ម៉ារីប៊ែល ម៉េឌីណា បម្រើជាអ្នកប្រឹក្សាផ្នែកពង្សប្រវត្តិអស់រយៈពេលជាង ១០ ឆ្នាំនៅក្នុងវួដរបស់នាង ក្នុងទីក្រុងសាន់ឌីអាហ្គូ រដ្ឋកាលីហ្វូញ៉ា ។ បន្ទាប់ពីមានអារម្មណ៍បាក់ទឹកចិត្តក្នុងការហៅរបស់នាង ហើយដោយធ្វើតាមការបំផុសគំនិតឲ្យឈោងទៅរកបងប្អូនស្រីវ័យចំណាស់ទាំងឡាយនៅក្នុងវួដរបស់នាង នាងបានឃើញផ្ទាល់ពីរបៀបដែលការធ្វើការជាមួយនឹងមនុស្សម្នាក់ៗ អាចជួយលើកស្ទួយដល់អ្នកឯកោ និងបំផុសគំនិតដល់អ្នកដទៃ—សូម្បីតែសមាជិកនៅក្នុងវួដទាំងមូលក្តី ។
ការបំផុសគំនិតដើម្បីផ្តោតលើមនុស្សវ័យចំណាស់
វួដរបស់ ម៉ារីប៊ែល ទើបតែបានបញ្ចូលគ្នាជាមួយវួដមួយទៀត ហើយមនុស្សគ្រប់រូបហាក់ដូចជារវល់យ៉ាងខ្លាំងក្នុងការចំណាយពេលស្រាវជ្រាវ និងរៀនអំពីបុព្វការីជនរបស់ពួកគេ ។ បន្ទាប់ពីការគិតនូវអ្វីដែលនាងអាចធ្វើដើម្បីជួយដល់សមាជិកវួដរបស់នាងឲ្យចូលរួមក្នុងកិច្ចការពង្សប្រវត្តិនោះ ម៉ារីប៊ែលទទួលអារម្មណ៍ឲ្យជួយដល់សមាជិកវ័យចំណាស់នៅក្នុងវួដយ៉ាងខ្លាំង ។ ដោយការខ្វះខាត ពួកគាត់ជាច្រើនពិបាកក្នុងការទៅព្រះវិហារជារៀងរាល់សប្តាហ៍ណាស់ ។ នាងបានសម្រេចចិត្តចាប់ផ្តើមទៅសួរសុខទុក្ខ បងប្អូនស្រីវ័យចំណាស់ពីរបីនាក់—ដោយមានផែនការ ប្រសិនបើនាងអាចសម្ភាសពួកគាត់ ជួយពួកគាត់បង្កើតគណនីកម្មវិធីស្រាវជ្រាវក្រុមគ្រួសារ និងជួយពួកគាត់ស្រាវជ្រាវរកក្រុមគ្រួសាររបស់ពួកគាត់ ។
ការសាកសួរបងប្អូនស្រីទាំងនោះនូវសំណួរដ៏សាមញ្ញ បានផ្តល់នូវលទ្ធផលនៃការទទួលបានរឿង និងព័ត៌មានដ៏ច្រើនសន្ធឹកសន្ធាប់ ។ ជាដំបូងនោះ គឺគ្រាន់តែសួររកព័ត៌មានលម្អិតដូចជា ឈ្មោះ កាលបរិច្ឆេទ និងទីកន្លែងនានា ម៉ារីប៊ែលក៏បានស្តាប់យ៉ាងអត់ធ្មត់ និងបានថតនូវសាច់រឿងជាច្រើនដែលពួកគាត់បានចែកចាយផងដែរ ។ បងប្អូនស្រីវ័យចំណាស់ទាំងនោះមានការភ្ញាក់ផ្អើលក្នុងការដែលអាចនឹកឡើងវិញនូវព័ត៌មានទាំងនោះដូចជា ថ្ងៃខែឆ្នាំកំណើតបងប្អូនបង្កើត ឪពុកម្តាយ ពូ មីង និងជីដូនជីតា ។ សូម្បីតែអ្នកដែលមិនអាចចងចាំព័ត៌មានលម្អិតដំបូង ក៏បានទទួលអត្ថប្រយោជន៍ពីការនិយាយអំពីអនុស្សាវរីយ៍ទាំងឡាយរបស់ពួកគាត់ផងដែរ ។ ក្រោយមក ពួកគាត់មួយចំនួនបានទូរសព្ទមកដោយផ្ដល់នូវព័ត៌មានបន្ថែម បន្ទាប់ពីបានខំប្រឹងខ្នះខ្នែងស្វែងរកអនុស្សាវរីយ៍ទាំងឡាយកាលពីដំបូង បានជួយពួកគាត់នឹកឃើញឡើងវិញបន្តិចម្តងៗ ។
ការយកឈ្នះលើបញ្ហាប្រឈមទាំងឡាយ
ម៉ារីប៊ែលបានចាប់ផ្តើមធ្វើឲ្យមានការរីកចម្រើនពិតប្រាកដជាមួយសមាជិកទាំងនេះ និងកត់ត្រាពង្សប្រវត្តិរបស់ពួកគាត់ នៅពេលដែលជំងឺរាតត្បាត កូវីដ-១៩ បានចាប់ផ្តើម ។ ទោះបីជាមានភាពមិនប្រាកដប្រាជាជាច្រើននៅពេលនោះក្តី ក៏វាមិនបានបញ្ឈប់នាងពីការជួយពួកគាត់បង្កើតមែកធាងគ្រួសាររបស់ពួកគាត់ដែរ ។ ទោះបីជាសមាជិកវ័យចំណាស់មិនចេះពីរបៀបធ្វើអ្វីមួយទាក់ទងនឹងបច្ចេកទេស ដូចជាការបើកទម្រង់ ភី.ឌី.អែហ្វ.ក៏ដោយ ម៉ារីប៊ែលបាននិយាយថា យ៉ាងហោចណាស់ពួកគាត់អាចហៅទូរសព្ទបានដែរ ។ ពួកគាត់មួយចំនួនមិនមានអ៊ីនធឺណិត ឬកុំព្យូទ័រនៅផ្ទះឡើយ ឬមិនចេះអានបានច្រើនទេ ។ ពួកគាត់ខ្លះអាចចែកចាយអេក្រង់ ថតរូប ឬចេះច្រើនជាងនេះ ។
មិនថាជាវិធីសាស្រ្តណាដែលនាងប្រើដើម្បីឈោងទៅរកពួកគាត់ទេ ម៉ារីប៊ែលបានបន្តទំនាក់ទំនងជាមួយសមាជិកវ័យចំណាស់ក្នុងវួដរបស់នាង ។ នាងនឹងប្រមូលព័ត៌មាន ហើយបន្ទាប់មកធ្វើការស្រាវជ្រាវសាមញ្ញសម្រាប់ពួកគាត់ ដូចជាការស្វែងរកសំបុត្រកំណើត សំបុត្រអាពាហ៍ពិពាហ៍ និងអ្វីផ្សេងៗទៀត ។ ប្រសិនបើសមាជិកមិនមានសមត្ថភាពមើលកំណត់ត្រាតាមអ៊ីនធឺណិតទេ នាងនឹងទាញយកកំណត់ត្រានោះចេញមក ឬចែកចាយតាមរយៈអ៊ីមែល ដើម្បីឲ្យពួកគាត់អាចរកឃើញព័ត៌មាននៅក្នុងកំណត់ត្រាសម្រាប់ខ្លួនពួកគាត់ ។
ឥទ្ធិពលយ៉ាងជ្រាលជ្រៅលើមនុស្សម្នាក់ៗ និងក្រុមគ្រួសាររបស់ពួកគេ
ម៉ារីប៊ែលបាននិយាយថា « ខ្ញុំកំពុងធ្វើការស្រាវជ្រាវ ប៉ុន្តែពួកគាត់កំពុងធ្វើការរុករក និងស្វែងរក ហើយពួកគាត់ចូលចិត្តកិច្ចការនេះណាស់ » ។ សមាជិកទាំងនេះមានអារម្មណ៍រំភើបយ៉ាងខ្លាំង អំពីអ្វីដែលពួកគាត់បានរៀនតាមរយៈកំណត់ត្រា ដែលពួកគាត់បានចែកចាយជាមួយកូនៗរបស់ពួកគាត់ ។ ក្រោយមកកូនៗ និងចៅៗរបស់ពួកគាត់បានចាប់ផ្តើមចូលរួមក្នុងការហៅទូរសព្ទដើម្បីស្វែងយល់ដំណើររឿងអំពីប្រវត្តិគ្រួសាររបស់ពួកគេ ។
អ្នកផ្សេងទៀតថែមទាំងមានអារម្មណ៍ថា មានឥទ្ធិពលផ្ទាល់ខ្លួនជាច្រើន ។ ស្ត្រីវ័យចំណាស់ម្នាក់មិនដែលស្រាវជ្រាវពីបុព្វការីជនរបស់គាត់ទេ ដោយសារតែប្រវត្តិគ្រួសាររបស់គាត់ ។ គាត់កើតក្រៅខាន់ស្លា ហើយឪពុករបស់គាត់បានមានគ្រួសារមួយទៀតដោយមានកូននៅពេលនោះ ។ បន្ទាប់ពីធ្វើការជាមួយម៉ារីប៊ែលបានមួយរយៈមក ស្ត្រីរូបនេះបានសម្រេចចិត្តចែកចាយបន្ថែមអំពីឪពុកម្តាយរបស់គាត់ ។ ម៉ារីប៊ែលអាចស្វែងរកប្រវត្តិរបស់ឪពុក និងម្តាយរបស់គាត់បន្ថែមទៀតសម្រាប់គាត់ ។ ស្រ្តីរូបនេះទទួលបានការយល់ដឹងកាន់តែច្រើនអំពីការសម្រេចចិត្តដែលឪពុកម្តាយរបស់គាត់បានធ្វើ ហើយការយល់ដឹងបែបនេះបានជួយព្យាបាលដល់គាត់ទៀតផង ។ គាត់បានប្រាប់ម៉ារីប៊ែលថា គាត់មានអារម្មណ៍ដឹងគុណ នៅពេលដែលគាត់បានពាំនាំរឿងទាំងនោះត្រឡប់ចូលមកក្នុងជីវិតរបស់គាត់វិញ ហើយដោយដឹងថា គាត់មិនអាចបន្ទោសខ្លួនឯងចំពោះការសម្រេចចិត្តដែលឪពុកម្តាយរបស់គាត់បានធ្វើនោះទេ ។ គាត់បានចាប់ផ្តើមជឿថា គាត់មានតម្លៃមិនអាចកាត់ថ្លៃបាន ហើយបានបោះបង់ចោលនូវភាពអាម៉ាស់ដែលគាត់បានមានអស់រយៈពេលជាច្រើនឆ្នាំ ។
ប្អូនស្រីម្នាក់មកពីប្រទេសហ្គូតេម៉ាឡា ដែលរស់នៅក្នុងវួដនេះចង់ចូលរួមក្នុងពង្សប្រវត្តិផងដែរ ហើយនាងបានចាប់ផ្តើមធ្វើការជាមួយម៉ារីប៊ែល ។ នាងបានចាប់ផ្តើមបង្កើតមែកធាងគ្រួសាររបស់នាង ប៉ុន្តែនាងអាចធ្វើបានតែធ្វើពិធីបុណ្យជ្រមុជទឹកជំនួសតែប៉ុណ្ណោះ ដោយឲ្យសមាជិកវួដយកទៅធ្វើពិធីបរិសុទ្ធដទៃទៀតនៅឯព្រះវិហារបរិសុទ្ធ ។ នៅក្នុងការស្ថាបនាមែកធាងរបស់នាង នាងបានរកឃើញព័ត៌មានរបស់ជីដូនទួតរបស់នាង ហើយនាងមានអារម្មណ៍ចង់ធ្វើជាមនុស្សម្នាក់ដែលបំពេញគ្រប់ពិធីបរិសុទ្ធទាំងអស់សម្រាប់គាត់ជាខ្លាំង ។ នាងបានបានខិតខំដើម្បីទទួលបានប័ណ្ណចូលព្រះវិហារបរិសុទ្ធ ដើម្បីនាងអាចធ្វើកិច្ចការនោះបាន ។ តាមរយៈដំណើរការនេះ នាងក៏អាចត្រូវបានផ្សារភ្ជាប់ជាមួយស្វាមី និងកូនៗរបស់នាងផងដែរ ។ ម៉ារីប៊ែលបានបង្ហាញនូវភាពអស្ចារ្យក្នុងការឃើញនូវដំណើរការនៃការប្រែចិត្តជឿដែលមកពីការធ្វើពង្សប្រវត្តិ ។
ការជួយមនុស្សម្នាក់ម្តងៗបានជះឥទ្ធិពលដល់អ្នកដទៃ
ម៉ារីប៊ែលកំពុងបម្រើស្ត្រីម្នាក់ដែលមានឈ្មោះថា ខាតាលីណា ហ្គោមេស ដែលកំពុងរស់នៅក្នុងមជ្ឈមណ្ឌលមនុស្សចាស់ ។ ក្នុងអំឡុងពេលហៅទូរសព្ទរបស់ពួកគាត់ មិត្តភក្តិរបស់ ខាតាលីណា នៅមជ្ឈមណ្ឌលបានស្តាប់ដោយក្តីរំភើប ហើយសួរថា តើពួកគាត់អាចចែកចាយរឿងរបស់ពួកគាត់ និងទទួលបានជំនួយពីផ្នែកពង្សប្រវត្តិបានដែរឬទេ ។ ម៉ារីប៊ែលបាននិយាយថា « វាមិនគ្រាន់តែបង្រួបបង្រួមគ្រួសាររបស់សមាជិកទាំងនេះប៉ុណ្ណោះទេ គឺវាថែមទាំងបង្រួបបង្រួមមិត្តភក្តិជិតស្និទ្ធទៀតផង ។ ពួកគេបានមកជួបជុំគ្នាដើម្បីចែកចាយ និងរៀនពីគ្នាទៅវិញទៅមក ។ វាពិតជាអស្ចារ្យណាស់ ! »
បន្ទាប់ពីបានធ្វើការជាមួយម៉ារីប៊ែល ស្ត្រីម្នាក់បានដឹងថា គាត់អាចផ្សារភ្ជាប់ជាមួយឪពុកម្តាយរបស់គាត់នៅក្នុងព្រះវិហារបរិសុទ្ធបាន សមាជិកវួដមួយចំនួនមានសេចក្តីរំភើបដែលអាចចូលរួមនៅព្រះវិហារបរិសុទ្ធជាមួយគាត់—ហើយមនុស្សជាច្រើនបានដឹងថា ពួកគេក៏អាចផ្សារភ្ជាប់ជាមួយឪពុកម្តាយរបស់ពួកគេ ឬសាច់ញាតិផ្សេងទៀតផងដែរ ។
សមាជិកវ័យចំណាស់ក្នុងវួដក៏បានចាប់ផ្តើមចែកចាយទីបន្ទាល់របស់ពួកគាត់នៅព្រះវិហារ រួមទាំងចែកចាយដំណើររឿងសាមញ្ញៗអំពីបុព្វការីជនរបស់ពួកគាត់ និងអារម្មណ៍ដែលពួកគាត់មានក្នុងការធ្វើពង្សប្រវត្តិរបស់ពួកគាត់ ។ ការធ្វើបែបនេះបានបំផុសគំនិតដល់សមាជិកវួដដទៃទៀតឲ្យចង់រៀនបន្ថែមទៀត ហើយមិនត្រឹមតែសមាជិកវ័យចំណាស់នោះទេ មានមនុស្សជាច្រើនបានទាក់ទងទៅអ្នកប្រឹក្សាផ្នែកពង្សប្រវត្តិដើម្បីសុំជំនួយ ។
តាមរយៈការងាររបស់នាងជាមួយអ្នកដទៃ ម៉ារីប៊ែលថែមទាំងអាចឆ្លងកាត់ការរាំងស្ទះនៅក្នុងការស្រាវជ្រាវគ្រួសាររបស់នាងទៀតផង ។ ខណៈពេលជួយស្ត្រីផ្សេងទៀតដែលមានឈ្មោះ សាន់ត្រា ខូរូណា ម៉ារីប៊ែលបានរកឃើញថានាង និងបុព្វការីជនរបស់ សាន់ត្រា មកពីទីក្រុងដូចគ្នានៅម៉ិកស៊ីកូ ។ ការរកឃើញនេះគឺរកឃើញនៅលើសំបុត្រអាពាហ៍ពិពាហ៍សម្រាប់ខ្សែស្រឡាយគ្រួសាររបស់គាត់ដោយមានបុព្វការីជនរបស់ សាន់ត្រា ធ្វើជាសាក្សីក្នុងព្រឹត្តិការណ៍នោះ ។ ម៉ារីប៊ែល និងសាន់ត្រាមានអារម្មណ៍រីករាយយ៉ាងខ្លាំងចំពោះរឿងនេះ ។ ម៉ារីប៊ែលបាននិយាយថា « ទំនាក់ទំនងរវាងក្រុមគ្រួសាររបស់យើងបានមានហួសពីសម័យកាល ជំនាន់ ប្រទេស និងសូម្បីតែសាសនា ។ ខ្ញុំបានរកឃើញ [ សាន់ត្រា ] នៅក្នុងប្រទេសផ្សេងគ្នា និយាយភាសាផ្សេង កាន់សាសនាផ្សេងពីសាសនារបស់បុព្វការីជនយើង ប៉ុន្តែទំនាក់ទំនងរបស់ [ ក្រុមគ្រួសារយើង ] ពីជំនាន់មួយទៅជំនាន់មួយនៅបន្តមាន ។ ខ្ញុំចូលចិត្តរឿងនោះ » ។
ការស្វែងរក និងជួយ « មនុស្សម្នាក់ »
ម៉ារីប៊ែលបាននិយាយថា « ខ្ញុំទទួលស្គាល់ថា មានសមាជិកជាច្រើនដែលដឹងថាពង្សាវលីមានសារៈសំខាន់ចំពោះសាសនារបស់យើង និងសម្រាប់ផែនការនៃសេចក្តីសង្គ្រោះ ប៉ុន្តែពួកគេមិនមានឧបករណ៍ ឬធនធានដើម្បីធ្វើវាដោយខ្លួនឯងទេ ។ នេះជាមូលហេតុដែលខ្ញុំបានសម្រេចចិត្តទាក់ទងទៅពួកគាត់ ពីព្រោះពួកគាត់មានពេល ពួកគាត់ចូលចិត្តចែកចាយរឿង ហើយពួកគាត់ដឹងថាការងារនេះសំខាន់ ។... ខ្ញុំកំពុងធ្វើការងារនេះ ដើម្បីឲ្យពួកគេអាចចូលប្រើបាន ដើម្បីឲ្យពួកគាត់អាចរីករាយជាមួយពរជ័យនៃកិច្ចការនេះ » ។
ម៉ារីប៊ែលបានចែកចាយបន្ថែមទៀតថា នាងមានអារម្មណ៍ថា នេះជាគឺជាអត្ថន័យនៃដំណឹងល្អ ។ ដើម្បីបម្រើ យើងត្រូវតែ « សម្លឹងមើលជុំវិញ ហើយឃើញថា តើមានតម្រូវការអ្វីខ្លះដែលត្រូវធ្វើ និងអ្វីខ្លះដែលយើងអាចធ្វើបាន ដើម្បីជួយបំពេញតម្រូវការទាំងនោះ »។
ប្រធាន រ័សុល អិម ណិលសុន បានមានប្រសាសន៍ថា « ឱ នោះគឺជាគំរូដ៏ល្អណាស់ហ្ន ដែលព្រះអង្គសង្គ្រោះបានបង្ហាញយើង—ថា តាមរយៈយើងម្នាក់ៗឈោងទៅបម្រើដល់មនុស្សតែម្នាក់ប៉ុណ្ណោះ នោះយើងអាចផ្សព្វផ្សាយសេចក្ដីស្រឡាញ់របស់ព្រះយេស៊ូវគ្រីស្ទទូទាំងពិភពលោកហើយ » ។
ដូចដែលម៉ារីប៊ែល បានរកឃើញរបៀបដើម្បីឈោងទៅ និងធ្វើការងារបម្រើដល់ « មនុស្សម្នាក់ » នៅក្នុងវួដរបស់នាង យើងទាំងអស់គ្នាអាចឈោងទៅ និងស្វែងរក « មនុស្សម្នាក់ » ដែលមានអារម្មណ៍ថា គ្មានគេចង់រាប់រក ឬ មិនមានតម្លៃ ។ ម្នាក់ម្តងៗ ធ្វើកិច្ចការជាមួយនឹងមធ្យោបាយរបស់យើង យើងអាចជួយពួកគេបង្កើនទំនាក់ទំនងដ៏អស្ចារ្យជាមួយនឹងគ្រួសាររបស់ពួកគេ ហើយពួកគេដឹងថា ពួកគេ កំពុងផ្សព្វផ្សាយសេចក្តីស្រឡាញ់របស់ព្រះយេស៊ូវគ្រីស្ទ ។
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
