ប្រសិនបើអ្នកមានបុព្វការីជនជាជនជាតិចិន ជប៉ុន ឬកូរ៉េ អ្នកអាចរកឃើញកំហុសដែលមិនបានរំពឹងទុកនៅក្នុងកាលបរិច្ឆេទដែលបានចាត់តាំងទៅនឹងព្រឹត្តិការណ៍នានាក្នុងជីវិតដូនតារបស់អ្នក ។ នេះជាមូលហេតុ ៖
- ទិន្នន័យថ្មី និងបច្ចេកវិទ្យាដែលកាន់តែប្រសើរបង្ហាញពីកំណត់ត្រាស្ទួននៅក្នុងមែកធាងគ្រួសារ ។ កំណត់ត្រាស្ទួនសម្រាប់មនុស្សតែម្នាក់ ប៉ុន្តែអាចមានព័ត៌មានដែលបានប៉ាន់ស្មានខុសគ្នា ។
- ពេលដែលអាចធ្វើទៅបាន កម្មវិធីស្រាវជ្រាវក្រុមគ្រួសារព្យាយាមបញ្ចូលគ្នានូវកំណត់ត្រាព្រះវិហារបរិសុទ្ធដែលស្ទួនទៅជាកំណត់ត្រាតែមួយ ។ ដំណើរការនេះត្រូវបានហៅថាការដាក់បញ្ចូលគ្នា ។
- ប្រសិនបើកំណត់ត្រាស្ទួនមានកាលបរិច្ឆេទខុសគ្នាសម្រាប់ព្រឹត្តិការណ៍ជីវិតដូចគ្នា នោះកំណត់ត្រាដែលបញ្ចូលគ្នាថ្មីនៅក្នុងមែកធាងគ្រួសារបង្ហាញកាលបរិច្ឆេទណាដែលទើបនឹងបញ្ចូលថ្មីៗ ។ ពេលខ្លះឯកសារដាក់បញ្ចូលថ្មីបំផុតគឺខុស ។
- អ្នកប្រើប្រាស់ត្រូវបានអញ្ជើញឲ្យកែកំហុសនៅពេលដែលពួកគេជួបវា ។ សូមប្រាកដថា ត្រូវបញ្ចូលប្រភព ឬសេចក្តីថ្លែងការណ៍ដែលមានហេតុផលនៅពេលអ្នកធ្វើដូច្នោះ ។
ខាងក្រោមនេះពន្យល់លម្អិតកាន់តែច្រើន អំពីរបៀបដែលកំហុសទាំងនេះកើតឡើង និងរបៀបដ៏ល្អបំផុតដើម្បីដោះស្រាយបញ្ហាទាំងនោះ ។
ការពន្យល់កំហុសទាំងឡាយ
នៅកន្លែងណាដែលការចូលទៅកាន់ឯកសារប្រវត្តិសាស្ត្រមានកម្រិត ពេលខ្លះអ្នកប្រើប្រាស់កម្មវិធីស្រាវជ្រាវក្រុមគ្រួសារបានប៉ាន់ស្មានកាលបរិច្ឆេទនៃព្រឹត្តិការណ៍ជីវិតដ៏សំខាន់បំផុតរបស់បុព្វការីជនរបស់ពួកគេ ។ ជាប្រវត្តិសាស្ត្រ នេះគឺជាករណីសម្រាប់អ្នកប្រើប្រាស់ដែលមានបុព្វការីជនជាជនជាតិចិន ជប៉ុន និងកូរ៉េ ។
បន្ថែមពីលើនេះទៀត មនុស្សជាច្រើនធ្វើការដោយឯករាជ្យលើបុព្វការីជនម្នាក់ដែលមនុស្សម្នាក់ទៀតមាន ក្នុងរយៈពេលជាច្រើនឆ្នាំបានបង្កើតនូវកំណត់ត្រាជាច្រើននៅក្នុងមែកធាងគ្រួសារ—ទាំងអស់សម្រាប់មនុស្សតែម្នាក់ ។ ទាំងនេះត្រូវបានគេហៅថាកំណត់ត្រាស្ទួន ហើយពេលខ្លះវាមានព័ត៌មានផ្ទុយគ្នា ។
នៅពេលដែលអាចធ្វើទៅបាន កម្មវិធីស្រាវជ្រាវក្រុមគ្រួសារព្យាយាមស្វែងរកកំណត់ត្រាស្ទួន ហើយបញ្ចូលវាទៅក្នុងកំណត់ត្រាតែមួយ ។ ទោះជាយ៉ាងណា ប្រសិនបើកាលបរិច្ឆេទមកពីកំណត់ត្រាដែលត្រូវបានបញ្ចូលគ្នា ផ្ទុយគ្នា នោះប្រព័ន្ធរបស់យើងត្រូវតែសម្រេចចិត្តថា តើកាលបរិច្ឆេទណាមួយដើម្បីបង្ហាញនៅលើកំណត់ត្រាដែលបានបញ្ចូលគ្នានោះ ។ បច្ចុប្បន្ននេះ ប្រព័ន្ធរបស់យើងជ្រើសរើសកាលបរិច្ឆេទដែលបានដាក់បញ្ជូលថ្មីៗបំផុតទៅក្នុងមែកធាងគ្រួសារ ។
ពិតណាស់ កាលបរិច្ឆេទដែលបានដាក់បញ្ជូលថ្មីបំផុតអាចខុស ។ យើងទទួលស្គាល់រឿងនេះ ហើយថែមទាំងបានគូសចំណាំកំណត់ត្រាមួយចំនួននៅក្នុងមែកធាងគ្រួសារថាមានបញ្ហាទិន្នន័យ ។ យើងសង្ឃឹមថាអ្នកនឹងចំណាយពេលដើម្បីកែកំហុសទាំងនេះនៅពេលអ្នកជួបវា ។
កិច្ចប្រឹងប្រែងជាក្រុម
នៅពេលណាដែលអ្នកធ្វើការកែតម្រូវ សូមប្រាកដថាផ្តល់ប្រភពមួយប្រសិនបើអ្នកអាចធ្វើបាន ឬយ៉ាងហោចណាស់សេចក្តីថ្លែងការណ៍ដែលមានហេតុផលមួយយ៉ាងច្បាស់ ដែលនឹងបញ្ជាក់ការផ្លាស់ប្ដូររបស់អ្នក ។ ប្រសិនបើអ្នកធ្វើដូច្នេះ អ្នកប្រើប្រាស់ផ្សេងទៀតដែលអាចមានចម្ងល់ពីការផ្លាស់ប្ដូរនេះទំនងជាមិនសូវកែប្រែ ឬកែត្រឡប់វិញ ។
ពេលកម្មវិធីស្រាវជ្រាវក្រុមគ្រួសារត្រូវបានចុះជាអ្នករួមចំណែក
មុនឆ្នាំ ១៩៩៤ កាតឈ្មោះដែលបានដាក់ស្នើសម្រាប់ពិធីបរិសុទ្ធក្នុងព្រះវិហារបរិសុទ្ធជាភាសាចិន ជប៉ុន និងកូរ៉េ ត្រូវបានរៀបចំដោយដៃ ។ ទោះបីជាព័ត៌មានពិធីបរិសុទ្ធដែលមាននៅលើកាតទាំងនេះត្រូវបានរក្សាទុកដោយប្រុងប្រយ័ត្នក៏ដោយ ក៏ឈ្មោះរបស់អ្នករួមចំណែកមិនបានរក្សាទុកទេ ។ ចំណុចនេះអាចនាំឲ្យអ្នកប្រើប្រាស់កម្មវិធីស្រាវជ្រាវក្រុមគ្រួសារនៅសព្វថ្ងៃនេះឃើញឈ្មោះ ដែលកម្មវិធី « ស្រាវជ្រាវក្រុមគ្រួសារ » បានចុះថា ជាអ្នករួមចំណែកសម្រាប់ផ្នែកព័ត៌មានជាក់លាក់មួយ ។