របៀបសម្អាតស្លាកព្រលឹង

កុមារម្នាក់ និងម្តាយរបស់គាត់សម្អាតស្លាកព្រលឹងមួយដែលមានសំណេរជាភាសាជប៉ុននៅលើនោះ ។

ស្លាកព្រលឹងដែលគេក៏ហៅថាថ្មក្បាលផ្នូរ ឬថ្មដាក់នៅក្បាលផ្នូរ ដែលជាធម្មតាត្រូវបានដាក់ដើម្បីសម្គាល់កន្លែងបញ្ចុះសពរបស់សមាជិកគ្រួសារជាទីស្រឡាញ់ ។ ថ្មរំឭកការចងចាំទាំងនេះក៏ត្រូវបានដាក់នៅទីបញ្ចុះសពដើម្បីទុកជាការចងចាំដល់មនុស្សជាទីស្រឡាញ់ផងដែរ ដែលអាចត្រូវបានគេយកទៅបញ្ចុះនៅកន្លែងផ្សេង ឬដែលមិនអាចយកទៅបញ្ចុះបានដោយសារហេតុផលមួយចំនួនណាមួយ ។

ប្រពៃណីនៃការសម្គាល់កន្លែងបញ្ចុះសពមានអាយុកាលរាប់ពាន់ឆ្នាំមកហើយ ។ វប្បធម៌នីមួយៗមានរបៀបផ្សេងៗគ្នា ដើម្បីគោរពដល់មរណជនរបស់ពួកគេ ។ ចេញពីដំបូកដីធម្មតា គំនរដុំថ្ម ឬដើមឈើដែលទើបដាំថ្មី រហូតដល់ថ្មស្លាកសញ្ញាដែលបានឆ្លាក់យ៉ាងស្រស់ស្អាត ស្លាកសម្គាល់ផ្នូរគឺត្រូវបានធ្វើពីសម្ភារផ្សេងៗគ្នា ។

ទីបញ្ចុះសពមួយនៅប្រទេសម៉ិកស៊ិក ដែលមានផ្កាចម្រុះពណ៌នៅលើស្លាកព្រលឹង និងផ្នូរជាច្រើន

ស្លាកព្រលឹងក៏អាចជាប្រភពនៃព័ត៌មានពង្សាវលីដែលមិនអាចកាត់ថ្លៃបានផងដែរ ។ ស្លាកព្រលឹងទាំងនោះរួមមានទាំងឈ្មោះ និងកាលបរិច្ឆេទ ។ ជាញឹកញាប់ សមាជិកនៃក្រុមគ្រួសារមួយ ត្រូវបានយកទៅបញ្ចុះនៅក្បែរៗគ្នា ការធ្វើបែបនេះវាជួយឲ្យមានភាពងាយស្រួលដល់អ្នកស្រាវជ្រាវពង្សាវលីក្នុងការផ្ទៀងផ្ទាត់ឈ្មោះ និងកាលបរិច្ឆេទជាមួយនឹងកំណត់ត្រាប្រវត្តិសាស្ត្រផ្សេងៗទៀត ។ ដោយសារអាកាសធាតុ ធម្មជាតិ ការឆ្លងកាត់នៃពេលវេលា និងកត្តាផ្សេងៗទៀត ស្លាកព្រលឹងអាចសឹក កខ្វក់ កាន់ស្លែ ឬមានរុក្ខជាតិផ្សេងៗដុះលើ ខូចបែកបាក់ និងមិនអាចអានបាន ។ ជាអកុសល ប្រសិនបើស្លាកព្រលឹងត្រូវបានសម្អាតដោយសម្ភារមិនត្រឹមត្រូវ ការសម្អាតនោះអាចបណ្តាលឲ្យវាខូចខាតជាអចិន្ត្រៃយ៍កាន់តែខ្លាំង ។

ការរៀនពីរបៀបសម្អាតស្លាកព្រលឹងឲ្យបានត្រឹមត្រូវ ពិតជាមានសារៈសំខាន់ណាស់ចំពោះអាយុកាលនៃបូជនីយដ្ឋានប្រវត្តិសាស្ត្រដែលមិនអាចជំនួសបានទាំងនេះ ។ អ្នកអាចធ្វើឲ្យទីសម្រាករបស់បុព្វការីជនរបស់អ្នក មានភាពស្រស់ស្អាតបានដោយមិនមានការបំផ្លាញបន្ថែមទៀតដល់ស្លាកព្រលឹងដែលចាស់ និងខូចខាត ។ នេះជាអ្វីដែលអ្នកគួរដឹង ។

សីលធម៌ និងការអនុញ្ញាតតាមផ្លូវច្បាប់

ទីបញ្ចុះសពជុំវិញពិភពលោក មានច្បាប់ទម្លាប់ផ្សេងៗគ្នាអំពីសីលធម៌ និងច្បាប់ ។ ប្រសិនបើស្លាកព្រលឹងមានទីតាំងនៅក្នុងទីបញ្ចុះសពសាធារណៈ ឬព្រះវិហារ អ្នកត្រូវប្រាកដថា អ្នកបានសុំការអនុញ្ញាតជាមុនសិនដើម្បីសម្អាតវា ។ នៅក្នុងក្រុងមួយចំនួន ស្លាកព្រលឹងត្រូវបានគ្រប់គ្រងដោយមនុស្សដែលបានទិញវា ហើយសាលាក្រុងមិនមានសិទ្ធិអនុញ្ញាតឲ្យអ្នកដទៃចូលមកសម្អាតទីធ្លាផ្នូរនោះទេ ។ សូមទាក់ទងទៅកន្លែងទីបញ្ចុះសព ឬព្រះវិហារដែលផ្នូរនោះស្ថិតនៅ ដើម្បីដឹងថាអ្នកត្រូវសុំការអនុញ្ញាតពីនរណា ។ សូមកុំសម្អាតស្លាកព្រលឹងណាមួយ ដោយពុំបានទទួលការអនុញ្ញាតឲ្យធ្វើការសម្អាតនោះឡើយ ។

ទីបញ្ចុះសពភាគច្រើនគឺជាកន្លែងនៃគាវរភាព និងភាពស្ងប់ស្ងាត់ ។ សូមពិចារណារកពេលវេលាដ៏ល្អបំផុតដែលអ្នកអាចធ្វើការសម្អាតបាន ចៀសវាងកុំឲ្យរំខានដល់អ្នកដទៃដែលទៅលេងសាច់ញាតិរបស់គេនៅទីបញ្ចុះសពនោះ ។

ការពិនិត្យមើលស្ថានភាពនៃស្លាកព្រលឹង

សូមពិនិត្យមើលស្ថានភាពនៃស្លាកព្រលឹង មុនពេលអ្នកចាប់ផ្តើមធ្វើការសម្អាត ។ តើវាមានការខូចខាតដែរឬទេ ? តើវាមានបែក ប្រេះ ឬខូចខាតអ្វីផ្សេងទៀតដែរទេ ? មានវិធីងាយស្រួលមួយដើម្បីពិនិត្យមើលការបែកបាក់ដែលពីដំបូងឡើយវាអាចពិបាកក្នុងការមើលឃើញ ។ បន្សើមថ្មជាមួយទឹកស្អាត ហើយសង្កេតមើលវាខណៈពេលដែលវាចាប់ផ្ដើមស្ងួត ។ នៅពេលដែលវាឡើងស្ងួតនោះ ស្នាមប្រេះនឹងបង្ហាញឡើងជាស្នាមឆ្កូតសើមៗ ។ ប្រសិនបើដំណើរការនេះនាំឲ្យរកឃើញការប្រេះនៅលើស្លាកព្រលឹង ឬប្រសិនបើមានការខូចខាតធំ នោះវាជាការប្រសើរជាងដែលអ្នកគួរតែកុំប៉ះពាល់វាឡើយ ដើម្បីជៀសវាងធ្វើឲ្យមានការខូចខាតបន្ថែមទៀត ។

គោលការណ៍ណែនាំដ៏ល្អមួយគឺថា បើអ្នកមានការសង្ស័យទោះបីវាការសង្ស័យតូចមួយក្ដីថាស្លាកព្រលឹងនោះឈរនៅនឹងឬអត់ទេ ចូរទុកវាឲ្យនៅបែបនោះទៅកុំប៉ះពាល់វាឲ្យសោះ ។

ស្លាកព្រលឹងធ្វើពីថ្មម៉ាបនៅលើទីទួលដែលបែរមុខទៅរកសមុទ្រ — ស្លាកព្រលឹងត្រូវបានធ្វើពីធាតុផ្សំផ្សេងៗពីគ្នាជាច្រើន រួមទាំងថ្មម៉ាបរំឭកការចងចាំទាំងនេះ នៅទីក្រុងស៊ែរីហ្វូ ប្រទេសក្រិក ។

តើស្លាកព្រលឹងចាស់ៗធ្វើអំពីអ្វី

ប្រសិនបើអ្នកចង់ដឹងពីរបៀបដ៏ល្អបំផុតដើម្បីសម្អាតស្លាកព្រលឹងនោះ អ្នកនឹងចង់កំណត់ថាវាត្រូវបានធ្វើឡើងពីអ្វី ។ ស្លាកព្រលឹងពីមុនៗមកជាច្រើន ត្រូវបានធ្វើឡើងជាមួយ ថ្មបន្ទះ ឬថ្មភក់ ។ ធាតុផ្សំទូទៅផ្សេងៗទៀតអាចមានឈើ បេតុង ថ្មកំបោរ ថ្មម៉ាប ដែក សំរិទ្ធ និងថ្មក្រានីត ។

រឿងមួយចំនួនដែលត្រូវពិចារណា ៖

ថ្មភក់គឺមានភាពផុយស្រួយណាស់ ហើយងាយនឹងពុកផុយ និងរលាយទៅតាមពេលវេលា ។
ថ្មម៉ាបមានភាពទន់ និងមានភាពផុយស្រួយ និងងាយកាត់នឹងជាតិអាស៊ីត និងសារធាតុគីមីខ្លាំង ។
ថ្មបន្ទះមានភាពធន់ជាង ប៉ុន្តែវាក៏អាចផុយបែកផងដែរ ដែលបណ្តាលឲ្យបែកតាមស្នាមឆូតធម្មជាតិរបស់វា ។
ថ្មក្រានីតគឺជាថ្មរឹងខ្លាំង និងប្រើប្រាស់ធន់បានយូរ ។ វាគឺជាថ្មដែលពេញនិយមនាពេលបច្ចុប្បន្ននេះ សម្រាប់យកទៅធ្វើស្លាកព្រលឹងពីព្រោះវាទប់ទល់នឹងអាកាសធាតុបានល្អ ។ វាអាចទប់ទល់ជាមួយនឹងផលិតផលសម្អាតបានល្អប្រសើរជាងគេ ។

កញ្ចប់ធាតុផ្សំសម្រាប់សម្អាតស្លាកព្រលឹង

នៅពេលអ្នកបានកំណត់ធាតុផ្សំប្រើសម្រាប់ធ្វើស្លាកព្រលឹងនេះហើយ បានពិនិត្យមើលស្ថានភាពរបស់ស្លាកព្រលឹងនោះរួច វាដល់ពេលដែលត្រូវយកធាតុផ្សំទាំងនោះទៅសម្អាតស្លាកព្រលឹងដែលអ្នកមានហើយ ។

សូមបង្កើតកញ្ចប់សម្រាប់សម្អាតស្លាកព្រលឹងដោយខ្លួនឯងជាមួយនឹងវត្ថុដូចខាងក្រោមនេះ ៖

ជក់ដែលមានរោមទន់
ឈើ ឬជ័រប្លាស្ទិកសម្រាប់ឈូសកៀរ
ទឹកចម្រោះដោយចំហុយ
Orvus paste ( សាប៊ូសម្រាប់លាងសម្អាត )
ទឹកលាងសម្អាតស្នាមប្រលាក់ D/2 Biological Solution ( ប្រើសម្រាប់ការដុះលូតលាស់នៃជីវសាស្រ្ត )
ធុង
ដបសម្រាប់បាញ់
ក្រណាត់ទន់ធ្វើពីវត្ថុធាតុធម្មជាតិ ( បើបានក្រណាត់កប្បាសរឹតតែល្អ )
ទុយោទឹក ( ប្រសិនបើត្រូវបានអនុញ្ញាត និងអាចប្រើបាន )
ស្រោមដៃ
សម្ភារការពារភ្នែក
ថ្នាំបាញ់សម្លាប់សត្វល្អិត

អ្វីដែលត្រូវចៀសវាង

ទាំងនេះគឺជាឧបករណ៍ និងសារធាតុផ្សំមួយចំនួនដែលអាចបណ្តាលឱ្យមានការខូចខាតដល់ស្លាកព្រលឹងដោយអចេតនាណាមួយ ៖

ឧបករណ៍ប្រើថាមពលដូចជាម៉ាស៊ីនសម្រាប់លាងសម្អាត ឬសម្រាប់ដុសខាត់
ឧបករណ៍ដែករឹង
ជក់ធ្វើពីលួស និងប្រដាប់ខាត់
ទឹកថ្នាំដាក់ឲ្យស ឬឧបករណ៍សម្អាតដែលមានជាតិអាស៊ីត
ក្រែមលាបកោរពុកមាត់
ឧបករណ៍សម្អាតផ្ទះទូទៅ ( ករណីលើកលែងតែមួយគត់គឺសាប៊ូលាងចាន ម៉ាកDawn និងទឹកសម្អាតកញ្ចក់ដែលគ្មានជាតិអាម៉ូញាក់ ដែលគេអាចយកមកប្រើដើម្បីសម្អាតស្លាកព្រលឹងថ្មក្រានីតបាន ) ។

ព្យាយាមចៀសវាងធ្វើការសម្អាតក្នុងពេលមានអាកាសធាតុក្តៅ ឬត្រជាក់ខ្លាំង ។ ការដាក់ទឹកត្រជាក់នៅលើថ្មដែលក្តៅអាចបណ្តាលឲ្យប្រេះបាក់ថ្មបាន ។ លើសពីនេះទៀត ប្រសិនបើមានសីតុណ្ហភាពត្រជាក់ខ្លាំងដល់ថ្នាក់កក សូមរង់ចាំរហូតដល់សីតុណ្ហភាពក្តៅបន្តិច ។ ទឹកដែលកកក៏អាចបណ្តាលឲ្យថ្មប្រេះ និងបាក់បានផងដែរ ។

ការណែនាំជាជំហានៗ ដើម្បីសម្អាតស្លាកព្រលឹងចាស់ៗ

ស្ត្រីម្នាក់សម្អាតស្លាកព្រលឹងគ្រួសាររបស់នាងដែលបានតុបតែងដោយផ្កាដ៏ស្រស់ស្អាត ។

ដោយចាំថាស្លាកព្រលឹងត្រូវបានធ្វើឡើងពីអ្វីរួមទាំងច្បាប់ និងសីលធម៌នៅក្នុងតំបន់របស់អ្នក វាដល់ពេលហើយដើម្បីចាប់ផ្តើមដំណើរការដុសខាត់លាងសម្អាត ។ អ្នកអាចពិចារណានូវវិធីសាស្រ្តផ្សេងៗគ្នានៅពេលសម្អាតស្លាកព្រលឹងចាស់ៗ ។

នៅពេលជ្រើសរើសសម្ភារសម្អាត ត្រូវប្រាកដថាសារធាតុគីមីនឹងមិនបំផ្លាញប្រភេទថ្មដែលស្លាកព្រលឹងបានធ្វើឡើងឡើយ ។ អ្នកប្រហែលជាត្រូវធ្វើការស្រាវជ្រាវបន្ថែមទៀតដោយខ្លួនឯង ដើម្បីកំណត់ថាតើឧបករណ៍សម្អាតមួយណាដែលល្អបំផុតសម្រាប់សម្អាតស្លាកព្រលឹងជាក់លាក់ណាមួយដែលអ្នកចង់សម្អាតនោះ ។

ចូរកុំដាក់សារធាតុគីមីណាមួយនៅលើស្លាកព្រលឹង ប្រសិនបើអ្នកមិនដឹងថាសារធាតុគីមីនោះនឹងមានប្រតិកម្មយ៉ាងណាជាមួយនឹងថ្មនោះទេ ។ ភាគច្រើន គ្រាន់តែទឹកស្អាតគឺវាគ្រប់គ្រាន់ហើយ ។

ជំហាន ទី១ ៖ បន្សើមថ្ម

ត្រូវប្រាកដថាអ្នកបានយកទឹកស្អាតមកជាមួយអ្នកគ្រប់គ្រាន់ ។ បន្សើមស្លាកព្រលឹងឲ្យជោគសព្វជាមួយទឹកស្អាត ។ ការធ្វើឲ្យថ្មសើមនឹងជួយការពារ ឬកាត់បន្ថយសារធាតុគីមីដែលអាចស្រូបចូលទៅក្នុងផ្ទៃថ្មដែលមានភាពផុយស្រួយ ។ ទឹកស្អាតគឺជាជំហានដំបូងក្នុងការដកយកភាពកខ្វក់ និងកាកសំណល់លើផ្ធៃថ្មនោះ ។

ជំហាន ទី២ ៖ យកកាកសំណល់ចេញ

ប្រើជក់រោមទន់ៗបោសយកស្លែ ធូលី ស្លឹកឈើ និងស្លែចេញដោយថ្នមៗ ។ ស្លែគឺជាប្រភេទរុក្ខជាតិម៉្យាងនៃសរីរាង្គពីរ ( ផ្សិត និងសារាយ ) ដែលត្រូវបានរកឃើញជាញឹកញាប់នៅលើស្លាកព្រលឹងចាស់ៗ ។ អ្នកអាចប្រើឈើ ឬជ័រប្លាស្ទិកឈូសកៀរ ប្រសិនបើមានច្រើន ប៉ុន្តែបន្តធ្វើដោយថ្នមៗ ។

ជំហាន ទី៣ ៖ លាបទឹកសម្រាប់លាងសម្អាត ហើយជូតយ៉ាងថ្នមៗ

ធ្វើការសាកល្បងឧបករណ៍សម្អាតដែលអ្នកនឹងប្រើនៅលើថ្មនោះពីមុនពេលបន្តដំណើរការលាងសម្អាតទាំងមូល ។ អ្នកអាចពិចារណាសាកល្បងផ្ទៃតូចណាមួយ ហើយបន្ទាប់មកទុកឲ្យវាស្ងួតទាំងស្រុង ដើម្បីមើលថាតើវាមានសភាពបែបណា ។

ដោយប្រើជក់រោមទន់ៗ ក្រណាត់ ឬអេប៉ុងទន់ ជូតថ្មមៗនៅលើស្លាកព្រលឹងក្នុងចលនារាងជារង្វង់ ។ ចូរកុំសង្កត់ខ្លាំងពេក ។ អ្នកតែងតែអាចលាងសម្អាតលើវាម្តងទៀតបានប្រសិនបើអ្នកចង់ ។ ចូររក្សាផ្ទៃថ្មខាងលើសើមខណៈពេលដែលអ្នកសម្អាត ។

ចូរកុំប្រើឧបករណ៍ដែកសម្រាប់ជូត ព្រោះវាអាចកោស កូត និងខូចខាតស្លាកព្រលឹងបាន ។

នៅពេលអ្នកជូតថ្ម ចូរសម្អាតវាពីក្រោម ហើយផ្លាស់ទីឡើងទៅលើ ។ របៀបធ្វើនេះស្ដាប់ទៅហាក់ដូចជាឆ្គង ពីព្រោះអ្នកនឹងធ្វើឲ្យមានទឹកកខ្វក់ធ្លាក់ចុះចំកន្លែងដែលអ្នកបានសម្អាតរួចហើយ ។ ការធ្វើរបៀបគឺ ធានាថាថ្មនេះត្រូវបានសើមទឹកគ្រប់គ្រាន់មុនពេលទឹកកខ្វក់ហូរប៉ះលើផ្ទៃនោះ ដូច្នេះហើយវាជួយការពារស្នាមប្រតាកមកពីរបៀបលាងសម្អាតនេះ ។

តើខ្ញុំអាចប្រើឧបករណ៍សម្អាតមួយណា ?

ស្ត្រីម្នាក់ពាក់ស្រោមដៃ កាន់ច្រាស់រៀបចំដើម្បីដុសជូតស្លាកព្រលឹងដែលសើម ។

អ្នកជំនាញណែនាំឲ្យប្រើជម្រើសដែលស្រាលបំផុត នៅពេលនិយាយអំពីការប្រើប្រាស់សារធាតុគីមីដើម្បីសម្អាតថ្ម ។ ក្នុងករណីជាច្រើន ទឹកស្អាតដោយគ្មានសាប៊ូសោះគឺគ្រប់គ្រាន់ហើយ ។ អ្នកអាចប្រើឧបករណ៍សម្អាតដែលមិនមានសារធាតុអីយ៉ូត ដូចជា Orvus paste ជាភ្នាក់ងារសម្រាប់សម្អាត ។ មានវិធីសាស្រ្តផ្សេងៗក្នុងការលាបថ្នាំសម្អាតនោះ ។ អនុវត្តតាមការណែនាំនៅលើធុងថ្នាំនោះ សម្រាប់ការអនុវត្តល្អបំផុត ។ ត្រូវប្រាកដថាលាងថ្នាំទាំងអស់ចេញជាមួយទឹក ។

បន្ទាប់ពីការសម្អាតដំបូង ថ្មអាចនៅតែមានស្លែ ឬក្អែល នៅជាប់នឹងស្លាកព្រលឹងនោះ ។ នៅក្នុងករណីនេះ អ្នកអាចប្រើឧបករណ៍សម្អាតជីវគីមី ( ដូចជា D/2 Biological Solution ) ដើម្បីដកយកវត្ថុដែលមានជីវសាស្រ្តដែលនៅសេសសល់ចេញ ។ អនុវត្តតាមការណែនាំនៅលើធុងថ្នាំសម្រាប់សម្អាតដោយប្រុងប្រយ័ត្ន ។ ប្រសិនបើអ្នកប្រើសារធាតុមានជីវគីមី វាអាចត្រូវចំណាយពេលជាច្រើនថ្ងៃ ឬច្រើនសប្តាហ៍ផងក៏ថាបាន ដើម្បីមើលឃើញពីឥទិ្ធពលទាំងស្រុងនៃការសម្អាតនោះ ។ ចូរកុំបារម្ភឡើយ ប្រសិនបើអ្នកឃើញមានពណ៌ទឹកក្រូចលេចឡើងនៅលើថ្មបន្ទាប់ពីអ្នកលាបសារធាតុជីវគីមីរួច ។ ពណ៌នេះកើតឡើងមកពីសារធាតុជីវសាស្រ្តនៅលើថ្មងាប់ ហើយជាធម្មតាវានឹងបាត់ទៅវិញតាមពេលវេលា ។

ជំហាន ទី៤ ៖ លាងសម្អាតឲ្យបានគ្រប់ជ្រុងជ្រោយ

លាងថ្មឲ្យបានគ្រប់ជ្រុងជ្រោយជាមួយនឹងទឹកស្អាត ។ ជំហាននេះគឺជាជំហានសំខាន់បំផុតក្នុងចំណោមជំហានទាំងអស់ ។ ការទុកសារធាតុគីមីនៅលើថ្មប្រាកដណាស់ជាវិធីមួយដែលបំផ្លាញស្លាកព្រលឹងនោះ ។ ដើម្បីឲ្យមានសុវត្ថិភាព សូមលាងថ្មនោះជាមួយទឹកឲ្យបានច្រើនដង ។ អ្នកក៏អាចប្រើក្រណាត់ស្អាតផងដែរ ដើម្បីប្រាកដថាអ្នកអាចដកយកថ្នាំសម្រាប់សម្អាតទាំងអស់ចេញបានស្អាតល្អ ។

ជំហាន ទី៥ ៖ សម្ងួត

វាជាការល្អបំផុតដើម្បីអនុញ្ញាតឲ្យថ្មចាស់ទាំងនោះស្ងួតតាមធម្មជាតិ ។ ការអនុញ្ញាតឲ្យថ្មស្ងួតតាមធម្មជាតិអាចចំណាយពេលជាច្រើនថ្ងៃ អាស្រ័យទៅលើជម្រៅនៃរន្ធថ្ម និងស្ថានភាពអាកាសធាតុផងដែរ ។

ជំហាន ទី៦ ៖ ពិនិត្យមើលឡើងវិញ

បុរស និងស្ត្រីម្នាក់សម្អាតស្លាកព្រលឹង មួយដែលមានសំណេរជាភាសាជប៉ុននៅលើនោះ ។

ចូរកុំប្រញាប់ប្រញាល់ដើម្បីធ្វើឲ្យថ្មស្អាតយ៉ាងល្អឥតខ្ចោះដោយគ្រាន់តែធ្វើលើកទី១នោះ ។ អ្នកប្រហែលជាចង់បន្សើមថ្មម្តងទៀត ហើយជូតចេញ ប៉ុន្តែសារធាតុគីមីដែលបានប្រើអាចមានប្រសិទ្ធភាពក្នុងរយៈពេលជាច្រើនសប្តាហ៍ខាងមុខ ។ ត្រឡប់មកវិញក្នុងរយៈពេលពីបីថ្ងៃក្រោយ ឬសូម្បីតែពីរបីសប្តាហ៍ក្រោយ ដើម្បីមើលថាតើថ្មត្រូវការលាងសម្អាតម្តងទៀតដែរឬទេ ។

ការសម្អាតថ្មក្រានីត

ថ្មក្រានីតថ្មីៗដែលប្រើជាញឹកញាប់សព្វថ្ងៃនេះត្រូវបានធ្វើឡើងពីថ្មដ៏រឹងមាំបំផុតមួយចំនួនដែលអាចរកបាន ។ ថ្មក្រានីតអាចសើមជាមួយនឹងទឹកស្អាត ហើយជូតយ៉ាងថ្មមៗជាមួយសាប៊ូលាងចាន Dawn ។ សម្ងួតវាជាមួយនឹងក្រណាត់មីក្រូហ្វាយប៊ើរស្អាត ឬទុកឲ្យវាស្ងួតដោយខ្លួនឯង ។ នៅពេលវាស្ងួតទាំងស្រុងហើយ អ្នកអាចប្រើឧបករណ៍សម្អាតកញ្ចក់ដែលគ្មានសារធាតុអាម៉ូញាក់ ដើម្បីធ្វើឲ្យវាមានភាពភ្លឺរលោងដោយគ្មានស្នាម ។ ចូរកុំប្រើវិធីសាស្រ្តនេះនៅលើថ្មដែលមិនធ្វើពីថ្មក្រានីតឡើយ ។

តើគួរសម្អាតស្លាកព្រលឹងញឹកញាប់ប៉ុនណាដែរ ?

កត្តាមួយចំនួនដែលគួរពិចារណាដើម្បីកំណត់ថា តើត្រូវសម្អាតស្លាកព្រលឹងដ៏មានតម្លៃនេះញឹកញាប់ប៉ុនណា ៖

តើថ្មនេះធ្វើពីអ្វី ?
តើថ្មនេះមានអាយុកាលប៉ុន្មានហើយ ?
តើថ្មនេះខូចខាតប៉ុនណាហើយ ?
តើអ្វីខ្លះជាលក្ខខណ្ឌនៃបរិស្ថាន ?

អ្នកជំនាញជាច្រើនយល់ស្របថា ការសម្អាតស្លាកព្រលឹងជាមួយអ្វីដែលលើសពីការប្រើជក់ទន់ៗ គួរតែធ្វើរៀងរាល់ ៧ទៅ ១០ឆ្នាំម្តង ។
ចូរពិចារណាពីស្ថានភាពបរិស្ថានដែលអាចប៉ះពាល់ដល់ការសម្អាតស្លាកព្រលឹង ។ ប្រសិនបើស្លាកព្រលឹងស្ថិតនៅក្នុងតំបន់ដែលមានពន្លឺព្រះអាទិត្យ វាប្រហែលជាមិនចាំបាច់ត្រូវបានសម្អាតញឹកញាប់ពេកដូចស្លាកព្រលឹងដែលនៅក្រោមដើមឈើ ដែលមានជ័រឈើ និងលាមកបក្សីដែលអាចបណ្តាលឲ្យមានស្នាមប្រឡាក់បន្ថែមទៀតនោះទេ ។

ការសម្អាតស្លាកព្រលឹងគ្រួសារគឺជាវិធីដ៏ល្អមួយ ដើម្បីបង្ហាញការគោរព និងក្តីស្រឡាញ់ចំពោះមនុស្សជាទីស្រឡាញ់ ។ វាមិនត្រឹមតែជាការផ្តល់កិត្តិយសដល់នរណាម្នាក់ដែលអ្នកស្រឡាញ់ប៉ុណ្ណោះទេ ប៉ុន្តែថែមទាំងជាវិធីមួយដើម្បីលម្អ និងថែរក្សាអ្វីមួយសម្រាប់សហគមន៍ទាំងមូលផងដែរ ។ ការយល់ដឹងពីរបៀបសម្អាតស្លាកព្រលឹងចាស់ និងថ្មីៗនឹងជួយធានាថាបូជនីយដ្ឋានពិសេសទាំងនេះនៅយូរអង្វែងសម្រាប់មនុស្សជំនាន់ក្រោយ ។

ឪពុកចង្អុលទៅលើស្លាកព្រលឹងមួយដែលកូនស្រីរបស់គាត់កំពុងសម្លឹងមើល ។

ទៅលេងស្លាកព្រលឹងរបស់បុព្វការីជនរបស់អ្នក ។

ការទៅលេងកន្លែងបញ្ចុះសពរបស់បុព្វការីជនរបស់អ្នក អាចជាវិធីដ៏មានន័យមួយដើម្បីភ្ជាប់ទំនាក់ទំនងជាមួយពួកគាត់ ។ តើអ្នកឆ្ងល់ថាសាច់ញាតិរបស់អ្នកត្រូវបានបញ្ចុះនៅទីណាទេ ? អ្នកអាចប្រើឧបករណ៍ស្វែងរកទីបញ្ចុះសពដើម្បីស្វែងរកពួកគាត់បាន ។ អ្នកអាចស្វែងរកតាមទីបញ្ចុះសពដែលមានឈ្មោះជាក់លាក់ ក៏ដូចជាតាមឈ្មោះមនុស្សជាទីស្រឡាញ់របស់អ្នកដែលមាននៅលើស្លាកព្រលឹងបានផងដែរ ។ អ្នកមិនអាចដឹងបានថាអ្នកនឹងអាចរកឃើញអ្វីខ្លះទេ !

សាកល្បងស្វែងរកទីបញ្ចុះសព

នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។

របៀប​សម្អាត​ស្លាក​ព្រលឹង ៖ គន្លឹះ និង​តិចនិច​ខ្លះៗ