Ընտանիքը կենտրոնական դեր ունի Աստծո ծրագրում

Երբևէ մտածե՞լ եք, թե ինչու են Վերջին Օրերի Սրբերը շարունակ շեշտում ընտանիքների կարևորությունը և դրանց դերը մեր հավատքում։ Ավելի հիմնարար բան չկա։ Ընտանիքները ազդում են մեր երջանկության, մեր համայնքների և մեզ վրա՝ նույնիսկ մահից հետո։ Ընտանիք․ Հայտարարություն աշխարհին հռչակագրում ասվում է, որ «ընտանիքն ամենակարևոր դերն ունի Արարչի ծրագրում՝ Իր զավակների հավերժական ճակատագրի համար» և որ «Ամուսինը և կինը սուրբ պատասխանատվություն են կրում սիրելու և հոգ տանելու միմյանց և երեխաների համար։ «Որդիները Տիրոջ ժառանգությունն են» (Սաղմոս 127.3)»: («Ընտանիք․ Հայտարարություն աշխարհին», ChurchofJesusChrist.org)։

Երեխաների միության «Զավակն եմ ես Աստծո» դասական երգը սովորեցնում է, որ երկրի վրա բոլորը Աստծո զավակներ են, դուք այստեղ եք ուղարկվել ընտանիքներով ապրելու, և դուք կարող եք վերադառնալ ապրելու Նրա հետ։

Զավակն եմ ես Աստծո,

Նա է ինձ կյանք տվել,

Տվել է ինձ տուն երկրային

Եվ ծնողներ բարի:

Առաջնորդիր, քայլիր ինձ հետ,

Որ ուղին գտնեմ:

Սովորեցրու՝ ինչ անել,

Որ մի օր Քեզ հասնեմ:

Ընտանիքների հավերժական բնույթը

Հաջորդ անգամ, երբ ձեր ընտանիքը հավաքվի, ուշադրություն դարձրեք առկա սրբազան զգացողությանը։ Բարության և կարեկցանքի զգացմունքները պետք է նպատակային լինեն։ Ընտանեկան կապերն էլ ավելի են ամրապնդվում քահանայության զորության միջոցով, երբ ընտանիքի անդամները միասին կնքվում են տաճարում ժամանակի և հավերժության համար։ Իր երկրային ծառայության ընթացքում Հիսուս Քրիստոսը Պետրոս առաքյալին տվեց զորություն, որ «ինչ որ երկրի վրա կապ[ի], կապված կլինի երկնքում» (Մատթեոս 16․19): Այս զորությունը, կրկին վերականգնվել է և կոչվում է կնքման զորություն։ Դա ընտանիքները հավերժ միավորելու իշխանությունն է, երբ այն գործադրվում է Աստծո լիազորված ներկայացուցիչների կողմից։

Ընտանիքները միասին կնքելու սրբազան գործողությունը կարող է կատարվել միայն Տիրոջ սուրբ տաճարներից մեկում։ Նախագահ Հենրի Բ. Այրինգն ասել է. «Կնքման ուխտերի շնորհիվ կարող ենք հաստատում ստանալ ընտանեկան նվիրական կապերի մասին, որոնք կշարունակվեն մահից հետո և կտևեն հավերժություն» (Լիահոնա, մայիս 2024)։

Երբևէ մտածե՞լ եք, թե ինչպիսին էին ձեր ընտանեկան կապերը մինչև երկիր գալը։ Ինչպե՞ս կտարբերվեր կյանքը, եթե դուք գայիք առանց ծնողների, քույրերի և եղբայրների կամ նախնիների։ Երկնային Հայրն ունի գիտելիք, որը վեր է մեր ըմբռնումից։ Նրա ծրագիրը մեզ հնարավորություն է տալիս պահպանել ընտանիքները գերեզմանից այն կողմ՝ սուրբ տաճարներում սրբազան արարողությունների միջոցով։ Ընտանիքները կարևոր դեր ունեն թե՛ այն բանում, որ անդամներն օգնում են միմյանց դիմակայել առօրյա կյանքի մարտահրավերներին, և թե՛ մեր հոգևոր առաջընթացի ուղղորդման գործում։

Ընտանիքները որպես սիրո և հոգևոր աճի դպրոց

Մորմոնի Գրքում ուսուցանվող առաջին դասերից մեկը սիրո և ընտանեկան կապի մասին է։ Լեքին տեսիլքում տեսավ կենաց ծառը, որը խորհրդանշում է «Աստծո սերը» (տես 1 Նեփի 11․21–22)։ Ծառի պտուղը խորհրդանշում է Քրիստոսի Քավության օրհնությունները։ Երբ Լեքին ճաշակեց պտղից, այն լցրեց նրա հոգին «չափազանց մեծ ուրախությամբ», և նա փափագեց կիսվել այդ ուրախությամբ իր ընտանիքի հետ (տես 1 Նեփի 8․11-12): Երբ դուք կենտրոնանաք ձեր ընտանեկան հարաբերությունների և նախնիների հետ կապերի վրա, կկարողանաք կիսվել այն «պտուղով», որով Լեքին էր ցանկանում կիսվել իր և ձեր ընտանիքի հետ։

Ընտանիքները կատարյալ միջավայր են Հիսուս Քրիստոսի ավետարանը սովորեցնելու և դրանով ապրելու համար։ «Ծնողների սուրբ պարտականությունն է՝ դաստիարակել երեխաներին սիրո և առաքինության մթնոլորտում, ապահովել նրանց նյութական և հոգևոր կարիքները, ուսուցանել նրանց սիրել և ծառայել մեկը մյուսին, պահել Աստծո պատվիրանները և օրինապաշտ քաղաքացիներ լինել, որտեղ էլ որ ապրեն» («Ընտանիք. Հայտարարություն աշխարհին», ChurchofJesusChrist.org): Երբ քրիստոսակենտրոն երջանկությունը մեր ուշադրության կենտրոնում է, տունն ու ընտանիքը դառնում են հոգևորության և սիրո լավագույն աղբյուրները։

Ընտանիքներում դուք կարող եք սովորել դրսևորել սեր, ներողամտություն և համբերություն։ Անառակ որդու պատմության մեջ ավագ եղբայրը չէր ուզում տոնել կրտսեր եղբոր վերադարձը։ Ընտանիքներում դուք հաճախ կարիք կունենաք միմյանցից ներողություն խնդրելու։ Նախագահ Ջեֆրի Ռ. Հոլլանդը բացատրել է․ «Թույլ տվեք, որ մարդիկ ապաշխարեն։ Թույլ տվեք, որ նրանք աճեն։ Հավատացեք, որ մարդիկ կարող են փոխվել և բարելավվել»։ (“‘Remember Lot’s Wife’: Faith Is for the Future” [Բրիգամ Յանգի Համալսարանի հոգևոր հավաք, 13 հունվար 2009 թ․], speeches.byu.edu)

Ընտանեկան աղոթքը հիանալի միջոց է, որը մտերմացնում է ընտանիքի անդամներին։ Ընտանեկան աղոթքն այնքան կարևոր է, որ երբ Հիսուս Քրիստոսը այցելեց նեփիացիներին, նա պատվիրեց նրանց. «Աղոթեք Հորը ձեր ընտանիքներում, միշտ իմ անունով, որպեսզի ձեր կանայք և ձեր զավակները կարողանան օրհնվել» (3 Նեփի 18․21): Ընտանեկան աղոթքների ժամանակ դուք նաև կիմանաք միմյանց կոնկրետ մտահոգությունները և կարիքներին ծանոթ կլինեք։ Կարող եք նաև փորձել աղոթելուց առաջ մի պահ հատկացնել՝ միմյանց հիշեցնելու համար, թե ինչի և ում համար եք աղոթելու։ Դիտեք “Family Prayer isn’t Just for Praying" տեսանյութը այն մասին, թե ինչպես է աղոթում մի ընտանիք։ (Նշում. Այս տեսանյութը ձայնագրվել է անգլերենով, սակայն YouTube-ի ավտոմատ թարգմանությամբ հասանելի է տարբեր լեզուներով։)

Սուրբ գրությունների ուսումնասիրությունը, Եկ, հետևիր ինձ դասերը, գերագույն համաժողովի ելույթները կամ հոգևոր երաժշտությունը «Քրիստոսի խոսքերով [սնվելու]» եղանակներ են (2 Նեփի 32․3): Երբ դուք «սնվում եք» այս խոսքերով, կարող եք մխիթարել, ուղղորդել ընտանիքի անդամներին և օգնել միմյանց լուծել խնդիրները։ «Քրիստոսի խոսքերը կասեն ձեզ բոլոր բաները, որ դուք պետք է անեք» (2 Նեփի 32․3)։

Այս տեսանյութում Ժոան կիսվում է մի հուզիչ պատմությամբ այն մասին, թե ինչպես է իր ընտանիքը ամրապնդվել նորածին եղբոր վաղաժամ մահից հետո։ Մահը խոր ազդեցություն էր ունեցել նրա ընտանիքի վրա։ Եկեղեցու տեղական ղեկավարների օգնությամբ և աջակցությամբ նրա ծնողներն ու ընտանիքը կնքվեցին միասին տաճարում։ Դա շատ յուրահատուկ պահ էր բոլորի համար։ «Մենք բազմիցս զգացել ենք եղբորս ներկայությունը մեր կողքին։ Անձամբ ես զգացել եմ նրա ներկայությունը։ Շատ լավ է մտածել, որ եղբայր ունեմ. ես դա զգում եմ։ Նա ընտանիքի անդամ է, և՝ միշտ է եղել»։

Երբ ձգտում եք սկսել ձեր ընտանեկան պատմության ոգեշնչող ճամփորդությունը, մտածեք բոլոր այն ընտանիքների մասին, որոնք ապրել են ձեզանից առաջ։ Մտածեք այն աշխատանքի մասին, որը նրանք կատարել են տարիների ընթացքում՝ իրենց ընտանիքները ֆիզիկապես և հոգևորապես անվտանգ և պաշտպանված պահելու համար։ Մտածեք այն զոհաբերությունների մասին, որոնք նրանք կատարել են՝ գրանցումներ պահպանելու, իրենց երեխաներին սովորեցնելու և դժվարությունների առաջ ուժեղ մնալու համար։

Մինչ դուք ձգտում եք կապ հաստատել այս ընտանիքի անդամների հետ տաճարային և ընտանեկան պատմության աշխատանքի միջոցով, ապավինեք նրանց ուժին, հավատքին և քաջությանը, որպեսզի օգնեն ձեզ ճանապարհին։ Երբ կիսվեք ընտանիքի անդամների հետ ձեր փորձով, դա կօրհնի և կոգեշնչի նրանց մասնակցել այդ աշխատանքին։ Երեց Քվենթին Լ. Քուքը խոստացել է, որ եթե դուք «օգնեք նրանց, ովքեր չեն կարող օգնել իրենց, ապա կօրհնվեք ավելի մեծ մտերմությամբ և ուրախությամբ ձեր ընտանիքում» (Ensign, փետրվար 2016):