сайн мэдээний ёслолуудыг хүлээн авч, Бурхантай гэрээнд нэгдэж, дараа нь эдгээр гэрээгээ сахиж, наманчилж, бусдад үйлчилж мөн эцсээ хүртэл тэвчсэнээр мөнх бус байдал үнэхээр үр дүнтэй гэдэг дээр Их Эзэнд итгэх бүрэн итгэл найдвар, баталгааг олж авах болно гэдгийг би гэрчилж байна." —Ахлагч Брүк П.Хэйлс

Түүнийг бүх зүрх сэтгэлээрээ хай—Бишоп Л.Тодд Баж

Тэргүүлэх бишопын зөвлөлийн хоёрдугаар зөвлөх, бишоп Л.Тодд Баж хүндэтгэлийн өдөр шүтэн бишрэх, ариун сүмд орох, залбирах, судраас суралцах зэргээр Христэд илүү ойр ойрхон хандвал гэрээгээ бэхжүүлж чадна хэмээн гэрчилжээ.

"Есүс Христийн сайн мэдээ бидэнд Түүн рүү эргэн очих боломжуудыг олгодог. Эдгээр боломж нь өдөр бүр залбирах, судар судлах болон ариун ёслол, хүндэтгэлийн өдөр, ариун сүмд шүтэн бишрэх зэрэг юм."—Бишоп Л.Тодд Баж

"Ариун сүмд шүтэн бишрэх үедээ бид анхаарлаа төвлөрүүлэхийн тулд илүү сахилга баттай чармайлт гаргавал эсвэл селестиел өрөөнд чимээгүйхэн эргэцүүлэн арай удаан суувал яах вэ? Бидний анхаарал хийх дээр бага төвлөрч, харин Тэнгэрлэг Эцэгтэй болон Есүс Христтэй холбогдсон гэрээт холбоогоо бэхжүүлэхэд илүү төвлөрвөл эдгээр ариун нандин мөч бүхэн баялаг болж, бид хувийн амьдралдаа хэрэгтэй удирдамжийг хүлээн авах болно гэдгийг би гэрчилж байна."—Бишоп Л.Тодд Баж

Хэзээ ч мартагдахгүй өдрүүд—Ахлагч Гари Э.Стивэнсон

Ахлагч Гари Э.Стивэнсон хэлсэн үгэндээ ирэх 10 жилд Есүс Христийн сайн мэдээний баяр баяслыг хуваалцах урьд хожид байгаагүй боломжууд тохиох талаар дүрслэв.

"Дараагийн 10 жилийн турш урьд хожид байгаагүй олон тооны ариун сүмийн нээлттэй хаалганы өдөрлөг болох, онцгойлон адислах ёслол хийгдэхээр төлөвлөгдөж байгаа. . . . Тэр өдрүүд нь хэзээ ч мартагдах аргагүй байх болно." —Ахлагч Гари Э.Стивэнсон

"Дэлхийг тойрон ариун сүмүүдээр зочлох үеэрээ өсвөр үеийнхэн олноороо баптисмын усан сангийн дэргэд зогсон хүлээж байгааг мөн ёслолын ажилтнаар үйлчилж буй залуучуудын тоо нэмэгдсэнийг харахад надад ер бусын сайхан мэдрэмж төрдөг." —Ахлагч Гари Э.Стивэнсон

"Би өсөж буй үеийнхэн та нартаа хандан . . . гэр бүлийн түүхээ хөтлөх ажилд оролцон, ариун сүмд цагийг өнгөрүүлэхийн зэрэгцээ өөрсдийн адил зохистой хамтрагчтай ариун сүмд гэрлэж чадахуйц эрэгтэй, эмэгтэй болоход өөрсдийгөө сайтар бэлдэхийг аминчлан захиж байна." —Ахлагч Гари Э.Стивэнсон

"Яг одоо ариун сүмийг амьдралынхаа салшгүй нэгэн хэсэг болгох загварыг амьдралдаа хэвшүүл." —Ахлагч Гари Э.Стивэнсон

Ай, ууган хүүгийн эрхтэй эрхэм өсвөр үеийнхэн минь—Брэдли Р.Вилкокс ах

Залуу эрэгтэйчүүдийн ерөнхий ерөнхийлөгчийн зөвлөлийн нэгдүгээр зөвлөх Брэдли Р.Вилкокс ах Бурханы гэрээт хүүхдүүдэд, ялангуяа өсвөр үеийнхэнд хандан үг хэлэхдээ Аврагч бидэнд Өөрийнх нь ажлыг хийх итгэл хүлээлгэдэг бөгөөд бид дэлхийг өөрчилж, Түүний бүх хүүхдийг гэрт нь авчрахад туслахын тулд төрсөн гэдгийг тунхаглав.

"Та нар гэрээ байгуулж, сахих сонголт хийсэн учир Тэр та нарт итгэж найддаг. Тэрээр та нарыг өөр, өвөрмөц, бусдаас ялгагдахаар хүмүүс байна гэдэгт итгэж найддаг. Учир нь та нараар хийлгэх чухал ажил Түүнд бий." —Брэдли Р.Вилкокс ах

"Бодоод үз дээ! — Бурхан дэлхий дээрх бүх хүний дундаас гэрээний хүүхдүүд, багийнх нь гишүүд болох та нарт бүх хүүхдийг нь гэрт нь аюулгүй эргүүлэн авчрах ажилд тусална хэмээн итгэн найддаг." —Брэдли Р.Вилкокс ах

"Та Есүс Христтэй мөр зэрэгцэн хөдөлмөрлөдөг. Шинэ гэрээ бүрээр, Түүнтэй харилцах харилцаа тань гүнзгийрэхийн хэрээр та хоёр гар гараасаа бат атгалцсаар эцэст нь салшгүй бат барилдлагатай болох болно." —Брэдли Р.Вилкокс ах

"Та нарын Бурхан, Есүс Христ хоёртой байгуулсан гэрээт харилцаа бол хайр, итгэл найдварын харилцаа бөгөөд үүгээр та Тэдний ач ивээл, тэнгэрлэг тусламж, хүч чадлын хишиг, боломж олгогч хүчийг илүү ихээр хүртэх боломжтой." —Брэдли Р.Вилкокс ах

Үндсийг нь торд, тэгвэл мөчрүүд нь ургах болно—Ахлагч Дийтр Ф.Угдорф

Бид Аврагчийг Түүний ёслолуудаас олох болно гэсэн Ахлагч Дийтр Ф.Угдорфын энэхүү сануулгад бид дуртай.

"Хэрэв та Сүмийн цуглаан дээр эсвэл ариун сүмд илүү утга учиртай туршлага олж авахыг эрэлхийлж байгаа бол тэнд бидний хүлээн авдаг ариун нандин ёслолуудаас Аврагчийг хайхыг хичээ. Их Эзэнийг Түүний ариун өргөөнөөс ол." —Ахлагч Дийтр Ф.Угдорф

“Болгоогтун би бол та нарын өргөх тэрхүү гэрэл билээ” —Ахлагч Роналд А.Расбанд

Ахлагч Роналд А.Расбанд Ютагийн Мантай ариун сүмийг дахин онцгойлон адислах үйл ажиллагааны үеэр ерөнхийлөгч Рассэлл М.Нэлсонтэй өнгөрүүлсэн туршлагаасаа хуваалцжээ. Тэрээр хэлсэн үгэндээ өнгөрсөн хэдэн жилийн хугацаанд ерөнхийлөгч Нэлсоны ариун сүмийн тухай заасан сургаалаас эш татсан юм. Ахлагч Расбандын эш татсан бидний дуртай Ерөнхийлөгч Нэлсоны зарим эшлэлийг доор дурдав.

2020

“Эдгээр ариун сүмийн барилгын ажил таны амьдралыг өөрчлөхгүй байж болох ч ариун сүмийн үйлчлэл өөрчлөх нь гарцаагүй" —Ерөнхийлөгч Рассэлл М.Нэлсон ("Сүмийн ирээдүй: Аврагчийн Хоёр дахь ирэлтэд дэлхийг бэлтгэх нь," Лиахона)

2021

"Ариун сүмийн амин зүрх бол Аврагч ба Түүний сургаал юм. Сүнс болон удирдамжаар дамжуулан ариун сүмд заагддаг бүх зүйл Есүс Христийн талаарх бидний ойлголтыг тэлдэг. Түүний амин чухал ёслолууд ариун нандин санваарын гэрээгээр дамжуулан биднийг Түүнтэй холбодог. Улмаар биднийг гэрээгээ сахих үед Тэрээр Өөрийн эдгээгч, хүчирхэгжүүлэгч хүчийг бидэнд хүртээдэг." —Ерөнхийлөгч Рассэлл М.Нэлсон (2021 оны 10-р сарын Ерөнхий чуулган)

Санваарын талаар илүү ихийг эндээс мэдэж аваарай.

"Өнөөдөр биднийг хүрээлэх тэнгэр элч нар бидэнд байна. Ерөнхийлөгч Нэлсон: '[Ариун сүмд] тэнгэр, газар хоёрын хооронд татсан хөшгийг хэрхэн нээхийг, Бурханы тэнгэр элч нараас тан руу ирэхийг хэрхэн гуйхыг … та сурах болно” гэж хэлсэн.' —Ахлагч Роналд А.Расбанд ба ерөнхийлөгч Рассэлл М. Нэлсон (2021 оны 10-р сарын ерөнхий чуулган)

2024

"Ариун сүмд шүтэн биширдэг бүхэн Бурханы сүр хүчтэйгээр урагш одож, мөн тэнгэр элч нар ‘тэдний дээр захирч байдаг.’ Хишиг хүртсэн эрэгтэй, эмэгтэй хүмүүсийн хувьд Бурханы хүчээр зэвсэглэж, амьдралын шуургыг ганцаараа туулахгүй гэдгээ мэдэх нь та нарын өөртөө итгэх итгэлийг хэр их нэмэх вэ? Тэнгэрлэг элч нар танд үнэхээр тусална гэдгийг мэдэх нь танд хэр их урам зориг өгөх вэ? " —Ерөнхийлөгч Рассэлл М.Нэлсон (2024 оны 4-р сарын Ерөнхий чуулган)

"[Ютагийн Мантай ариун сүмийг] дахин онцгойлон адислах залбиралдаа ерөнхийлөгч Нэлсон Их Эзэнээс Түүний ариун өргөө нь энэ ариун сүмд орсон бүгдийг онцгойлон өргөж, 'тэд ариун нандин адислалуудыг хүлээн авч, гэрээнүүддээ зохистой мөн итгэлтэй хэвээр үлдэж … эдгээр хаалгаар зохистой орж ирэх бүгдэд энэ нь амар тайвны өргөө, тайтгарлын өргөө, мөн хувийн илчлэлтийн өргөө байх болтугай' хэмээн гуйсан." —Ахлагч Роналд А.Расбанд ба ерөнхийлөгч Рассэлл М.Нэлсон (Мантай ариун сүмийг онцгойлон адислах залбирал)

"Бид Их Эзэнийг хүндлэн бишрэхийн тулд ариун сүмүүдийг барьдаг. Тэдгээрийг үзүүлж харуулахын тулд бус, харин шүтэн бишрэхэд зориулж барьдаг. Бид эдгээр ариун нандин хананы дотор мөнхийн ач холбогдолтой нандин гэрээнүүдийг байгуулдаг." —Ерөнхийлөгч Рассэлл М.Нэлсон (Мантай ариун сүмийг дахин онцгойлон адисалсан нь)

"Их Эзэн Есүс Христ эргэн ирнэ"—Ерөнхийлөгч Рассэлл М.Нэлсон

Есүс Христийн Хожмын Үеийн Гэгээнтнүүдийн Сүмийн ерөнхийлөгч Рассэлл М.Нэлсон 2024 оны 10-р сарын чуулган дээр хэлсэн үгийнхээ эхэнд 17 шинэ ариун сүмийг зарлаж, чин сэтгэлээсээ эрэлхийлэгч хүн бүр Христийг ариун сүмд олох болно хэмээн амлав.

Шинээр баригдах 17 ариун сүм

Ерөнхийлөгч Нэлсон хэлсэн үгэндээ эдгээр 17 шинэ ариун сүмийг зарлав:

• Мексикийн Жүчитан дэ Зарагоза 
• Эль Сальвадорын Санта Ана 
• Колумбийн Мэдэллин 
• Доминиканы Сантиаго 
• Чилийн Пүэрто Монтт 
• Ирландын Даблин 
• Италийн Милан 
• Нигерийн Абужа 
• Угандагийн Кампала 
• Мозамбикийн Мапуто 
• Айдахогийн Коэр Далийн 
• Аризонагийн Квийн Крийк 
• Тэксасын Эл Пасо 
• Алабамагийн Хантсвилл 
• Висконсиний Милвоки 
• Ниү Жэрсигийн Саммит  
• Ютагийн Прайс 

Ерөнхийлөгч Нэлсон ариун сүмийн эдгээр шинэ байршлыг зарламагцаа ийн мэдэгдсэн юм.
"Хайрт ах, эгч нар аа, бидний мэлмийн өмнө юу өрнөж байгааг та нар харж байна уу? Энэ цаг мөчийн сүр жавхланг бид олж харахын төлөө би залбирч байна! Их Эзэн үнэхээр Өөрийн ажлыг яаравчлуулж байна." —Ерөнхийлөгч Рассэлл М.Нэлсон

Бошиглогчийн ариун сүмийн талаар өгсөн захиаснууд

Ерөнхийлөгч Нэлсоны хэлсэн үг бидний амьдралд зориулсан удирдамж, амлалтуудаар дүүрэн байлаа. Бид энэ нийтлэлд ариун сүм болон гэрээнүүдийн тухай бүх эшлэлийг оруулах боломжгүй тул илүү их сүнслэг удирдамж авахын тулд уг хэлсэн үгийг бүтнээр нь уншихад уриалж байна.

"Бид яагаад ариун сүмүүдийг урьд өмнө байгаагүй хурдацтайгаар барьж байна вэ? Яагаад? Учир нь Их Эзэн бидэнд ийн үйлдэхийг зааварласан. Ариун сүмийн адислалууд хөшигний хоёр талд Израилыг цуглуулахад тусалдаг. Эдгээр адислал нь мөн Их Эзэний Хоёр дахь ирэлтэд дэлхийг бэлтгэхэд туслах хүмүүсийг бэлдэхэд тусалдаг!" —Ерөнхийлөгч Рассэлл М.Нэлсон

"Ариун сүмд байнга шүтэн бишрэх нь бидэнд тусална." —Ерөнхийлөгч Рассэлл М.Нэлсон

"Их Эзэний өргөөнд бид Есүс Христэд төвлөрдөг. Бид Түүнээс суралцаж, Түүнтэй гэрээ байгуулж, Түүнийг таньж мэддэг." —Ерөнхийлөгч Рассэлл М.Нэлсон

"Бид ариун сүмийн гэрээгээ сахиснаар Их Эзэний хүчирхэгжүүлэгч хүчийг илүү их хүлээн авдаг." —Ерөнхийлөгч Рассэлл М.Нэлсон

"Ариун сүмд бид дэлхийн тамлалаас хамгаалалт хүлээн авч, Есүс Христийн болон Тэнгэрлэг Эцэгийнхээ цэвэр хайрыг үлэмж ихээр хүртэж, дэлхий үймээн самуунтай байхад амар амгалан, сүнслэг баталгааг мэдэрнэ." —Ерөнхийлөгч Рассэлл М.Нэлсон

"Би та нарт дараах зүйлсийг амлая. Есүс Христийг чин сэтгэлээсээ эрэлхийлэх хүн бүр Түүнийг ариун сүмд олох болно. Та нар Түүний хайрыг мэдэрч, сэтгэлийг тань хамгийн их шаналгаж байгаа асуултууддаа хариулт авч, Түүний сайн мэдээний баяр баясгаланг илүү сайн ойлгох болно." —Ерөнхийлөгч Рассэлл М.Нэлсон

"Хэрэв та Есүс Христийг дагах гэрээ байгуулж, гэрээгээ сахих юм бол амьдралын тань зовлон зүдгүүр зуурдынх гэдгийг олж мэдэх болно. Зовлон зүдгүүр тань 'Христийн баясалд автагдана.'" —Ерөнхийлөгч Рассэлл М.Нэлсон

Ариун сүмд шүтэн бишрэх нь

Ариун сүмд орох цаг товлох эсвэл тантай хамгийн ойр байрлах ариун сүмийн талаарх мэдээллийг авахыг хүсвэл доорх холбоосоор орно уу:

Ариун сүмд орохоор бэлтгэх нь

Бишоп зэрэг орон нутгийн удирдагчид танд Их Эзэний өргөөнд шүтэн бишрэх зөвшөөрлийн бичиг авахад туслах болно. Ариун сүмийн шүтлэг бишрэлээ илүү хувийн шинжтэй, утга учиртай болгох тухай энэхүү нийтлэлийг уншина уу.

Гэр бүлийн нэрийн туслах нэртэй шинэ хэрэгсэл нь удирдагч болон зөвлөхүүдэд шинэ болон эргэн ирж байгаа гишүүдэд, мөн өсвөр үеийнхэнд ариун сүмд анх удаа орохдоо зориулж гэр бүлийн нэрсийн картыг бэлдэж, хэвлэхэд нь туслах нэгэн сайхан аргыг санал болгож байна. Гэр бүлийн нэрийн туслахын талаар дэлгэрэнгүй мэдээллийг эндээс авна уу.

Гэр бүлийн нэрсийг бэлтгэж, олох талаар өөр тусламж авахыг хүсвэл доорх холбоос дээр дарна уу.

• Өвөг дээдсийнхээ нэрийг ариун сүмд хэрхэн авч очих тухай мэдэж авах
  

Нийтлэл дэх эшлэлүүдийг татан авч, хуваалцах нь

Энэхүү нийтлэл дэх эшлэлүүдийг чөлөөтэй хуулж аван хуваалцах боломжтой.

Суурин компьютер дээр эшлэлийн зургуудыг татан авч, хуваалцахын тулд сонгосон зураг дээрээ дараад, баруун товчийг дарах (Windows ашигладаг бол) эсвэл зураг дээр дарангаа Control дээр (Mac ашигладаг бол) дарвал Хадгалах болон Татаж авах сонголтууд гарч ирнэ. Та зургийг хадгалсныхаа дараа дуртай олон нийтийн мэдээллийн сайт руугаа оруулж эсвэл найздаа илгээж болно.

Зургийг мобайл төхөөрөмж дээр хуваалцах эсвэл хадгалахын тулд зураг дээр дарж нээгээд сонголтын цэс гарч ирэх хүртэл хуруугаараа дээр нь удаан дарснаар та зургийг татаж авах эсвэл хуваалцах боломжтой болно.

Нэмж хэлэхэд, та дараах товчийг ашиглан бүх эшлэлийг zip хавтсанд нэг дор татаж авах боломжтой.

Есүс Христийн Хожмын Үеийн Гэгээнтнүүдийн Сүмийн 2024 оны 10-р сарын Ерөнхий чуулганы бүрэн видео, аудио болон бичвэрийг олж авахын тулд ChurchofJesusChrist.org хаягаар зочилно уу.