Ургийн модны алдаатай нэгтгэлүүдийг хэрхэн засах вэ?

Та FamilySearch Ургийн мод дээр санамсаргүйгээр хоёр профайлыг нэгтгэчхээд дараа нь нэгтгэх ёсгүй байсан гэдгийг олж мэдэж байсан уу? Эсвэл нэгэн хүсэл эрмэлзэл дүүрэн хамаатан садан тань баахан нэгтгэл хийтэл та буруу хийсэн нэгтгэлүүдийг засах болсон уу?

Энэ нийтлэлээс та алдаатай нэгтгэлийг хэрхэн засах, алдааг залруулах, Нэгтгэлийг дүгнэх хэрэгслийг хэрхэн ашиглах талаар суралцаж болно.

Нэгтгэл буруу байх шинж тэмдгүүд

Та Ургийн мод дээр ажиллаж байхдаа үл нийцэл эсвэл алдаа бүхий профайлуудыг харвал энэ нь алдаатай нэгтгэлээс үүдсэн байж болох юм. Анхаарал тавих зүйлсийн жишээнүүдийг доор харуулав:

• Хүн нас барсан эсвэл салсан гэх баримтгүйгээр нэгэн зэрэг олон эхнэртэй гэрлэсэн байна. 

• Хүн бараг боломжгүй тооны хүүхэдтэй (20 ба түүнээс дээш) байна. 

• Хүүхдийн төрсөн огноо утгагүй байна. Жишээ нь: хүүхэд эхийн хүүхэд тээх боломжтой наснаас өмнө эсвэл эцэг нь нас барснаас хойш 9 сараас илүү хугацааны дараа төрсөн байна.  

• Хүүхдийн төрсөн газар утгагүй байна. Жишээлбэл: хүн амын тооллогын бүртгэл дээр тухайн гэр бүл үргэлж нэг газар амьдарч байсан ч хэд хэдэн хүүхэд өөр газар төрсөн гэж дурдсан. 

• Хүүхдүүд 7 сараас бага зайтай төрсөн эсвэл хүүхдүүдийн хооронд насны зөрүү их байна. 

• Хүүхэд нь тухайн үед амьдарч байсан ах, эгчтэйгээ адилхан нэртэй байна. 

• Амьдралын үйл явдлууд утгагүй байна. Жишээлбэл: хүүхэд төрөхөөсөө өмнө нэрийн адислал хүртсэн эсвэл 2 настайдаа гэрлэсэн гэх мэт. 

• Тухайн хүний эх сурвалж зөрчилдөж байна. Жишээ нь: нэг жилд хоёр өөр хүн амын тооллого болсон, эсвэл өөр өөр жилүүдэд оршуулсан хэмээн хоёр эх сурвалж дээр дурдсан гэх мэт. 

• Амьдралын үйл явдлуудын он сар өдөр нь өөр эх сурвалжуудад ялгаатай дурдагдсан байх. Жишээ нь: хүнд хавсаргасан бүртгэлийн хагаст төрсөн оныг нь 1860, нөгөө хагаст төрсөн оныг 1850 гэж бичсэн байна. 

• Гэр бүлийн гишүүд болон тэдний хоорондын харилцаа өөр эх сурвалжууд дээр өөр өөрөөр бичигдэх. 

Олон асуудал харагдах тусам буруу нэгтгэсэн байх магадлал нэмэгддэг.

Яагаад буруу нэгтгэлийг засах хэрэгтэй вэ?

Урийн мод нь дундын мод учраас буруу нэгтгэх нь зөвхөн хийсэн хүнд нөлөөлөхгүй. Алдаатай нэгтгэх нь бүх хэрэглэгчид нөлөөлж, давхар асуудал үүсгэж болно.

• Буруу нэгтгэл нь буруу холбоо хамааралд хүргэж болно. Хүмүүс буруу эхнэр, нөхөр, эцэг эхтэй холбогдож, буруу удам руу хөтөлж болно. 

• Буруу нэгтгэлийн алдаа цаашид томорсоор байдаг. Буруу нэгтгэх нь ихэвчлэн профайлд үл нийцэл болон бусад алдааг үүсгэдэг. Эдгээр алдаа нь ихэвчлэн профайл дээрх хүний бодит байдлын талаар төөрөгдөлд хүргэж, цаашлаад уг хүн болон гэр бүлийн бусад гишүүд дээр буруу нэгтгэл нэмж хийхэд хүргэдэг.  

Буруу нэгтгэлийг засах нь одоо байгаа асуудлуудыг засаж, цаашдын асуудлуудаас зайлсхийхэд тусалдаг.

Жич: Гар утасны аппликэйшн дээр та нэгтгэснээсээ хойш ямар ч өөрчлөлт хийгээгүй тохиолдолд л нэгтгэснийг буцааж болно. Мөн Нэгтгэлийг дүгнэх хэрэгсэл гар утасны аппликэйшн дээр байхгүй гэдгийг анхаараарай. Ургийн мод дахь нэгтгэлийг хэрхэн буцаах вэ? хэсгийг үзээд гар утасны аппликэйшний алхмууд руу гүйлгэн оч.

Юунаас эхэлж шалгах вэ: Өөрчлөлтийн бүртгэл

Нэгтгэл буруу хийгдсэн эсэхийг шалгахдаа хамгийн түрүүлж үзэх зүйл бол өөрчлөлтийн бүртгэл юм. Өөрчлөлтийн бүртгэл дээр профайл үүсгэснээс хойших бүх өөрчлөлтийг, түүний дотор нэгтгэлийг харуулдаг.

Өөрчлөлтийн бүртгэлийг компьютер дээр харахын тулд өвөг дээдсийнхээ профайл руу орно. Доош гүйлгээрэй. Та дэлгэцийн баруун талд Хамгийн сүүлийн өөрчлөлтүүд хэсгийг олох болно. Бүгдийг харуулах дээр дар. Гар утасны аппликэйшн дээр өвөг дээдсийнхээ профайл руу орно. Баруун дээд булан дахь босоо 3 цэг дээр дараад Сүүлийн өөрчлөлтүүд дээр дарна.

Өөрчлөлтийн бүртгэлд орсны дараа шүүлтүүрийг ашиглаж зөвхөн нэгтгэлийг харж болно. (Энэ шүүлтүүрийн функц аппликэйшн дээр байхгүй.)

1. Хуудасны баруун дээд талд байгаа Шүүлтүүр товчийг дар. 
   
2. Нэгтгэл дээр дар. 

Нэгтгэлийг дүгнэх хэрэгслийг ашиглан нэгтгэсэн хоёр профайлыг харьцуулах

Өмнө нь өөрчлөлтийн бүртгэл дэх нэгтгэлийн тэмдэглэлүүд нь нэгтгэх явцад хийсэн өөрчлөлтүүдийн хураангуйг харуулдаг байсан. Энэ нь гэхдээ уншиж, ойлгоход амаргүй байсан байж болох юм. Одоо Нэгтгэлийг дүгнэх хэрэгсэл нь нэгтгэлийг хянаж, шаардлагатай бол засаж залруулахад хялбар болгож байна. Энэ хэрэгслийг ашиглан өөрчлөлтийн бүртгэл дээр буй 2016 оны 8-р сарын 1-нээс хойш хийгдсэн нэгтгэлүүдийг хянах боломжтой.

Нэгтгэлийн дүгнэлт дээр дарахад нэгтгэхээс өмнөх хоёр профайл зэрэгцэн харагдана, дараа нь авч үлдсэн профайл харагдана.

Ургийн мод дээрх Нэгтгэлийг дүгнэх хэрэгслийг ашиглах талаар илүү их тусламж авахыг хүсвэл тус болох дараах нийтлэлийг үзнэ үү:

Нэгтгэлийн дүгнэлт—Ургийн модон дахь нэгтгэлүүдийг нарийвчлан харах шинэ хэрэгсэл

-аар/ээр  Julene Elise Brown

October 10, 2024

FamilySearch has a new tool that we hope will improve your experience with merges in the collaborative FamilySearch Family Tree. As merging …

Дэлгэрэнгүй

Үнэхээр буруу нэгтгэсэн эсэхийг хэрхэн тодорхойлох вэ?

Та нэгтгэсэн профайлуудын мэдээллийг зэрэгцүүлэн хараад үнэхээр буруу нэгтгэсэн эсэхийг хэрхэн тодорхойлох вэ?

Нэгтгэсэн хоёр профайлын мэдээлэл илт ялгаатай байх үед нэгтгэлийг буруу хийснийг анзаарахад амархан. Гэхдээ хоёр профайлын хооронд маш бага ялгаа байвал энэ нь илүү хэцүү байж болно. Чухал мэдээлэл түүхэн бичиг баримтаар нотлогдсон эсэхийг үргэлж шалгаж бай.

Буруу нэгтгэсэн эсэхийг тодорхойлохдоо шалгах эсвэл анхаарах зүйлсийн жагсаалтыг доор харуулав:

• Энэ хоёр профайл төөрөгдөл үүсгэж болзошгүй нийтлэг овогтой юу? Буруу нэгтгэл нь нийтлэг овогтой байх үед ихэвчлэн тохиолддог. 

• Энэ хоёр профайл нь ижил эсвэл төстэй нэртэй ч амьдралын үйл явдлуудын огноо, газрууд нь эрс ялгаатай юу? Хэн нэгэн зөвхөн нэрсээс нь болоод хоёр профайлыг нэгтгэсэн байж болох ч амьдралын үйл явдлууд нь уг профайлууд өөр өөр хүмүүсийнх гэдгийг харуулдаг. Жишээ нь: “Анна Томпсон” нэртэй хоёр эмэгтэй нэг хотод амьдардаг “Жон Смит” нэртэй хүмүүстэй гэрлэсэн байж болно. 

• Зарим харилцаа утгагүй харагдаж байна уу? Жишээ нь: нэг профайл нэг эцэг эхтэй байхад нөгөө нь ондоо нэртэй эцэг эхтэй байна уу?  

• Төрсөн болон гэрлэсэн огноо, нас барсан огноо хоорондоо ойрхон байна уу? 
  
  • Түүхэн баримт хөтөлдөг хүмүүс мэдээллийг үргэлж бүрэн зөв тэмдэглэдэггүй байсан ч тухайн хүний амьдралын чухал он сар өдөр нь түүхийн баримтуудад ерөнхийдөө адил байх ёстой. Хэрвээ профайлуудын төрсөн огнооны зөрүү нь 5 жил дотор байвал эдгээр нь нэг хүн байж болно. Харин нэг хүн 1863 онд, нөгөө нь 1845 онд төрсөн бол энэхүү илт зөрүү нь хоёр профайл өөр өөр хүмүүсийнх байх ёстойг илтгэж болно. 
• Эх сурвалжуудын хооронд зөрчил байна уу? Жишээ нь: нэг профайл нь Канадын Квебек мужийн 1881 оны хүн амын тооллогын эх сурвалжтай, нөгөө профайл нь Канадын Онтарио мужийн 1881 оны хүн амын тооллогын эх сурвалжтай гэх мэт. 

Хэрэв та дээрх асуултуудын нэг эсвэл хэд хэдэд нь “тийм” гэж хариулсан бол нэгтгэл нь буруу байж болно. Судалгааны ур чадвараа ашиглан хайж байгаа хүний чухал огноо, газар, холбоо хамаарлыг батлах бүртгэлүүдийг хай.
Боломжтой бол зөвхөн индексжүүлсэн мэдээллийг бус харин жинхэнэ баримт бичгийн эх зургийг хар. Заримдаа түүхэн бичиг баримтын индексүүд нь бүрэн зөв биш, түүхийн гар бичмэлийг уншихад хэцүү байдаг. Индексжүүлсэн мэдээллийг зөв хуулбарласан эсэхийг шалгахын тулд эх зургийг харснаар нэр, огнооны зөрүүг олж мэдэх боломжтой.

Хэрэв та эх сурвалжид ороогүй тодруулах мэдээлэл олбол бусад хэрэглэгчид ирээдүйд буруу нэгтгэхээс зайлсхийхэд нь туслахын тулд тухайн хүний профайлын Хамтран ажиллах хуудас дээр тэмдэглэл оруулаарай.

FamilySearch Ургийн модон дээрх буруу нэгтгэлийг засах

Буруу нэгтгэлийг 2 аргаар засаж болно. Аль аргыг ашиглах нь нэгтгэснээс хойш профайлд өөрчлөлт хийсэн эсэхээс шалтгаална.

Нэгтгэснийг салгах

Хэрэв нэгтгэснээс хойш ямар ч өөрчлөлт хийгдээгүй бол хялбархан буцааж болно. Эдгээр алхмыг дагаарай:

1. Өөрчлөлтийн бүртгэл дээр засах гэж байгаа нэгтгэлийн Нэгтгэлийг дүгнэх дээр дарна. 
   
2. Нэгтгэлийг дүгнэх дэлгэцийн баруун дээд талд буй Нэгтгэлийг салгах дээр дарна. Жич: Хэрвээ танд нэгтгэснээс хойш ямар ч өөрчлөлт харагдахгүй байгаа ч Нэгтгэлийг салгах товчлуур байхгүй бол системд өөрчлөлт хийсэн байж болно. Тэгвэл Профайлыг сэргээх хэсэг дэх зааврыг дага. 
   
3. Энэ нэгтгэл буруу байх шалтгаан талбарт хоёр профайл яагаад нэг хүнийх биш болохыг товчхон тайлбарла. Жишээ нь: “Жон Сампсон ABCD-123 1852 онд Английн Линкөншөрт төрсөн. Эцэг эх нь Жон, Мэри Сампсон нар байв. Жоан Сампсон ZYXW-789 1858 онд Английн Йоркшөрт төржээ. Түүний эцэг эх Жэймс, Анн Симпсон нар байв. Тэд нэг хүн биш. 
   
4. Илгээх дээр дарна. Энэ үйлдэл нь нэгтгэсэн хоёр профайлыг тусгаарлаж, нэгтгэхээс өмнөх байдалд нь эргүүлэн аваачна. 
   

Нэгтгэх үйлдлээр устгагдсан профайлыг сэргээх

Хэрэв нэгтгэснээс хойш тухайн хүний профайлд өөрчлөлт орсон бол Нэгтгэлийг салгах сонголт боломжгүй. (Товчлуур саарал өнгөтэй бөгөөд дарах нь ямар ч үр дүнгүй.)

Үүний оронд та устгагдсан хүнийг сэргээх хэрэгтэй. Эдгээр алхмыг дагаарай:

1. Өөрчлөлтүүдийн бүртгэлээс устгасан хүний нэрийг олж дарна. Үүнийг өөрчлөлтүүдийн жагсаалтаас эсвэл Нэгтгэлийг дүгнэх дэлгэцэн дээр хийж болно. 
   
2. Гарч ирсэн хураангуй карт дээр Хүн дээр дар. 
   
3. Устгагдсан профайлын дээд хэсэгт харагдах хар зургийн баруун талд Хүнийг сэргээх дээр дарна. 
   
4. Энэ хүнийг сэргээх шалтгаан талбарт 2 профайл яагаад нэг хүнийх биш болохыг товчхон тайлбарла. Жишээ нь: “Анн Стирланд ABCD-123 болон Анн Стөрлэнд ZYXW-789 хоёр эгч дүү юм. Анн Стөрлэнд ABCD-123 1853 онд нас баржээ. Анн Стөрлэнд ZYXW-789 эгч нь нас барснаас хойш хоёр жилийн дараа 1855 онд төржээ.” 
   
5. Сэргээх дээр дар. 
   

Жич: Энэ үйл явц нь устгагдсан хүний профайлыг нэгтгэхийн өмнөх байдалд нь сэргээнэ; Харин нөгөө профайл дээр нэгтгэснээс хойш хийсэн бүх өөрчлөлт хадгалагддаг. Хэрэв эдгээр өөрчлөлтийн зарим нь алдаа мадагтайгаар хийгдсэн бол тус тусад нь засах хэрэгтэй.

Ирээдүйд буруу нэгтгэхээс сэргийлэх зөвлөгөө

Ирээдүйд профайлуудыг буруу нэгтгэх магадлалыг багасгахын тулд хоёр профайлыг хоёулыг нь хянаж үзээд аль болох үнэн зөв, бүрэн бүтэн болго. Энэ үйл явцад нэмэлт эх сурвалжуудыг хавсаргах, алдаа дутагдлыг засах, газрын нэр, огноог стандартын дагуу болгох, Хамтран ажиллах хуудаст тайлбар бичих зэрэг орно.

Хүн бүр алдаа гаргадаг, тиймээс 2 профайлыг санамсаргүй буруу нэгтгэсэн бол бүү санаа зов. Хэрэв танд ямар нэг асуудал гарсан бол одоо яаж шийдвэрлэхээ мэдэж авлаа!

Нэмэлт тусламж

FamilySearch Ургийн мод дээр нэгтгэх, салгах нь ярвигтай байж болно. Хэрэв та нэгтгэх асуудлаар тусламж авахыг хүсвэл мэдлэг туршлагатай хүмүүс танай орон нутгийн FamilySearch төвд үнэ төлбөргүй тусалж болно.