ថ្ងៃឈប់សម្រាក និងការប្រារព្ធពិធីអបអរសាទរគឺជាពេលវេលាដ៏ល្អបំផុតមួយចំនួនដើម្បីជួបជុំជាមួយក្រុមគ្រួសារ ដើម្បី បង្កើតអនុស្សាវរីយ៍ដ៏យូរអង្វែងពេញមួយជីវិត ហើយ ក្រុមគ្រួសារនៅទូទាំងពិភពលោកមានអំណរគុណចំពោះប្រពៃណីដែលពួកគេប្រារព្ធរួមគ្នា ។ ទាំងនេះគឺជាថ្ងៃឈប់សម្រាកប្រពៃណីមួយចំនួននៅជុំវិញពិភពលោក ដែលអ្នកប្រហែលជាមិនធ្លាប់បានឮពីមុនមក ។
១. បុណ្យគ្រីស្ទម៉ាស់នៅប្រទេសហ្វាំងឡង់—ពេលវេលានៃការចងចាំ
នៅ មួយថ្ងៃមុនថ្ងៃបុណ្យគ្រីស្ទម៉ាស់នៅប្រទេសហ្វាំងឡង់ ក្រុមគ្រួសារទាំងឡាយដាក់ទៀនដែលបានអុជរួច នៅជិតផ្នូររបស់មនុស្សជាទីស្រឡាញ់របស់ពួកគេនៅពេលធ្លាក់ព្រិល ។ ទៀនគឺជានិមិត្តរូបនៃការរស់ឡើងវិញ និងជាការរំឭកថា បុព្វការីជននឹងរស់ឡើងវិញ ។ តាមវិធីនេះ បុណ្យគ្រីស្ទម៉ាស់នៅ ប្រទេសហ្វាំងឡង់ គឺជាថ្ងៃឈប់សម្រាកដែលផ្តោតលើគ្រួសារ ។ វាជាពេលមួយនៃការចងចាំ និងភាពសុខសាន្ដ ។
២. ពិធីបុណ្យនៃពន្លឺ ឌីវ៉ាលី—ជ័យជម្នះនៃសេចក្ដីល្អលើសេចក្ដីអាក្រក់
ពិធីបុណ្យនៃពន្លឺ ឌីវ៉ាលី គឺជាពិធីបុណ្យដែលមានរយៈពេលប្រាំថ្ងៃ ដែលប្រារព្ធនៅរដូវស្លឹកឈើជ្រុះដោយជនជាតិហិណ្ឌូ ជនជាតិស៊ីក និងជនជាតិជេន នៅទូទាំងពិភពលោក ។ ទោះបីជាថ្ងៃឈប់សម្រាកនេះត្រូវបានប្រារព្ធនៅជុំវិញពិភពលោកក្ដី ក៏វាមានអត្ថន័យ និងសារៈសំខាន់ខុសគ្នាៗទៅតាមតំបន់ និងសាសនានីមួយៗដែលប្រារព្ធពិធីនេះផងដែរ ។
សម្រាប់មនុស្សមួយចំនួន ពិធីបុណ្យឌីវ៉ាលី គឺជាការអបអរសាទរនៃការវិលត្រឡប់មកវិញនៃព្រះអម្ចាស់រ៉ាម៉ា បន្ទាប់ពីការនិរទេសខ្លួនរបស់ទ្រង់ ។ មនុស្សមួយចំនួនផ្សេងទៀតភ្ជាប់ពិធីបុណ្យនេះទៅនឹងព្រះម៉ែនៃភាពចម្រុងចម្រើន និងទ្រព្យសម្បតិ្ដ គឺព្រះម៉ែលក្ម្សី ប៉ុន្ដែមានមនុស្សផ្សេងទៀតដែលប្រារព្ធពិធីបុណ្យនេះ ដើម្បីអបអរជ័យជម្នះរបស់ព្រះវិស្ណុលើស្ដេចក្រុងពាលី ។
ទោះបីជាមានភាពខុសគ្នាច្រើនក៏ដោយ ក៏មាននិមិត្តសញ្ញាទូទៅមួយដែលតំណាងឲ្យថ្ងៃឈប់សម្រាកនេះដែរ —ឌីវ៉ាលី តំណាងឲ្យជ័យជម្នះនៃសេចក្ដីល្អលើសេចក្ដីអាក្រក់ និងពន្លឺលើភាពងងឹត ។ ក្រុមគ្រួសារទាំងឡាយប្រារព្ធពិធីនេះដោយការបំភ្លឺផ្ទះរបស់ពួកគេដោយប្រើចង្កៀងដីឥដ្ឋ ឬចង្កៀងប្រេង និងបង្កើតក្បាច់រចនាដ៏ល្អិតល្អន់ដែលធ្វើពីអង្ករ ឬម្សៅនៅខាងមុខទ្វារ ឬទីសក្ការៈបូជា ។
៣. ពិធីបុណ្យ Eid Al-Fitr—ចុងបញ្ចប់នៃការតមអាហាររយៈពេល ៣០ ថ្ងៃ
Eid Al-Fitr មានន័យថា « ពិធីបុណ្យនៃការបញ្ចប់ការតមអាហារ » គឺជាការប្រារព្ធពិធីបីថ្ងៃ ដែលប្រារព្ធឡើងដោយជនជាតិម៉ូស្លីមនៅទូទាំងពិភពលោក ។ ជាមួយការប្រារព្ធពិធីបុណ្យ Eid Al-Fitr ជនជាតិម៉ូស្លីមប្រារព្ធពិធីបញ្ចប់នៃខែរ៉ាម៉ាដាន ដែលជាការតមអាហារតាំងពីព្រឹកព្រលឹមដល់ថ្ងៃលិចក្នុងរយៈពេល ៣០ ថ្ងៃ ។
នៅថ្ងៃដំបូងនៃពិធីបុណ្យ Eid Al-Fitr សហគមន៍ប្រមូលផ្តុំគ្នាដើម្បីអធិស្ឋាន និងស្ដាប់ធម្មទេសនា ។ បន្ទាប់ពីការជួបជុំនេះ ក្រុមគ្រួសារ និងមិត្តភក្តិទទួលទានអាហារពេលព្រឹករួមគ្នា ដែលជាអាហារដំបូងគេក្នុងរយៈពេលមួយខែដែលទទួលទាននៅអំឡុងពេលថ្ងៃ ។ មនុស្សផ្តល់អំណោយដល់កុមារ បរិច្ចាគដល់អង្គការសប្បុរសធម៌ ទៅលេងគ្រួសារ និងគោរពដល់បុព្វការីជនរបស់ពួកគេនៅទីបញ្ចុះសព ។
៤. ពិធីបុណ្យ Festa Junina—ការប្រមូលផលនៅរដូវក្តៅ
ពិធីបុណ្យ Festa Junina ត្រូវបានប្រារព្ធឡើងនៅប្រទេសប្រេស៊ីល នៅថ្ងៃទី២៤ ខែមិថុនា ដើម្បីសម្គាល់ចុងបញ្ចប់នៃរដូវក្តៅ និងការចាប់ផ្តើមនៃរដូវប្រមូលផល ។ វាមានដើមកំណើតជាថ្ងៃឈប់សម្រាករបស់និកាយកាតូលិក និងអបអរដល់ពួកបរិសុទ្ធបីរូបរបស់និកាយកាតូលិក ៖ សេនត៍ អេនធូនី សេនត៍ យ៉ូហាន និងសេនត៍ ពេត្រុស ។
ក្រុមគ្រួសារទាំងឡាយប្រារព្ធពិធីបុណ្យ Festa Junina ដោយស្លៀកពាក់តាមបែបជនបទ ជាសម្លៀកបំពាក់បែបប្រមូលផល និងធ្វើភ្នក់ភ្លើងនៅតាមផ្លូវនៅមុខផ្ទះរបស់ពួកគេ ។ ដោយសារខែមិថុនាគឺជាខែត្រជាក់ ភ្នក់ភ្លើងជួយបង្កើតទីតាំងកក់ក្តៅមួយសម្រាប់សហគមន៍ដើម្បីប្រមូលផ្តុំគ្នា ។ នៅក្នុង ប្រទេសប្រេស៊ីល ផ្លែពោតភាគច្រើនត្រូវបានប្រមូលផលនៅក្នុងខែមិថុនា ។ ដោយសារតែការប្រមូលផលនេះ អាហារជាច្រើនដែលទទួលទានក្នុងអំឡុងពិធីបុណ្យ Festa Junina ត្រូវបានធ្វើឡើងពីផ្លែពោត ។
៥. ពិធីបុណ្យ Maslenitsa—ចុងបញ្ចប់នៃរដូវរងាដ៏សែនត្រជាក់
Maslenitsa គឺជាថ្ងៃឈប់សម្រាករបស់ជនជាតិស្លាវ ដែលបានប្រារព្ធឡើងមុនពេល Great Lent ( ពិធីតមអាហារដ៏ធំ ) នៅខែមីនា ។ ហើយក៏ត្រូវបានគេហៅថា សប្ដាហ៍នំផេនខេកផងដែរ នោះ Maslenitsa គឺជាថ្ងៃឈប់សម្រាករយៈពេលមួយសប្ដាហ៍ពេញ ដែលជនជាតិរុស្សីទទួលទាន blinis នំផេនខេកស្ដើងដែលមានដាក់គ្រឿងផ្សំផ្សេងទៀតនៅពីលើ ដែលមានតាំងពីរសជាតិផ្អែមទៅដល់រសជាតិប្រៃ ។ Blinis តំណាងឲ្យព្រះអាទិត្យបាំងឆ័ត្រ និងភាពកក់ក្តៅ និងការចាប់ផ្ដើមនៃការស្វាគមន៍ការបញ្ចប់នៃរដូវរងា ។
សប្តាហ៍នៃ Maslenitsa ក៏រួមបញ្ចូលទាំងការលេងគប់ដុំព្រិល ការជួបជុំគ្រួសារ និងព្រឹត្តិការណ៍នានារបស់សហគមន៍ផងដែរ ។ នៅចុងបញ្ចប់នៃសប្ដាហ៍ វាជាប្រពៃណីក្នុងការដុតរូបចំបើង « ព្រះនាងម៉ាស្លិននីស្ត្សា » ដែលតំណាងឲ្យរដូវរងា ។
៦. ពិធីបុណ្យ មួយថ្ងៃមុនទិវានីកូឡាស—ថ្ងៃកំណើតរបស់ Sinterklaas
នៅថ្ងៃទី៥ ខែធ្នូ ដែលជាយប់មុនថ្ងៃនៃទិវា សេនត៍ នីកូឡាស កុមារជនជាតិអាល្លឺម៉ង់ត្រូវបានគេប្រាប់ថា សេនតាក្លូស ធ្វើដំណើរឆ្ងាយមកពីប្រទេសអេស្ប៉ាញមកកាន់ ប្រទេសហូឡង់ ដើម្បីចែកចាយរបស់របរក្មេងលេង ។ Sinterklaas ( សេនតាក្លូស ) យោងតាមប្រពៃណី ទុកទូករបស់លោកនៅឯកំពង់ផែ ហើយជិះសេះ-សពេញទីក្រុង ។
ជំនួយការរបស់លោកទាំងអស់ត្រូវបានហៅថា Piet ( ភីត ) ជួយលោកដឹកជញ្ជូនកាដូទៅឲ្យក្មេងៗដែលបានធ្វើល្អ ។ ផ្ទុយទៅវិញ ក្មេងៗក្បាលខូចនឹងត្រូវបានគេយកទៅប្រទេសអេស្ប៉ាញរយៈពេលមួយឆ្នាំដើម្បីរៀនពីការធ្វើជាក្មេងល្អ ។
ពិធីបុណ្យ មួយថ្ងៃមុនទិវា នីកូឡាស និងបុណ្យគ្រីស្ទម៉ាសគឺជាថ្ងៃឈប់សម្រាកផ្សេងពីគ្នានៅក្នុងប្រទេសហូឡង់ ។ ថ្ងៃបុណ្យគ្រីស្ទម៉ាសដែលត្រូវបានគេស្គាល់ថាជា Eerste Kerstdag គឺជាថ្ងៃឈប់សម្រាកដែលមានគារវភាព និងផ្តោតសំខាន់លើគ្រួសារ ដោយមានការទទួលទានអាហារជាគ្រួសារ ការថ្វាយបង្គំនៅព្រះវិហារ និងដំណើររឿងបុណ្យគ្រីស្ទម៉ាសនានា ។
៧. ពិធីបុណ្យ Tu B'shevat—ប្រារព្ធពិធីបុណ្យមាតាធម្មជាតិ
Tu B'shevat គឺជាពិធីប្រពៃណីមួយដែលប្រារព្ធឡើងដោយជនជាតិជ្វីហ្វ នៅថ្ងៃទី១៥ នៃខែ Shevat ( ខែមករា ឬ ខែកុម្ភៈ អាស្រ័យលើប្រតិទិនហេព្រើរ ) ។ គោលបំណងរបស់ពិធីបុណ្យនេះ គឺដើម្បីអបអរសាទរការបញ្ចប់នៃរដូវភ្លៀង និងសង្កត់ធ្ងន់លើការទទួលខុសត្រូវក្នុងការថែទាំ និងបីបាច់ផែនដី ។ មនុស្សដាំដើមឈើ ទទួលទានផ្លែឈើ និងអបអរសាទរភាពស្រស់ស្អាត និងភាពអស្ចារ្យនៃភពផែនដីរបស់យើង ។
៨. ពិធីបុណ្យ Qingming—គោរពអតីតកាល និងអបអរសាទរអនាគត
ពិធីបុណ្យ Qingming របស់ប្រទេសចិនគឺជាពេលវេលាសម្រាប់គ្រួសារដើម្បីគោរពដល់បុព្វការីជនរបស់ពួកគេ និងប្រារព្ធពិធីនៃការចាប់ផ្តើមនៃនិទាឃរដូវ ។ ថ្ងៃឈប់សម្រាកនេះត្រូវបានគេហៅផងដែរថាជា « ទិវាសែនផ្នូរ » ឬ « ពន្លឺដ៏បរិសុទ្ធ »—ដែលជាការបកប្រែតាមន័យត្រង់ជាភាសាអង់គ្លេស—ហើយជាទូទៅគឺនៅចំរវាងថ្ងៃទី៤ និងថ្ងៃទី៦ ខែមេសា ។
ដូចដែលឈ្មោះបានបង្ហាញ ពិធីបុណ្យ Qingming គឺជាពេលវេលាសម្រាប់គ្រួសារដើម្បីបង្ហាញការគោរពចំពោះបុព្វការីជនរបស់ពួកគេដោយការទៅលេង សម្អាត និងជួសជុលផ្នូរបុព្វការីជនរបស់ពួកគេ ។ ពេលខ្លះ ក្រុមគ្រួសារទាំងឡាយក៏សែនកម្រងផ្កា ឬអាហារនៅពីមុខផ្នូរទាំងនោះផងដែរ ។
Qingming ក៏ជាការប្រារព្ធពិធីនៃការចាប់កំណើតថ្មី និងការចាប់ផ្តើមនៃនិទាឃរដូវផងដែរ ។ ក្នុងអំឡុង Qingming មនុស្សតែងតែបង្ហោះខ្លែង ឬគោមពណ៌ ចូលរួមកីឡា ឬគ្រាន់តែចំណាយពេលនៅខាងក្រៅដើម្បីរីករាយជាមួយធម្មជាតិបៃតងថ្មី និងផ្កានៃនិទាឃរដូវ ។
តើពិធីបុណ្យអ្វីខ្លះដែលអ្នកនឹងប្រារព្ធនៅឆ្នាំនេះ ?
ថ្ងៃឈប់សម្រាកដែលយើងប្រារព្ធ និងប្រពៃណីដែលយើងអនុវត្ត គឺជាផ្នែកមួយដ៏សំខាន់នៃអ្វីដែលចងភ្ជាប់គ្រួសារ និងវប្បធម៌របស់យើង ។ តើគ្រួសាររបស់អ្នកប្រារព្ធពិធីបុណ្យអ្វីខ្លះមកពីជុំវិញពិភពលោក ហើយតើប្រពៃណីពិសេសរបស់គ្រួសារអ្នកមានអ្វីខ្លះ ?
កម្មវិធីកម្រងអនុស្សាវរីយ៍នៃកម្មវិធីស្រាវជ្រាវក្រុមគ្រួសារ អាចជួយអ្នកកត់ត្រាប្រពៃណីគ្រួសាររបស់អ្នក នៅពេលដែលអ្នកកំពុងអបអរពិធីទាំងនោះ។ បង្កើតចំណងកាន់តែជ្រាលជ្រៅជាមួយគ្រួសារអតីតកាល បច្ចុប្បន្ន និងអនាគតរបស់អ្នក ដោយការរក្សាប្រពៃណីគ្រួសាររបស់អ្នកចេញពីថ្ងៃឈប់សម្រាកជុំវិញពិភពលោក ។
ស្វែងយល់បន្ថែមអំពីថ្ងៃឈប់សម្រាកនៅជុំវិញពិភពលោក
នៅ កម្មវិធីស្រាវជ្រាវក្រុមគ្រួសារ យើងយកចិត្តទុកដាក់លើការភ្ជាប់អ្នកទៅនឹងគ្រួសាររបស់អ្នក ហើយយើងផ្ដល់ជូននូវបទពិសោធន៍រុករកដ៏រីករាយ ព្រមទាំងសេវាកម្មពង្សប្រវត្តិដោយឥតគិតថ្លៃ ។ ហេតុអ្វី ? ព្រោះយើងឲ្យតម្លៃដល់ក្រុមគ្រួសារ ហើយជឿថា ការភ្ជាប់មនុស្សជាច្រើនជំនាន់អាចធ្វើឲ្យជីវិតរបស់យើងបានកាន់តែប្រសើរឡើងនាពេលឥឡូវនេះ និងជារៀងរហូតតទៅ ។ យើងគឺជាអង្គការដែលមិនស្វែងរកប្រាក់កម្រៃ ដោយទទួលបានការឧបត្ថម្ភពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដើម្បីរៀនបន្ថែមទៀតអំពីជំនឿរបស់យើង សូមចុចត្រង់នេះ ។
