អែលឌើរ នែល អិល អាន់ឌើរសិន បានមានប្រសាសន៍ ថា « យើងនៅទីនេះដើម្បីពិភាក្សាអំពីរបៀបដែលយើងអាចជួយ ជាពិសេសសមាជិកថ្មីយើង ឲ្យទទួលបានបទពិសោធន៍ដ៏អស្ចារ្យភ្លាមៗបន្ទាប់ពីពួកគេបានទទួលបុណ្យជ្រមុជទឹកចូលមកក្នុងសាសនាចក្រ » ។
នៅខែ កុម្ភៈ ឆ្នាំ ២០២៤ សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ បានចេញផ្សាយនូវសម័យប្រជុំស្ដីពីសេចក្ដីណែនាំដល់ថ្នាក់ដឹកនាំផ្នែកព្រះវិហារបរិសុទ្ធ និងពង្សប្រវត្ដិ សម្រាប់សមាជិក និងថ្នាក់ដឹកនាំក្នុងសាសនាចក្រ ។ ក្រុមពិភាក្សានៃថ្នាក់ដឹកនាំរៀមច្បង ៦ រូបនៃសាសនាចក្របានជួបប្រជុំគ្នាដើម្បីពិភាក្សាអំពីពរជ័យនៃព្រះវិហារបរិសុទ្ធដែលសមាជិកថ្មីអាចទទួលបាន—ទាំងសមាជិកថ្មីនៅក្នុងសាសនាចក្រ និងសមាជិកដែលមានអាយុវ័យក្មេង រួមទាំងសមាជិកដែលត្រឡប់មកវិញផងដែរ ។ ពួកលោកក៏បានណែនាំឲ្យស្គាល់នូវឧបករណ៍ថ្មីមួយដែលអាចឲ្យថ្នាក់ដឹកនាំ និងអ្នកដទៃទៀតជួយសមាជិកដែលធ្វើពិធីបុណ្យជ្រមុជទឹកជំនួសដើម្បីរៀបចំកាតឈ្មោះគ្រួសារសម្រាប់ព្រះវិហារបរិសុទ្ធដោយឆាប់រហ័ស និងដោយងាយស្រួល ។
វីដេអូទាំងមូលពីសេចក្ដីណែនាំដល់ថ្នាក់ដឹកនាំ និងសេចក្តីណែនាំនៃការពិភាក្សាដែលមាននៅលើគេហទំព័ររបស់សាសនាចក្រជាភាសាមួយចំនួនដែលបានភ្ជាប់មកជាមួយ ។ ព័ត៌មានបន្ថែមទៀតអំពីសេចក្ដីណែនាំដល់ថ្នាក់ដឹកនាំ ឆ្នាំ ២០២៤ ( រួមទាំងសេចក្តី សង្ខេបពីវីដេអូ ) អាចអានបាននៅខាងក្រោមនេះ ។
សំណួរទូទៅអំពីសេចក្ដីណែនាំដល់ថ្នាក់ដឹកនាំ
សូមចុច ឬប៉ះលើអត្ថបទនៅផ្នែកនេះដើម្បីមើលចម្លើយសំណួរទូទៅមួយចំនួន ។
យើងមានសេចក្តីណែនាំស្ដីពីការពិភាក្សារហូតដល់ ២៣ ភាសា ដើម្បីជួយដល់ការសន្ទនាទាំងនេះ ។
អស់អ្នកទាំងឡាយណាដែលមានការហៅដូចតទៅនេះគឺត្រូវបានលើកទឹកចិត្ដជាពិសេសឲ្យមើល ពិភាក្សា និងធ្វើសកម្មភាពរួមគ្នា ៖
- អ្នកប្រឹក្សាយោបល់ផ្នែកព្រះវិហារបរិសុទ្ធ និងពង្សប្រវត្តិប្រចាំតំបន់
- គណៈប្រធានស្តេក គណៈប្រធានបេសកកម្ម និងគណៈប្រធានមណ្ឌល
- សមាជិកនៃក្រុមប្រឹក្សាស្តេក និងវួដ និងគណៈប្រធានរបស់ពួកគេ
- អ្នកដឹកនាំបេសកកម្មវួដ និងពួកអ្នកផ្សព្វផ្សាយសាសនា
- ថ្នាក់ដឹកនាំផ្នែកព្រះវិហារបរិសុទ្ធ និងពង្សប្រវត្តិវួដ
- អ្នកប្រឹក្សាផ្នែកព្រះវិហារបរិសុទ្ធ និងពង្សប្រវត្តិប្រចាំវួដ និងស្ដេក
- គណៈប្រធានថ្នាក់ក្រុមយុវនារី
- គណៈប្រធានកូរ៉ុមបព្វជិតភាពអើរ៉ុន
ការសង្ខេបខ្លីៗនៃសេចក្ដីណែនាំដល់ថ្នាក់ដឹកនាំ ឆ្នាំ ២០២៤
ខាងក្រោមនេះគឺជាការរៀបរាប់ខ្លះៗអំពីសារលិខិតចេញពីសេចក្ដីណែនាំដល់ថ្នាក់ដឹកនាំ ដើម្បីជួយអ្នកឲ្យដឹងពីអ្វីដែលពិភាក្សានៅក្នុងសេចក្ដីណែនាំនេះ ។ ទាំងនេះមិនមែនជាសារលិខិត ទាំងអស់ ដែលបានផ្ដល់នៅក្នុងសេចក្ដីណែនាំនេះទេ ដូចនេះអ្នកអានគឺត្រូវបានលើកទឹកចិត្តយ៉ាងខ្លាំងឲ្យមើលវីដេអូនេះផងដែរ ។
ការទៅព្រះវិហារបរិសុទ្ធអាចផ្ដល់ពរជ័យដល់សមាជិក—ប៉ុន្ដែពួកគេត្រូវការជំនួយពីពួកយើង
អែលឌើរ អាន់ឌើរសិន បានមានប្រសាសន៍នៅក្នុងសេចក្ដីណែនាំដល់ថ្នាក់ដឹកនាំថា « យើងសង្ឃឹមថាព្រះវិហារបរិសុទ្ធនឹងកាន់តែសកម្មនៅក្នុងជីវិតរបស់ពួកបរិសុទ្ធថ្ងៃចុងក្រោយទាំងអស់ » ប៉ុន្ដែលោកបានផ្ដោតទៅលើការពិភាក្សាអំពីសមាជិកថ្មីៗជាពិសេស ។ លោកបានសួរថា « តើយើងអាចជួយពួកគេនៅប៉ុន្មានសប្ដាហ៍ដំបូងនោះដោយរបៀបណា » ?
ស៊ីស្ទើរ ផតធ័រ បានសង្កេតឃើញថា នៅពេលយើងជាសមាជិកថ្មីនៃសាសនាចក្រ យើងអាចចូលមកក្នុងសាសនាចក្រតែម្នាក់ឯង ហើយអាច « មានអារម្មណ៍ហាក់ដូចជាយើងកំពុងចាប់ផ្ដើមជីវិតថ្មី » ។ គាត់បានបញ្ជាក់ថា ការមានឱកាសទៅព្រះវិហារបរិសុទ្ធក្នុងអំឡុងដំណាក់កាលដំបូងនៃភាពជាសមាជិករបស់យើង និងការចូលរួមក្នុងពិធីបរិសុទ្ធដ៏សំខាន់បែបនេះ នៅក្នុងដំណាក់នៃព្រះអម្ចាស់អាច « ជួយយើងឲ្យមានអារម្មណ៍ថាជាផ្នែកមួយនៃកិច្ចការដ៏សំខាន់នៃសាសនាចក្រ ទោះបីយើងថ្មីក្នុងដំណឹងល្អក្ដី » ។
អែលឌើរ ដាន់ខិន បានបញ្ជាក់ថា ព្រះអម្ចាស់បានទុកព្រះទ័យទុកចិត្ដលើថ្នាក់ដឹកនាំដើម្បីជួយសមាជិកថ្មីទាំងនេះចូលទៅក្នុងដំណាក់របស់ទ្រង់ ។ ស៊ីស្ទើរ យី បានចែកចាយបទពិសោធន៍ដែលគាត់បានធ្វើការងារបម្រើដល់សមាជិកថ្មីម្នាក់ ដោយគាត់បានថ្លែងទីបន្ទាល់ថា វួដទាំងមូលបានជួបជុំគ្នាជួយនាងឲ្យរៀបចំខ្លួន និងចូលរួមព្រះវិហារបរិសុទ្ធ—ដែលបានផ្ដល់ពរជ័យដល់ពួកគេគ្រប់គ្នា ។
សម្រាប់សមាជិកថ្មី ការយកឈ្មោះសមាជិកគ្រួសាររបស់ពួកគេជាលើកដំបូងអាចមានភាពសាមញ្ញជាងការដែលយើងគិត
អ្នកដែលនៅក្នុងក្រុមពិភាក្សា បានផ្តល់ការពិភាក្សាពីរបៀបយកឈ្មោះទៅព្រះវិហារបរិសុទ្ធជាលើកដំបូងសម្រាប់សមាជិកថ្មីថា វាមិនមែនតែងតែជាបញ្ហាប្រឈមនឹងការស្រាវជ្រាវពង្សាវលីនោះទេ ប៉ុន្ដែវាអាចជាបទពិសោធន៍មួយដែលសាមញ្ញ និងស្រស់ស្អាត ។ អែលឌើរ ហាមីលថុន បានមានប្រសាសន៍ថា « អ្នកប្រែចិត្ដជឿថ្មីភាគច្រើនចង់ទទួលបុណ្យជ្រមុជទឹកសម្រាប់សមាជិកគ្រួសារនៅក្នុងព្រះវិហារបរិសុទ្ធ … ជាញឹកញាប់គឺជីដូនជីតារបស់ពួកគេ » ។ « ពួកគេដឹងក្នុងចិត្តរួចហើយថា តើពួកគេចង់ធ្វើពិធីបរិសុទ្ធនោះដល់នរណា » ។
ថ្នាក់ដឹកនាំទាំងនេះបានពិភាក្សាបន្ថែមទៀតអំពីសារៈសំខាន់ក្នុងការមាននរណាម្នាក់នៅចាំជួយពួកគេរៀបចំឈ្មោះនោះ ដែលអាចធ្វើទៅបានភ្លាមៗបន្ទាប់ពីប៊ីស្សពបានចុះហត្ថលេខាលើប័ណ្ណចូលព្រះវិហារបរិសុទ្ធរបស់ពួកគេ ។ អែលឌើរ ហ្គង បានបន្ថែមថា « យើងក៏បានសម្រួលដំណើរការនោះឲ្យកាន់តែសាមញ្ញផងដែរ » ។
នៅពេលដែលក្រុមពិភាក្សានេះបានពន្យល់ពីធនធានថ្មីមួយសម្រាប់ប៊ីស្សព—ឬនរណាម្នាក់ដែលប៊ីស្សពបានសុំឲ្យជួយ ។ ដោយមានការបំផុសយ៉ាងសាមញ្ញ ឧបករណ៍នេះអាចឲ្យនរណាម្នាក់ជួយសមាជិកថ្មីបាន—រួមមានការបង្កើតគណនី កម្មវិធីស្រាវជ្រាវក្រុមគ្រួសារ រៀបចំឈ្មោះគ្រួសារ និងបម្រុងទុកពិធីបរិសុទ្ធ ។ ( រៀនបន្ថែមទៀតអំពីឧបករណ៍នេះនៅទីនេះ ) ។ បន្ថែមពីលើឧបករណ៍ដ៏សាមញ្ញនេះ ការធ្វើឲ្យការរៀបចំនេះកាន់តែមានលក្ខណៈផ្ទាល់ខ្លួន អាចជួយឲ្យមានអារម្មណ៍ថា ដំណើរការផ្នែកបច្ចេកទេសមានតិចជាងមុន ។
អែលឌើរ អាន់ឌើរសិន បានមានប្រសាសន៍អំពីរបៀបដែលលោក និងភរិយារបស់លោកបានខិតខំជួយកូនៗរបស់ពួកលោកទៅព្រះវិហារបរិសុទ្ធនៅសប្ដាហ៍ដែលពួកគេឈានចូលអាយុ ១២ ឆ្នាំ ហើយធ្វើឲ្យការទៅព្រះវិហារបរិសុទ្ធនេះក្លាយជាបទពិសោធន៍មួយដែលគួរឲ្យចងចាំ ទោះបីជាព្រះវិហារបរិសុទ្ធមានចម្ងាយឆ្ងាយក៏ដោយ ។ ឪពុកម្តាយ និងថ្នាក់ដឹកនាំ អាចជួយសមាជិកថ្មីទៅព្រះវិហារបរិសុទ្ធឲ្យបានឆាប់តាមដែលអាចធ្វើទៅបានតាមរបៀបដ៏សមស្របមួយ ។ សម្រាប់កុមារអាយុ ១១ ឆ្នាំ និងសមាជិកថ្មី វាជាបទពិសោធន៍មួយដែលពួកគេនឹងមិនអាចបំភ្លេចបានឡើយ ។
អែលឌើរ ដាន់ខិន បានរំឭកថា « កិច្ចការនេះគឺតែងតែជាបទពិសោធន៍មួយដ៏រុញរាសម្រាប់សមាជិកថ្មីជានិច្ច » លោកបានណែនាំពីរបៀបដែលយើងអាចជួយឲ្យបទពិសោធន៍នេះមិនសូវមានភាពភ័យព្រួយ ។ ដូចដែលអែលឌើរ ហ្គង បានលើកឡើងថា « គន្លឹះគឺជាឱកាសដើម្បីទៅមុខជាមួយនឹងព្រះអម្ចាស់ និង … ដើម្បីចុះសេចក្ដីសញ្ញាជាមួយនឹងទ្រង់ » ។ លោកបានបន្ដទៀតថា « ក្នុងនាមជាថ្នាក់ដឹកនាំ ជាមិត្តភក្តិ ជាសមាជិក យើងខិតខំធ្វើឲ្យដំណើរការនោះមានភាពងាយស្រួលអស់ពីលទ្ធភាព សម្រាប់អ្នកដែលទៅលើកដំបូង » ។
ការបន្ដរីកចម្រើនក្នុងដំណឹងល្អ—និងទន្ទឹងរង់ចាំទៅព្រះវិហារបរិសុទ្ធលើកក្រោយរបស់អ្នក
អែលឌើរ អាន់ឌើរសិន បានលើកឡើងនាចុងបញ្ចប់នៃសេចក្ដីណែនាំដល់ថ្នាក់ដឹកនាំនេះថា សមាជិកតែងតែផ្លាស់ទីក្នុងដំណឹងល្អជានិច្ច—មិនថាផ្លាស់ទីទៅមុខមួយជំហាន ឬផ្លាស់ទីទៅទីណាឆ្ងាយនោះទេ ។ បទពិសោធន៍ ឬការតភ្ជាប់ខាងវិញ្ញាណថ្មីមួយអាចនាំមកនូវការយល់ដឹងថ្មីមួយទៀតដល់ការប្រែចិត្ដជឿផ្ទាល់ខ្លួនរបស់ពួកគេ ។ និយាយដល់អារម្មណ៍រំភើបដែលមនុស្សទាំងនោះមាន នៅពេលពួកគេទទួលបុណ្យជ្រមុជទឹកលើកដំបូង អែលឌើរ ហ្គង បានមានប្រសាសន៍ថា « អ្នកអាចមានបទពិសោធន៍នោះម្ដងហើយម្ដងទៀត » រៀងរាល់ពេលអ្នកទៅព្រះវិហារបរិសុទ្ធដើម្បីធ្វើពិធីបុណ្យជ្រមុជទឹកជំនួស ។
សូម្បីតែអស់អ្នកដែលរស់នៅឆ្ងាយពីព្រះវិហារបរិសុទ្ធក្តី ក៏នៅតែអាចមានគោលដៅស្វែងរកឈ្មោះ និងយកឈ្មោះមកកាន់ព្រះវិហារបរិសុទ្ធបានដែរ ។ អែលឌើរ ហាមីលថុន បានលើកឡើងថា សមាជិកម្នាក់ដែលរស់នៅឆ្ងាយពីព្រះវិហារបរិសុទ្ធនៅតែអាចរៀបចំកាតឈ្មោះគ្រួសារ ហើយដាក់វានៅកន្លែងដែលអាចមើលឃើញបាន ជាការរំឭកក្នុងការទៅព្រះវិហារបរិសុទ្ធ នៅពេលដែលសមាជិកនោះអាចទៅបាន ។ ស៊ីស្ទើរ ផតធ័រ និងស៊ីស្ទើរ យី បានបន្ថែមថាអស់អ្នកដែលមិនអាចទៅព្រះវិហារបរិសុទ្ធបានក្នុងរយៈពេលយូរ អាចចែកចាយឈ្មោះគ្រួសារជាមួយអ្នកដែលរស់នៅជិតព្រះវិហារបរិសុទ្ធ ហើយក៏អាចសិក្សាអំពីព្រះវិហារបរិសុទ្ធ និងសេចក្ដីសញ្ញាដែលពួកគេបានធ្វើនៅពិធីបុណ្យជ្រមុជទឹក ដើម្បីខិតកាន់តែជិតព្រះអង្គសង្គ្រោះផងដែរ ។
សេចក្ដីបញ្ចប់
អែលឌើរ ហាមីលថុន បានមានប្រសាសន៍ថា « យើងរស់នៅក្នុងពេលដែលមិនធ្លាប់មានពីមុនមក » ។ « ព្រះវរបិតាសួគ៌នឹងរីករាយបំផុតនៅពេលដែលបានឃើញបុត្រាបុត្រីរបស់ទ្រង់នៅក្នុងព្រះវិហារបរិសុទ្ធ ជាពិសេសអស់អ្នកដែលថ្មីហើយខ្ចីនៅក្នុងដំណឹងល្អ—សមាជិកថ្មី យុវវ័យអាយុ ១១ ឆ្នាំ … ហើយសូម្បីតែអស់អ្នកដែលត្រឡប់មកព្រះវិហារបរិសុទ្ធវិញក្តី » ។
នៅក្នុងការថ្លែងទីបន្ទាល់បញ្ចប់របស់គាត់ ស៊ីស្ទើរ យី បានលើកឡើងថា « [ ព្រះ ]ពិតជាចង់ឲ្យបុត្រាបុត្រីរបស់ទ្រង់ដឹងថាទ្រង់ស្រឡាញ់ពួកគេប៉ុនណា តាមរយៈពរជ័យនៃសេចក្ដីសញ្ញាដែលទ្រង់នឹងប្រទានឲ្យពួកគេ ។… យើងមានឱកាសដើម្បីធ្វើជាផ្នែកនៃ … ដំណើរការនៃការនាំយកពួកគេមករកទ្រង់ » ។
ស៊ីស្ទើរ ផតធ័រ បានចែកចាយបទពិសោធន៍របស់គាត់ពេលគាត់ធ្វើពិធីបុណ្យជ្រមុជទឹកសម្រាប់ជីដូនរបស់ឪពុករបស់គាត់ បន្ទាប់ពីគាត់បានចូលរួមក្នុងសាសនាចក្រ ។ គាត់បានមានប្រសាសន៍ថា « [ ព្រះវិហារបរិសុទ្ធ ] គឺជាដំណាក់របស់ព្រះអម្ចាស់ » ។ « ទ្រង់គង់នៅទីនោះ ។ វាជាដំណាក់ទ្រង់ ។… វាជាកន្លែងដែលជាកម្មសិទ្ធិរបស់ព្រះវរបិតាសួគ៌ ព្រះរាជបុត្រាទ្រង់ និងគ្រួសាររបស់យើង—ដែលបានផ្តល់ក្នុងភាពអស់កល្បជានិច្ច តាមរយៈដង្វាយធួននៃព្រះអង្គសង្គ្រោះរបស់យើង ព្រះយេស៊ូវគ្រីស្ទ » ។
អែលឌើរ អាន់ឌើរសិន បានបញ្ចប់សេចក្ដីណែនាំដល់ថ្នាក់ដឹកនាំ ដោយផ្ដល់ពរសាវករបស់លោក ។ ក្នុងនោះលោកបានលើកឡើងថា « រាល់ការខិតខំបន្ដិចបន្ដួចក៏ដោយ ដើម្បីព្យាយាមជួយអ្នកប្រែចិត្ដជឿថ្មី បុត្រថ្មីនៃព្រះវរបិតាសួគ៌របស់យើង ដែលបានចូលទៅក្នុងទឹកនៃពិធីបុណ្យជ្រមុជទឹក [ ហើយ ]ជួយគាត់ ឬនាងឲ្យស្វែងរកផ្លូវរបស់ពួកគេចូលទៅកាន់ដំណាក់របស់ព្រះអម្ចាស់ នឹងមិនត្រឹមតែផ្ដល់ពរជ័យដល់បុគ្គលនោះប៉ុណ្ណោះទេ—តែខ្ញុំសូមសន្យាថា វានឹងផ្ដល់ពរជ័យដល់បងប្អូនផងដែរ ។ វានឹងផ្ដល់ពរដល់សមាជិកក្នុងវួដរបស់បងប្អូន ។ សេចក្ដីជំនឿរបស់បងប្អូនលើព្រះយេស៊ូវគ្រីស្ទនឹងរីកចម្រើនឡើង » ។
សេចក្ដីណែនាំដល់ថ្នាក់ដឹកនាំទាំងមូល មានរយៈពេលត្រឹមតែ ២៨ នាទីប៉ុណ្ណោះ ។ នៅក្នុងការសម្ភាសដែលបានធ្វើឡើងបន្ទាប់ពីសម័យប្រជុំនេះ អែលឌើរ ហាមីលថុន បានមានប្រសាសន៍ថាការចាក់ផ្សាយនេះបានមកពីការបំផុសគំនិតដ៏ជ្រាលជ្រៅ ការប្រឹក្សាដ៏យកចិត្ដទុកដាក់ និងពេញដោយព្រះវិញ្ញាណ និងត្រូវបានដឹកនាំដោយព្រះវិញ្ញាណ ។ លោកបានកត់ចំណាំថា ការទទួលយកការណែនាំចេញពីការប្រឹក្សានេះ អាចជាបទពិសោធន៍ដ៏អស្ចារ្យសម្រាប់អស់អ្នកដែលទាក់ទង ។
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
