សុភាសិតចាស់មួយបានពោលថា « អ្នកអាចរាប់ចំនួនគ្រាប់នៅក្នុងផ្លែប៉ោមមួយបាន ប៉ុន្តែអ្នកមិនអាចរាប់ចំនួនផ្លែប៉ោមពីគ្រាប់មួយបានទេ » ។ ដោយអនុវត្តក្នុងបរិបទសាសនាចក្រ សុភាសិតនេះបង្ហាញថា យើងម្នាក់ៗមានសក្តានុពលក្នុងការផ្ដល់ពរជ័យដល់មនុស្សដទៃជាច្រើន ។ ជាពិសេស តាមរយៈការថ្វាយបង្គំក្នុងព្រះវិហារបរិសុទ្ធ និងពង្សប្រវត្តិ យើងអាចជួយប្រមូលគ្រួសាររបស់យើងឲ្យមករកព្រះអង្គសង្គ្រោះបាន ។
គំនិត និងដួងចិត្តរបស់សមាជិកថ្មីក្នុងសាសនាចក្រ
សមាជិកថ្មីជាច្រើនតែចូលរួមសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដោយមានបំណងប្រាថ្នាយ៉ាងខ្លាំងក្នុងការចែកចាយដំណឹងល្អ និងពិធីបរិសុទ្ធនៃសេចក្តីសង្គ្រោះទាំងជាមួយសមាជិកគ្រួសារដែលនៅរស់ និងសមាជិកដែលបានទទួលមរណភាពទៅហើយ ។ ដូចលីហៃដែរ បានងាកទៅរកគ្រួសាររបស់លោកភ្លាមៗបន្ទាប់ពីបានភ្លក់ផ្លែឈើនៃដើមជីវិតហើយ ( សូមមើល នីហ្វៃទី១ ៨:១២ ) សមាជិកថ្មីក្នុងសាសនាចក្រច្រើនតែចង់ឲ្យសមាជិកគ្រួសាររបស់ពួកគេទទួលបានផ្លែឈើនៃដំណឹងល្អនោះផងដែរ ។
ការជួយសមាជិកថ្មីឲ្យបញ្ចេញបំណងប្រាថ្នានេះទៅជាសកម្មភាពនឹងជួយពួកគេឲ្យសម្របខ្លួនទៅតាមសកម្មភាពក្នុងសាសនាចក្រ ពង្រឹងទីបន្ទាល់របស់ពួកគេ និងផ្ដល់ពរជ័យនៃសេចក្តីសង្គ្រោះទៅដល់សមាជិកគ្រួសារដែលបានស្លាប់របស់ពួកគេ ។ នេះជារបៀបដែលប្រឹក្សាយោបល់ផ្នែកព្រះវិហារបរិសុទ្ធ និងពង្សប្រវត្ដិអាចដើរតួនាទីយ៉ាងសំខាន់ក្នុងការធ្វើឲ្យរឿងនេះកើតឡើងបាន ។
ចាប់ផ្ដើមពីព្រះអង្គសង្រ្គោះ
ការជួយសមាជិកថ្មីឲ្យផ្តល់ពិធីបរិសុទ្ធដ៏សង្គ្រោះសម្រាប់គ្រួសាររបស់ពួកគេនៅក្នុងព្រះវិហារបរិសុទ្ធ នឹងនាំពួកគេ និងមនុស្សជាទីស្រឡាញ់របស់ពួកគេឲ្យខិតទៅកាន់តែជិតព្រះអង្គសង្គ្រោះ ។ តើហេតុអ្វី ? ពីព្រោះវាជាកិច្ចការរបស់ទ្រង់ ដែលពួកគេកំពុងធ្វើ ( សូមមើល ម៉ូសេ ១:៣៩ ) ។
លើកទឹកចិត្តសមាជិកថ្មីឲ្យចូលរួមក្នុងការថ្វាយបង្គំក្នុងព្រះវិហារបរិសុទ្ធភ្លាមៗបន្ទាប់ពីពិធីបុណ្យជ្រមុជទឹក
ថ្នាក់ដឹកនាំវួដគួរតែជួយសមាជិកថ្មីឲ្យទទួលបានប័ណ្ណចូលព្រះវិហារបរិសុទ្ធ និងចូលរួមក្នុងព្រះវិហារបរិសុទ្ធ តាមដែលកាលៈទេសៈអនុញ្ញាត ក្នុងរយៈពេលប៉ុន្មានសប្តាហ៍បន្ទាប់ពីពួកគេបានទទួលបុណ្យជ្រមុជទឹកហើយ ។ អ្នកជំនាញអាចគាំទ្រដល់សកម្មភាពនេះបាន តាមរយៈការជួយសមាជិកថ្មីឲ្យស្វែងរក និងបោះពុម្ពឈ្មោះគ្រួសារសម្រាប់ពិធីបុណ្យជ្រមុជទឹក និងពិធីបញ្ជាក់នៅក្នុងព្រះវិហារបរិសុទ្ធ ។ ជំនួយឈ្មោះគ្រួសារ គឺជាឧបករណ៍ដ៏ល្អមួយសម្រាប់អ្នកជំនាញផ្នែកព្រះវិហារបរិសុទ្ធ និងពង្សប្រវត្ដិ ដើម្បីសម្រេចជំហានដ៏សំខាន់នេះ ។
ជួយសមាជិកថ្មីឲ្យបន្ថែមអ្វីដែលពួកគេដឹងទៅក្នុងមែកធាងគ្រួសារក្នុងកម្មវិធី FamilySearch
ជំនួយឈ្មោះគ្រួសារ នឹងជួយសមាជិកថ្មីឲ្យបង្កើតមែកធាងគ្រួសារផ្ទាល់ខ្លួនរបស់ពួកគេនៅលើគេហទំព័រ FamilySearch.org ។ ប៉ុន្តែកុំឈប់នៅទីនោះឡើយ ។ សូមជួយពួកគេឲ្យបន្តបន្ថែមឈ្មោះ កាលបរិច្ឆេទ និងទីកន្លែងដើម្បីឲ្យកម្មវិធី FamilySearch អាចភ្ជាប់គ្រួសាររបស់ពួកគេទៅនឹងកំណត់ត្រាដែលមានស្រាប់ និងស្វែងរកបុព្វការីជនថ្មីដែលត្រូវការពិធីបរិសុទ្ធក្នុងព្រះវិហារបរិសុទ្ធ ។
បង្រៀនសមាជិកថ្មីឲ្យប្រើពិធីបរិសុទ្ធត្រៀមរួចរាល់
នៅពេលសមាជិកថ្មីបន្ថែមអ្វីដែលពួកគេដឹង នោះកម្មវិធី FamilySearch នឹងភ្ជាប់ពួកគេទៅនឹងបុព្វការីជនដែលត្រូវការពិធីបរិសុទ្ធក្នុងព្រះវិហារបរិសុទ្ធ ។ បន្ទាប់មក សមាជិកថ្មីអាចប្រើពិធីបរិសុទ្ធត្រៀមរួចរាល់ ដើម្បីស្វែងរកឱកាសទាំងនេះ និងបោះពុម្ពកាតឈ្មោះគ្រួសារដែលចាំបាច់សម្រាប់ព្រះវិហារបរិសុទ្ធបានយ៉ាងឆាប់រហ័ស ។ ការបង្រៀនសមាជិកថ្មីអំពីរបៀបប្រើពិធីបរិសុទ្ធត្រៀមរួចរាល់ នឹងជួយពួកគេឲ្យចេះប្រើវាដោយខ្លួនឯងកាន់តែខ្លាំង ។
គំនិតយោបល់បន្ថែម
ទាំងនេះគឺជាយោបល់ណែនាំបន្ថែមមួយចំនួនដើម្បីជួយពង្រឹងសមាជិកថ្មីក្នុងសាសនាចក្រ ៖
ជួយពួកគេឲ្យមានអារម្មណ៍ស្វាគមន៍ ។
នៅពេលអ្នកបន្តគាំទ្រសមាជិកថ្មីម្នាក់ៗ អ្នកអាចក្លាយជាមិត្តម្នាក់នៅក្នុងវួដ ដែលជួយពួកគេឲ្យមានអារម្មណ៍ស្វាគមន៍ និងត្រូវការបាន ។ ឥទ្ធិពលរបស់អ្នកអាចជួយសមាជិកថ្មីឲ្យមើលឃើញថា ការចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិមិនមែនជាព្រឹត្តិការណ៍តែម្តងនោះទេ ប៉ុន្តែជាប្រភពនៃពរជ័យពេញមួយជីវិត ។
ជួយពួកគេឲ្យរៀនអំពីគ្រួសាររបស់ពួកគេ ។
អ្នកអាចជួយសមាជិកថ្មីឲ្យមានអារម្មណ៍ជិតស្និទ្ធនឹងគ្រួសាររបស់ពួកគេបាន ដោយការជួយពួកគេឲ្យរៀនអំពីមនុស្សពិតដែលជាផ្នែកមួយនៃកេរតំណែលរបស់ពួកគេ ។ ជួយពួកគេឲ្យរៀនពីដំណើររឿងនៃជីវិតរបស់បុព្វការីជនរបស់ពួកគេ ហើយបន្ថែមរូបថត ដំណើររឿង និងឯកសារផ្សេងៗទៀតអំពីពួកគាត់ទៅក្នុងកម្មវិធី FamilySearch ។ នៅពេលអ្នករីករាយនឹងបទពិសោធន៍ទាំងនេះជាមួយសមាជិកថ្មី សូមអញ្ជើញពួកគេឲ្យចែកចាយគំនិត បទពិសោធន៍ និងទីបន្ទាល់របស់ពួកគេជាមួយអ្នកដទៃ ជាពិសេសសមាជិកគ្រួសារដែលនៅរស់ ។
ភ្ជាប់ពួកគេជាមួយមិត្តភក្តិផ្សេងទៀត ។
តាមដែលអ្នកអាចធ្វើបាន សូមជួយផ្គូផ្គងសមាជិកថ្មីជាមួយអ្នកដទៃនៅក្នុងវួដ ដែលអាចមានដំណើរដូចពួកគេ ទាំងក្នុងការស្វែងរកក្រុមគ្រួសាររបស់ពួកគេ និងការផ្ដល់ពរជ័យក្នុងព្រះវិហារបរិសុទ្ធដល់ពួកគេផងដែរ ។ សមាជិកថ្មីដែលមានមិត្តភក្តិនៅក្នុងវួដដែលពួកគេរស់នៅ និងមនុស្សដែលមានបទពិសោធន៍ខាងវិញ្ញាណដ៏ពិសិដ្ឋដូចគ្នា ទំនងជាបន្តនៅលើផ្លូវនៃសេចក្តីសញ្ញានេះជាងអត់មាន ។
សេចក្ដីបញ្ចប់
នៅពេលសមាជិកថ្មីចូលរួមក្នុងការថ្វាយបង្គំក្នុងព្រះវិហារបរិសុទ្ធ និងពង្សប្រវត្តិ ពួកគេត្រូវបានទាញទៅរកព្រះអង្គសង្គ្រោះ ។ នេះគឺដោយសារតែពួកគេទទួលអារម្មណ៍ពីវិញ្ញាណនៃអេលីយ៉ា ដែលធ្វើឲ្យការប្រែចិត្តជឿរបស់ពួកគេកាន់តែជ្រាលជ្រៅ ហើយពង្រឹងចំណងទាក់ទងក្រុមគ្រួសាររបស់ពួកគេទាំងនៅលើផែនដី និងអស់កល្បជានិច្ច ។ ប្រធាន រ័សុល អិម ណិលសុន បានបង្រៀនថា វិញ្ញាណនៃអេលីយ៉ាគឺជា « ការបើកសម្តែងរបស់ព្រះវិញ្ញាណបរិសុទ្ធដែលថ្លែងសាក្សីពីលក្ខណៈដ៏ទេវភាពនៃគ្រួសារ » ។ ( « A New Harvest Time » Ensign ខែឧសភា ឆ្នាំ១៩៩៨ ទំព័រ៣៤ ) ។ ការជួយសមាជិកថ្មីឲ្យចូលរួមក្នុងកិច្ចខិតខំប្រឹងប្រែងដ៏ពិសិដ្ឋនេះ គឺជាវិធីមួយដ៏សំខាន់បំផុត ដែលអ្នកអាចចូលរួមចំណែកដល់កិច្ចការរបស់ព្រះអម្ចាស់តាមរយៈការហៅរបស់អ្នកបាន ។
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
