Միավորման (merge) վերլուծություն․ նոր, մանրակրկիտ դիտում՝ Տոհմածառի միավորումների համար

FamilySearch-ն ունի նոր գործիք, որը, հուսով ենք, կբարելավի ձեր փորձառությունը՝ FamilySearch-ի Տոհմածառի միավորումների հետ կապված: Քանի որ միավորումն ազդում է 2 անձանց էջերի անունների, ամսաթվերի, վայրերի, աղբյուրների և կապերի վրա, միավորումների վերանայումը և շտկումը կարող է բարդ լինել: Միավորման վերլուծության նոր դիտումը թույլ է տալիս ավելի լավ հասկանալ յուրաքանչյուր միավորման նախքանը և հետոն: 

Ի՞նչ է Միավորման վերլուծության դիտումը

Նախքան միավորման վերլուծությունը հասանելի դառնալը, օգտվողները կարող էին տեսնել միայն պահպանվող և ջնջվող անձնական էջերի ամփոփումը միավորման մեջ, ինչպես նաև որոշ տեղեկություններ ստացվող փոփոխությունների մասին:

Միավորման վերլուծության նոր դիտումով այժմ կարող եք տեսնել միավորման մեջ ներգրավված յուրաքանչյուր անձի կենսական մանրամասները, աղբյուրները և կապերը՝ կողք կողքի: Դրա կողքին, «միավորվելուց հետո» բաժնում դուք կարող եք տեսնել տեղեկություններ պահպանված անձնական էջի համար:

Միավորման վերլուծության դիտումը նաև ունի «Սկզբնական ներդրումներ» բաժինը, որը ցույց է տալիս յուրաքանչյուր անհատի սկզբնական անունը, ստեղծման ամսաթիվը և ծննդյան տվյալները (եթե առկա է):

Ինչպես տեսնել միավորման վերլուծությունը

Դուք կարող եք գտնել միավորման վերլուծություն՝ նախ անցնելով Տոհմածառում անձի անձնական էջի վերջին փոփոխությունների ցանկին: Հետևեք այս քայլերին․

1. Տոհմածառում բացեք անձի անձնական էջը (նաև կոչվում է անձի էջ):
2. Աջ կողմում, «Վերջին փոփոխություններ»-ի տակ սեղմեք Ցույց տալ բոլորը:
3. Փնտրեք միավորում, և սեղմեք Միավորման վերլուծություն։

Միավորման վերլուծությունն այժմ հասանելի է բոլոր միավորումների համար, որոնք տեղի են ունեցել 2016 թ․ օգոստոսի 1-ից հետո: Միավորման վերլուծության դիտումը ներկայումս հասանելի է միայն FamilySearch.org կայքում, և ոչ բջջային հավելվածում:

Ինչպես շտկել սխալ միավորումները

Ինչպես նշվեց վերևում, միավորման վերլուծության դիտումը հիանալի միջոց է FamilySearch-ի օգտագործողների համար՝ տեսնելու, թե արդյոք միավորումը ճիշտ է կատարվել, թե՝ սխալ: Եթե միավորումը սխալ է կատարվել, խնդիրը շտկելու 2 եղանակ կա.

Կատարել պարզ հետդարձ (եթե առկա է)

Եթե միավորման ավարտից հետո փոփոխություններ չեն կատարվել, կարող եք ամբողջությամբ հետարկել միավորումը՝ երկու անձնական էջերը նախկինում եղածին վերականգնելու համար.

1. Անհատներից մեկի «Վերջին Փոփոխությունների» ցանկում սեղմեք Միավորման Վերլուծություն այն միավորման համար, որն ուզում եք հետարկել:
2. Սեղմեք Հետարկել միավորումը միավորման վերլուծության էկրանի վերին աջ մասում:

Ինչպես վերականգնել ջնջված անձնական էջը

Եթե միավորումից հետո կատարվել են փոփոխություններ, ապա «Հետարկել միավորումը» կոճակը անհասանելի կլինի։ Ջնջված անձին վերականգնելու համար հետևեք այս 3 քայլերին։

1. Անձնական էջերից մեկի համար «Վերջին փոփոխություններում» սեղմեք Միավորման Վերլուծություն այն միավորման համար, որն ուզում եք վերականգնել։
2. Սեղմեք ջնջված անձի անունը:
3. Սև վահանակի ներքևի աջ մասում, որտեղ երևում է, որ դուք դիտում եք ջնջված անձնական էջը, սեղմեք Վերականգնել անձին:

Նշում. Այս գործընթացը վերականգնում է ջնջված անձի անձնական էջը միավորումից առաջ եղած իր նախնական վիճակին, սակայն մյուս անձնական էջը պահպանում է միավորումից հետո կատարված բոլոր փոփոխությունները: Եթե այդ փոփոխություններից որոշը սխալ են, դրանք կարող են անհատապես շտկվել:

Տոհմածառի վրա միավորման և միավորման չեղարկման լավագույն եղանակները

Երբ միավորումը ճիշտ է, այն լուծում է կրկնօրինակների խնդիրը և կարող է նույնիսկ օգնել հարազատներին գտնել ընտանիքի լրացուցիչ անդամների և այլ տեղեկություններ: Բայց քանի որ սխալ միավորումները կարող են սխալ տեղեկություններ պարունակող խճճվածություն ստեղծել, ավելի լավ է խուսափել դրանցից ի սկզբանե: Ահա մի քանի եղանակներ, որոնք կարող են կանխել սխալ միավորումները․

Ստեղծեք անձնական էջեր, որոնք ճշգրիտ են և ողջամտորեն ամբողջական

Երբ անձնական էջ եք ավելացնում Տոհմածառին, ամեն ինչ արեք, որպեսզի տրամադրեք ճշգրիտ, ողջամտորեն ամբողջական տեղեկություններ: Սխալ միավորումները տեղի են ունենում առավել հաճախ այն անձնական էջերի հետ, որոնցում պակասում են կարևոր տեղեկություններ (օրինակ ՝ չկան ծննդյան մասին տեղեկություններ կամ աղբյուրներ)։ Որքան ավելի ամբողջական և ճշգրիտ է անձնական էջը, այնքան ավելի քիչ է հավանականությունը, որ այն սխալ կերպով միավորվի:

Ուշադիր ստուգել ամբողջ տեղեկությունը

Միավորման կամ սխալ միավորման շտկումը դիտարկելիս շատ ուշադիր նայեք 2 անձնական էջերի տեղեկություններին: Երկու անհատներ կարող են ունենալ նույն անունը, և նույնիսկ նույն ծննդյան վայրերը և ծննդյան տարեթվերը: Զարմանալիորեն, այդպես պատահու՛մ է։ Փնտրեք այնպիսի մանրամասներ, ինչպիսիք են նման կամ տարբեր կապերը, զբաղմունքները և աղբյուրները, որոնք կօգնեն ձեզ որոշել, թե արդյոք 2 էջերն էլ իսկապես ներկայացնում են նույն անձին: Եթե կասկածներ ունեք, ավելի լավ է չմիավորեք։

Վերականգնել պահպանված անձնական էջը սխալ միավորումից հետո (ըստ անհրաժեշտության)

Ինչպես նշվեց վերևում, երբ դուք վերականգնում եք սխալ միավորված անձնական էջը, բոլոր տեղեկությունները և աղբյուրները, որոնք ավելացվել են միավորման պահից, մնում են պահպանված անձնական էջում: Եթե տեղեկությունները և աղբյուրները սխալ են, Տոհմածառը կարող է ցույց տալ սխալ հուշումներ կրկնօրինակների համար, ինչը ավելի հավանական է դարձնում, որ սխալ միավորումը պիտի նորից կատարվի: Ժամանակ տրամադրեք բոլոր տեղեկություններն ու աղբյուրները ստուգելու համար, և ուղղեք բոլոր սխալները։

Թողեք լավ նշումներ և համագործակցեք ուրիշների հետ

Վերջապես, հիշեք, որ երբ դուք միավորում կամ հետարկում եք միավորումը, դուք համագործակցում եք մյուսների հետ Տոհմածառի վրա: Երբ փոփոխություններ եք կատարում, լավ է միշտ օգտակար պատճառի հայտարարություն ավելացնել։ Դուք կարող եք նաև օգտագործել նշումներ, զրուցարանի համակարգը և այլ գործիքներ հաղորդակցվելու համար: Զգուշացման նշումները հատկապես օգտակար են, երբ գործ ունեք ձեզ անհանգստացնող անձնական էջերի հետ, որոնք կարող են սխալ միավորվել:

Ինչպես կարծիք հայտնել

Մենք ցանկանում ենք շարունակել բարելավել միավորման վերլուծության դիտումը՝ օգնելու օգտագործողներին ավելի լավ հասկանալ և կառավարել Տոհմածառում կատարված փոփոխությունները և շնորհակալ կլինենք ձեր կարծիքի համար, երբ փորձեք այս նոր գործառույթը: Այցելեք FamilySearch համայնք ձեր կարծիքը մեզ հայտնելու համար։

FamilySearch-ը ձգտում է բարելավել համատեղ Տոհմածառը և կապել ձեզ ձեր ընտանիքի հետ: Հուսով ենք, հավանեցիք այս տեղեկությունը՝ նոր գործառույթի մասին։